Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Matthew 26;1-75

26  Edikem ke ini Jesus okụrede nditịn̄ kpukpru ikọ emi, enye ọdọhọ mbet esie ete:  “Mbufo ẹmefiọk ẹte usen iba osụhọ passover ọmọn̄ ada itie,+ ẹyenyụn̄ ẹyak Eyen owo ẹnọ ẹte ẹkọn̄ ke eto.”+  Ekem mbọn̄ oku ye mbiowo obio ẹsop idem ọtọkiet ke okụre akwa oku emi ekerede Caiaphas,+  ẹnyụn̄ ẹdiomi+ ndida n̄kari mmụm Jesus n̄wot.  Edi, mmọ ẹdọhọ ẹte: “Yak okûdi ke ini usọrọ, mbak ndutịme edidu ke otu mme owo.”+  Ke adan̄aemi Jesus odude ke Bethany+ ke ufọk Simon emi ọkọdọn̄ọde akpamfia,+  n̄wan kiet emi akamade otu alabaster emi esịnede ọsọn̄urua edifuọn̄ aran+ asan̄a ekpere enye, onyụn̄ ọtọhọ ọduọk enye ke ibuot nte enye etiede ke okpokoro.  Ke ini mme mbet ẹkụtde emi, mmọ ẹyat esịt ẹnyụn̄ ẹbụp ẹte: “Ẹbaha n̄kpọ emi ẹban̄a nso?+  Koro ẹkpekenyam aran emi ẹbọ ediwak okụk ẹda ẹnọ mme ubuene.”+ 10  Ke Jesus ọfiọkde emi,+ enye ọdọhọ mmọ ete: “Ntak emi mbufo ẹfịnade n̄wan emi? Enye akanam eti n̄kpọ ke idem mi.+ 11  Koro mme ubuene+ ẹdodu ye mbufo kpukpru ini, edi ami ndidụhe ye mbufo kpukpru ini.+ 12  Koro ke ini n̄wan emi ọduọkde mi edifuọn̄ aran emi ke idem, enye akanam emi eben̄e ini emi ẹdibụkde mi.+ 13  Ke akpanikọ ke ndọhọ mbufo, Ebiet ekededi emi ẹdikwọrọde eti mbụk emi ke ofụri ererimbot, ẹyetịn̄ n̄ko se n̄wan emi akanamde ndida nti enye.”+ 14  Ekem owo kiet ke otu mbet duopeba, enye emi ẹkotde Judas Iscariot,+ adaha ebịne mbọn̄ oku 15  onyụn̄ okobụp ete: “Nso ke mbufo ẹdinọ mi man nda enye nnọ mbufo?”+ Mmọ ẹnyịme ndinọ enye mbak silver edịp ye duop.+ 16  Ọtọn̄ọde ke ini oro enye aka iso oyom eti ifet ndida enye nnọ.+ 17  Ke akpa usen usọrọ uyo eke leaven mîdụhe,+ mme mbet ẹdi ẹbịne Jesus ẹdidọhọ ẹte: “M̀mọ̀n̄ ke afo oyom nnyịn itịm n̄kpọ inọ fi man adia passover?”+ 18  Enye ọdọhọ ete: “Ẹdụk obio ẹbịne owo ntem ye ntem+ ẹnyụn̄ ẹdọhọ enye ẹte, Andikpep ọdọhọ ete, ‘Edimek ini mi emekpere; nyenịm passover ye mme mbet mi ke ufọk fo.’”+ 19  Ndien mme mbet ẹnam kpa nte Jesus eketemede mmọ, ndien mmọ ẹtịm n̄kpọ ẹben̄e passover.+ 20  Ekem, ke ini esịmde mbubreyo,+ enye osụhọde etie ke okpokoro ye mbet esie duopeba.+ 21  Ke adan̄aemi mmọ ẹsụk ẹdiade udia, enye ọdọhọ ete: “Ke akpanikọ ke ndọhọ mbufo, Owo kiet ke otu mbufo ayada mi ọnọ.”