Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Matthew 5;1-48

5  Ke ini enye okụtde otuowo enye ọdọk ke obot; ndien ke ama okosụhọde etetie, mme mbet esie ẹdi ẹbịne enye;  ndien enye atat inua esie ọtọn̄ọ ndikpep mmọ n̄kpọ, ete:  “Mmọ oro ẹkerede ẹban̄a unana mmọ ke n̄kan̄ eke spirit+ ẹkop inemesịt, koro obio ubọn̄ heaven enyenede mmọ.+  “Mmọ oro ẹfụhọde ẹkop inemesịt, koro ẹyedọn̄ mmọ esịt.+  “Mmọ oro ẹnyenede ifụre ifụre ido+ ẹkop inemesịt, koro mmọ ẹyeda isọn̄ ẹnyene.+  “Mmọ oro ẹkopde biọn̄ ye nsatitọn̄+ edinen ido ẹkop inemesịt, koro mmọ ẹyeyụhọ.+  “Mme atua owo mbọm+ ẹkop inemesịt, koro ẹyetua mmọ mbọm.  “Mmọ oro esịt asanade+ ẹkop inemesịt, koro mmọ ẹyekụt Abasi.+  “Mme anam emem+ ẹkop inemesịt, koro ẹyekot mmọ ‘nditọ+ Abasi.’ 10  “Mmọ oro ẹkọbọde+ ke ntak edinen ido ẹkop inemesịt, koro obio ubọn̄ heaven enyenede mmọ. 11  “Mbufo ẹkop inemesịt ke ini mme owo ẹsụn̄ide+ mbufo ẹnyụn̄ ẹkọbọde+ mbufo ẹnyụn̄ ẹtịn̄de kpukpru orụk idiọkn̄kpọ ke nsu ẹdian mbufo ke ntak mi. 12  Ẹdara ẹnyụn̄ ẹfrọ ke idatesịt,+ koro utịp+ mbufo omokpon ke heaven; koro kpa ntem ke mmọ ẹkekọbọ mme prọfet+ emi ẹkebemde mbufo iso ẹdu. 13  “Mbufo ẹdi inụn̄+ isọn̄; edi edieke inụn̄ adabade, didie ke ẹkeme ndinam enye afiak enyene inem? Ifọnke ke baba n̄kpọ kiet ibọhọke nditop enye nduọk ke an̄wa+ man mme owo ẹdịghi ke ikpat. 14  “Mbufo ẹdi un̄wana ererimbot.+ Obio ikemeke ndidịbe ke ini enye odude ke enyọn̄ obot. 15  Owo isidomoke utuenikan̄ ida aban̄ ifụk,+ edi ẹsidori ke uwụk utuenikan̄, ndien enye ayama ọnọ kpukpru mbon emi ẹdude ke ufọk. 16  Kpasụk ntre ẹyak un̄wana+ mbufo ayama ke iso owo, man mmọ ẹkpekụt nti utom+ mbufo ẹnyụn̄ ẹnọ Ete mbufo emi odude ke heaven ubọn̄.+ 17  “Ẹkûkere ẹte n̄kedi ndibabiat Ibet+ m̀mê uwetn̄kpọ mme Prọfet. N̄kedịghe ndibabiat, edi n̄kedi ndinam enye osu;+ 18  koro ndọhọ mbufo ke akpanikọ nte edi mmemmem n̄kpọ enyọn̄ ye isọn̄ ndibe mfep+ akan n̄kpri-n̄kan abisi m̀mê ubak abisi ke Ibet ndidedei mbe mfep ndien kpukpru n̄kpọ idaha itie.+ 19  Ke ntre, owo ekededi eke abiatde+ kiet ke otu ata ekpri ewụhọ emi onyụn̄ ekpepde mme owo ndinam ntre, ẹdikot enye ‘ata ekpri’ ke obio ubọn̄ heaven.+ Amaedi owo ekededi eke anamde onyụn̄ ekpepde+ mmọ, ẹyekot enye emi ‘akamba’+ ke obio ubọn̄ heaven. 20  Koro ndọhọ mbufo nte edieke edinen ido mbufo mîkanke eke mme scribe* ye mme Pharisee,+ mbufo ididụkke+ obio ubọn̄ heaven. 21  “Mbufo ẹma ẹkop ẹte ẹkedọhọ mbon eset ẹte, ‘Kûwot owo;+ edi owo ekededi eke owotde owo+ ẹyekot enye ẹte edinam ibat ke esopikpe.’+ 22  Edi, ami ndọhọ mbufo nte owo ekededi eke akade iso ndiyat esịt+ ye eyenete esie ẹyekot enye ẹte edinam ibat+ ke esopikpe; edi ẹyekot owo ekededi eke etịn̄de ata idiọk ikọ emiom adian eyenete esie ẹte edinam ibat ke N̄kponn̄kan Esopikpe, amaedi owo ekededi eke ọdọhọde ete, ‘Afo ata ndisịme owo!’ odot ẹsịn enye ke Gehenna eke asakde ikan̄.+ 23  “Ke ntre, edieke afo adade enọ fo edi itieuwa+ ndien afo eti do ete ke eyenete fo enyene ikọ ye afo,+ 24  kpọn̄ enọ fo nịm do ke iso itieuwa, nyụn̄ nyọn̄; kebem iso nam emem ye eyenete fo,+ ndien ekem, ke ama akafiak edi, wa enọ fo.