Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Matthew 8;1-34

8  Ke enye ama okoto ke obot osụhọde edi, akwa otuowo ẹtiene enye.  Ndien, sese! owo akpamfia+ kiet asan̄a ekpere onyụn̄ edinụhọ ọnọ enye, ete: “Ọbọn̄, edieke afo akam amade, emekeme ndinam mi nsana.”  Ndien enye anyanade ubọk otụk enye, ete: “Mmama. Sana.”+ Ndien kpa idaha oro enye asana ke akpamfia esie.+  Ekem Jesus ọdọhọ enye ete: “Kụt ete ke utịn̄ke unọ owo ndomokiet,+ edi ka kowụt oku idemfo,+ nyụn̄ nọ enọ+ oro Moses okowụkde, man edi ntiense ọnọ mmọ.”  Ke ini enye odụkde Capernaum,+ akwa owoekọn̄ kiet edi ebịne enye, edikpe enye ubọk  onyụn̄ ọdọhọ ete: “Ete, ofụn eren mi ọdọn̄ọ akpauben̄ ana ke ufọk onyụn̄ odu ke ọkpọsọn̄ ndutụhọ.”  Enye ọdọhọ enye ete: “Mma nsịm do nyanam udọn̄ọ okụre enye.”  Akwa owoekọn̄ oro ọbọrọ ete: “Ete, ami ndotke nte afo okpodụkde ke idak ọkọm mi, edi kam tetịn̄ ikọ ndien ofụn eren mi oyokop nsọn̄idem.  Koro ami n̄ko ndu ke idak odudu ukara owo en̄wen, mmonyụn̄ nnyene mbonekọn̄ emi ẹdude ke idak mi, nnyụn̄ ndọhọ owo enye emi nte, ‘Ka!’+ ndien enye aka, nnyụn̄ ndọhọ efen nte, ‘Di!’ ndien enye edi, nnyụn̄ ndọhọ ofụn mi nte, ‘Nam emi!’ ndien enye anam.” 10  Ke Jesus okopde emi, idem akpa enye, ndien enye ọdọhọ mbon emi ẹtienede enye ete: “Ke akpanikọ, ndọhọ mbufo nte, Akanam n̄kwe owo ndomokiet emi enyenede mbuọtidem eke okponde ntem ke Israel.+ 11  Edi ndọhọ mbufo nte ediwak owo ẹyeto mme ikpehe edem usiahautịn+ ye edem usoputịn ẹdi ẹnyụn̄ ẹdisụhọde ẹtie ke okpokoro kiet ye Abraham ye Isaac ye Jacob ke obio ubọn̄+ heaven;+ 12  ke adan̄aemi ẹditopde nditọ obio ubọn̄+ ẹduọn̄ọ ke ekịm ke an̄wa. Do ke mmọ ẹditua eyet ẹnyụn̄ ẹta edet.”+ 13  Ekem Jesus ọdọhọ akwa owoekọn̄ oro ete: “Nyọn̄. Yak osu ọnọ fi nte mbuọtidem fo edide.”+ Ndien ofụn eren oro okop nsọn̄idem kpa ke hour oro. 14  Ekem ke ini Jesus odụkde ufọk Peter, enye okụt eka an̄wan+ Peter nte anade-na onyụn̄ ọdọn̄ọde ufiopidem.+ 15  Ntre enye otụk enye ubọk,+ ufiopidem oro ọkpọn̄ enye, ndien n̄wan emi adaha ke enyọn̄ anam n̄kpọ ọnọ enye.+ 16  Edi ke esịmde mbubreyo, mme owo ẹda ediwak mbon emi ẹnyenede demon ẹsọk enye; ndien enye ada ikọ inua esie ebịn mme spirit efep, onyụn̄ ọkọk kpukpru mbon emi idem mîsọn̄ke; 17  man okposu se ẹkedade prọfet Isaiah ẹtịn̄, ẹte: “Enye ekemen mme udọn̄ọ nnyịn onyụn̄ obiom mme ubiak nnyịn.”