Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Mark 16;1-20

16  Ntre ke sabbath+ ama ekebe, Mary Magdalene,+ ye Mary eka James, ye Salome ẹdep ufuọn̄n̄kpọ man ẹda ẹkeyet enye.+  Ndien mmọ ẹdaha ke tụhi-tụhi usenubọk akpa usen+ urua, ẹnyụn̄ ẹdisịm udi ke utịn ama akasiaha.+  Ndien mmọ ẹneme ye kiet eken ẹte: “Anie edikpat itiat osio ke inua udi ọnọ nnyịn?”  Edi ke ini mmọ ẹmenerede enyịn ẹse, mmọ ẹkụt ke ẹma ẹkpat itiat ẹsio, okposụkedi enye okokponde etieti.+  Ke ini mmọ ẹdụkde esịt udi, mmọ ẹkụt akparawa kiet nte etiede ke n̄kan̄ nnasia esịne afia ewụra, ndien idem akpa mmọ.+  Enye ọdọhọ mmọ ete: “Ẹkûyak idem akpa mbufo. Mbufo ẹyom Jesus eyen Nazareth, emi ẹkekọn̄de ke eto.+ Ẹma ẹnam enye eset,+ enye idụhe mi. Sese! Ebiet emi mmọ ẹkenịmde enye.+  Edi ẹka ẹketịn̄ ẹnọ mme mbet esie ye Peter ẹte, ‘Enye ke ebem mbufo iso aka Galilee;+ mbufo ẹdikụt enye do, kpa nte enye ọkọdọhọde mbufo.’”+  Ntre ke ini mmọ ẹwọn̄ọde mmọ ẹfen̄e ẹkpọn̄ udi oro, koro idem ẹkenyekde onyụn̄ akpade mmọ etieti. Ndien mmọ itịn̄ke baba n̄kpọ kiet inọ owo ndomokiet, koro ndịk anamde mmọ.+ IBIO IBIO UTỊT Ndusụk uwetn̄kpọ ye mme edikabade eke ukperedem ẹsịne ibio ibio utịt ke ẹkụrede Mark 16:8, nte etienede mi: Edi kpukpru n̄kpọ oro ẹkewụkde mmọ, mmọ ẹbụk ibio ibio ẹnọ mbon oro ẹdude ẹkpere Peter. N̄ko-n̄ko, ke mme n̄kpọ emi ẹma ẹkebe, Jesus osio mmọ ọdọn̄ ete ẹtọn̄ọ ke edem usiahautịn tutu esịm edem usoputịn ẹtan̄a edisana ikọ emi mîkemeke ndibiara emi aban̄ade nsinsi edinyan̄a. ANYAN UTỊT Ndusụk uwetn̄kpọ eset (Codex Alexandrinus, Codex Ephraemi, Codex Bezae) ye mme edikabade (Latin Vulgate, Curetonian Syriac, Syriac Peshitta) ẹdian anyan utịt emi etienede mi, edi emi mîdụhe ke Codex Sinaiticus, Codex Vaticanus, n̄wed Sinaitic Syriac, ye Edikabade eke usem Armenian:  Ke enye ama ekeset ke tụhi-tụhi usenubọk akpa usen urua enye ebem iso ayarade idem owụt Mary Magdalene, emi enye ekebịnde demon itiaba osion̄o ke idem. 10  Enye aka eketịn̄ ọnọ mbon oro ẹkedude ye enye, nte mmọ ẹfụhọde ẹnyụn̄ ẹtuan̄ade. 11  Edi, ke ini mmọ ẹkopde ẹte enye edidu uwem ye nte ke n̄wan emi ama okụt enye, mmọ inịmke ke akpanikọ. 12  Akan oro, ke mme n̄kpọ emi ẹma ẹkebe, enye ayarade idem ke ido en̄wen owụt owo mmọ iba nte mmọ ẹsan̄ade ke usụn̄ ẹka obio-in̄wan̄; 13  ndien mmọ ẹfiak ẹdi ẹditịn̄ ẹnọ mmọ eken. Edi mmọ inịmke mmọ emi ke akpanikọ. 14  Edi ke ukperedem enye ayarade idem ọnọ mbet duopekiet nte mmọ ẹtiede ke okpokoro, enye onyụn̄ asua ọnọ mmọ ke ntak unana mbuọtidem ye isọn̄esịt mmọ, koro mmọ mîkenịmke mbon oro ẹkekụtde enye ke enye ama ekeset ke n̄kpa. 15  Ndien enye ọdọhọ mmọ ete: “Ẹka ke ofụri ererimbot ẹnyụn̄ ẹkekwọrọ eti mbụk ẹnọ kpukpru edibotn̄kpọ. 16  Ẹyenyan̄a owo eke enịmde ke akpanikọ onyụn̄ anade baptism, edi ikpe oyobiom owo eke mînịmke ke akpanikọ. 17  N̄ko-n̄ko, mme idiọn̄ọ emi ẹyetiene mmọ eke ẹnịmde ke akpanikọ: Mmọ ẹyeda enyịn̄ mi ẹbịn mme demon, mmọ ẹyesem nsio nsio usem, 18  ndien mmọ ẹyeda ubọk mmọ ẹmen urụkikọt, onyụn̄ edieke mmọ ẹn̄wọn̄de n̄kpọ ekededi emi ekemede ndiwot owo, n̄kpọ idinamke mmọ. Mmọ ẹyedori mbon udọn̄ọ ubọk, ndien mmọ emi ẹyekop nsọn̄idem.” 19  Ntre, ndien, ke Ọbọn̄ Jesus ama eketịn̄ ikọ ye mmọ ama, ẹmen enye ẹdọk ke heaven, enye onyụn̄ osụhọde etetie ke ubọk nnasia Abasi. 20  Mmọ, ndien, ẹwọn̄ọ ẹkekwọrọ ikọ ke kpukpru ebiet, ke adan̄aemi Ọbọn̄ anamde utom ye mmọ onyụn̄ ọsọn̄ọde etop oro ebe ke mme idiọn̄ọ eke ẹsan̄ade ye emi.

Mme Ikọ Idakisọn̄