Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Numbers 18;1-32

18  Ndien Jehovah ọdọhọ Aaron ete: “Afo ye nditọiren fo ye ufọk usọ ẹyebiom ndudue emi ẹnamde ẹdian edisana ebiet,+ afo ye nditọiren fo ẹyenyụn̄ ẹbiom ndudue emi ẹnamde ẹdian itie oku mbufo.+  Ndien da nditọusọ eke esien Levi, ekpụk usọ, dian idem, man mmọ ẹdiana ye afo ẹnyụn̄ ẹnam n̄kpọ ẹnọ fi+ ye nditọ fo emi ẹdude ye afo, ke iso tent Ntiense.+  Ndien mmọ ẹnyene ndinam n̄kpọ nnọ fi nnyụn̄ nnam utom mmọ ke ofụri tent.+ Yak mmọ ẹkûkam ẹsan̄a ẹkpere n̄kpoduoho edisana ebiet ye itieuwa mbak mmọ ẹdikpan̄a,+ oro edi, mmọ ye mbufo.  Ndien mmọ ẹyediana ye afo ẹnyụn̄ ẹnam utom mmọ ke tent usopidem kaban̄a kpukpru utom tent, owo efen inyụn̄ inyeneke ndisan̄a n̄kpere mbufo.+  Ndien mbufo ẹnyene ndinam utom mbufo ke edisana ebiet+ ye utom mbufo ke itieuwa,+ mbak nditọn̄ọ ntak nyat esịt+ ye nditọ Israel.  Ndien sese! mmosio nditọete mbufo, nditọ Levi, ke otu nditọ Israel,+ nnọ mbufo nte enọ,+ nte mbon oro ẹyakde ẹnọ Jehovah ndinam utom tent usopidem.+  Ndien afo ye nditọiren fo emi ẹdude ye afo ẹnyene ndikpeme itie oku mbufo nnyụn̄ nse mban̄a kpukpru utom itieuwa ye se idude ke esịt ikpehe;+ mbufo ẹnyụn̄ ẹnyene ndinam utom.+ Mmada utom itie oku nnọ mbufo nte enọ, ndien ẹnyene ndiwot owo efen ekededi emi asan̄ade ekpere.”+  Ndien Jehovah ọdọhọ Aaron ete: “Amaedi ami, sese! mmọnọ fi odudu ndise mban̄a mme etịbe oro ẹtịpde ẹnọ mi.+ Mmada ubak ndisana n̄kpọ emi nditọ Israel ẹnọde nnọ fi ye nditọiren fo, nte nsinsi udeme.+  Emi edinyene fi ke otu ata ndisana n̄kpọ, ke otu uwa emi ẹfọpde ke ikan̄, kpukpru uwa mmọ ọkọrọ ye kpukpru uwa n̄kpasịp+ mmọ ye kpukpru uwa idiọkn̄kpọ+ mmọ ye kpukpru uwa ubiomikpe+ mmọ, emi mmọ ẹdidade ẹsọk mi. Emi edi ata edisana n̄kpọ ọnọ fi ye nditọiren fo. 10  Afo edita enye ke ata edisana ebiet.+ Kpukpru irenowo ẹdita enye.+ Emi edidi ata edisana n̄kpọ ọnọ fi.+ 11  Ndien emi edinyene fi: se ẹsiode ke otu enọ emi mmọ ẹtịpde+ ẹda ẹdi ọkọrọ ye kpukpru edifụn̄ uwa+ nditọ Israel. Mmada mmọ nnọ fi ye nditọiren fo ye nditọiban fo emi ẹdude ye afo,+ nte nsinsi udeme. Kpukpru owo emi ẹsanade ke ufọk fo ẹkeme ndita enye.+ 12  “Kpukpru mfọnn̄kan aran ye kpukpru mfọnn̄kan obufa wine ye wheat,* akpa mbun̄wụm+ mmọ, emi mmọ ẹdinọde Jehovah, mmada mmọ nnọ fi.+ 13  Akpa mfri eke ẹdatde ke otu kpukpru se idude ke isọn̄ mmọ, emi mmọ ẹdidade ẹsọk Jehovah, ẹdinyene fi.+ Kpukpru owo emi ẹsanade ke ufọk fo ẹkeme ndidia. 14  “Kpukpru n̄kpọ emi ẹyakde ẹnọ ke Israel ẹdinyene fi.+ 15  “Kpukpru se isịrerede itie eyen,+ ke otu kpukpru obụkidem, emi mmọ ẹdinọde Jehovah, ke owo ye ke unam, ẹdinyene fi. Edi afo kûtre ndifak akpan ke otu owo;+ afo onyụn̄ enyene ndifak akpa eyen unam eke edehede.