+ 22  Ke ẹkopde mfụhọ etieti ẹban̄a ikọ emi, mmọ owo kiet kiet ẹtọn̄ọ ndibụp enye ẹte: “Ọbọn̄, ndi ami?”+ 23  Enye ọbọrọ ete: “Owo eke edebide ubọk ye ami ke usan edi enye emi edidade mi ọnọ.+ 24  Ke akpanikọ, Eyen owo ọmọn̄ ọnyọn̄, kpa nte ẹwetde+ ẹban̄a enye, edi mbọm+ owo oro adade Eyen owo ọnọ!+ Ọkpọfọn ye enye akan edieke enye mîkpakamanake.” 25  Ke ibọrọ, Judas emi okoyomde ndida enye nnọ, obụp ete: “Rabbi, ndi ami?” Enye ọdọhọ enye ete: “Afo ke idemfo ọdọhọ.” 26  Nte mmọ ẹsụk ẹdiade udia, Jesus emen uyo+ ndien, ke ama ọkọdiọn̄, obụn̄,+ ọnọ mme mbet onyụn̄ ọdọhọ ete: “Ẹbọ, ẹta. Emi ada aban̄a idem mi.”+ 27  N̄ko, enye emen cup,+ ndien ke ama ọkọnọ ekọm, ayak ọnọ mmọ onyụn̄ ọdọhọ ete: “Kpukpru mbufo ẹbọ ẹn̄wọn̄;+ 28  koro emi ada aban̄a+ iyịp+ mi, kpa ‘iyịp ediomi,’+ emi ẹdiduọkde kaban̄a ediwak owo+ man ẹfen mme idiọkn̄kpọ.+ 29  Edi ndọhọ mbufo nte, Ndin̄wọn̄ke aba mfri vine emi tutu esịm usen oro ndin̄wọn̄de enye obufa ye mbufo ke obio ubọn̄ Ete mi.”+ 30  Ke akpatre, ke ẹma ẹkekwọ ikwọ itoro,+ mmọ ẹwọn̄ọ ẹka Obot Olive.+ 31  Ekem Jesus ọdọhọ mmọ ete: “Kpukpru mbufo ẹyetuak ukot ẹduọn̄ọ ke ntak mi ke okoneyo emi, koro ẹwet ẹte, ‘Nyowot ekpemerọn̄, ndien otuerọn̄ ayasuana.’+ 32  Edi ke mma nset, nyebem mbufo iso n̄ka Galilee.”+ 33  Edi Peter ọdọhọ enye ete: “Kpukpru mmọ eken ẹkpetatuak ukot ẹduọn̄ọ ke ntak fo, ami ndituakke ukot nduọ tutu amama!”+ 34  Jesus ọdọhọ enye ete: “Ke akpanikọ ke ndọhọ fi, Okoneyo emi, mbemiso ekikọ ọkpọk, afo ayakan̄ mi utịm ikata.”+ 35  Peter ọdọhọ enye ete: “Idem akpana nte n̄kpa ye afo, ndidehedei n̄kan̄ fi.” Kpukpru mbet eken ẹnyụn̄ ẹtịn̄ kpa ntre.+ 36  Ekem Jesus asan̄a ye mmọ edi ebiet+ emi ẹkotde Gethsemane, ndien enye ọdọhọ mme mbet esie ete: “Ẹsụhọde ẹtie mi ke adan̄aemi n̄kade ko ndibọn̄ akam.”+ 37  Ndien enye ada Peter ye nditọ+ Zebedee iba adaha, onyụn̄ ọtọn̄ọ ndikop mfụhọ, esịt onyụn̄ etịmede enye etieti.+ 38  Ekem enye ọdọhọ mmọ ete: “Ukpọn̄ mi ofụhọ etieti, ekpere ndikpa.+ Ẹtie mi ẹtiene mi ẹkpeme.”+ 39  Ndien ke ini enye asan̄ade esisịt aka iso, enye ọduọ ekịbi iso esie ke isọn̄, ọbọn̄ akam+ onyụn̄ ọdọhọ ete: “Ete mi, edieke usụn̄ odude, yak cup+ emi ebe ọkpọn̄ mi. Edi, okûdi nte ami nduakde,+ edi yak edi nte afo aduakde.”