Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Matthew 24;1-51

24  Ekem Jesus adaha ọwọrọ ke temple aka esiemmọ, edi mme mbet esie ẹsan̄a ẹkpere ẹte iwụt enye mme ufọk temple.+  Enye ọbọrọ mmọ ete: “Nte mbufo ẹmekụt kpukpru n̄kpọ emi? Ke akpanikọ ke ndọhọ mbufo nte, Owo idikpọn̄ke itiat kiet ke enyọn̄ itiat efen eke owo mîdidorokede iduọk.”+  Ke adan̄aemi enye etiede ke Obot Olive, mme mbet ẹka ẹbịne enye ke ndịbe ẹkedọhọ ẹte: “Sian nnyịn, Ini ewe ke mme n̄kpọ emi ẹditịbe, nso idinyụn̄ idi idiọn̄ọ edidu+ fo ye eke akpatre ini editịm n̄kpọ emi?”+  Ndien Jesus ọbọrọ mmọ ete: “Ẹkpeme mbak owo baba kiet edida mbufo otụn usụn̄;+  koro ediwak owo ẹyedi ke enyịn̄ mi ẹnyụn̄ ẹdọhọ ẹte, ‘Ami ndi Christ,’ ẹyenyụn̄ ẹda ediwak owo ẹtụn usụn̄.+  Mbufo ẹyekop ẹban̄a ekọn̄ ye mme etop ekọn̄; ẹkûkop ndịk. Koro ana mme n̄kpọ emi ẹda itie, edi idịghe utịt kan̄a.+  “Koro idụt ayadaha an̄wana ye idụt,+ obio ubọn̄ kiet oyonyụn̄ adaha an̄wana ye obio ubọn̄+ en̄wen, ndien akan̄+ ye unyekisọn̄+ ẹyedu ke nsio nsio ebiet.  Kpukpru n̄kpọ emi ẹdi ntọn̄ọ ubiak uman.  “Ekem mme owo ẹyeda mbufo ẹyak ẹnọ ukụt+ ẹnyụn̄ ẹwot+ mbufo, ndien mbufo ẹyedi mbon emi kpukpru mme idụt ẹsuade+ ke ntak enyịn̄ mi.+ 10  Adan̄aoro, n̄ko, ẹyenam ediwak owo ẹtuak ukot ẹduọn̄ọ+ ẹnyụn̄ ẹda kiet eken ẹnọ ẹnyụn̄ ẹsua kiet eken.+ 11  Ndien ediwak prọfet nsu+ ẹyedaha ẹda ẹnyụn̄ ẹda ediwak owo ẹtụn usụn̄;+ 12  ndien ke ntak emi ubiatibet+ editọtde ima ediwak owo eyebịt.+ 13  Edi ẹyenyan̄a owo eke ediyọde+ tutu esịm utịt.+ 14  Ẹyenyụn̄ ẹkwọrọ eti mbụk+ obio ubọn̄+ emi ke ofụri isọn̄ nte ntiense ẹnọ kpukpru mme idụt;+ ndien adan̄aoro ke utịt+ edidi. 15  “Ke ntre, ke ini mbufo ẹkụtde mbubiam n̄kpọ+ oro adade nsobo edi, emi prọfet Daniel eketịn̄de, nte adade ke edisana ebiet,+ (yak andikot n̄wed anam n̄kpọ ye mbufiọk,) 16  adan̄aoro yak mbon oro ẹdude ke Judea ẹfehe+ ẹka ikpọ obot. 17  Yak owo emi odude ke enyọn̄ ufọk okûsụhọde edimen mme n̄kpọ ke ufọk esie; 18  ndien yak owo emi odude ke in̄wan̄ okûfiak edi ufọk ndimen ewụra esie. 19  Mbọm iban idịbi ye mmọ emi ẹnọde nditọ eba ke mme usen oro!+ 20  Ẹka iso ẹbọn̄ akam ẹte itọk mbufo okûdi ke ini etuep, m̀mê ke usen sabbath; 21  koro adan̄aoro akwa ukụt+ oyodu, orụk eke akanam mîdụhe toto ke editọn̄ọ ererimbot tutu esịm emi,+ eke mîdinyụn̄ idụhe aba. 22  Ke akpanikọ, ke owo mîkpesịbeke mme usen oro ẹmụhọ, baba owo* kiet ikpọbọhọke; edi ke ntak ndimek ikọt+ Abasi ẹyesịbe mme usen oro ẹmụhọ.+ 23  “Adan̄aoro edieke owo ekededi ọdọhọde mbufo ete, ‘Sese! Christ mmọmi,’+ m̀mê, ‘Mmọko!’ ẹkûnịm ke akpanikọ.+ 24  Koro mme Christ nsu+ ye mme prọfet nsu+ ẹyedaha ẹda ẹnyụn̄ ẹnam ikpọ idiọn̄ọ+ ye mme utịben̄kpọ man, ke ẹkemede, ẹkpeda ndimek ikọt Abasi ẹtụn usụn̄.+ 25  Sese! Mmebem iso ndụri mbufo utọn̄ do.+ 26  Ke ntre, edieke mme owo ẹdọhọde mbufo ẹte, ‘Sese! Enye odu ke wilderness,’ ẹkûwọrọ ẹka; ‘Sese! Enye odu ke esịt ubet,’ ẹkûnịm ke akpanikọ.