Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Nehemiah 9;1-38

9  Ndien ke ọyọhọ usen edịp ye inan̄ ke ọfiọn̄ emi,+ nditọ Israel ẹsop idem ọtọkiet ẹtre udia,+ ẹsịne ọfọn̄ ntuan̄a+ ẹnyụn̄ ẹduọk ntọn̄+ ke idem.  Ndien mfri Israel ẹdian̄ade ẹkpọn̄+ kpukpru mbon isenidụt,+ ẹnyụn̄ ẹda ẹyarade+ mme idiọkn̄kpọ+ mmọ ye mme ndudue mme ete mmọ.+  Ekem mmọ ẹdada ke itie+ mmọ ẹkot n̄wed ibet+ Jehovah Abasi mmọ uyo ọwọrọ ke n̄kpọ nte hour ita ke eyo ama akan̄wan̄a;*+ ndien ẹda hour ita en̄wen ẹyarade mme idiọkn̄kpọ+ mmọ ẹnyụn̄ ẹtuak ibuot ẹnọ Jehovah Abasi mmọ.+  Ndien Jeshua ye Bani, Kadmiel, Shebaniah, Bunni, Sherebiah,+ Bani ye Chenani ẹdọk ẹda ke n̄kpoto+ nditọ Levi ẹseme ke ọkpọsọn̄ uyo+ ẹnọ Jehovah Abasi mmọ.  Ndien nditọ Levi, kpa Jeshua ye Kadmiel, Bani, Hashabneiah, Sherebiah, Hodiah, Shebaniah ye Pethahiah ẹdọhọ ẹte: “Ẹdaha ẹda ẹtoro+ Jehovah Abasi mbufo ke nsinsi nsinsi.+ Ndien yak mmọ ẹtoro ubọn̄ ubọn̄ enyịn̄ fo,+ emi okon̄de akan kpukpru ekọm ye itoro.  “Afo ikpọn̄ edi Jehovah;+ afo akanam heaven,+ idem n̄kon̄n̄kan heaven, ye kpukpru mme udịm mmọ,+ isọn̄+ ye kpukpru se idude ke esịt,+ mme inyan̄+ ye kpukpru se idude mmọ ke esịt;+ ndien edi afo enịm kpukpru mmọ uwem; mme udịm+ enyọn̄ ẹnyụn̄ ẹtuak ibuot ẹnọ fi.  Afo edi Jehovah kpa ata Abasi, emi ekemekde Abram+ okonyụn̄ adade enye ọwọrọ ke Ur mbon Chaldea+ onyụn̄ osiode enye enyịn̄ Abraham.+  Ndien afo ama okụt ke enye anam akpanikọ ke esịt esie ke iso fo;+ mmọdo afo akanamde ediomi+ ye enye ndinọ enye isọn̄ mbon Canaan, mme Hittite, mme Amorite, mme Perizzite, mbon Jebus ye mme Girgashite, ndida enye nnọ mfri esie;+ afo omonyụn̄ anam ikọ fo, koro afo edide edinen.+  “Ntre afo ama okụt+ ukụt mme ete ete nnyịn ke Egypt, onyụn̄ okop+ eseme mmọ ke Ididuot Inyan̄. 10  Ndien afo ọnọ Pharaoh ye kpukpru mme asan̄autom esie ye kpukpru mbio obio esie idiọn̄ọ ye mme utịben̄kpọ,+ koro afo ọkọfiọkde ke mmọ ẹma ẹmiom+ mmọ; ndien afo anam enyịn̄+ ọnọ idemfo, kpa nte edide mfịn emi. 11  Ndien afo ama abahade+ inyan̄ ke iso mmọ, man mmọ ẹsan̄a ke edisat isọn̄ ẹbe ke ufọt inyan̄;+ afo ama onyụn̄ emen mme andibịne mmọ ọduọk ke udem+ nte itiat+ ke akamba mmọn̄.+ 12  Ndien afo anam adaha obubịt enyọn̄ ada mmọ usụn̄ ke uwemeyo+ ye adaha ikan̄ ke okoneyo+ man anam usụn̄ emi mmọ ẹsan̄ade an̄wan̄a.+ 13  Afo ama osụhọde edi Obot Sinai+ onyụn̄ etie ke heaven etịn̄ ikọ ye mmọ+ onyụn̄ ọnọ mmọ ndinen ubiereikpe+ ye ibet akpanikọ,+ ye nti edumbet ye mme ewụhọ.+ 14  Ndien afo anam mmọ ẹfiọk edisana sabbath+ fo, onyụn̄ ada Moses asan̄autom fo ọnọ mmọ mme ewụhọ ye mme edumbet ye ibet.