Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Mark 10;1-52

10  Enye adaha do edi ke mme adan̄a Judea ye edem Jordan oko, otuowo ẹnyụn̄ ẹtọn̄ọ ntak ẹsop idem ọtọkiet ẹtiene enye, ndien enye ọtọn̄ọ ntak ekpep mmọ n̄kpọ nte akam esinamde.+  Ekem mme Pharisee ẹsan̄a ẹkpere man ẹdomo enye idomo, ndien mmọ ẹbụp enye m̀mê ibet enyịme owo osio n̄wan esie ndọ.+  Enye ọbọrọ mmọ ete: “Nso ewụhọ ke Moses ọkọnọ mbufo?”  Mmọ ẹdọhọ ẹte: “Moses ama ayak ẹwet n̄wed usiondọ ẹnyụn̄ ẹsio n̄wan ndọ.”+  Edi Jesus ọdọhọ mmọ ete: “Ntak isọn̄esịt+ mbufo akanam enye ewet ewụhọ emi ọnọ mbufo.  Nte ededi, toto ke editọn̄ọ emi ẹkebotde mme n̄kpọ ‘Enye okobot mmọ eren ye n̄wan.+  Ke ntak emi erenowo ọyọkpọn̄ ete ye eka esie,  ndien mmọ mbiba ẹyekabade ẹdi obụk kiet’;+ ntre mmọ idịghe aba owo iba, edi ẹdi obụk kiet.  Mmọdo, se Abasi ama akadian yak baba owo kiet okûdian̄ade.”+ 10  Ke ini enye ọtọn̄ọde ntak odu ke ufọk,+ mme mbet ẹbụp enye n̄kpọ emi. 11  Ndien enye ọdọhọ mmọ ete: “Owo ekededi eke osiode n̄wan esie ndọ onyụn̄ ọdọde efen esịn efịbe+ edue enye, 12  onyụn̄ edieke n̄wan, ke ama ọkọwọrọ ebe esie ndọ, ọdọde efen, enye esịn efịbe.”+ 13  Ekem mme owo ẹda n̄kpri nditọ ẹsọk enye man enye otụk mmọ; edi mme mbet ẹsua ẹnọ mmọ.+ 14  Ke ini Jesus okụtde emi, esịt ofụt enye, enye onyụn̄ ọdọhọ mmọ ete: “Ẹyak n̄kpri nditọ ẹtiene mi; ẹkûdomo ndikpan mmọ, koro obio ubọn̄ Abasi enyenede mmọ eke ẹtiede ntem.+ 15  Ke akpanikọ ke ndọhọ mbufo, Owo ekededi eke mîbọhọ obio ubọn̄ Abasi nte ekpri eyen ididụkke ke esịt.”+ 16  Ndien enye emen nditọ oro akama ke ubọk esie onyụn̄ ọdiọn̄ mmọ, odori mmọ ubọk.+ 17  Ekem nte enye ọwọrọde aka esie, owo kiet efehe etiene enye onyụn̄ ọkọtọn̄ọ edọn̄ ke iso esie onyụn̄ obụp enye ete: “Eti Andikpep, nso ke nnyene ndinam man nnyene nsinsi uwem?”+ 18  Jesus obụp enye ete: “Ntak emi afo okotde mi eti?+ Owo ndomokiet idịghe eti, ke mîbọhọke kiet, kpa Abasi.+ 19  Afo ọmọfiọk mme ewụhọ emi, ‘Kûwot owo,+ Kûsịn efịbe,+ Kûyịp inọ,+ Kûtie ntiense nsu,+ Kûtụk owo,+ Kpono usọ ye uka.’”