Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Mark 14;1-72

14  Edi osụhọ usen iba+ mbemiso passover+ ye usọrọ+ uyo eke leaven mîdụhe. Ndien mbọn̄ oku ye mme scribe* ke ẹyom usụn̄ ndida n̄kari mmụm enye n̄wot;+  koro mmọ ẹsụk ẹdọhọde ẹte: “Yak okûdi ke ini usọrọ; mbak ndutịme edidu ke otu mme owo.”+  Ndien ke adan̄aemi enye odude ke Bethany ke ufọk Simon emi ọkọdọn̄ọde akpamfia,+ nte enye etiede ke itie udia, n̄wan kiet akama otu alabaster emi esịnede edifuọn̄ aran, ata nard, emi ọsọn̄de urua etieti, edi. Enye obom otu alabaster oro onyụn̄ ọtọhọ aran oro ọduọk enye ke ibuot.+  Edi ndusụk owo ẹdu do emi ẹfụtde esịt ke otu idemmọ ẹte: “Ntak emi ẹbahade edifuọn̄ aran emi?+  Koro ẹkpekenyam edifuọn̄ aran emi ẹbe denarius ikie ita ẹnyụn̄ ẹda ẹnọ mme ubuene!” Mmọ ẹnyụn̄ ẹyat esịt etieti ye n̄wan oro.+  Edi Jesus ọdọhọ ete: “Ẹkpọn̄ enye. Ntak emi ẹfịnade enye? Enye akanam eti n̄kpọ ke idem mi.+  Koro mme ubuene ẹdodu ye mbufo kpukpru ini,+ ndien ini ekededi oro mbufo ẹyomde ẹmekeme ndifọn ido ye mmọ, edi ami ndidụhe ye mbufo kpukpru ini.+  Enye akanam se enye ekemede; enye ekebem iso eyet mi edifuọn̄ aran ke idem eben̄e ini oro ẹdibụkde mi.+  Ke akpanikọ ke ndọhọ mbufo, Ebiet ekededi emi ẹdikwọrọde eti mbụk ke ofụri ererimbot,+ ẹyetịn̄ n̄ko se n̄wan emi akanamde ndida nti enye.”+ 10  Ekem Judas Iscariot, owo kiet ke otu mbet duopeba, adaha ebịne mbọn̄ oku man ada enye ọnọ mmọ.+ 11  Ke ini mmọ ẹkopde emi, mmọ ẹdat esịt ẹnyụn̄ ẹn̄wọn̄ọ ndinọ enye okụk silver.+ Ntre enye ọtọn̄ọ ndiyom mmemmem usụn̄+ ndida enye nnọ. 12  Ekem ke akpa usen usọrọ uyo eke leaven mîdụhe,+ emi ẹsiwade unam uwa passover, mme mbet esie+ ẹbụp enye ẹte: “M̀mọ̀n̄ ke afo oyom nnyịn ika iketịm n̄kpọ inọ fi man adia passover?”+ 13  Ndien enye osio owo iba ke otu mbet esie ọdọn̄ onyụn̄ ọdọhọ mmọ ete: “Ẹdụk obio, ndien owo kiet emi obiomde aban̄ mmọn̄ oyosobo ye mbufo.+ Ẹtiene enye, 14  ndien ebiet ekededi eke enye ebede odụk ẹdọhọ enyeneufọk ẹte, ‘Andikpep ọdọhọ ete: “Ubet isen emi ami ndidiade passover+ ye mme mbet mi+ odu m̀mọ̀n̄?”’ 15  Ndien enye oyowụt mbufo akwa ubet enyọn̄, emi ẹbanade ẹben̄e; mbufo ẹnyụn̄ ẹtịm n̄kpọ do ẹben̄e nnyịn.”+ 16  Ntre mme mbet ẹwọn̄ọ, ẹkedụk obio ẹnyụn̄ ẹkụt kpa nte enye ọkọdọhọde mmọ; ndien mmọ ẹtịm n̄kpọ ẹben̄e passover.