+ 27  Koro kpa nte emịnen̄mịnen̄+ ọwọrọde ke mme ikpehe edem usiahautịn ayama ekesịm mme ikpehe edem usoputịn, ntre ke edidu Eyen owo editie.+ 28  Ebiet ekededi emi okpo odude, do ke mme ntrukpom+ ẹdisop idem.+ 29  “Ke ndondo oro ukụt mme usen oro ama ekebe, utịn eyekịm,+ ọfiọn̄+ idinyụn̄ inọhọ un̄wana esie, ndien mme ntantaọfiọn̄ ẹyeto ke enyọn̄ ẹduọn̄ọ, ẹyenyụn̄ ẹnyen̄e mme odudu ikpaenyọn̄.+ 30  Ndien adan̄aoro idiọn̄ọ Eyen owo+ ọyọwọrọ owụt idem ke enyọn̄, ndien ekem kpukpru mme esien ke isọn̄ ẹyeyịbi idemmọ ke eseme,+ ndien mmọ ẹyekụt Eyen owo asan̄ade ke obubịt enyọn̄ edi ye odudu ye akwa ubọn̄.+ 31  Ndien enye oyosio mme angel esie ọdọn̄ ye akwa uyom obukpon̄,+ mmọ ẹyenyụn̄ ẹtan̄ ndimek ikọt+ esie ke ikpehe ofụm mbinan̄+ ẹbon ọtọkiet, ọtọn̄ọde ke utịt ikpaenyọn̄ kiet tutu esịm utịt eken. 32  “Edi ẹkpep n̄kpọ emi ẹto eto fig nte uwụtn̄kpọ: Ke ndondo oro nsek n̄kọk esie esehede onyụn̄ osion̄ode ikọn̄, mbufo ẹfiọk ẹte ndaeyo ke ekpere.+ 33  Kpasụk ntre n̄ko, ke ini mbufo ẹkụtde kpukpru n̄kpọ emi, ẹfiọk ẹte enye ekpere, odu ke enyịnusụn̄.+ 34  Ke akpanikọ ke ndọhọ mbufo nte, emana+ emi idibehe ifep tutu kpukpru n̄kpọ emi ẹwọrọ ẹsu. 35  Enyọn̄ ye isọn̄ ẹyebe ẹfep,+ edi ikọ mi idibehe ifep tutu amama.+ 36  “Baba owo kiet ifiọkke usen ye hour+ oro, mme angel ke heaven ifiọkke, Eyen inyụn̄ ifiọkke, ke mîbọhọke Ete ikpọn̄.+ 37  Koro kpa nte mme usen Noah+ ẹkedide, kpasụk ntre ke edidu Eyen owo edidi.+ 38  Koro kpa nte mmọ ẹkedude ke mme usen oro ẹkebemde ukwọ iso, ẹdia ẹnyụn̄ ẹn̄wọn̄, irenowo ẹdọ ndọ ẹnyụn̄ ẹda iban ẹnọ ke ndọ, tutu esịm usen emi Noah+ odụkde ubom;+ 39  mmọ inyụn̄ ifiọkke tutu ukwọ edi edikpọri mmọ kpukpru efep,+ kpasụk ntre ke edidu Eyen owo edidi. 40  Adan̄aoro owo iba ẹyedu ke in̄wan̄: ẹyeda kiet ẹdaha ẹnyụn̄ ẹkpọn̄ enye eken; 41  iban iba ẹyekọk n̄kpọ ke itiat ukọkn̄kpọ:+ ẹyeda kiet ẹdaha ẹnyụn̄ ẹkpọn̄ enye eken.+ 42  Ke ntre, ẹdu ke ukpeme koro mbufo mîfiọkke usen eke Ọbọn̄ mbufo edidide.+ 43  “Edi ẹfiọk n̄kpọ kiet emi, ẹte, edieke enyeneufọk ọkpọfiọkde ini emi inọ edidide,+ enye okpodu ke edidemede ikponyụn̄ iyakke ẹbụn̄ ufọk esie ẹdụk. 44  Mmọdo mbufo n̄ko ẹdu ke mben̄eidem,+ koro ke hour emi mbufo mîkereke, Eyen owo eyedi. 45  “Anie ndien edi ofụn emi anamde akpanikọ+ onyụn̄ enyenede ọniọn̄ emi eteufọk esie ekemekde ete ese aban̄a mbonufọk imọ, onyụn̄ ọnọ mmọ udia ke nnennen ini?+ 46  Ofụn oro oyokop inemesịt+ edieke eteufọk esie ke edide edisịm okụt enye anamde ntre! 47  Ke akpanikọ ke ndọhọ mbufo nte, Enye eyemek enye ete ese aban̄a kpukpru inyene esie.+ 48  “Edi edieke ofụn oro akabarede ọdiọk onyụn̄ ọdọhọde ke esịt esie ete,+ ‘Eteufọk mi ebịghi ndidi,’+ 49  onyụn̄ ọtọn̄ọ ndimia ekemmọ ifịn, adia onyụn̄ ọn̄wọn̄ n̄kpọ ye mbon mmịn, 50  eteufọk ofụn oro eyedi ke usen oro enye mîdorike enyịn ye ke hour+ oro enye mîdiọn̄ọke, 51  oyonyụn̄ ọnọ enye ata ọkpọsọn̄ ufen+ onyụn̄ ọnọ enye udeme ye mbon mbubịk. Do ke enye editua onyụn̄ ata edet.+

Mme Ikọ Idakisọn̄

At. Ed., “obụkidem.”