Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Psalm 21;1-13

Ẹnọ adausụn̄. Ikwọ David. 21  O Jehovah, edidem amadara ke odudu fo;+Onyụn̄ ọdọn̄ enye didie ntem ndinen̄ede ndara ke edinyan̄a fo!+   Afo ọmọnọ enye se esịt esie oyomde,+Unyụn̄ usịnke ndinọ enye se n̄kpọkinua esie eben̄ede.+ Selah.   Koro afo amada nti n̄kpọ ọdiọn̄ enye,+Onyụn̄ ayara enye anyanya ata eti gold.+   Enye ekeben̄e fi uwem. Afo ọmọnọ enye,+Ọmọnọ enye ediwak usen ke nsinsi nsinsi.+   Ubọn̄ esie omokpon koro afo anyan̄ade enye.+Afo amada uku ye uyai esịne enye.+   Koro afo amanam enye ọbọ edidiọn̄ ke nsinsi;+Afo amada idatesịt iso fo anam esịt adat enye.+   Koro edidem ọbuọtde idem ye Jehovah,+Ọbuọt idem ke ima-mfọnido Ata Edikon̄. Owo idinamke enye esehede.+   Ubọk fo eyesịm kpukpru mme asua fo;+Ubọk nnasia fo eyesịm mbon oro ẹsuade fi.   Afo ayanam mmọ ẹtie nte akwa ikan̄ eke asakde ke edikem ini emi afo ọwọn̄ọrede iso ese mmọ.+Jehovah oyosobo mmọ ke iyatesịt esie, ikan̄ oyonyụn̄ ata mmọ.+ 10  Afo oyosobo mbun̄wụm mmọ efep ke isọn̄,+Ye nditọ mmọ ke otu nditọ owo.+ 11  Koro mmọ ẹdomode ndinam fi idiọk;+Mmọ ẹduak se mmọ mîkemeke ndinam.+ 12  Koro afo ayanam mmọ ẹfiak edem ẹfehe+Ke urụk utịgha fo emi afo odụride eket mmọ ke iso.+ 13  O Jehovah, kon̄ ke odudu fo.+Nnyịn iyọkwọ edinem ikwọ inyụn̄ itoro odudu fo.+

Mme Ikọ Idakisọn̄