+ 40  Ndien enye edi ebịne mme mbet onyụn̄ okụt mmọ nte ẹdede idap, onyụn̄ obụp Peter ete: “Nte mbufo ikemeke nditiene mi n̄kpeme ọkpọkọm ke hour kiet?+ 41  Ẹdu ke ukpeme+ ẹnyụn̄ ẹka iso ndibọn̄ akam,+ mbak mbufo ẹdidụk idomo.+ Ke akpanikọ, spirit enyịme, edi obụkidem ememem.”+ 42  N̄ko, enye adaha aka ọyọhọ utịm ikaba,+ ọkọbọn̄ akam, ete: “Ete mi, edieke usụn̄ mîdụhe cup emi ndibe mfep ibọhọke ami n̄n̄wọn̄ enye, yak uduak fo ada itie.”+ 43  Enye onyụn̄ afiak edi edikụt mmọ nte ẹdede idap, koro enyịn odobide mmọ.+ 44  Ntre enye ọkpọn̄ mmọ, afiak adaha ọkọbọn̄ akam ọyọhọ utịm ikata,+ onyụn̄ afiak etịn̄ kpasụk ikọ oro. 45  Ekem enye edi ebịne mme mbet edidọhọ mmọ ete: “Ke utọ ini emi mbufo ke ẹde idap ẹnyụn̄ ẹduọk odudu! Sese! Ini ke asan̄a ekpere eke ẹdidade Eyen owo ẹsịn mme anamidiọk ke ubọk.+ 46  Ẹdaha ke enyọn̄, ẹyak inyọn̄ọ. Sese! Andida mi nnọ asan̄a ekpere.”+ 47  Ndien ke adan̄aemi enye osụk etịn̄de ikọ, sese! Judas,+ kiet ke otu mbet duopeba, asan̄a ye akwa otuowo emi mbọn̄ oku ye mbiowo obio ẹsiode ẹdọn̄ ẹdi, ẹkama akan̄kan̄ ye okpoyon̄.+ 48  Edi andida enye nnọ ama ọnọ mmọ idiọn̄ọ, ete: “Owo ekededi eke nditịmde inua, edi enye; ẹmụm enye.”+ 49  Ndien enye asan̄a nnennen ebịne Jesus ọkọdọhọ ete: “Rabbi,+ mmọkọm-o!” onyụn̄ etịm enye inua+ ima ima. 50  Edi Jesus+ obụp enye ete: “Da owo, nso ida fi idi mi?” Ndien mmọ ẹsan̄a ẹdi, ẹdimụm Jesus, ẹda ẹdaha.+ 51  Edi, sese! kiet ke otu mbon oro ẹdude ye Jesus odụri akan̄kan̄ esie osio onyụn̄ ekpi ofụn akwa oku utọn̄ esịbe.+ 52  Ekem Jesus ọdọhọ enye ete: “Sịn akan̄kan̄ fo ke itie esie,+ koro kpukpru owo eke ẹmende akan̄kan̄ ẹdikpa ke akan̄kan̄.+ 53  M̀mê ekere ete n̄kemeke ndiben̄e Ete mi ọnọ mi se ikande udịm angel+ duopeba idahaemi? 54  Edieke n̄kpanamde ntre, didie ke N̄wed Abasi okposu nte ke ana ada itie ntem?” 55  Kpa ke hour oro Jesus ọdọhọ otuowo ete: “Nte mbufo ẹkama akan̄kan̄ ye okpoyon̄ ẹwọn̄ọ ẹdi ndimụm mi nte n̄kpọ eke ẹbịnede owo n̄wo?+ Mma nsitie ke temple n̄kpep n̄kpọ ke usen ke usen,+ edi mbufo imụmke mi. 56  Edi kpukpru emi ada itie man se mme prọfet ẹkewetde okposu.”+ Ndien kpukpru mbet ẹkpọn̄ enye ẹfen̄e.+ 57  Mbon oro ẹkemụmde Jesus ẹda enye ẹdaha ẹka ke ọtọ Caiaphas+ akwa oku, ke ebiet emi mme scribe* ye mbiowo ẹsopde idem.