Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Nahum 2;1-13

2  Andisuan ọmọdọk edi ke iso fo.+ Yak ẹkpeme ebiet ukpeme. Kpeme usụn̄. Bọbọ mbọbọ ke isịn. Dọn̄ idem etieti.+  Koro Jehovah ayafiak ọnọ Jacob ubọn̄ oro enye ekenyenede,+ kpa nte ubọn̄ Israel, koro mme andisobo ẹmesobo mmọ;+ mmọ ẹmenyụn̄ ẹbiat mme n̄kọk mmọ.+  Otuekọn̄ n̄kpọsọn̄ owo esie emeyịbe; irenowo esie emi ẹkopde odudu ẹnyụn̄ ẹsịne ididuot ọfọn̄ ke idem.+ Chariot ekọn̄ esie enyene ukwak emi esemde nte ikan̄ ke usen emi enye etịmde idem, ẹmenyụn̄ ẹfụn̄ mme eduat emi ẹdade eto juniper+ ẹnam.  Mme chariot ekọn̄ ẹwat idat idat ke efak.+ Mmọ ẹfefehe ẹdọk ẹfefehe ẹsụhọde ke an̄wa obio. Mmọ ẹbiet nsadan̄ ikan̄. Mmọ ẹnyụn̄ ẹfen̄e nte emịnen̄mịnen̄.+  Enye eyeti n̄kpọsọn̄ owo esie.+ Mmọ ẹyetuak ukot ẹduọn̄ọ ke isan̄ mmọ.+ Mmọ ẹyefen̄e ẹka ibibene esie ẹnyụn̄ ẹnam ọkọ ekọn̄ esie enen̄ede ọsọn̄.  Ẹyeberede mme inuaotop akpa mmọn̄ ẹnịm in̄wan̄, ufọk ubọn̄ ọyọduọ.  Ẹmebiere ẹnịm; ẹmefụhọde enye ẹnịm iferi; ẹyeda enye ẹka ntan̄mfep,+ ndien ifịn iban esie ẹyeseme, uyom mmọ eyebiet uyom ibiom,+ ẹnyụn̄ ẹmia ikpanesịt mmọ ndien ndien.+  Ndien Nineveh, toto ke ntọn̄ọ esie,+ ekebiet n̄kpọdiọhọ mmọn̄;+ edi mmọ ke ẹfen̄e. “Mbufo ẹtuak ẹda! Ẹtuak ẹda!” Edi idụhe owo eke ọwọn̄ọrede iso.+  Mbufo ẹbụme silver; ẹbụme gold;+ koro mme n̄kpọ oro ẹtịmde ẹbon mînyeneke udomo. Kpukpru orụk ndiye n̄kpọmbana ẹdi barasuene.+ 10  Ẹmenam obio edi ikpîkpu ye ukpọk onyụn̄ ana ndon!+ Nsia* eyemede,+ edọn̄ ofụmede,+ ọkpọsọn̄ ubiak ẹnyụn̄ ẹdu ke kpukpru isịn;+ ndien iso akpai kpukpru mmọ.+ 11  Itienna ekpe ye abaitiat emi abak ayara ekpe odụn̄de ẹdu m̀mọ̀n̄, emi ekpe asan̄ade odụk,+ emi eyen ekpe odude, ndien idụhe owo eke anamde mmọ ẹdịghe?+ 12  Ayara ekpe awai mbai mbai se ikemde nditọ esie, onyụn̄ efịk unam itọn̄ owot ọnọ mme uman esie. Ndien enye ada se enye omụmde ọyọhọ aba esie, itie udịbe esie onyụn̄ ọyọhọ ye unam emi enye awaide mbai mbai.+ 13  “Sese! ami mmenyene utọk ye afo,” uyo Jehovah mme udịm edi emi,+ “ndien nyọfọp chariot ekọn̄ esie ke nsụn̄ikan̄.+ Ndien akan̄kan̄ ayadia abak nyara ekpe fo.+ Ndien nyesịbe udia fo mfep ke isọn̄, ndien owo idikopke aba uyom mme isụn̄utom fo.”+

Mme Ikọ Idakisọn̄

At. Ed., “esịt.”