Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Matthew 16;1-28

16  Ekem mme Pharisee+ ye mme Sadducee ẹka ẹbịne enye, man ẹkedomo enye idomo, ẹnyụn̄ ẹdọhọ enye ẹte owụt mmimọ idiọn̄ọ emi otode enyọn̄.+  Enye ọbọrọ mmọ ete: “[[Ke mbubreyo, ẹmehe mbufo ndidọhọ ẹte, ‘Enyọn̄ ọyọfọn, koro enyọn̄ eyịbe’;  ndien ke usenubọk, mbufo ẹte, ‘Mfịn eyetuebe onyụn̄ edep edịm, koro enyọn̄ eyịbe, onyụn̄ okpụk.’ Mbufo ẹmefiọk nditịn̄ nte ikpaenyọn̄ etiede, edi mbufo ikemeke ndifiọk mme idiọn̄ọ ini.]]+  Idiọk emana emi esịnde efịbe aka iso ndiyom idiọn̄ọ, edi owo idinọhọ enye idiọn̄ọ+ ndomokiet ke mîbọhọke idiọn̄ọ Jonah.”+ Ekem enye adaha ọkpọn̄ mmọ.+  Edi mme mbet ẹbe ẹka edem n̄kan̄ oko ẹnyụn̄ ẹfre ndida uyo.+  Jesus ọdọhọ mmọ ete: “Ẹtịn̄ enyịn ẹkpeme mbak leaven mme Pharisee ye mme Sadducee.”+  Ntre mmọ ẹtọn̄ọ ndikere ke otu idemmọ, ẹte: “Nnyịn ikadaha uyo ndomokiet idi.”  Ke Jesus ọfiọkde emi, enye ọdọhọ ete: “Ntak emi mbufo ẹkerede n̄kpọ ntem ke otu idem mbufo, koro mbufo mînyeneke uyo, mbufo mbon ekpri mbuọtidem?+  Nte mbufo ifiọkke se emi ẹwọrọde, mîdịghe nte mbufo itịghi uyo ition emi owo tọsịn ition ẹketade ye adan̄a ibat akpasa emi mbufo ẹketan̄de?+ 10  M̀mê uyo itiaba emi owo tọsịn inan̄ ẹketade ye adan̄a ibat akpasa udọn̄n̄kpọ emi mbufo ẹketan̄de?+ 11  Nso inam mbufo mîfiọkke ite n̄ketịn̄ke ye mbufo mban̄a uyo? Edi ẹkpeme mbak leaven mme Pharisee ye mme Sadducee.”+ 12  Do ke mmọ ẹdifiọk ẹte ke enye ikọdọhọke mmimọ ikpeme mbak leaven uyo, edi mbak ukpepn̄kpọ+ mme Pharisee ye mme Sadducee. 13  Edi ke enye ama ekedi mme ikpehe n̄kan̄ Caesarea Philippi, Jesus obụp mme mbet esie ete: “Mme owo ẹdọhọ ke Eyen owo edi anie?”+ 14  Mmọ ẹte: “Ndusụk owo ẹte John Andinịm Owo Baptism,+ mbon efen ẹte Elijah,+ mbon efen n̄ko ẹte Jeremiah mîdịghe kiet ke otu mme prọfet.” 15  Enye obụp mmọ ete: “Edi mbufo ẹdọhọ ke ami ndi anie?”+ 16  Simon Peter ọbọrọ ete: “Afo edi Christ,+ Eyen odu-uwem Abasi.”+ 17  Jesus ọdọhọ enye ete: “Inemesịt edi okwo, Simon eyen Jonah, koro idịghe obụk ye iyịp akayarade emi ọnọ fi, edi Ete mi emi odude ke heaven akayarade.+ 18  N̄ko, ndọhọ fi nte, Afo edi Peter,+ ndien nyọbọp esop mi ke enyọn̄ akamba itiat+ emi, ndien mme inuaotop Udi*+ idikanke enye.+ 19  Nyọnọ fi mme ukpọhọde obio ubọn̄ heaven, ndien se ededi eke afo ọbọpde ke isọn̄ kpa n̄kpọ oro ke ẹbọp ke heaven, se ededi eke afo edinyụn̄ atatde ke isọn̄ kpa n̄kpọ oro ke ẹtat ke heaven.”+ 20  Ekem enye ọsọn̄ọ owụk mme mbet ete ẹkûtịn̄ ẹnọ owo ndomokiet ẹte imọ idi Christ.+ 21  Ọtọn̄ọde ke ini oro ka iso Jesus Christ ọtọn̄ọ ndiwụt mme mbet esie nte ke imọ inyene ndika Jerusalem nnyụn̄ n̄kokụt ediwak ndutụhọ ke ubọk mbiowo ye mbọn̄ oku ye mme scribe,* ye nte ke ẹyewot imọ, imọ iyonyụn̄ iset ke ọyọhọ usen ita.+ 22  Ntem Peter ada enye esịk ada onyụn̄ ọtọn̄ọ ndisua nnọ enye, ete: “Tua idemfo mbọm, Ọbọn̄; n̄kpọ emi idiwọrọke fi tutu amama.”+ 23  Edi, enye ọwọn̄ọde ọdọhọ Peter ete: “Da mi ke edem, Satan!+ Afo edi n̄kpọ iduọ ọnọ mi, koro afo ukereke ekikere Abasi,+ edi ekere eke owo.” 24  Ekem Jesus ọdọhọ mme mbet esie ete: “Edieke owo ekededi oyomde nditiene mi, yak enye akan̄ idemesie onyụn̄ emen eto ndutụhọ esie aka iso+ etiene mi. 25  Koro owo ekededi eke oyomde ndinyan̄a ukpọn̄ esie ọyọduọk enye; edi owo ekededi eke ọduọkde ukpọn̄ esie ke ntak mi oyokụt enye.+ 26  Koro nso udori ke owo edidia edieke enye enyenede ofụri ererimbot edi ataba ukpọn̄ esie?+ mîdịghe nso ke owo edinọ ke ibuot+ ukpọn̄ esie? 27  Koro ẹnịm ẹnọ Eyen owo ndidi ke ubọn̄ Ete esie, asan̄a ye mme angel esie, ndien adan̄aoro enye ọyọnọ owo kiet kiet utịp nte ekemde ye ido esie.+ 28  Ke akpanikọ ke ndọhọ mbufo nte ndusụk owo ẹdu ke otu mmọ emi ẹdade mi emi mîditabike n̄kpa tutu mmọ ẹbem iso ẹkụt Eyen owo nte edide ke obio ubọn̄ esie.”+

Mme Ikọ Idakisọn̄

Gr., “Hades.”
Se ik. id. Mt 2:4.