+ 20  Owo oro ọdọhọ enye ete: “Andikpep, mma nnenịm kpukpru n̄kpọ emi toto ke uyen mi.” 21  Jesus owụk enyịn ese enye onyụn̄ ama enye onyụn̄ ọdọhọ enye ete: “N̄kpọ kiet osụhọ fi ndinam: Ka, kanyam se ededi oro afo enyenede nyụn̄ yak nọ mme ubuene, ndien afo eyenyene n̄kpọuto ke heaven, nyụn̄ ditiene mi.”*+ 22  Edi enye ofụhọ ke ikọ oro onyụn̄ ọnyọn̄ ke mfụhọ, koro enye enyenede ediwak inyene.+ 23  Ke ini Jesus esede akanade, enye ọdọhọ mme mbet esie ete: “Edidi ọkpọsọn̄ n̄kpọ didie ntem mbon emi ẹnyenede okụk+ ndidụk obio ubọn̄ Abasi!”+ 24  Edi idem akpa+ mme mbet ke ikọ esie. Jesus ọtọn̄ọ ntak ọdọhọ mmọ ete: “Nditọ, edi ọkpọsọn̄ n̄kpọ didie ntem ndidụk obio ubọn̄ Abasi! 25  Edi mmemmem n̄kpọ camel ndibe ke odudu abiabon akan owo inyene ndidụk obio ubọn̄ Abasi.”+ 26  Idem ọdọdiọn̄ akpa mmọ, mmọ ẹnyụn̄ ẹdọhọ enye ẹte: “Anie, ndien, ekeme ndibọhọ?”+ 27  Jesus owụk enyịn ese mmọ onyụn̄ ọdọhọ ete: “Owo ikemeke ndinam emi, edi Abasi ekeme, koro Abasi ekeme ndinam kpukpru n̄kpọ.”+ 28  Peter ọdọhọ enye ete: “Sese! Nnyịn ima ikpọn̄ kpukpru n̄kpọ itiene fi.”+ 29  Jesus ọdọhọ ete: “Ke akpanikọ ke ndọhọ mbufo, Idụhe baba owo kiet emi ọkọkpọn̄de ufọk m̀mê nditọeka iren m̀mê nditọeka iban m̀mê eka m̀mê ete m̀mê nditọ m̀mê in̄wan̄ ke ntak mi ye ke ntak eti mbụk+ 30  emi mîdibọhọ n̄kpọ utịm ikikie+ idahaemi ke ini emi, mme ufọk ye nditọeka iren ye nditọeka iban ye eka ye nditọ ye in̄wan̄, ọkọrọ ye ukọbọ,+ ye nsinsi uwem ke editịm n̄kpọ emi edidide. 31  Nte ededi, ediwak owo emi ẹdide akpa ẹyedi akpatre, akpatre ẹyenyụn̄ ẹdi akpa.”+ 32  Ekem mmọ ẹsan̄a ke usụn̄ ẹdọk ẹka Jerusalem, ndien Jesus ebem mmọ iso, ndien idem akpa mmọ; edi ndịk anam mbon emi ẹketienede mmọ. Enye ọtọn̄ọ ntak ada mbet duopeba esịk ada onyụn̄ ọtọn̄ọ ndisian mmọ mme n̄kpọ emi ẹdiwọrọde enye:+ 33  “Sese, nnyịn imọn̄ idọk ika Jerusalem, ndien ẹyeyak Eyen owo ẹnọ mbọn̄ oku ye mme scribe,* ndien mmọ ẹyebiom enye ikpe n̄kpa ẹnyụn̄ ẹyak enye ẹnọ mbon idụt,+ 34  ndien mmọ ẹyesak enye nsahi ẹnyụn̄ ẹfiari enye etap ẹnyụn̄ ẹmia enye ẹnyụn̄ ẹwot enye, edi ke usen ita ẹbede enye eyeset.”+ 35  Ndien James ye John, nditọ Zebedee iba,+ ẹsan̄a ẹkpere enye ẹnyụn̄ ẹdọhọ enye ẹte: “Andikpep, nnyịn iyom afo anam ọnọ nnyịn se ededi eke nnyịn iben̄ede fi.”