Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Matthew 15;1-39

15  Ekem mme Pharisee ye mme scribe* ẹto Jerusalem+ ẹdi ẹbịne Jesus, ẹdibụp enye ẹte:  “Ntak emi mme mbet fo ẹbiatde ido mbon eset? Ke uwụtn̄kpọ, mmọ iyetke ubọk mmọ ke ini ẹyomde ndidia udia.”+  Enye ọbọrọ mmọ ete: “Ntak emi mbufo n̄ko ẹbiatde ewụhọ Abasi ke ntak ido eset mbufo?+  Ke uwụtn̄kpọ, Abasi ọdọhọ ete, ‘Kpono usọ ye uka’;+ n̄ko, ‘Yak owo eke osụn̄ide ete m̀mê eka esie okûtre ndikpa.’+  Edi mbufo ẹte, ‘Owo ekededi eke ọdọhọde ete m̀mê eka esie ete: “Se ededi oro nnyenede emi afo ọkpọbọde ufọn oto edi enọ oro nyakde nnọ Abasi,”  inaha enye okpono ete esie ke baba usụn̄ kiet.’+ Ntre mbufo ẹmenam ikọ Abasi akabade edi ikpîkpu ke ntak ido eset mbufo.+  Mbufo mbon mbubịk,+ Isaiah+ ama etịn̄ ntịn̄nnịm ikọ nte odotde aban̄a mbufo, ke ini enye ọkọdọhọde ete,  ‘Mbon emi ẹkpono mi ke n̄kpọkinua mmọ, edi esịt mmọ ada nsannsan ye ami.+  Mmọ ẹtuak ibuot ẹnọ mi ke ikpîkpu, koro mmọ ẹkpepde mme ewụhọ owo ke ukpepn̄kpọ mmọ.’”+ 10  Ntem enye okot otuowo ete ẹsịk ẹkpere onyụn̄ ọdọhọ mmọ ete: “Ẹkop ẹnyụn̄ ẹfiọk se emi ọwọrọde:+ 11  Idịghe se idụkde owo inua asabade owo; edi edi se iwọrọde owo ke inua asabade owo.”+ 12  Ekem mme mbet ẹto ẹdi ẹdidọhọ enye ẹte: “Nte ọmọfiọk ete mme Pharisee ẹma ẹtuak ukot ẹduọn̄ọ ke ini ẹkopde se afo eketịn̄de?”+ 13  Enye ọbọrọ ete: “Ẹyedịbede kpukpru eto emi mîdịghe Ete mi eke heaven ọkọtọ.+ 14  Ẹkpọn̄ mmọ. Mmọ ẹdi mme adausụn̄ emi ẹdide nnan. Ndien edieke nnan adade nnan usụn̄, mmọ mbiba ẹyeduọn̄ọ ẹdụk obube.”+ 15  Peter ọbọrọ enye ete: “Nam uwụtn̄kpọ oro an̄wan̄a nnyịn.”+ 16  Ntem enye obụp ete: “Nte mbufo n̄ko inyeneke ifiọk kan̄a?+ 17  Nte mbufo ifiọkke ite n̄kpọ ekededi eke odụkde owo inua ebe odụk nsia ndien ẹsion̄o ẹdọn̄ ke ekwe? 18  Edi, mme n̄kpọ emi ẹwọrọde owo ke inua ẹto esịt ẹn̄wọn̄ọ, kpa mme n̄kpọ emi ẹsabade owo.+ 19  Ke uwụtn̄kpọ, ndiọi ekikere,+ uwotowo, efịbe, use, inọ, ikọ ntiense nsu, ikọ isụn̄i, ẹto owo ke esịt ẹwọn̄ọ.+ 20  Mme n̄kpọ emi ẹsabade owo; edi ndidia udia ye ubọk emi owo mîyetke isabakede owo.”+ 21  Ekem Jesus ọkpọn̄ do, ọnyọn̄ aka ikpehe n̄kan̄ Tyre ye Sidon.+ 22  Ndien, sese! n̄wan Phoenicia+ kiet emi otode ikpehe oro ọwọrọ edi, onyụn̄ ofiori, ete: “Tua mi mbọm,+ Ọbọn̄, Eyen David. Demon afịna eyen mi an̄wan idiọk idiọk.” 