Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Numbers 16;1-50

16  Ekem Korah+ eyen Izhar,+ eyen Kohath,+ eyen Levi,+ adaha ke enyọn̄, ọkọrọ ye Dathan+ ye Abiram+ nditọ Eliab,+ ye On eyen Peleth, nditọ Reuben.+  Ndien mmọ ẹdaha ke enyọn̄ ke iso Moses, mmọ ye owo ikie iba ye aba ye duop ke otu nditọ Israel, kpa mbọn̄ esop, mbon emi ẹsikotde ẹdi mbono, mbon etop.  Ntre mmọ ẹsop idem ọtọkiet ẹnam ikọ+ ye Moses ye Aaron ẹnyụn̄ ẹdọhọ mmọ ẹte: “Ekem mbufo adan̄aoro, koro ofụri esop emi ẹdi edisana,+ Jehovah onyụn̄ odu ke otu mmọ.+ Ntak, ndien, mbufo ẹmenerede idem mbufo ke enyọn̄ ẹkan esop Jehovah?”+  Ke ini Moses okopde emi, enye ọduọ ekịbi iso esie ke isọn̄.  Ekem enye ọdọhọ Korah ye ofụri esop esie ete: “Eyo ama esiere Jehovah ayanam ẹfiọk m̀mê anie edi owo esie+ ye owo emi edide edisana+ ye owo emi anade asan̄a ekpere enye,+ ndien owo ekededi emi enye edimekde+ ayasan̄a ekpere enye.  Ẹnam ntem: Afo Korah ye ofụri esop+ fo, ẹda n̄kpọ ufọp incense+ mbufo ẹdi,  ẹnyụn̄ ẹsịn ikan̄ ke esịt ẹnyụn̄ ẹdori incense ke esịt ke iso Jehovah n̄kpọn̄, ndien ama ekem owo emi Jehovah edimekde,+ enye edidi edisana owo. Yak ekem mbufo adan̄aoro, mbufo nditọ Levi!”+  Ndien Moses ọdọhọ Korah ete: “Mbọk, ẹkpan̄ utọn̄, mbufo nditọ Levi.  Nte edi ekpri n̄kpọ ke enyịn mbufo Abasi Israel ndidian̄ade+ mbufo ke otu esop Israel nnịm nnọ idemesie ete mbufo ẹnam utom tent utuakibuot Jehovah ẹnyụn̄ ẹda ke iso esop ẹnam n̄kpọ ẹnọ mmọ,+ 10  onyụn̄ adade fi ye kpukpru nditọete fo, kpa nditọ Levi, adian idem? Ntre nte mbufo ẹyom ndibọ n̄ko itie oku nda?+ 11  Oro esịn afo ye ofụri esop fo ẹsop idem ẹn̄wana ye Jehovah.+ Amaedi Aaron, enye edi anie eke mbufo ẹsụkde enye uyo?”+ 12  Ekem Moses ọdọn̄ ẹkekot Dathan ye Abiram+ nditọ Eliab ẹdi, edi mmọ ẹdọhọ ẹte: “Nnyịn ididịghe!+ 13  Nte edi ekpri n̄kpọ afo ndida nnyịn n̄wọrọ ke isọn̄ emi ọfiọrọde mmọn̄eba ye aranọkwọk ndi ndiwot ke wilderness,+ nnyụn̄ nnịm idem ke ọbọn̄ nnyịn?+ 14  Afo unyụn̄ udaha nnyịn udụk isọn̄ ekededi emi ọfiọrọde mmọn̄eba ye aranọkwọk,+ man ọnọ nnyịn udeme isọn̄ ye in̄wan̄ vine. Nte afo oyom nditịbi mbio emi enyịn? Nnyịn ididịghe!” 15  Ndien Moses ayat esịt etieti onyụn̄ ọdọhọ Jehovah ete: “Kûwọn̄ọde enyịn use uwa n̄kpasịp mmọ.+ N̄kọbọhọ mmọ baba ayara ass kiet, n̄konyụn̄ nnamke baba owo mmọ kiet idiọk.”