Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Mark 11;1-33

11  Ekem ke ini mmọ ẹsan̄ade ẹkpere Jerusalem, ẹdisịm Bethphage ye Bethany+ ke Obot Olive, enye osio owo iba ke otu mbet esie ọdọn̄+  onyụn̄ ọdọhọ mmọ ete: “Ẹka ẹkedụk obio-in̄wan̄ emi mbufo ẹdade ẹkụt ko, ndien ke ndondo oro mbufo ẹbede ẹdụk ke esịt mbufo ẹyekụt abak ass emi ẹyịride, emi akanam baba owo kiet mîdoroke enye ke edem; ẹtat enye ẹda ẹdi.+  Ndien edieke owo ekededi obụpde mbufo ete, ‘Ntak mbufo ẹnamde emi?’ ẹbọrọ ẹte, ‘Ọbọn̄ oyom enye, ndien ọyọnọ enye afiak edi mi inikiet.’”+  Ntre mmọ ẹdaha ẹka ẹkekụt abak ass emi eyịride ke enyịnusụn̄, ke an̄wa ke enen, ndien mmọ ẹtat enye.+  Edi ndusụk mmọ emi ẹdade do ẹbụp mmọ ẹte: “Nso ke mbufo ẹnam emi ke nditat abak ass oro?”+  Mmọ ẹbọrọ mmọ emi kpa nte Jesus eketemede; ndien mmọ ẹyak mmọ ẹka.+  Ndien mmọ ẹda abak ass+ oro ẹsọk Jesus, ẹnyụn̄ ẹda ewụra mmọ ẹbri enye ke edem, ndien enye ọdọk odoro.+  N̄ko, ediwak owo ẹbri ewụra+ mmọ ke usụn̄, edi mmọ en̄wen ẹkpi ikọn̄+ ke in̄wan̄ ẹbri.+  Ndien mmọ emi ẹbede iso ye mmọ emi ẹtienede ke edem ẹka iso ẹfiori ẹte: “Mbọk, nyan̄a enye!+ Itoro enyene enye emi edide ke enyịn̄ Jehovah!+ 10  Itoro enyene obio ubọn̄ ete nnyịn David+ emi edide! Mbọk, tie ke ata enyọn̄ nyan̄a enye!” 11  Ndien enye odụk Jerusalem, ebe odụk temple; enye onyụn̄ ese kpukpru n̄kpọ, ndien, sia eyo ama ọkọsọn̄, enye ọwọrọ aka Bethany ye mbet duopeba.+ 12  Ke ndan̄nsiere, ke ini mmọ ẹwọn̄ọde ke Bethany, biọn̄ ọdọn̄ enye.+ 13  Ndien enye ada nsannsan okụt eto fig emi enyenede ikọn̄, onyụn̄ aka ndise m̀mê iyokụt n̄kpọ ke esịt. Edi, ke ini enye esịmde eto oro, enye ikwe n̄kpọ ndomokiet ke mîbọhọke ikọn̄ ikọn̄, koro mîkemke ini fig.+ 14  Ntre, enye ọdọhọ eto oro ete: “Yak owo baba kiet okûdia aba mfri fo tutu amama.”+ Mme mbet esie ẹnyụn̄ ẹkop. 15  Ekem mmọ ẹdisịm Jerusalem. Ndien enye odụk temple onyụn̄ ọtọn̄ọ ndibịn mmọ eke ẹnyamde ẹnyụn̄ ẹdepde n̄kpọ ke temple nsion̄o, onyụn̄ onụk okpokoro mme okpụhọ okụk ye nnyan n̄kpọitie mme anyam ibiom ọduọn̄ọ;+ 16  enye inyụn̄ inyịmeke owo ekededi emen n̄kpọ asan̄a ebe ke temple, 17  edi enye ekpep mme owo n̄kpọ onyụn̄ ọdọhọ ete: “Nte iwetke ite, ‘Ẹdikot ufọk mi ufọk akam+ kpukpru mme idụt’?+ Edi mbufo ẹmenam enye edi itie udịbe mbon n̄wo.”+ 18  Ndien mbọn̄ oku ye mme scribe* ẹkop, ẹnyụn̄ ẹtọn̄ọ ndiyom usụn̄ nte ẹdiwotde enye;+ koro mmọ ẹfehede enye, koro idem ọdiọn̄de-diọn̄ akpa ofụri otuowo aban̄a ukpepn̄kpọ esie.+ 19  Ndien ke esịmde mbubreyo, mmọ ẹwọn̄ọ ke obio. 20  Edi ke ini mmọ ẹsan̄ade ẹbe ke tụhi-tụhi usenubọk, mmọ ẹkụt ke eto fig oro ama eyemede akpa ọtọn̄ọde ke orụn̄.+ 21  Ntre, ke ini Peter etide, ọdọhọ enye ete: “Rabbi, sese! eto fig emi afo okosụn̄ide ama eyemede.”+ 22  Ndien Jesus ọbọrọ mmọ ete: “Ẹnyene mbuọtidem ke Abasi. 23  Ke akpanikọ ke ndọhọ mbufo nte owo ekededi eke ọdọhọde obot emi ete, ‘Wụhọde kọduọ dụk inyan̄,’ mînyụn̄ iyịkke ke esịt esie edi enyenede mbuọtidem ete se imọ itịn̄de oyosu, ọyọwọrọ ntre ọnọ enye.+ 24  Ntak edi oro ndọhọde mbufo nte, Kpukpru n̄kpọ eke mbufo ẹbọn̄de akam ẹben̄e ẹnyene mbuọtidem ẹte ke ẹmebọbọ, ndien mbufo ẹyenyene mmọ.+ 25  Ndien ke ini mbufo ẹdade ẹbọn̄ akam, ẹfen+ owo ekededi emi mbufo ẹnyenede ikọ; man Ete mbufo emi odude ke heaven ekpefen mbufo ndudue mbufo n̄ko.”+ 26 * —— 27  Ekem mmọ ẹfiak ẹdi Jerusalem. Ndien nte enye asan̄ade ke temple, mbọn̄ oku ye mme scribe ye mbiowo ẹdi ẹbịne enye+ 28  ẹnyụn̄ ẹdibụp enye ẹte: “Ewe odudu ke afo ada anam mme n̄kpọ emi? mîdịghe anie ọkọnọ fi odudu emi ndinam mme n̄kpọ emi?”+ 29  Jesus ọbọrọ mmọ ete: “Nyobụp mbufo mbụme kiet. Mbufo ẹbọrọ mi, ndien ami n̄ko nyasian mbufo odudu eke ndade nnam mme n̄kpọ emi.+ 30  Nte baptism+ John okoto heaven m̀mê okoto owo? Ẹbọrọ mi.”+ 31  Ntre mmọ ẹtọn̄ọ ndikere ke otu idemmọ, ẹte: “Edieke nnyịn idọhọde, ‘Okoto heaven,’ enye ọyọdọhọ ete, ‘Ntak, ndien, mbufo mîkenịmke enye ke akpanikọ?’+ 32  Edi nnyịn ima idedei idọhọ, ‘Okoto owo’?”—Mmọ ẹfefehe otuowo, koro kpukpru mmọ emi ẹda ke John ekenen̄ede edi prọfet.+ 33  Ntre, mmọ ẹbọrọ Jesus ẹte: “Nnyịn ifiọkke.” Ndien Jesus ọdọhọ mmọ ete: “Ami nde ndisianke mbufo odudu eke ndade nnam mme n̄kpọ emi.”+

Mme Ikọ Idakisọn̄

Se ik. id. Mr 1:22.
Se ik. id. Mr 7:16.