+ 16  Ndien afo enyene ndifak enye ke ekọmurua ufak ọtọn̄ọde ke eyen ọfiọn̄ kiet dọk, ke ekọmurua oro ẹkenịmde, shekel silver ition ke shekel edisana ebiet.+ Emi edi gerah edịp.+ 17  Sụk akpa eyen enan̄ m̀mê akpa ayara eyenerọn̄ m̀mê akpa eyen ebot ke afo mûdufakke.+ Mmọ ẹdi edisana. Afo enyene ndisịme iyịp+ mmọ ke itieuwa, onyụn̄ ọfọp ikpọn̄ mmọ nte uwa emi ẹfọpde ke ikan̄ man osio edinem utebe ọnọ Jehovah.+ 18  Ndien obụk mmọ edinyene fi. Ukem nte ikọn̄esịt edifụn̄ uwa ye ukot nnasia, enye edinyene fi.+ 19  Mmada kpukpru ndisana etịbe,+ emi nditọ Israel ẹdinọde Jehovah, nnọ fi ye nditọiren fo ye nditọiban fo emi ẹdude ye afo, nte nsinsi udeme.+ Emi edi ediomi inụn̄ ke nsinsi ke iso Jehovah ọnọ fi ye nditọ fo emi ẹdude ye afo.”+ 20  Ndien Jehovah ọdọhọ Aaron ete: “Afo udunyeneke n̄kpọ-akpa ke isọn̄ mmọ, udunyụn̄ unyeneke udeme ke otu mmọ.+ Ami ndi udeme fo ye n̄kpọ-akpa fo ke otu nditọ Israel.+ 21  “Ndien sese! mmada ọyọhọ mbak duop+ ke Israel nnọ nditọ Levi nte udeme mmọ ke utom emi mmọ ẹnamde, kpa utom tent usopidem. 22  Ndien nditọ Israel inyeneke ndisan̄a aba n̄kpere tent usopidem mbak ẹdidue isop idiọkn̄kpọ ẹnyụn̄ ẹkpan̄a.+ 23  Ndien nditọ Levi ẹnyene ndinam utom tent usopidem, onyụn̄ edi mmọ ẹdibiom ndudue mmọ.+ Emi edi nsinsi ewụhọ ke ofụri emana mbufo nte ke mmọ idinyeneke udeme ke otu nditọ Israel.+ 24  Koro mmada ọyọhọ mbak duop emi nditọ Israel ẹditịpde ẹnọ Jehovah nte etịbe nnọ nditọ Levi nte udeme mmọ. Ntak edi oro ndọhọde nte, ‘Mmọ idinyeneke udeme ke otu nditọ Israel.’”+ 25  Ekem Jehovah ọdọhọ Moses ete: 26  “Dọhọ nditọ Levi ete, ‘Mbufo ẹnyene ndibọ nditọ Israel ọyọhọ mbak duop oro mbọde mmọ nnọ mbufo nte udeme mbufo,+ mbufo ẹnyụn̄ ẹnyene ndisio ọyọhọ mbak duop ke ọyọhọ mbak duop+ oro nnọ nte etịbe Jehovah. 27  Ndien ẹyebat emi ẹnọ mbufo ke etịbe mbufo, nte wheat emi otode ke ọtọ udịghi wheat+ ye nte ofụri se itode ke obube unyịmi wine m̀mê ọtọ unyịmi aran. 28  Ntem ke mbufo n̄ko ẹdisio etịbe ke kpukpru ọyọhọ mbak duop, emi mbufo ẹdibọde nditọ Israel, ẹnọ Jehovah, mbufo ẹdinyụn̄ ẹda mmọ ẹnọ Aaron oku nte etịbe Jehovah. 29  Ke kpukpru enọ emi ẹnọde mbufo, mbufo ẹyetịp kpukpru orụk etịbe ẹnọ Jehovah, ke otu se ifọnde ikan,+ nte edisana n̄kpọ ke otu mmọ.’ 30  “Nyụn̄ dọhọ mmọ ete, ‘Ke ini mbufo ẹnọde se ifọnde ikan ke otu mmọ,+ do ẹyebat enye ẹnọ nditọ Levi nte se itode ke ọtọ udịghi wheat ye nte se itode ke obube unyịmi wine m̀mê ọtọ unyịmi aran. 31  Ndien mbufo ẹdita enye ke kpukpru ebiet, mbufo ye mbonufọk mbufo, koro emi edi utịp mbufo ke utom emi mbufo ẹnamde ke tent usopidem.+ 32  Ndien mbufo ididuehe isop ke ini mbufo ẹsiode se ifọnde ikan ke otu mmọ ẹnọ, mbufo inyụn̄ inyeneke ndisabade ndisana n̄kpọ nditọ Israel, mbak mbufo ẹdikpan̄a.’”+

Mme Ikọ Idakisọn̄

Mîdịghe, emi ekeme ndidi “barley.”