+ 18  Ke ini Jesus okụtde nte otuowo ẹkande enye ẹkụk, enye ọnọ uyo ete ẹsio ẹka edem n̄kan̄ oko.+ 19  Ndien scribe* kiet asan̄a ekpere onyụn̄ edidọhọ enye ete: “Andikpep, nyetiene fi n̄ka ebiet ekededi eke afo oyomde ndika.”+ 20  Edi Jesus ọdọhọ enye ete: “Mme ebuaikọt ẹnyene ndudu, mme inuen enyọn̄ ẹnyụn̄ ẹnyene efọk, edi Eyen owo inyeneke ebiet eke enịmde ibuot esie.”+ 21  Ekem mbet esie efen ọdọhọ enye ete: “Ọbọn̄, yak mi n̄ka kan̄a n̄kobụk ete mi.” 22  Jesus ọdọhọ enye ete: “Ka iso tiene mi, nyụn̄ yak mme akpan̄kpa ẹbụk mme akpan̄kpa mmọ.”+ 23  Edikem ke ini enye edierede ke ubom,+ mme mbet esie ẹtiene enye. 24  Ndien, sese! akwa oyobio ofụme ke inyan̄, tutu mbufụt mmọn̄ ọtọ ofụk ubom; edi, enye ke ede idap.+ 25  Ndien mmọ ẹdi ẹdidemede enye ke idap,+ ẹnyụn̄ ẹdọhọ ẹte: “Ọbọn̄, nyan̄a nnyịn, nnyịn imọn̄ itak!” 26  Edi enye ọdọhọ mmọ ete: “Mbufo mbon ekpri mbuọtidem, ntak emi mbufo ẹfehede ndịk?”+ Ekem, enye adaha ada, aduari ofụm ye inyan̄, akwa ndobo onyụn̄ odu.+ 27  Ntre idem akpa mmọ, mmọ ẹnyụn̄ ẹbụp ẹte: “Nso orụk owo edi emi,+ eke ofụm ye inyan̄ ẹkam ẹkopde uyo esie?” 28  Ke ini enye esịmde edem oko onyụn̄ odụkde idụt mbon Gadara,+ owo iba emi ẹnyenede demon+ ẹto mme udi ẹwọn̄ọ ẹdisobo ye enye, ẹdama idat etieti, tutu owo ndomokiet isọn̄ke esịt ikem ndisan̄a usụn̄ oro mbe. 29  Ndien, sese! mmọ ẹfiori ẹte: “Nnyịn isan̄a nso ye afo, Eyen Abasi?+ Ndi afo ekedi mi nditụhọde nnyịn+ mbemiso edikem ini?”+ 30  Otu ediwak edi ẹma ẹdu nsannsan ke ẹdia n̄kpọ. 31  Ntre mme demon oro ẹtọn̄ọ ndikpe enye ubọk ẹte: “Edieke ebịnde nnyịn, dọn̄ nnyịn ikodụk mme edi oko ke idem.”+ 32  Ntre enye ọdọhọ mmọ ete: “Ẹka!” Mmọ ẹwọn̄ọ ẹkedụk mme edi idem ẹdọn̄ọ; ndien, sese! ofụri otu ufene emi ẹbụmede ẹfen̄e ẹsụhọde ebeden̄ ẹkeduọn̄ọ ẹdọn̄ọ inyan̄ ẹnyụn̄ ẹkpan̄a ke mmọn̄.+ 33  Edi mme ekpeme ufene oro ẹfen̄e ẹkedụk obio, ẹnyụn̄ ẹbụk kpukpru n̄kpọ, ọkọrọ ye n̄kpọ emi aban̄ade mbon oro ẹkenyenede demon. 34  Ndien, sese! ofụri obio ẹwọn̄ọ ẹdi ndisobo ye Jesus; ndien ke ini mmọ ẹkụtde enye, mmọ ẹnen̄ede ẹkpe enye ubọk ẹte ọwọrọ ọkpọn̄ n̄kann̄kụk mmimọ.+

Mme Ikọ Idakisọn̄

Se ik. id. Mt 2:4.