+ 17  Ke mbubreyo enye asan̄a ye mbet duopeba edi.+ 18  Ndien nte mmọ ẹtiede ke okpokoro ẹdia udia, Jesus ọdọhọ ete: “Ke akpanikọ ke ndọhọ mbufo, Owo kiet ke otu mbufo, emi adiade udia+ ye ami, ayada mi ọnọ.”+ 19  Mmọ ẹtọn̄ọ ndifụhọ ndien owo kiet kiet ọdọhọ enye ete: “Ndi ami?”+ 20  Enye ọdọhọ mmọ ete: “Edi kiet ke otu mbufo mbet duopeba, emi edebide uyo ke usan ye ami.+ 21  Ke akpanikọ, Eyen owo ọmọn̄ ọnyọn̄, kpa nte ẹwetde ẹban̄a enye, edi mbọm owo oro adade Eyen owo ọnọ! Ọkpọfọn ye owo oro akan edieke enye mîkpakamanake.”+ 22  Ekem nte mmọ ẹsụk ẹdiade udia, enye emen uyo, ọdiọn̄, obụn̄ onyụn̄ ayak ọnọ mmọ, onyụn̄ ọdọhọ ete: “Ẹbọ, emi ada aban̄a idem mi.”+ 23  Ndien enye emen cup, ọnọ ekọm onyụn̄ ayak ọnọ mmọ, ndien kpukpru mmọ ẹbọ ẹn̄wọn̄.+ 24  Ndien enye ọdọhọ mmọ ete: “Emi ada aban̄a iyịp+ mi, kpa ‘iyịp ediomi,’+ emi ẹdiduọkde+ kaban̄a ediwak owo.+ 25  Ke akpanikọ ke ndọhọ mbufo, Ndin̄wọn̄ke aba mfri vine tutu esịm usen oro ndin̄wọn̄de enye obufa ke obio ubọn̄ Abasi.”+ 26  Ke akpatre, ke ẹma ẹkekwọ ikwọ itoro,+ mmọ ẹwọn̄ọ ẹka Obot Olive.+ 27  Ekem Jesus ọdọhọ mmọ ete: “Kpukpru mbufo ẹyetuak ukot ẹduọn̄ọ, koro ẹwet ẹte, ‘Nyowot ekpemerọn̄,+ ndien mme erọn̄ ẹyesuana.’+ 28  Edi ke mma nset nyebem mbufo iso n̄ka Galilee.”+ 29  Edi Peter ọdọhọ enye ete: “Idem ekpedi kpukpru mmọ eken ẹtuak ukot ẹduọn̄ọ, ami ndiduọhọ.”+ 30  Ndien Jesus ọdọhọ enye ete: “Ke akpanikọ ke ndọhọ fi, Mfịn emi, ih, okoneyo emi, mbemiso ekikọ ọkpọk utịm ikaba, afo ayakan̄ mi utịm ikata.”+ 31  Edi enye etịn̄ ye nsọn̄uyo ete: “Akpanana nte n̄kpa ye afo, ndidehedei n̄kan̄ fi.” N̄ko, kpukpru mmọ eken ẹtịn̄ kpa ntre.+ 32  Ntre mmọ ẹdisịm ebiet kiet emi ekerede Gethsemane, ndien enye ọdọhọ mme mbet esie ete: “Ẹsụhọde ẹtie mi ke adan̄aemi n̄kade n̄kọbọn̄ akam.”+ 33  Ndien enye ada Peter ye James ye John+ adaha, idem onyụn̄ ọtọn̄ọ ndinyek enye, esịt onyụn̄ etịmede enye etieti.+ 34  Ndien enye ọdọhọ mmọ ete: “Ukpọn̄ mi ofụhọ+ etieti, ekpere ndikpa. Ẹtie mi ẹkpeme.”+ 35  Ndien ke ini enye asan̄ade esisịt aka iso enye ọduọ ke isọn̄ onyụn̄ ọtọn̄ọ ndibọn̄ akam ete, edieke usụn̄ odude, yak hour emi ebe ọkpọn̄ imọ.+ 36  Enye onyụn̄ ọdọhọ ete: “Abba, Ete,+ afo emekeme ndinam kpukpru n̄kpọ; men cup emi kpọn̄ mi. Edi yak okûdi se ami nyomde, edi yak edi se afo oyomde.”