+ 58  Edi Peter aka iso nditiene enye nsannsan, tutu esịm okụre+ akwa oku, ndien, ke ama ekebe odụk esịt okụre, enye osụhọde etetie ye mme asan̄autom ufọk oro man okụt se iditịbede.+ 59  Kan̄a ke emi, mbọn̄ oku ye ofụri Sanhedrin ke ẹyom ntiense nsu nditịn̄ ikọ ndian Jesus man ẹkpewot enye,+ 60  edi mmọ ikwe ndomokiet, okposụkedi ediwak ntiense nsu ẹwọrọde ẹdi.+ Ekem owo iba ẹwọrọ ẹdi 61  ẹnyụn̄ ẹdidọhọ ẹte: “Owo emi ọkọdọhọ ete, ‘Ami mmekeme ndiwụri temple Abasi nnyụn̄ mbọp enye ke usen ita.’”+ 62  Ndien akwa oku adaha ada onyụn̄ ọdọhọ enye ete: “Nte afo unyeneke ibọrọ ndomokiet ndinọ? Nso ke mmọ emi ẹtịn̄ ẹdian fi ntem?”+ 63  Edi Jesus ododop uyo.+ Ntre akwa oku ọdọhọ enye ete: “Mmowụk+ fi ke enyịn̄ odu-uwem Abasi nte asian nnyịn m̀mê afo edi Christ+ Eyen Abasi!” 64  Jesus ọdọhọ+ enye ete: “Afo ke idemfo ọdọhọ.+ Edi ndọhọ mbufo nte, Ọtọn̄ọde ke emi+ mbufo ẹyekụt Eyen owo+ nte etiede ke ubọk nnasia+ odudu onyụn̄ edide ke obubịt enyọn̄.”+ 65  Ekem akwa oku awak ewụra esie onyụn̄ ọdọhọ ete: “Enye etịn̄ ikọ isụn̄i adian Abasi!+ Nso ke nnyịn iyom aba ye ntiense?+ Sese! Mbufo ke emi ẹmekop ikọ isụn̄i emi.+ 66  Nso idi ekikere mbufo?” Mmọ ẹbọrọ ẹte: “Enye odot n̄kpa.”+ 67  Ndien mmọ ẹfiari enye etap ke iso+ ẹnyụn̄ ẹtọn̄ọ enye ita.+ Mmọ eken ẹsiak enye ufia ke mban̄,+ 68  ẹdọhọ ẹte: “Sian nnyịn ise, O Christ.+ Anie eyịbi fi?”+ 69  Edi Peter eketie ke an̄wa ke okụre oro; ndien ofụn an̄wan kiet asan̄a ebịne enye onyụn̄ ọdọhọ ete: “Afo, nde, okodu ye Jesus eyen Galilee!”+ 70  Edi enye akan̄ ke iso kpukpru mmọ onyụn̄ ọdọhọ ete: “Mfiọkke se afo etịn̄de aban̄a.” 71  Ke enye ama ọkọwọrọ aka ufọk inuaotop, eyenan̄wan efen okụt enye onyụn̄ ọdọhọ mbon oro ẹdude do ete: “Owo emi okodu ye Jesus eyen Nazareth.”+ 72  Ndien enye ọtọn̄ọ ntak akan̄, onyụn̄ ọn̄wọn̄ọ ete: “Mfiọkke owo emi!”+ 73  Ke esisịt ini ama ekebe mbon oro ẹdade ẹkpere ẹsan̄a ẹdi ẹnyụn̄ ẹdidọhọ Peter ẹte: “Ke akpanikọ afo edi kiet ke otu mmọ, koro, ke nditịm ntịn̄, usem fo ayarade fi.”+ 74  Ekem enye ọtọn̄ọ ndision̄o ikọ isụn̄i nnyụn̄ n̄n̄wọn̄ọ ete: “Mfiọkke owo emi!” Ndien kpa idaha oro ekikọ ọkpọk.+ 75  Peter onyụn̄ eti ikọ emi Jesus eketịn̄de, ete: “Mbemiso ekikọ ọkpọk, afo ayakan̄ mi utịm ikata.”+ Ndien enye ọwọrọ an̄wa akatua etieti.+

Mme Ikọ Idakisọn̄

Se ik. id. Mt 2:4.