Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Numbers 15;1-41

15  Ndien Jehovah ọdọhọ Moses ete:  “Dọhọ nditọ Israel ete, ‘Ke ini mbufo ẹdide ẹdisịm isọn̄ emi mbufo ẹdidụn̄de, emi nnọde mbufo,+  ẹnyụn̄ ẹyomde ndiwa uwa emi ẹfọpde ke ikan̄ ẹnọ Jehovah,+ edifọp uwa+ m̀mê uwa ndida nnam san̄asan̄a akan̄a m̀mê eke unyịmesịt+ m̀mê ke ini usọrọ mbufo emi ẹnịmde ke ini ke ini,+ man osio edinem utebe ọnọ Jehovah,+ edide enan̄ m̀mê erọn̄;  owo emi adade uwa esie edi enyene n̄ko ndinọ Jehovah uwa n̄kpasịp emi edide eti ndomuyo,+ mbahade ephah kiet ke itie duop emi ẹdade ẹbuak ye aran emi edide mbahade hin kiet ke itie inan̄.  Afo onyụn̄ enyene ndinọ wine nte edin̄wọn̄ uwa,+ mbahade hin kiet ke itie inan̄, ndian ye edifọp uwa oro m̀mê ayara eyenerọn̄ kiet kiet oro ẹwade.  Edieke edide okukịm erọn̄, afo enyene ndiwa uwa n̄kpasịp emi edide eti ndomuyo, mbahade iba ke itie duop, emi ẹdade ẹbuak ye aran emi edide mbahade hin kiet ke itie ita.  Afo onyụn̄ enyene ndinọ wine nte edin̄wọn̄ uwa, mbahade hin kiet ke itie ita, man osio edinem utebe ọnọ Jehovah.  “‘Edi edieke afo awade ayara enan̄ nte edifọp uwa+ m̀mê uwa ndida nnam san̄asan̄a akan̄a+ m̀mê uwa ebuana ọnọ Jehovah,+  afo enyene ndinọ n̄ko uwa n̄kpasịp+ emi edide eti ndomuyo, mbahade ita ke itie duop, emi ẹdade ẹbuak ye aran emi ẹdide ubak hin kiet, ndian ye ayara enan̄ oro. 10  Afo onyụn̄ enyene ndinọ wine nte edin̄wọn̄ uwa,+ ubak hin kiet, nte uwa emi ẹfọpde ke ikan̄, man osio edinem utebe ọnọ Jehovah. 11  Ntem ke ẹnyene ndinam ye enan̄ kiet kiet m̀mê okukịm erọn̄ kiet kiet m̀mê ayara eyenerọn̄ m̀mê eyen ebot. 12  Se ededi ibat unam emi mbufo ẹdiwade, ntem ke mbufo ẹdinam ye mmọ kiet kiet, nte ibat mmọ edide. 13  Kpukpru amanaisọn̄ ẹnyene ndiwa mmọ ntem ke ini ẹwade uwa emi ẹfọpde ke ikan̄, man osio edinem utebe ọnọ Jehovah.+ 14  “‘Ndien edieke esenowo odụn̄de ye mbufo m̀mê owo odude ye mbufo ke ediwak emana, onyụn̄ oyomde ndiwa uwa emi ẹfọpde ke ikan̄, man osio edinem utebe ọnọ Jehovah, nte mbufo ẹnamde, kpa ntre ke enye edinam.+ 15  Mbufo emi ẹdide mbon esop ye esenowo emi odụn̄de ye mbufo ẹdinyene ewụhọ+ kiet. Emi edidi nsinsi ewụhọ ke ofụri emana mbufo. Esenowo edidi ukem ye mbufo ke iso Jehovah.+ 16  Ibet kiet ye ubiereikpe kiet ẹdidu ọnọ mbufo ye esenowo emi odụn̄de ye mbufo.’”+ 17  Ndien Jehovah ọdọhọ Moses ete: 18  “Dọhọ nditọ Israel ete, ‘Ke ini mbufo ẹdidide ẹdisịm ebiet emi nnọde mbufo,+ 19  ama ekem ke ini mbufo ẹdidiade udia ekededi eke otode ke isọn̄ oro,+ mbufo ẹnyene ndida etịbe nsọk Jehovah. 20  Mbufo ẹnyene nditịp akpa mbun̄wụm+ wheat mbufo emi ẹkọkde nnọ ẹda ẹnam ekara uyo. Mbufo ẹdinọ enye nte etịbe eke otode ke ọtọ udịghi wheat. 21  Mbufo ẹnyene ndida ndusụk ke otu akpa mbun̄wụm wheat mbufo emi ẹkọkde nsọk Jehovah nte etịbe ke ofụri emana mbufo. 