Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Mark 3;1-35

3  Enye ọtọn̄ọ ntak odụk synagogue, ndien owo emi ubọk esie akpade odu do.+  Ntre mmọ ẹtịm ẹkpeme enye ẹte ise m̀mê enye ọyọkọk owo emi udọn̄ọ ke sabbath, man mmọ ẹkpedori enye ikọ.+  Ndien enye ọdọhọ owo emi ubọk esie akpade ete: “Daha ke enyọn̄ dida mi ke ufọt.”  Ekem enye ọdọhọ mmọ ete: “Nte ibet enyịme ẹnam eti n̄kpọ ke sabbath m̀mê enyịme ẹnam idiọk, ẹnyan̄a m̀mê ẹwot ukpọn̄?”+ Edi mmọ ẹdodop.  Ndien ke enye ama ekese mmọ akanade ye ifụtesịt, sia okopde mfụhọ etieti ke ntak isọn̄esịt mmọ,+ enye ọdọhọ owo oro ete: “Nyanade ubọk fo.” Enye onyụn̄ anyanade, ndien ubọk esie akabade ọfọn.+  Edi mme Pharisee ẹwọn̄ọ ẹnyụn̄ ẹtọn̄ọ kpa idaha oro ndidụk ediomi ye n̄ka mme anditiene Herod+ mban̄a enye, man ẹwot enye.+  Edi Jesus adaha ye mme mbet esie aka inyan̄; ndien akwa udịmowo ẹto Galilee ye Judea ẹtiene enye.+  Akwa udịmowo ẹnyụn̄ ẹto Jerusalem ye Idumea ye edem Jordan oko ye n̄kann̄kụk Tyre+ ye Sidon, ẹtiene enye, ke ini mmọ ẹkopde adan̄a ediwak n̄kpọ eke enye anamde.  Ndien enye ọdọhọ mme mbet esie ete ẹsinam ekpri ubom odu kpukpru ini mbak otuowo ẹdiberi imọ. 10  Koro enye ọkọkde ediwak owo udọn̄ọ, tutu kpukpru mbon oro ẹnyenede ndiọi udọn̄ọ ẹduọn̄ọ enye ke idem man ẹtụk enye.+ 11  Idem ndedehe spirit,+ ini ekededi oro mmọ ẹkụtde enye, mmọ ẹduọn̄ọ ẹna enye ke iso ẹnyụn̄ ẹfiori ẹte: “Afo edi Eyen Abasi.”+ 12  Edi ediwak ini enye ọsọn̄ọ owụk mmọ ete ẹkûnam ẹdiọn̄ọ imọ.+ 13  Ndien enye ọdọk obot onyụn̄ okot mbon oro enye oyomde,+ ndien mmọ ẹdaha ẹtiene enye.+ 14  Enye onyụn̄ enịm otu emi edide owo duopeba, emi enye okonyụn̄ okotde “mme apostle,” man mmọ ẹkpeka iso ẹdu ye enye, enye okponyụn̄ ọdọn̄ mmọ ẹka ẹkekwọrọ ikọ+ 15  ẹnyụn̄ ẹnyene odudu ndibịn mme demon.+ 16  Ndien otu emi edide owo duopeba oro enye ekenịmde ẹkedi Simon, emi enye n̄ko ọkọnọde udorienyịn̄ oro Peter,+ 17  ye James eyen Zebedee ye John eyeneka James+ (enye n̄ko ọnọ mmọ emi udorienyịn̄ oro Boanerges, emi ọwọrọde Nditọ Obuma), 18  ye Andrew ye Philip ye Bartholomew ye Matthew ye Thomas ye James eyen Alphaeus ye Thaddaeus ye Simon Enyene-Ifịk 19  ye Judas Iscariot, emi akadade enye ọnọ ke ukperedem.+ Ekem enye adaha odụk ufọk. 20  Otuowo ẹtọn̄ọ ntak ẹsop idem, tutu mmọ ikam ikemeke ndidia udia.+ 21  Edi ke ini iman+ esie ẹkopde ẹban̄a emi, mmọ ẹwọn̄ọ ẹka ndimụm enye, koro mmọ ẹdọhọde ẹte: “Ibuot ọbọhọ enye.”+ 22  N̄ko, mme scribe* emi ẹketode Jerusalem ẹsụhọde ẹdi ẹdọhọ ẹte: “Enye enyene Beelzebub, enye onyụn̄ ada andikara mme demon ebịn mme demon.”+ 23  Ntre, ke ama okokot mmọ ẹdi, enye ada mme uwụtn̄kpọ etịn̄ ikọ ọnọ mmọ ete: “Didie ke Satan ekeme ndibịn Satan? 24  Kamse, edieke obio ubọn̄ abaharede ada an̄wana ye idemesie, obio ubọn̄ oro ikemeke ndisọn̄ọ nda;+ 25  n̄ko edieke ufọk abaharede ada an̄wana ye idemesie, ufọk oro idikemeke ndisọn̄ọ nda.+ 26  N̄ko, edieke Satan adahade ada an̄wana ye idemesie onyụn̄ abaharede, enye ikemeke ndisọn̄ọ nda, edi ọmọn̄ edisịm utịt.+ 27  Ke akpanikọ, baba owo kiet emi odụkde ufọk ọkpọsọn̄ owo ikemeke ndibụme+ inyene esie ke mîbọhọke enye ebem iso ọbọp ọkpọsọn̄ owo emi, adan̄aoro ke enye edibụme ufọk esie.+ 28  Ke akpanikọ ke ndọhọ mbufo nte ẹyefen nditọ owo kpukpru n̄kpọ, inamke n̄kpọ m̀mê nso idiọkn̄kpọ ke mmọ ẹnam, m̀mê nso ikọ isụn̄i ke mmọ ẹtịn̄.+ 29  Nte ededi, owo ekededi eke etịn̄de ikọ isụn̄i adian edisana spirit inyeneke edifen tutu amama, edi enyene ubiomikpe nsinsi idiọkn̄kpọ.”+ 30  Emi edi koro mmọ ẹdọhọde ẹte: “Enye enyene ndedehe spirit.”+ 31  Ekem eka esie ye nditọeka esie iren+ ẹdi, ndien mmọ ẹda ke an̄wa ẹdọn̄ ẹdụk ẹkekot enye.+ 32  Edi, otuowo ẹtie ẹkanade enye ẹkụk, ntre mmọ ẹdọhọ enye ẹte: “Sese! Eka fo ye nditọeka fo iren ke ẹyom fi ke an̄wa.”+ 33  Edi enye ọbọrọ mmọ ete: “Anie edi eka mi ye nditọeka mi iren?”+ 34  Ndien ke esede mbon oro ẹtiede ẹkanade enye, enye ọdọhọ ete: “Sese, eka mi ye nditọeka mi iren!+ 35  Owo ekededi eke anamde uduak Abasi, enye emi edi eyeneka mi eren ye eyeneka mi an̄wan ye eka mi.”+

Mme Ikọ Idakisọn̄

Se ik. id. Mr 1:22.