Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Matthew 6;1-34

6  “Ẹtịm ẹkpeme mbak mbufo ẹdinam edinen ido+ mbufo ke iso owo ẹte mmọ ẹkụt; edieke ẹnamde, mbufo idibọhọ utịp ito Ete mbufo emi odude ke heaven.  Ntem ke ini afo ọnọde mme ubuene n̄kpọ,*+ kûbem iso ufri obukpon̄,+ kpa nte mbon mbubịk ẹnamde ke mme synagogue ye ke mme efak, man mme owo ẹkpenọ mmọ ubọn̄. Ke akpanikọ ke ndọhọ mbufo, Mmọ ẹmebọ utịp mmọ ọyọhọ ọyọhọ.  Edi amaedi afo, ke ini ọnọde mme ubuene n̄kpọ* kûyak ubọk ufien fo ọfiọk se ubọk nnasia fo anamde,  man enọ fo ekpedi ke ndịbe; ndien Ete fo emi esede ke ndịbe ọyọnọ fi utịp.+  “N̄ko, ke ini mbufo ẹbọn̄de akam, ẹkûbiet mbon mbubịk; koro mmọ ẹma ndida+ ke mme synagogue ye ke mme inụk ikpọ efak mbọn̄ akam man mme owo ẹkụt.+ Ke akpanikọ ke ndọhọ mbufo, Mmọ ẹmebọ utịp mmọ ọyọhọ ọyọhọ.  Edi, amaedi afo, ke ini ọbọn̄de akam, dụk ke ubet fo,+ ndien ke ama ekeberi usụn̄, bọn̄ akam nọ Ete fo emi odude ke ndịbe;+ ndien Ete fo emi esede ke ndịbe ọyọnọ fi utịp.  Edi ke ini ọbọn̄de akam, kûyịre nditịn̄ mfiak ntịn̄+ n̄kpọ kiet, kpa nte mbon idụt ẹnamde, koro mmọ ẹkere ke nditịn̄ uwak ikọ edinam ẹkop akam mmimọ.  Ntre, ẹkûtie nte mmọ, koro Abasi emi edide Ete mbufo ọfiọk mme n̄kpọ emi mbufo ẹyomde+ idem mbemiso mbufo ẹben̄ede enye.  “Mbufo ẹbọn̄ akam ntem, ndien, ẹte:+ “‘Ete nnyịn emi odude ke heaven, yak ẹnam enyịn̄ fo+ asana.+ 10  Yak obio ubọn̄+ fo edi. Yak uduak+ fo ada itie, nte edide ke heaven, yak edi ke isọn̄+ kpasụk ntre. 11  Nọ nnyịn udia* eke ekemde nnyịn ke usen mfịn;+ 12  nyụn̄ fen nọ nnyịn ke isọn eke nnyịn ikamade fi, kpa nte nnyịn n̄ko ifende inọ mmọ eke ẹkamade nnyịn isọn.+ 13  Kûnyụn̄ uda nnyịn usịn ke idomo,+ edi nyan̄a nnyịn sio ke ubọk andidiọk.’+ 14  “Koro edieke mbufo ẹfende ẹnọ mme owo ke mme idiọkn̄kpọ mmọ, Ete mbufo eke heaven eyefen n̄ko ọnọ mbufo;+ 15  edi edieke mbufo mîfenke inọ mme owo ke mme idiọkn̄kpọ mmọ, Ete mbufo idinyụn̄ ifenke inọ mbufo ke mme idiọkn̄kpọ mbufo.+ 16  “Ke ini mbufo ẹtrede udia,+ ẹkûkama* iso mfụhọ mfụhọ nte mbon mbubịk, koro mmọ ẹkpụhọde iso mmọ man mme owo ẹkụt ke mmimọ itre udia.+ Ke akpanikọ ke ndọhọ mbufo, Mmọ ẹmebọ utịp mmọ ọyọhọ ọyọhọ. 