Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Mark 9;1-50

9  N̄ko-n̄ko, enye ọdọhọ mmọ ete: “Ke akpanikọ ke ndọhọ mbufo, Ndusụk owo ẹdu ke otu mmọ emi ẹdade mi emi mîditabike n̄kpa tutu mmọ ẹbem iso ẹkụt obio ubọn̄ Abasi nte edide ke odudu.”+  Ekem usen itiokiet ke ukperedem, Jesus ada Peter ye James ye John ọdọk edikon̄ obot man ẹkedu ke idemmọ ikpọn̄. Ndien mbiet esie okpụhọde ke iso mmọ,+  ewụra esie onyụn̄ akabade esem, afia akan nte eyet ọfọn̄ ekededi ke isọn̄ ekemede ndinam enye afia.+  N̄ko, Elijah ye Moses ẹbiọn̄ọde mmọ ke iso, ẹnyụn̄ ẹneme nneme ye Jesus.+  Ndien Peter ọdọhọ Jesus ete: “Rabbi, ọfọn nnyịn ndidu mi, ntre yak nnyịn iwụk tent ita, kiet enyene fi, kiet enyene Moses, kiet onyụn̄ enyene Elijah.”+  Ke akpanikọ, enye ikọfiọkke se ekpetịn̄de, koro mmọ ẹma ẹnen̄ede ẹkop ndịk.  Ndien obubịt enyọn̄ oboho, edifụk mmọ, uyo+ onyụn̄ oto ke obubịt enyọn̄ oro ọwọrọ ete: “Emi edi edima Eyen mi;+ ẹkpan̄ utọn̄ ẹnọ enye.”+  Ndien, kpa idaha oro, mmọ ẹse ẹkanade inyụn̄ ikwe owo ndomokiet odude ye mmọ aba, ke mîbọhọke Jesus ikpọn̄.+  Nte mmọ ẹtode ke obot ẹsụhọde, enye owụk mmọ in̄wan̄-in̄wan̄ ete ẹkûtịn̄+ se mmọ ẹkekụtde ẹnọ baba owo kiet, tutu ke Eyen owo ama ekeset ke n̄kpa.+ 10  Ndien mmọ ẹmụm ikọ oro ẹsịn ke esịt, edi ẹneme ke otu idemmọ se ediset ke n̄kpa emi ọkpọwọrọde. 11  Ndien mmọ ẹbụp enye, ẹte: “Ntak emi mme scribe* ẹdọhọde ẹte ke ana Elijah+ ebem iso edi?”+ 12  Enye ọdọhọ mmọ ete: “Elijah ebebem iso edi edidiọn̄ kpukpru n̄kpọ;+ edi ẹkenam didie ẹwet ẹban̄a Eyen owo ẹte ke ana enye okụt ediwak ndutụhọ,+ ke owo idinyụn̄ idaha enye ke n̄kpọ?+ 13  Edi ndọhọ mbufo nte, Elijah,+ ke akpanikọ, emedi, ndien mmọ ẹma ẹnam enye adan̄a ediwak n̄kpọ nte mmọ ẹyomde, kpa nte ẹwetde ẹban̄a enye.”+ 14  Ekem ke ini mmọ ẹdide ẹdisịm mme mbet eken, mmọ ẹkụt akwa otuowo ẹkande mmọ ẹkụk ye mme scribe ẹnenide eneni ye mmọ.+ 15  Edi ke ndondo oro ofụri otuowo ẹdade ẹkụt enye idem akpa mmọ, ndien mmọ ẹfehe ẹtiene enye, ẹkekọm enye. 16  Ndien enye obụp mmọ ete: “Nso ke mbufo ẹneni ye mmọ?” 17  Ekem owo kiet ke otu oro ọbọrọ enye ete: “Andikpep, n̄kada eyeneren mi nsọk fi koro enye enyenede spirit imụm;+ 18  ndien ebiet ekededi eke spirit emi omụmde enye, osio enye ọduọk ke isọn̄, enye osio efot onyụn̄ ata edet ndien ọbọ enye in̄wek. Ndien mma ndọhọ mme mbet fo ẹbịn enye ẹduọk, edi mmọ ikemeke.”+ 19  Enye ọbọrọ mmọ ete: “O emana unana mbuọtidem,+ adan̄a didie ke ndika iso ye mbufo? Adan̄a didie ke ndiyọ mbufo? Ẹda enye ẹsọk mi.”+ 20  Ntre mmọ ẹda enye ẹsọk enye. Edi ke ini spirit oro okụtde enye, enye esịn̄ede eyen oro kpa idaha oro, ndien enye ọduọ ke isọn̄ amian̄a, osion̄o efot.+ 21  Ndien enye obụp ete esie ete: “Ebịghi adan̄a didie nte n̄kpọ emi ọkọtọn̄ọ ndinam enye?” Enye ọdọhọ ete: “Toto ke uyen; 22  ndien esisio enye esịn ke ikan̄ ye ke mmọn̄ ediwak ini man owot enye.+ Edi edieke afo ekemede ndinam n̄kpọ, tua nnyịn mbọm nyụn̄ n̄wam nnyịn.” 23  Jesus ọdọhọ enye ete: “Ikọ oro, ‘Edieke afo ekemede’! Kamse, kpukpru n̄kpọ ẹkeme ndiwọrọ nnọ owo edieke enye enyenede mbuọtidem.”+ 24  Ete ekpri eyen emi ofiori kpa idaha oro ete: “Mmenyene mbuọtidem! N̄wam mi ke ebiet oro nnanade mbuọtidem!”