+ 37  Ndien enye edi edikụt mmọ nte ẹdede idap, onyụn̄ obụp Peter ete: “Simon, nte afo edede? Nte afo ukemeke ndikpeme ke hour kiet?+ 38  Ẹdu ke ukpeme ẹnyụn̄ ẹbọn̄ akam,+ mbak mbufo ẹdidụk idomo. Ke akpanikọ, spirit enyịme, edi obụkidem ememem.”+ 39  Ndien enye afiak aka ọkọbọn̄ akam, etịn̄ kpa ikọ oro.+ 40  Enye onyụn̄ afiak edi edikụt mmọ nte ẹdede idap, koro enyịn etiede mmọ idap idap, ntre mmọ ifiọkke se ẹkpebọrọde enye.+ 41  Ekem enye edi ọyọhọ utịm ikata onyụn̄ ọdọhọ mmọ ete: “Ke utọ ini emi mbufo ke ẹde idap ẹnyụn̄ ẹduọk odudu! Ekem adan̄aoro! Hour oro edikem!+ Sese! Ẹda Eyen owo ẹsịn mme anamidiọk ke ubọk.+ 42  Ẹdaha ke enyọn̄, ẹyak inyọn̄ọ.+ Sese! Andida mi nnọ asan̄a ekpere.”+ 43  Ndien kpa idaha oro, ke adan̄aemi enye osụk etịn̄de ikọ, Judas, kiet ke otu mbet duopeba, edisịm, ndien otuowo emi ẹtode edem mbọn̄ oku ye mme scribe ye mbiowo ẹsan̄a ye enye ẹkama akan̄kan̄ ye okpoyon̄.+ 44  Edi andida enye nnọ ama ọnọ mmọ idiọn̄ọ, ete: “Owo ekededi eke nditịmde inua, edi enye; ẹmụm enye ẹda ẹdaha sụn̄.”+ 45  Ndien enye ebe nnennen edi onyụn̄ asan̄a ekpere enye onyụn̄ okot enye: “Rabbi!” onyụn̄ etịm enye inua+ ima ima. 46  Ntre mmọ ẹmụm enye ẹda ẹdaha.+ 47  Edi, owo kiet ke otu mbon oro ẹdade ẹkpere odụri akan̄kan̄ esie osio onyụn̄ ekpi ofụn akwa oku utọn̄ esịbe.+ 48  Edi Jesus ọdọhọ mmọ ete: “Nte mbufo ẹkama akan̄kan̄ ye okpoyon̄ ẹwọn̄ọ ẹdi ndimụm mi nte n̄kpọ eke ẹbịnede owo n̄wo?+ 49  Mma nsidu ye mbufo ke temple n̄kpep n̄kpọ ke usen ke usen,+ edi mbufo imụmke mi. Nte ededi, emi edi man N̄wed Abasi+ okposu.”+ 50  Ndien kpukpru mmọ ẹkpọn̄+ enye ẹfen̄e.+ 51  Edi akparawa kiet emi esịnede eti ọfọn̄ linen ke idem ofụk iferi etiene enye n̄kpet n̄kpet; ndien mmọ ẹdomo ndimụm enye,+ 52  edi enye ọkpọn̄ ọfọn̄ linen esie efehe iferi. 53  Ekem mmọ ẹda Jesus ẹdaha ẹka edem akwa oku, ndien kpukpru mbọn̄ oku ye mbiowo ye mme scribe ẹsop idem.+ 54  Edi Peter etiene enye nsannsan+ tutu esịm okụre akwa oku; enye onyụn̄ etie kiet ye mme asan̄autom ufọk ewebe ikan̄. 55  Kan̄a ke emi mbọn̄ oku ye ofụri Sanhedrin ke ẹyom ikọ ntiense eke ẹtịn̄de ẹdian Jesus man ẹwot enye,+ edi mmọ ikwe ndomokiet.