+ 15  Afo ama onyụn̄ ọnọ mmọ uyo emi otode heaven ke ini biọn̄ ọkọdọn̄de mmọ,+ onyụn̄ osio mmọn̄ ke akamba itiat ọnọ mmọ man osụk mmọ nsatitọn̄,+ onyụn̄ ọdọhọ mmọ ẹdụk+ ẹkeda isọn̄ emi afo ekemenerede ubọk ọn̄wọn̄ọ ke iyọnọ mmọ.+ 16  “Ndien mmọ, kpa mme ete ete nnyịn, ẹma ẹkohode idem+ ẹnyụn̄ ẹsọn̄ obotitọn̄,+ inyụn̄ ikpan̄ke utọn̄ ke mme ewụhọ fo. 17  Ntre mmọ inyịmeke ndikpan̄ utọn̄,+ inyụn̄ itịghi+ mme utịbe utịbe edinam emi afo akanamde ọnọ mmọ, edi mmọ ẹsọn̄ obotitọn̄+ ẹnyụn̄ ẹmek etubom+ ndida mmọ mfiak nnyọn̄ itie ufụn mmọ ke Egypt. Edi, afo edi Abasi emi efende ọnọ,+ ọfọnde ido,+ onyụn̄ atuade mbọm,+ usọpke iyatesịt,+ awak+ ima-mfọnido, afo ukunyụn̄ ukpọn̄ke mmọ.+ 18  Ih, ke ini mmọ ẹkenamde editara mbiet eyen enan̄+ ẹnọ idemmọ, ẹnyụn̄ ẹdọhọde ẹte, ‘Emi edi Abasi mbufo, emi akadade mbufo ọwọrọ ke Egypt,’+ ndien mmọ ẹnam ikpọ edinam oro mîwụtke ukpono, 19  afo ke uwak mbọm fo ukukpọn̄ke+ mmọ ke wilderness. Adaha obubịt enyọn̄ iketreke ndida mmọ usụn̄ ke uwemeyo,+ adaha ikan̄ ikonyụn̄ itreke ndinọ un̄wana ke usụn̄ eke mmọ ẹsan̄ade ke okoneyo.+ 20  Afo onyụn̄ ọnọ mmọ eti spirit+ fo man mmọ ẹnyene eti ibuot, ukunyụn̄ usioho mmọ manna fo ke inua,+ ama onyụn̄ ọnọ mmọ mmọn̄ man osụk mmọ nsatitọn̄.+ 21  Ndien afo ọnọ mmọ udia ke isua aba+ ke wilderness. Mmọ ikananake n̄kpọ ndomokiet.+ Ọfọn̄ mmọ ikatahake,+ ikpat ikonyụn̄ ifụtke mmọ.+ 22  “Ndien afo ọnọ mmọ mme obio ubọn̄+ ye mme idụt, onyụn̄ edeme ọnọ mmọ ke itie ke itie;+ ntre mmọ ẹda isọn̄ Sihon+ ẹnyene, kpa isọn̄ edidem Heshbon,+ ye isọn̄ Og+ edidem Bashan.+ 23  Afo onyụn̄ anam nditọ mmọ ẹwak nte ntantaọfiọn̄ ke ikpaenyọn̄.+ Ekem ada mmọ edi isọn̄+ emi afo ọkọn̄wọn̄ọde ọnọ mme ete ete mmọ+ man mmọ ẹdụk ẹkeda ẹnyene. 24  Ntre nditọ+ mmọ ẹdụk ẹdida isọn̄ emi ẹnyene,+ afo onyụn̄ anam mmọ ẹkan+ mme andidụn̄ isọn̄ oro, kpa mbon Canaan,+ onyụn̄ ayak mmọ esịn mmọ ke ubọk, ọkọrọ ye ndidem+ mmọ ye mbio isọn̄+ emi, man ẹnam mmọ nte ẹmade.+ 25  Ndien mmọ ẹda mme obio ibibene+ ye isọn̄ emi enyenede isek+ ye mme ufọk emi ẹyọhọde ye kpukpru nti n̄kpọ+ ẹnyene, ye mme obube udọn̄ mmọn̄ emi ẹketịbide+ ye mme in̄wan̄ vine ye mme in̄wan̄ olive+ ye mme eto emi ẹnọde udia barasuene, mmọ ẹnyụn̄ ẹdia ẹyụhọ,+ ẹkponi+ ẹnyụn̄ ẹnem idemmọ esịt ke akwa mfọn fo.+ 26  “Edi, mmọ ẹtụt utọn̄+ ẹnyụn̄ ẹsọn̄ ibuot+ ye afo ẹnyụn̄ ẹkpọnọde ibet fo ẹnịm ke edem,+ ẹnyụn̄ ẹwot mme prọfet fo,+ emi ẹkesuade ẹnọ mmọ ẹte ida mmọ ifiak isọk fi;+ ndien mmọ ẹnam ikpọ edinam oro mîwụtke ukpono.