22  “‘Ndien edieke mbufo ẹdinamde ndudue mînyụn̄ inamke kpukpru mme ewụhọ+ emi Jehovah eketemede Moses, 23  kpukpru se Jehovah akadade Moses eteme mbufo ọtọn̄ọde ke usen emi Jehovah ọkọnọde ewụhọ tutu esịm ofụri emana mbufo ke ini iso, 24  ndien edieke ẹdide ke ndudue, ofụri esop mînyụn̄ ifiọkke, ofụri esop ndien ẹnyene ndiwa abak ayara enan̄ kiet nte edifọp uwa man osio edinem utebe ọnọ Jehovah, ye uwa n̄kpasịp ye edin̄wọn̄ uwa nte ẹkam ẹsinamde,+ ye eyen ebot kiet nte uwa idiọkn̄kpọ.+ 25  Ndien oku enyene ndisio isop+ nnọ ofụri esop nditọ Israel, ndien ẹyefen mmọ; koro ekedide ndudue,+ mmọ ẹkenyụn̄ ẹdade uwa mmọ ẹdi nte uwa emi ẹfọpde ke ikan̄ ẹnọ Jehovah ye uwa idiọkn̄kpọ mmọ ke iso Jehovah kaban̄a ndudue mmọ. 26  Ndien ẹyefen+ ofụri esop nditọ Israel ye esenowo emi odụn̄de ke otu mmọ, koro ekedi ndudue ofụri owo. 27  “‘Ndien edieke ukpọn̄ ekededi anamde idiọkn̄kpọ ke ndudue,+ enye enyene ndinọ uman ebot isua kiet ke uwa idiọkn̄kpọ.+ 28  Oku enyene ndisio isop nnọ ukpọn̄ emi anamde idiọkn̄kpọ ke ndudue, ke iso Jehovah, nnyụn̄ nsio isop idiọkn̄kpọ oro, ndien ẹyefen enye.+ 29  Amaedi amanaisọn̄ ke otu nditọ Israel ye esenowo emi odụn̄de ke otu mmọ, ibet kiet edidu ọnọ mbufo ke ini owo anamde idiọkn̄kpọ ke ndudue.+ 30  “‘Edi amaedi ukpọn̄ emi okoide-koi+ anam idiọkn̄kpọ, edide amanaisọn̄ m̀mê esenowo, onyụn̄ osụn̄ide Jehovah,+ ẹnyene ndisịbe ukpọn̄ oro mfep ke otu mbio obio esie.+ 31  Koro enye esede ikọ Jehovah ke ndek+ onyụn̄ abiatde ibet esie,+ ẹkûtre ndisịbe ukpọn̄ oro mfep.+ Ndudue esie oyodoro enye ke ibuot.’”+ 32  Ke adan̄aemi nditọ Israel ẹsụk ẹdude ke wilderness, mmọ ẹkụt eren kiet nte atan̄de ifia ke usen sabbath.+ 33  Ndien mbon oro ẹkekụtde enye atan̄de ifia ẹda enye ẹka iso Moses ye Aaron ye ofụri esop. 34  Ntre mmọ ẹsịn enye ke ufọk-ukpeme,+ koro owo mîketịn̄ke in̄wan̄-in̄wan̄ se ẹkpenamde enye. 35  Ekem Jehovah ọdọhọ Moses ete: “Ẹkûtre ndiwot owo oro,+ ofụri esop ẹnyene nditọn̄ọ enye ke itiat n̄wot ke edem itienna.”+ 36  Ntre ofụri esop ẹda enye ẹwọrọ ẹka edem itienna ẹketọn̄ọ enye ke itiat ẹwot, kpa nte Jehovah eketemede Moses. 37  Ndien Jehovah ọdọhọ Moses ete: 38  “Dọhọ nditọ Israel ete mmọ ẹkịm nyeriye ẹyịri ke isọn̄ọfọn̄ mmọ ke ofụri emana mmọ, ẹnyụn̄ ẹkịm blu blu urụk ẹdian ke enyọn̄ nyeriye isọn̄ọfọn̄ oro,+ 39  ‘Ndien enye eyedi nyeriye ke isọn̄ọfọn̄ mbufo, mbufo ẹyenyụn̄ ẹkụt enye ndien ẹti kpukpru mme ewụhọ+ Jehovah ẹnyụn̄ ẹnam mmọ, inyụn̄ itieneke esịt mbufo ye enyịn mbufo,+ emi mbufo ẹtienede ẹnyụn̄ ẹnyenede oburobụt ebuana.+ 40  Emi edi man mbufo ẹti ẹnyụn̄ ẹnam kpukpru mme ewụhọ mi ẹnyụn̄ ẹdi edisana ẹnọ Abasi mbufo.+ 41  Ami ndi Jehovah Abasi mbufo, emi n̄kadade mbufo n̄wọrọ ke isọn̄ Egypt man ndi Abasi mbufo.+ Ami ndi Jehovah Abasi mbufo.’”+

Mme Ikọ Idakisọn̄