+ 56  Ke akpanikọ, ediwak owo ẹtie ntiense nsu ẹban̄a enye,+ edi ikọ ntiense mmọ idụhe ke n̄kemuyo.+ 57  N̄ko, ndusụk owo ẹdaha ẹda ẹnyụn̄ ẹtịn̄ ikọ ntiense nsu ẹdian enye, ẹdọhọde ẹte: 58  “Nnyịn ikokop enye ọdọhọde ete, ‘Nyowụri temple emi ẹkedade ubọk ẹbọp ndien ke usen ita nyọbọp efen emi owo mîdaha ubọk ibọp.’”+ 59  Edi ke afan̄ enye emi n̄ko ikọ ntiense mmọ idụhe ke n̄kemuyo. 60  Ke akpatre, akwa oku adaha ke enyọn̄ ke ufọt mmọ obụp Jesus ete: “Nte afo ubọrọke ikọ ndomokiet? Nso ke mmọ emi ẹtịn̄ ẹdian fi ntem?”+ 61  Edi enye ododop inyụn̄ ibọrọke n̄kpọ ndomokiet.+ Akwa oku ọtọn̄ọ ntak obụp enye ete: “Nte afo edi Christ Eyen Andinyene Itoro?”+ 62  Ndien Jesus ọbọrọ ete: “Ndi enye; mbufo ẹyenyụn̄ ẹkụt Eyen owo+ nte etiede ke ubọk nnasia+ odudu onyụn̄ edide ke obubịt enyọn̄.”+ 63  Ntem akwa oku awak ọfọn̄ idakidem+ esie onyụn̄ ọdọhọ ete: “Nso ke nnyịn iyom aba ye ntiense?+ 64  Mbufo ẹmekop ikọ isụn̄i+ emi enye etịn̄de adian Abasi. Mbufo ẹse didie?” Kpukpru mmọ ẹbiom enye ikpe ẹte odot n̄kpa. 65  Ndien ndusụk mmọ ẹtọn̄ọ ndifiari enye etap+ ẹnyụn̄ ẹfụk enye ofụri iso ẹnyụn̄ ẹtọn̄ọ enye ita ẹnyụn̄ ẹdọhọ ẹte: “Sian nnyịn ise!” Ndien, ẹsiak enye ufia ke mban̄, mme adaidaha okụre ẹnyụn̄ ẹda enye ẹdaha.+ 66  Ekem ke adan̄aemi Peter odude ke isọn̄ ke okụre oro, kiet ke otu ifịn iban akwa oku edi,+ 67  ndien, ke ini enye okụtde Peter nte ewebede ikan̄, enye owụk enyịn ese enye onyụn̄ ọdọhọ ete: “Afo, nde, okodu ye Jesus emi,+ kpa eyen Nazareth.” 68  Edi enye akan̄, ọdọhọ ete: “Ndiọn̄ọke enye nnyụn̄ mfiọkke se afo etịn̄de,” ndien enye ọwọrọ an̄wa aka ufọk inuaotop.+ 69  Ndien ofụn an̄wan oro okụt enye do, onyụn̄ ọtọn̄ọ ntak ọdọhọ mbon oro ẹdade ẹkpere ete: “Owo emi edi kiet ke otu mmọ.”+ 70  Enye ọtọn̄ọ ntak akan̄. Ndien inikiet efen ke esisịt ini ebede mbon oro ẹdade ẹkpere ẹdọhọ Peter ẹte: “Ke akpanikọ afo edi kiet ke otu mmọ, koro, ke nditịm ntịn̄, afo edi owo Galilee.”+ 71  Edi enye ọtọn̄ọ ndision̄o ikọ isụn̄i nnyụn̄ n̄n̄wọn̄ọ+ ete: “Mfiọkke owo emi mbufo ẹtịn̄de ẹban̄a.”+ 72  Ndien kpa idaha oro ekikọ ọkpọk ọyọhọ utịm ikaba;+ ndien Peter eti ikọ oro Jesus eketịn̄de ọnọ enye ete: “Mbemiso ekikọ ọkpọk utịm ikaba, afo ayakan̄ mi utịm ikata.”+ Ndien enye ofụhọ onyụn̄ atua eyet.+

Mme Ikọ Idakisọn̄

Se ik. id. Mr 1:22.