Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Matthew 14;1-36

14  Ke ukem ini oro Herod, andikara n̄kann̄kụk oro, okop etop Jesus+  onyụn̄ ọdọhọ mme asan̄autom esie ete: “Emi edi John Andinịm Owo Baptism. Enye ama eset ke n̄kpa, ndien ntak edi oro enye ekemede ndinam mme utom odudu emi.”+  Koro Herod okomụm John onyụn̄ ọkọbi enye ke ufọk-n̄kpọkọbi ke ntak Herodias n̄wan Philip eyenete esie.+  Koro John ọkọdọhọde enye ete: “Ibet inyịmeke afo ndida enye nnyene.”+  Nte ededi, okposụkedi emi enye okoyomde ndiwot John, enye efehe otuowo, koro mmọ ẹkedade John nte prọfet.+  Edi ke ini ẹkenịmde usọrọ usen emana+ Herod, eyen Herodias an̄wan enek unek do onyụn̄ anam esịt enem Herod etieti  tutu enye ọn̄wọn̄ọ ndinọ enye se ededi oro enye eben̄ede.+  Ekem, nte eka esie eketemede enye, enye ọdọhọ ete: “Nọ mi ibuot John Andinịm Owo Baptism ke usan.”+  Okposụkedi edidem okofụhọde, enye ọnọ uyo ete ẹda ẹsọk enye, ke ntak un̄wọn̄ọ esie ye ke ntak mbon oro ẹketiede ye enye;+ 10  ndien enye ọdọn̄ ete ẹka ẹkebịghi John ibuot ke ufọk-n̄kpọkọbi. 11  Ndien ẹda ibuot esie ẹdi ke usan ẹdiyak ẹnọ eyenan̄wan oro, enye onyụn̄ ada ọsọk eka esie.+ 12  Ke akpatre, mme mbet esie ẹdi ẹdimen okpo esie ẹkebụk+ ndien ẹdi ẹditịn̄ ẹnọ Jesus. 13  Ke ini Jesus okopde emi enye ọkpọn̄ do ediere ke ubom aka ndobo ndobo ebiet man okodu ikpọn̄;+ edi ke ini otuowo ẹkopde, mmọ ẹto mme obio ẹsan̄a ke ukot ẹtiene enye. 14  Ndien ke ini enye ọwọrọde ke ubom edi enye okụt akwa otuowo; ndien mbọm+ mmọ anam enye, enye onyụn̄ ọkọk mbon udọn̄ọ mmọ.+ 15  Edi ke ini esịmde mbubreyo mme mbet esie ẹdi ẹbịne enye ẹnyụn̄ ẹdidọhọ ẹte: “Ebiet emi edi ndobo ndobo ebiet ndien eyo ọsọn̄; nọ otuowo emi ẹnyọn̄ọ, man mmọ ẹkpeka mme obio-in̄wan̄ ẹkedep udia eke mmọ ẹdidiade.”+ 16  Edi, Jesus ọdọhọ mmọ ete: “Mmọ inyeneke ndinyọn̄: Mbufo ẹnọ mmọ n̄kpọ ẹdia.”+ 17  Mmọ ẹdọhọ enye ẹte: “Nnyịn inyeneke n̄kpọ mi ikan uyo ition ye iyak iba.”+ 18  Enye ọdọhọ ete: “Ẹda mmọ ẹsọk mi mi.” 19  Ekem enye ọnọ otuowo uyo ete ẹsụhọde ẹtie ke mbiet onyụn̄ emen uyo ition ye iyak iba oro, emenede enyịn ese enyọn̄ onyụn̄ ọdiọn̄+ mmọ, ndien ke ama okobụn̄ uyo oro, enye edeme mmọ ọnọ mme mbet, mme mbet ndien ẹdeme ẹnọ otuowo.+ 20  Ntre kpukpru owo ẹdia ẹyụhọ, ndien mmọ ẹtan̄ mben̄e ẹyọhọ akpasa duopeba.+ 21  Edi mbon oro ẹkediade ẹkedi owo tọsịn ition, isịneke iban ye n̄kpri nditọwọn̄.+ 22  Ndien, ye unana ubiatini, enye akpak mme mbet esie ete ẹdiere ke ubom ẹbem imọ iso ẹka edem n̄kan̄ oko, ke adan̄aemi enye ọnọde otuowo ẹnyọn̄ọ.+ 23  Ekem, ke ama ọkọnọ otuowo ẹnyọn̄ọ, enye ọdọk obot ikpọn̄ ndikọbọn̄ akam.+ Okposụkedi eyo ama ọkọsọn̄, enye odu do ikpọn̄. 24  Etisịm ini emi, ubom ama odu oyom usụn̄ ọkpọn̄ obot ke ediwak mita, mbufụt mmọn̄ onyụn̄ anam ubom ọsọn̄ ndiwat,+ koro ofụm ọbiọn̄ọde mmọ. 25  Edi ke ekperede ndisịm usiere, enye asan̄a ke enyọn̄ inyan̄ etiene mmọ.+ 26  Ke ini mmọ ẹdade ẹkụt nte enye asan̄ade ke enyọn̄ inyan̄, esịt etịmede mmọ, mmọ ẹte: “Edi mbiet!”+ Ndien mmọ ẹfiori n̄kpo ke ntak ndịk. 27  Edi idaha oro Jesus etịn̄ mme ikọ emi ọnọ mmọ ete: “Ẹsọn̄ esịt, ami ke edi;+ ẹkûfehe ndịk.” 28  Peter ọbọrọ enye ete: “Ọbọn̄, edieke edide afo, dọhọ mi nsan̄a ke enyọn̄ mmọn̄ ntiene fi.” 29  Enye ọdọhọ ete: “Di!” Ndien Peter ọwọrọ ke ubom,+ asan̄a ke enyọn̄ mmọn̄ ebịne Jesus. 30  Edi ke esede oyobio oro, ndịk anam enye, ndien enye ọtọn̄ọ ndiden̄, onyụn̄ ofiori ete: “Ọbọn̄, nyan̄a mi!” 31  Kpa idaha oro Jesus anyanade ubọk esie omụm enye onyụn̄ ọdọhọ ete: “Afo owo ekpri mbuọtidem, ntak emi eyịkde?”+ 32  Ndien ke mmọ ẹma ẹkedọk ẹdụk ubom, oyobio oro odobo. 33  Ekem mbon oro ẹdude ke ubom ẹnụhọ ẹnọ enye ẹnyụn̄ ẹdọhọ ẹte: “Ke akpanikọ, afo edi Eyen Abasi.”+ 34  Ndien mmọ ẹbe ẹdisịm isọn̄ Gennesaret.+ 35  Edikem ke ini mbon edem oro ẹdide ẹdidiọn̄ọ enye, mmọ ẹdọn̄ ẹka ke ofụri n̄kann̄kụk oro, ndien mme owo ẹda kpukpru mbon emi ẹdọn̄ọde ẹsọk enye.+ 36  Ndien mmọ ẹka ẹkekpe enye ubọk ẹte mmọ ẹkam ẹtotụk nyeriye ewụra esie;+ ndien kpukpru mbon emi ẹtụkde ẹkop nsọn̄idem.

Mme Ikọ Idakisọn̄