+ 25  “Wara nam emem ye owo eke okotde fi ikpe, ke adan̄aemi osụk asan̄ade ye enye ke usụn̄, mbak owo oro okotde fi ikpe+ ediyak fi ọnọ ebiereikpe, ndien ebiereikpe ayak fi ọnọ adaidaha ufọkesop, ndien ẹtop fi ẹsịn ke ufọk-n̄kpọkọbi. 26  Ke akpanikọ, ndọhọ fi nte, Afo uduwọrọke do tutu afo ekpe akpatre okudọk okụk emi afo akamade.+ 27  “Mbufo ẹma ẹkop ẹte ẹkedọhọ ẹte, ‘Kûsịn efịbe.’+ 28  Edi ndọhọ mbufo nte owo ekededi eke owụkde enyịn ese n̄wan+ tutu udọn̄ idan̄ edemede enye, enye esesịn efịbe+ ye enye ama ke esịt+ esie. 29  Ndien edieke enyịn nnasia fo oro anamde fi atuak ukot ọduọ, wụbede enye top duọk.+ Koro ọfọn afo nditaba kiet ke otu ndido idem fo akan nditop fi ofụri idem nduọk+ ke Gehenna. 30  N̄ko, edieke ubọk nnasia fo anamde fi atuak ukot ọduọ, sịbe enye top duọk.+ Koro ọfọn afo nditaba kiet ke otu ndido idem fo akan ofụri idem fo ndidụk Gehenna. 31  “Akan oro ẹkedọhọ ẹte, ‘Owo ekededi eke osiode n̄wan esie ndọ,+ yak enye ọnọ n̄wan oro n̄wed usiondọ.’+ 32  Nte ededi, ndọhọ mbufo nte owo ekededi eke osiode n̄wan esie ndọ, ke mîdịghe ke ntak use,+ ekeme ndinam n̄wan oro esịn efịbe,+ ndien owo ekededi eke ọdọde n̄wan oro ẹma ẹkesio ndọ esịn efịbe.+ 33  “N̄ko mbufo ẹma ẹkop ẹte ẹkedọhọ mbon eset ẹte, ‘Kûtomo+ n̄kpọ edi unamke, edi nọ Jehovah se akakan̄ade.’+ 34  Edi, ndọhọ mbufo nte: Ẹkûtomo+ baba n̄kpọ kiet, edide heaven, koro enye edi ebekpo Abasi;+ 35  m̀mê isọn̄, koro enye edi udoriukot+ esie; ẹkûnyụn̄ ẹtomo Jerusalem, koro enye edi obio+ akwa Edidem. 36  Kûnyụn̄ utomo ibuot fo, koro afo ukemeke ndinam idet kiet akabade edi afia m̀mê obubịt. 37  Yak ikọ mbufo Ih edi Ih, Ihih mbufo edi Ihih;+ koro se ikande emi oto andidiọk.+ 38  “Mbufo ẹma ẹkop ẹte ẹkedọhọ ẹte, ‘Enyịn ke enyịn, edet ke edet.’+ 39  Edi, ndọhọ mbufo nte: Ẹkûn̄wana ye idiọkowo; edi owo ekededi ama eyịbi fi mfụk nnasia,+ wọn̄ọde mfụk eken n̄ko nọ enye. 40  Ndien edieke owo oyomde ndida fi n̄ka esop man ọbọ fi ọfọn̄ idakidem fo, sio ewụra fo n̄ko nọ enye;+ 41  ndien edieke owo emi enyenede odudu enyịkde fi ete asan̄a itiat kiet, san̄a itiat iba ye enye.+ 42  Nọ owo eke eben̄ede fi n̄kpọ, kûnyụn̄ usịn owo eke oyomde ndibọ fi ebuọt ye unana edikpe udori.+ 43  “Mbufo ẹma ẹkop ẹte ẹkedọhọ ẹte, ‘Afo enyene ndima mbọhọidụn̄+ fo nnyụn̄ nsua owo eke asuade fi.’+ 44  Edi, ndọhọ mbufo nte: Ẹka iso ẹma mme asua mbufo+ ẹnyụn̄ ẹbọn̄ akam ẹyom ufọn mmọ eke ẹkọbọde mbufo;+ 45  man mbufo ẹkpedi nditọ Ete mbufo emi odude ke heaven,+ sia enye anamde utịn esie asiaha ọnọ mme idiọkowo ye nti owo onyụn̄ anamde edịm edep ọnọ ndinen owo ye mme anam ukwan̄ido.+ 46  Koro edieke mbufo ẹmade mmọ eke ẹmade mbufo, nso utịp ke mbufo ẹnyene?+ Nte mme ọbọ a-tax inamke kpasụk ntre? 47  Ndien edieke mbufo ẹkọmde nditọete mbufo kpọt, nso n̄wọrọnda n̄kpọ ke mbufo ẹnam? Nte mbon idụt inamke kpasụk ntre? 48  Ke ntem, mbufo ẹfọn ẹma, kpa nte Ete mbufo eke heaven ọfọnde ama.+

Mme Ikọ Idakisọn̄

Se ik. id. Mt 2:4.