+ 16  Ekem Moses ọdọhọ Korah ete:+ “Afo ye kpukpru mbon esop fo, ẹdi ke iso Jehovah+ n̄kpọn̄, afo ye mmọ ye Aaron. 17  Yak owo kiet kiet onyụn̄ ada n̄kpọ ufọp incense esie edi, mbufo ẹnyụn̄ ẹdori incense ke esịt, owo kiet kiet onyụn̄ ada n̄kpọ ufọp incense esie edi ke iso Jehovah, n̄kpọ ufọp incense ikie iba ye aba ye duop, afo ye Aaron ẹnyụn̄ ẹda n̄kpọ ufọp incense mbufo ẹdi.” 18  Ntre mmọ ẹda n̄kpọ ufọp incense mmọ ẹdi ẹnyụn̄ ẹsịn ikan̄ ke esịt ẹnyụn̄ ẹdori incense ke esịt ẹnyụn̄ ẹdida ye Moses ye Aaron ke enyịnusụn̄ tent usopidem. 19  Ke ini Korah ama okosop ofụri esop+ ama ke enyịnusụn̄ tent usopidem ndinam ikọ ye mmọ, ubọn̄ Jehovah ọbiọn̄ọde ke iso ofụri esop.+ 20  Ekem Jehovah ọdọhọ Moses ye Aaron ete: 21  “Mbufo ẹdian̄ade+ ẹkpọn̄ esop emi, koro mmọn̄ nsobo+ mmọ mfep ini kiet.” 22  Ntre mmọ ẹduọ ẹkịbi iso mmọ ke isọn̄ ẹnyụn̄ ẹdọhọ ẹte: “O Abasi, kpa Abasi spirit kpukpru obụkidem,+ ndi idiọkn̄kpọ owo kiet kpọt edinam fi ayat esịt ye ofụri esop?”+ 23  Ntre Jehovah ọdọhọ Moses ete: 24  “Dọhọ ofụri esop emi ete, ‘Ẹdan̄a ke mbọhọ tent Korah ye Dathan ye Abiram!’”+ 25  Ekem Moses adaha ke enyọn̄ aka ọtọ Dathan ye Abiram, mbiowo+ Israel ẹnyụn̄ ẹtiene enye. 26  Ndien enye ọdọhọ ofụri esop ete: “Mbọk, mbufo ẹdaha ke mbọhọ tent mme idiọkowo emi, ẹkûnyụn̄ ẹtụk n̄kpọ baba kiet eke ẹnyenede mmọ,+ mbak ẹdisobo mbufo ẹfep ke ntak idiọkn̄kpọ mmọ.” 27  Kpa idaha oro, mmọ ẹdaha ke mbọhọ tent Korah ye Dathan ye Abiram, Dathan ye Abiram ẹnyụn̄ ẹwọn̄ọ ẹdida ke enyịnusụn̄ tent mmọ,+ ẹsan̄a ye iban mmọ ye nditọiren mmọ ye n̄kpri nditọ mmọ. 28  Ekem Moses ọdọhọ ete: “Mbufo ẹyeda emi ẹfiọk ẹte ke Jehovah ọkọdọn̄ mi ete ndinam kpukpru n̄kpọ emi,+ ndịghe ke odudu idemmi:+ 29  Edieke mbon emi ẹdikpan̄ade nte kpukpru owo ẹsikpade, m̀mê ẹbọde ufen nte kpukpru owo ẹsibọde,+ do idịghe Jehovah ọkọdọn̄ mi utom.+ 30  Edi edieke Jehovah edinamde utịben̄kpọ,+ ndien isọn̄ atat inua emen mmọ+ ye kpukpru se inyenede mmọ, mmọ ẹnyụn̄ ẹsụhọde ke Udi*+ ye uwem, do mbufo ẹyefiọk ẹte ke mbon emi ẹma ẹnam n̄kpọ ye Jehovah ke unana ukpono.”+ 31  Edikem ke ndondo oro enye etịn̄de ikọ emi ama, isọn̄ oro mmọ ẹdade asiaha.+ 32  Ndien isọn̄ atat inua emen mmọ ye ofụri ufọk mmọ ye kpukpru ikọt Korah ye inyene mmọ.+ 33  Ntre ke mmọ ye kpukpru ikọt mmọ ẹsụhọde ke Udi* ye uwem, isọn̄ onyụn̄ ofụk mmọ,+ ndien mmọ ẹkpan̄a ke otu mbon esop.