+ 25  Edi ke ini Jesus okụtde nte otuowo ẹbụn̄ọde ẹtiene mmọ, enye aduari+ ndedehe spirit oro, ọdọhọde enye ete: “Afo spirit imụm ye inan, mmowụk fi, wọrọ enye ke idem, kûnyụn̄ udụk enye ke idem aba.” 26  Ndien ke ama okofiori onyụn̄ esịn̄ede enye ediwak ini enye ọwọrọ;+ ndien enye etie nte akpa, tutu ata ediwak mmọ ẹdọhọ ẹte: “Enye akpa!” 27  Edi Jesus omụm enye ubọk emenede, ndien enye adaha ke enyọn̄.+ 28  Ntre ke enye ama okodụk ufọk, mme mbet esie ẹbụp enye ke ini mmọ ikpọn̄ ẹdude ye enye ẹte: “Ntak emi nnyịn mîkekemeke ndibịn enye nduọk?”+ 29  Ndien enye ọbọrọ mmọ ete: “N̄kpọ ndomokiet ikemeke ndinam orụk enye emi ọwọrọ, ibọhọke akam.”+ 30  Mmọ ẹdaha do ẹsan̄a ẹbe Galilee, edi enye iyomke owo ekededi ọfiọk. 31  Koro enye ekekpepde mme mbet esie n̄kpọ onyụn̄ ọdọhọde mmọ ete: “Ẹmọn̄ ẹyak Eyen owo ẹsịn mme owo ke ubọk, ndien mmọ ẹyewot enye,+ edi, kpa ye ẹwotde enye, enye eyeset ke usen ita ẹbede.”+ 32  Nte ededi, mmọ ifiọkke se ikọ oro ọwọrọde, ndịk inyụn̄ iyakke mmọ ẹbụp enye.+ 33  Ekem mmọ ẹdi ẹdidụk Capernaum. Ndien ke ini enye odude ke esịt ufọk enye obụp mmọ ete: “Nso ke mbufo ẹkeneni ke usụn̄?”+ 34  Mmọ ẹdodop, koro ke usụn̄ mmọ ẹkeneni ke otu idemmọ m̀mê anie okpon akan.+ 35  Ntre enye osụhọde etetie, okot mbet duopeba emi, onyụn̄ ọdọhọ mmọ ete: “Edieke owo ekededi oyomde ndidi akpa, ana enye edi akpatre onyụn̄ asan̄a utom ọnọ kpukpru mmọ eken.”+ 36  Ndien enye emen ekpri eyenọwọn̄, anam ada ke ufọt mmọ onyụn̄ ada ubọk esie awan̄ enye onyụn̄ ọdọhọ mmọ ete:+ 37  “Owo ekededi eke adarade kiet ke otu orụk n̄kpri nditọ emi ke ntak enyịn̄ mi, adara mi; ndien owo ekededi eke adarade mi, idarake mi ikpọn̄, edi adara n̄ko enye emi okosiode mi ọdọn̄.”+ 38  John ọdọhọ enye ete: “Andikpep, nnyịn ima ikụt owo kiet adade enyịn̄ fo ebịn mme demon ndien nnyịn idomo ndikpan enye,+ koro enye mîsan̄ake ye nnyịn.”+ 39  Edi Jesus ọdọhọ ete: “Ẹkûdomo ndikpan enye, koro idụhe owo eke edinamde utom odudu ke enyịn̄ mi oro edikemede ndisọp nsụn̄i mi;+ 40  koro owo eke mîbiọn̄ọke nnyịn ada ye nnyịn.+ 41  Koro owo ekededi eke ọnọde mbufo cup+ mmọn̄ kiet ẹn̄wọn̄ ke ntak oro mbufo ẹdide eke Christ,+ ke akpanikọ ke ndọhọ mbufo, enye iditabake utịp esie ke baba usụn̄ kiet. 42  Edi owo ekededi eke anamde kiet ke otu n̄kpri owo emi ẹnịmde ke akpanikọ atuak ukot ọduọ, ọkpọfọn ye enye akan edieke ẹkpemende utọ itiat ukọkn̄kpọ emi ass esiyụtde ẹkọn̄ enye ke itọn̄ ẹnyụn̄ ẹtop enye ẹduọk ke inyan̄.+ 43  “Ndien edieke ubọk fo anamde fi atuak ukot ọduọ, sịbe enye fep; ọfọn afo ndibiomo ndo ndụk uwem akan ndinyene ubọk iba ndụk Gehenna, ndụk ikan̄ oro owo mîkemeke ndinịme.+ 44*  —— 45  Ndien edieke ukot fo anamde fi atuak ukot ọduọ, sịbe enye fep; ọfọn afo ndidi mbụn̄ọ+ ndụk uwem akan ndinyene ukot iba ndien ẹtop fi ẹduọk ke Gehenna.+ 46*  —— 47  Ndien edieke enyịn fo anamde fi atuak ukot ọduọ, top enye duọk;+ ọfọn afo ndida enyịn kiet mbe ndụk obio ubọn̄ Abasi akan ndinyene enyịn iba ndien ẹtop fi ẹduọk ke Gehenna,+ 48  ke ebiet eke ndọn̄ mmọ mîkpaha, owo mînyụn̄ inịmeke ikan̄.+ 49  “Koro ẹyeduọk kpukpru owo ikan̄ nte n̄kpọ eke ẹduọkde inụn̄.+ 50  Inụn̄ ọfọn; edi edieke inụn̄ adabade, mbufo ẹdida nso ẹnam enye enem?+ Ẹnyene inụn̄+ ke idem mbufo, ẹnyụn̄ ẹtie ke emem+ ye kiet eken.”

Mme Ikọ Idakisọn̄

Se ik. id. Mr 1:22.
Se ik. id. Mr 7:16.
Se ik. id. Mr 7:16.