23  Edi enye ibọrọke enye baba ikọ kiet. Ntre mme mbet esie ẹdi ẹdiben̄e enye ẹte: “Dọhọ enye ọnyọn̄; koro enye osụk ofioride etiene nnyịn ke edem.” 24  Enye ọbọrọ ete: “Abasi ikọdọn̄ke mi ntiene owo ekededi ke mîbọhọke mme erọn̄ ufọk Israel emi ẹkesopde usụn̄.”+ 25  N̄wan oro edi edinụhọ ọnọ enye, ete: “Ọbọn̄, n̄wam mi!”+ 26  Enye ọbọrọ ete: “Inenke ndimen udia nditọ ntop nnọ nditọ ebua.” 27  N̄wan oro ọdọhọ ete: “Ih, Ọbọn̄; edi nditọ ebua ẹsikam ẹtan̄ n̄ken̄e udia emi ẹdon̄orede ke okpokoro mme eteufọk mmọ ẹduọn̄ọ ẹdia.”+ 28  Ekem Jesus ọbọrọ enye ete: “O n̄wan, mbuọtidem fo okpon; yak ọwọrọ ọnọ fi kpa nte afo oyomde.” Ndien eyen esie an̄wan okop nsọn̄idem ọtọn̄ọde ke hour oro.+ 29  Ekem Jesus oto do asan̄a ebe idụt oro edikpere inyan̄ Galilee,+ ndien, ke ama ọkọdọk obot,+ enye osụhọde etetie do. 30  Ndien akwa otuowo ẹdaha ẹtiene enye, ẹda mme mbụn̄ọ, mbon emi ẹbiomode ndo, nnan, imụm, ye ediwak mmọ eken ẹdi, ẹnyụn̄ ẹtop mmọ ẹbon enye ke ukot, ndien enye anam udọn̄ọ okụre mmọ;+ 31  tutu idem akpa otuowo nte mmọ ẹkụtde nte imụm ẹtịn̄de ikọ ye nte mbụn̄ọ ẹsan̄ade, nnan ẹnyụn̄ ẹkụtde usụn̄, ndien mmọ ẹtoro Abasi Israel.+ 32  Edi Jesus okot mme mbet esie ẹdi onyụn̄ ọdọhọ mmọ ete:+ “Mbọm+ otuowo emi anam mi, koro usen ita ẹdi emi nte mmọ ẹkedu ye ami mmọ inyụn̄ inyeneke se ẹdiade; nnyụn̄ nyomke ndinam mmọ ẹsan̄a biọn̄ ẹnyọn̄ọ. Idem ẹkeme ndimem mmọ ke usụn̄.” 33  Edi, mme mbet ẹbụp enye ẹte: “M̀mọ̀n̄ ke nnyịn idinyene uyo eke awakde ekem utọ ediwak otuowo emi ke ndobo ndobo ebiet emi?”+ 34  Ndien Jesus obụp mmọ ete: “Mbufo ẹnyene uyo ifan̄?” Mmọ ẹte: “Itiaba, ye n̄kpri iyak ifan̄.” 35  Ntre, ke ama ọkọnọ otuowo uyo ete ẹsụhọde ẹtetie ke isọn̄, 36  enye emen uyo itiaba ye mme iyak oro, ndien ke ama ọkọnọ ekọm, obụn̄ mmọ onyụn̄ edeme mmọ ọnọ mme mbet, ekem mme mbet ẹmen ẹdeme ẹnọ otuowo.+ 37  Kpukpru owo ẹdia ẹyụhọ, ẹnyụn̄ ẹtan̄ mben̄e emi ẹyọhọde ẹsụhọ, ẹyọhọ akpasa udọn̄n̄kpọ itiaba.+ 38  Edi mbon emi ẹkediade ẹkedi owo tọsịn inan̄, isịneke iban ye n̄kpri nditọwọn̄. 39  Ke akpatre, ke ama ọkọnọ otuowo ẹnyọn̄ọ, enye ediere ke ubom onyụn̄ edisịm ikpehe n̄kan̄ Magadan.+

Mme Ikọ Idakisọn̄

Se ik. id. Mt 2:4.