+ 27  Ntem afo ayak mmọ esịn ke ubọk mme asua mmọ,+ emi ẹkenamde mmọ ẹkụt nnanenyịn;+ edi ke ini nnanenyịn mmọ, mmọ ẹseme ẹkot fi,+ ndien afo etie ke heaven okop;+ ndien nte ekemde ye uwak mbọm+ fo, afo ọnọ mmọ mme andinyan̄a+ emi ẹkenyan̄ade mmọ ẹsio mme asua mmọ ke ubọk.+ 28  “Edi ke ndondo oro mmọ ẹnyenede ifụre, mmọ ẹfiak ẹnam se idiọkde ke iso fo,+ ndien afo ayak mmọ esịn ke ubọk mme asua mmọ, mmọ ẹnyụn̄ ẹdịghi mmọ.+ Ekem mmọ ẹtọn̄ọ ntak ẹkot fi ẹyom un̄wam,+ afo onyụn̄ etie ke heaven eyere mmọ+ onyụn̄ anyan̄a mmọ ke uwak mbọm fo, ediwak ini.+ 29  Okposụkedi afo akasuade ọnọ mmọ man mmọ ẹfiak ẹnịm ibet fo,+ mmọ ẹma ẹseri iseri+ ikonyụn̄ ikpan̄ke utọn̄ ke mme ewụhọ fo; ndien ẹnam idiọkn̄kpọ+ ẹbiat mme ubiereikpe+ fo, emi edide, edieke owo ekpenịmde, enye akpada mmọ odu uwem.+ Ndien mmọ ẹsọn̄ ibuot,+ ẹsọn̄ obotitọn̄,+ inyụn̄ ikpan̄ke utọn̄.+ 30  Edi afo ama enyene ime ye mmọ ke ediwak isua+ onyụn̄ ada spirit fo asua ọnọ+ mmọ ebe ke mme prọfet fo, ndien mmọ inọhọ utọn̄.+ Ke akpatre, afo ayak mmọ esịn ke ubọk mme idụt.+ 31  Ndien ke uwak mbọm fo, afo ukusoboke mmọ ufep+ ukunyụn̄ ukpọn̄ke+ mmọ; koro afo edide Abasi mfọn+ ye mbọm.+ 32  “Ndien, ke emi, O Abasi nnyịn, akwa+ ye ọkpọsọn̄+ Abasi emi enyenede uten̄e,+ emi enịmde ediomi+ onyụn̄ owụtde ima-mfọnido,+ kûyak enyịn fo ese ofụri ukụt nnyịn,+ eke ndidem+ nnyịn, eke mbọn̄+ nnyịn ye mme oku+ nnyịn ye mme prọfet+ nnyịn ye mme ete ete nnyịn+ ye eke ofụri ikọt fo toto ke usen ndidem Assyria tutu esịm mfịn emi,+ ke ekpri n̄kpọ.+ 33  Ndien afo emenen+ ke kpukpru se isịmde nnyịn, koro afo anamde akpanikọ,+ nnyịn ikam inam se idiọkde.+ 34  Amaedi ndidem nnyịn, mbọn̄ nnyịn, mme oku nnyịn ye mme ete ete nnyịn,+ mmọ ikenịmke ibet fo,+ ikonyụn̄ ikpan̄ke utọn̄ ke mme ewụhọ+ fo m̀mê mme ikọ ntiense* emi afo akadade odụri mmọ utọn̄.+ 35  Ndien mmọ—ke ini ubọn̄+ mmọ ye ke ini akpakịp nti n̄kpọ+ oro afo ọkọnọde mmọ ye isọn̄ emi an̄wan̄ade onyụn̄ enyenede isek+ oro afo akanamde mmọ ẹnyene, mmọ ikanamke n̄kpọ inọ fi+ ikonyụn̄ iwọn̄ọkede ikpọn̄ ndiọi edinam mmọ.+ 36  Sese! Nnyịn idi ifịn+ mfịn emi; ndien amaedi isọn̄ emi afo ọkọnọde mme ete ete nnyịn ete ẹdia mbun̄wụm ye nti n̄kpọ esie, sese! nnyịn idi ifịn ke esịt,+ 37  ndien mbun̄wụm esie amawak+ ọnọ ndidem+ oro afo ayakde nnyịn esịn mmọ ke ubọk ke ntak mme idiọkn̄kpọ nnyịn,+ ndien mmọ ẹmekara nnyịn idem, ye mme ufene nnyịn, nte mmọ ẹmama, nnyịn inyụn̄ idu ke akwa nnanenyịn.+ 38  “Ntre kpukpru n̄kpọ emi ẹsịn nnyịn idiomi ediomi emi enyenede nsọn̄ọ,+ emi ẹwetde-wet ẹnyụn̄ ẹfịkde ufịkn̄kpọ+ mbọn̄ nnyịn ye nditọ Levi nnyịn ye mme oku nnyịn.”+

Mme Ikọ Idakisọn̄

At. Ed., “mbahade usen kiet ke itie inan̄.”
M̀mê, “mme n̄kpọ editi.”