+ 34  Ndien kpukpru nditọ Israel emi ẹkekande mmọ ẹkụk ẹfen̄e ke ini ẹkopde mfiori mmọ, ẹnyụn̄ ẹdọhọ ẹte: “Ndịk anam nnyịn m̀mê isọn̄ eyemen nnyịn n̄ko!”+ 35  Ndien ikan̄ oto Jehovah+ edita owo ikie iba ye aba ye duop emi ẹkefọpde incense.+ 36  Ekem Jehovah ọdọhọ Moses ete: 37  “Dọhọ Eleazar eyen Aaron oku ete enye osio n̄kpọ ufọp incense+ ke esịt ikan̄ oro, ‘Nyụn̄ n̄wan̄a ikan̄ oro duọk ke ebiet oro; koro mmọ ẹdi edisana, 38  kpa mme n̄kpọ ufọp incense mbon oro ẹnamde idiọkn̄kpọ ẹdue ukpọn̄ mmọ.+ Ndien mmọ ẹnyene nditara mmọ nda nnam mbat mbat n̄kpọ ndida mfụk itieuwa,+ koro mmọ ẹkedade mmọ ẹdi ke iso Jehovah, oro esịn mmọ ẹdi edisana; mmọ ẹdinyụn̄ ẹdi idiọn̄ọ ẹnọ nditọ Israel.’”+ 39  Ntre Eleazar oku ada mme n̄kpọ ufọp incense+ okpoho oro, emi mbon oro ikan̄ akatade ẹkedade ẹdi, mmọ ẹnyụn̄ ẹtara mmọ ẹda ẹnam n̄kpọ ndida mfụk itieuwa, 40  nte n̄kpọ nditi nditọ Israel, mbak owo efen+ emi mîtoho ke ubon Aaron edisan̄a ekpere ete ifọp incense ke iso Jehovah,+ mbak owo edinyụn̄ etie nte Korah ye ofụri esop esie,+ kpa nte Jehovah akadade Moses asian enye. 41  Ndien ke ndan̄nsiere ofụri esop nditọ Israel ẹtọn̄ọ ndisụk Moses ye Aaron uyo,+ ẹte: “Mbufo ẹmewot ikọt Jehovah.” 42  Edikem ke ini ofụri esop ẹsopde idem ndinam ikọ ye Moses ye Aaron, mmọ ẹwọn̄ọde ẹse tent usopidem; ndien, sese! obubịt enyọn̄ ofụk enye, ubọn̄ Jehovah onyụn̄ ọbiọn̄ọde.+ 43  Ndien Moses ye Aaron ẹdi ke iso tent usopidem.+ 44  Ekem Jehovah ọdọhọ Moses ete: 45  “Mbufo ẹwọn̄ọ ke otu esop emi, man n̄kposobo mmọ mfep ini kiet.”+ Ntre mmọ ẹduọ ẹkịbi iso mmọ ke isọn̄.+ 46  Ekem Moses ọdọhọ Aaron ete: “Da n̄kpọ ufọp incense nyụn̄ sio ikan̄ ke itieuwa sịn ke esịt+ nyụn̄ dori incense ndien wọrọ iwiwa ka bịne mbon esop kosio isop nọ mmọ,+ koro Jehovah amayat esịt ye mmọ.+ Ufen ọmọtọn̄ọ!” 47  Kpa idaha oro, Aaron ada n̄kpọ ufọp incense, kpa nte Moses ọkọdọhọde, onyụn̄ efehe odụk otu mbon esop; ndien, sese! ufen ama ọtọtọn̄ọ ke otu mbio oro. Ntre enye esịn incense onyụn̄ ọtọn̄ọ ndisio isop nnọ mmọ. 48  Ndien enye ada ke ufọt mbon oro ẹkpan̄ade ye mme odu-uwem.+ Ekem ufen oro etre.+ 49  Ndien mbon oro ẹkpan̄ade ke ufen oro ẹsịm owo tọsịn duopenan̄ ikie itiaba, owo ibatke mbon oro ẹkekpan̄ade ke ntak Korah. 50  Etisịm ini emi Aaron afiakde etiene Moses ke enyịnusụn̄ tent usopidem, ufen oro ama etetre.

Mme Ikọ Idakisọn̄

Heb., “Sheol.” Se N̄w. Ik. 5.
Heb., “Sheol.”