17  Edi amaedi afo, ke ini etrede udia, da aran yet ke ibuot fo nyụn̄ yet iso fo,+ 18  man okûtie nte etre udia ọnọ owo, edi nte ke etre ọnọ Ete fo emi odude ke ndịbe;+ ndien Ete fo emi esede ke ndịbe ọyọnọ fi utịp. 19  “Ẹtre ndibon n̄kpọuto+ nnọ idem mbufo ke isọn̄, ke ebiet emi utan̄kpọ ye n̄karafan̄ ẹbiatde, ye ke ebiet emi mme inọ ẹbụn̄de ẹdụk ẹyịp. 20  Utu ke oro, ẹbon n̄kpọuto ẹnọ idem mbufo ke heaven,+ ke ebiet emi utan̄kpọ m̀mê n̄karafan̄ mîbiatke,+ mme inọ mînyụn̄ ibụn̄ke idụk iyịp. 21  Koro ebiet emi n̄kpọuto fo odude, do ke esịt fo edidu n̄ko. 22  “Utuenikan̄ idem owo edi enyịn.+ Do, edieke enyịn fo enen̄erede ese, ofụri idem fo ayayama; 23  edi edieke enyịn fo ọdiọkde,+ ofụri idem fo eyekịm. Edieke edide akpanikọ nte ke un̄wana emi odude fi ke idem edi ekịm, ekịm oro okpon adan̄a didie ntem!+ 24  “Baba owo kiet ikemeke ndidụk ufụn nnọ eteufọk iba; koro eyedi enye ayasua kiet onyụn̄ ama enye eken,+ mîdịghe enye ayadiana ye kiet onyụn̄ esịn enye eken ke ndek. Mbufo ikemeke ndidụk ufụn nnọ Abasi ye Inyene.+ 25  “Ke ntak emi ndọhọ mbufo nte: Ẹtre nditịmede esịt+ mban̄a uwem* mbufo ẹte ididia nso m̀mê idin̄wọn̄ nso, m̀mê ẹban̄a ikpọkidem mbufo ẹte idisịne nso.+ Nte uwem* ikanke udia, ikpọkidem inyụn̄ ikanke edisịnen̄kpọ?+ 26  Ẹtịm ẹse mme inuen+ enyọn̄, koro mmọ isuanke n̄kpasịp inyụn̄ idọkke-dọk inyụn̄ itan̄ke n̄kpọ ibon ke ubet ubonn̄kpọ; edi Ete mbufo eke heaven ọbọk mmọ. Nte mbufo isọn̄ke urua ikan mmọ?+ 27  Anie ke otu mbufo ekeme ndidian cubit kiet ke isua uwem esie ke ntak emi enye okopde editịmede esịt?+ 28  N̄ko, ntak emi mbufo ẹtịmerede esịt ẹban̄a edisịnen̄kpọ? Ẹkpep n̄kpọ ẹto ekpon̄idịm+ ke ikọt, nte mmọ ẹkọride; mmọ ikpaha utom, inyụn̄ ifiakke ndidi; 29  edi ndọhọ mbufo nte kpa Solomon+ ke ofụri ubọn̄ esie ikesịneke n̄kpọ nte kiet ke otu mmọ emi. 30  Edi, edieke Abasi esịnede mbiet ke ikọt n̄kpọ ntem, emi odude mfịn ndien n̄kpọn̄ ẹmen ẹtop ẹsịn ke usan̄uyo, adan̄a didie akan oro ke enye edisịne mbufo n̄kpọ, mbufo mbon ekpri mbuọtidem?+ 31  Mmọdo ẹkûtịmede esịt+ ẹdọhọ ẹte, ‘Nnyịn ididia nso?’ m̀mê, ‘Nnyịn idin̄wọn̄ nso?’ m̀mê, ‘Nnyịn idisịne nso?’ 32  Sia kpukpru emi ẹdi mme n̄kpọ emi mme idụt ẹsịnde idem ẹyom. Koro Ete mbufo eke heaven ọfiọk ke mbufo ẹmeyom kpukpru n̄kpọ emi.+ 33  “Ẹka iso, ndien, ndibem iso nyom obio ubọn̄ ye edinen ido esie,+ ndien ẹyedian kpukpru n̄kpọ emi ẹnọ mbufo.+ 34  Mmọdo, ẹkûtịmede esịt ẹban̄a n̄kpọn̄,+ koro n̄kpọn̄ eyenyene editịmede esịt esie. Afanikọn̄ usen ekem ye usen.

Mme Ikọ Idakisọn̄

At. Ed., “ke ini afo ọnọde enọ mbọm.”
At. Ed., “ke ini afo ọnọde enọ mbọm.”
At. Ed., “uyo.”
M̀mê, “ẹtre ndikama.”
At. Ed., “ukpọn̄.”
At. Ed., “ukpọn̄.”