+ 36  Enye obụp mmọ ete: “Nso ke mbufo ẹyom mi nnam nnọ mbufo?” 37  Mmọ ẹdọhọ enye ẹte: “Nyịme ete nnyịn itie, kiet ke ubọk nnasia fo kiet ke ufien, ke ubọn̄ fo.”+ 38  Edi Jesus ọdọhọ mmọ ete: “Mbufo ifiọkke se mbufo ẹben̄ede. Nte mbufo ẹmekeme ndin̄wọn̄ cup emi ami n̄n̄wọn̄de, m̀mê ndina baptism emi ami nnade?”+ 39  Mmọ ẹdọhọ enye ẹte: “Nnyịn imekeme.” Ndien Jesus ọdọhọ mmọ ete: “Mbufo ẹyen̄wọn̄ cup emi ami n̄n̄wọn̄de, ẹyenyụn̄ ẹna baptism emi ami nnade.+ 40  Nte ededi, editie ke nnasia mi m̀mê ke ufien mi inyeneke mi ndinọ,+ edi enyene mbon emi ẹketịmde oro ẹnọ.” 41  Ndien, ke ini mbet duop eken ẹkopde ẹban̄a emi, esịt ofụt mmọ aban̄a James ye John.+ 42  Edi ke Jesus ama okokot mmọ ẹdi, ọdọhọ mmọ ete: “Mbufo ẹmefiọk ẹte ke mbon emi ẹbatde nte mme andikara mme idụt ẹkara mmọ ke ọkpọsọn̄ ubọk, ikpọ owo mmọ ẹnyụn̄ ẹnyene odudu ke idem mmọ.+ 43  Inyeneke ndidi ntem ke otu mbufo; edi owo ekededi eke oyomde ndidi akwa owo ke otu mbufo edidi asan̄autom mbufo,+ 44  owo ekededi eke onyụn̄ oyomde ndidi akpa ke otu mbufo edidi ofụn kpukpru mbufo.+ 45  Koro Eyen owo ikedịghe man ẹnam n̄kpọ ẹnọ enye,+ edi man enye anam n̄kpọ ọnọ owo onyụn̄ ọnọ ukpọn̄ esie nte ufak+ ke ibuot ediwak owo.”+ 46  Ekem mmọ ẹdidụk Jericho. Edi nte enye ye mme mbet esie ye akamba otuowo ẹwọrọde ke Jericho, Bartimaeus (eyen Timaeus), nnan emi eben̄ede eben̄e, etie ke mbenusụn̄.+ 47  Ke ini enye okopde ete edi Jesus eyen Nazareth, enye ọtọn̄ọ ndifiori ete: “Jesus, Eyen David,+ tua mi mbọm!”+ 48  Edi ediwak owo ẹsọn̄ọ ẹdọhọ enye ekịbi inua; edi enye ọdọdiọn̄ ofiori ete: “Eyen David, tua mi mbọm!”+ 49  Ntre Jesus atuak ada onyụn̄ ọdọhọ ete: “Ẹkot enye edi.” Ndien mmọ ẹkot nnan oro, ẹte enye: “Sọn̄ idem daha ke enyọn̄, enye ke okot fi.”+ 50  Enye otop ewụra esie ọduọk, obụmede adaha etiene Jesus. 51  Ndien Jesus obụp enye ete: “Oyom nnam nso nnọ fi?”+ Nnan oro ọbọrọ enye ete: “Rab·bo′ni, nam mi mfiak n̄kụt usụn̄.”+ 52  Ndien Jesus ọdọhọ enye ete: “Ka, mbuọtidem fo anam idem ọsọn̄ fi.”+ Ndien kpa idaha oro enye afiak okụt usụn̄,+ onyụn̄ etiene enye ke usụn̄.+

Mme Ikọ Idakisọn̄

M̀mê, “di anditiene mi.”
Se ik. id. Mr 1:22.