Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Luke 9;1-62

9  Ekem enye okot mbet duopeba obon ọtọkiet onyụn̄ ọnọ mmọ odudu ye unen ndikan kpukpru mme demon nnyụn̄ n̄kọk udọn̄ọ.+  Ndien enye osio mmọ ọdọn̄ ẹkekwọrọ obio ubọn̄ Abasi ẹnyụn̄ ẹkọk udọn̄ọ,  enye onyụn̄ ọdọhọ mmọ ete: “Ẹkûkama baba n̄kpọ kiet ẹka isan̄ emi, ẹkûkama esan̄ m̀mê ekpri ekpat udia, m̀mê uyo m̀mê okụk silver; ẹkûnyụn̄ ẹkama ọfọn̄ idakidem iba.+  Edi ke ebiet ekededi eke mbufo ẹdụkde ufọk, ẹdu do ẹnyụn̄ ẹto do ẹnyọn̄ọ.+  Ndien ke ebiet ekededi eke owo mîdarake mbufo, nte mbufo ẹwọn̄ọde ke obio+ oro ẹken̄ ntan ikpat mbufo ẹbon man edi ntiense ọnọ mmọ.”+  Ndien mmọ ẹdaha ẹsan̄a to ke obio-in̄wan̄ sịm obio-in̄wan̄ ke ikpehe oro, ẹtan̄a eti mbụk ẹnyụn̄ ẹkọk udọn̄ọ ke kpukpru ebiet.+  Ekem Herod andikara n̄kann̄kụk oro okop kpukpru n̄kpọ emi ẹtịbede, ndien ekikere etịmede enye koro ndusụk owo ẹdọhọde ẹte John ama eset ke n̄kpa,+  edi mmọ efen ẹdọhọ ẹte Elijah ama ọbiọn̄ọde, edi mbon en̄wen ẹdọhọ ẹte owo kiet ke otu n̄kani prọfet ama eset.  Herod ọdọhọ ete: “Mma mbịghi John ibuot.+ Anie ndien edi emi eke n̄kopde utọ n̄kpọ emi mban̄a?” Ntre enye oyom+ ndikụt enye. 10  Ndien ke ini mme apostle ẹnyọn̄de ẹdi, mmọ ẹbụk ẹnọ enye se mmọ ẹkenamde.+ Ekem enye ada mmọ aka man ẹkedu ikpọn̄+ ke obio emi ekerede Bethsaida. 11  Edi ke ini otuowo ẹfiọkde, mmọ ẹtiene enye. Ndien enye adara mmọ etieti onyụn̄ etịn̄ n̄kpọ ọnọ mmọ aban̄a obio ubọn̄ Abasi,+ onyụn̄ anam udọn̄ọ okụre mmọ emi ẹyomde usọbọ.+ 12  Ekem eyo ọtọn̄ọ ndikụt. Ndien mbet duopeba ẹdi ẹdidọhọ enye ẹte: “Sio otuowo unyọn̄, man mmọ ẹkpeka mme obio-in̄wan̄ ye n̄kpri obio emi ẹkande ẹkụk ẹkeyom itie ndidan̄ ye se ẹdidiade, koro ebiet emi nnyịn idude edide ndobo ndobo ebiet.”+ 13  Edi enye ọdọhọ mmọ ete: “Mbufo ẹnọ mmọ n̄kpọ ẹdia.”+ Mmọ ẹdọhọ ẹte: “Nnyịn inyeneke n̄kpọ ikan uyo ition ye iyak iba,+ ibọhọke nnyịn ika ikedep udia inọ kpukpru owo emi.”+ 14  Ndien mmọ ẹkedi n̄kpọ nte irenowo tọsịn ition.+ Edi enye ọdọhọ mme mbet esie ete: “Ẹnam mmọ ẹsụhọde ẹtetie nte ẹsitiede ke itie udia, owo aba ye duop ke otu kiet kiet.”+ 15  Ndien mmọ ẹnam ntre ẹnyụn̄ ẹnam mmọ kpukpru ẹsụhọde ẹtetie. 16  Ekem enye emen uyo ition ye iyak iba oro, emenede enyịn ese enyọn̄, ọdiọn̄ mmọ onyụn̄ obụn̄ ayak ọnọ mme mbet ete ẹnịm otuowo ke iso.+ 17  Ntre ke kpukpru mmọ ẹdia ẹyụhọ, ẹnyụn̄ ẹtan̄ mben̄e eke osụhọde ẹyọhọ akpasa duopeba.+ 18  Edikem, ke adan̄aemi enye ọbọn̄de akam ikpọn̄, mme mbet ẹdi ẹdidu ye enye, ndien enye obụp mmọ, ete: “Otuowo ẹdọhọ ke ami ndi anie?”+ 19  Mmọ ẹbọrọ ẹte: “John Andinịm Owo Baptism; edi mmọ efen ẹte, Elijah, ndien mmọ efen n̄ko ẹte, owo kiet ke otu mme prọfet emeset.”+ 20  Edi enye obụp mmọ ete: “Edi mbufo ẹdọhọ ke ami ndi anie?” Peter ọbọrọ ete:+ “Afo edi Christ+ Abasi.” 21  Ekem enye ọsọn̄ọ etịn̄ ye mmọ onyụn̄ owụk mmọ ete ẹkûtịn̄ n̄kpọ emi ẹnọ baba owo kiet,+ 22  edi ọdọhọ ete: “Eyen owo enyene ndikụt ediwak ndutụhọ, ndien mbiowo ye mbọn̄ oku ye mme scribe* ẹyesịn enye, ẹnyụn̄ ẹwot+ enye, ndien enye eyeset ke ọyọhọ usen ita.”+ 23  Ekem enye ọdọhọ kpukpru mmọ ete: “Edieke owo ekededi oyomde nditiene mi, yak enye akan̄ idemesie+ onyụn̄ emen eto ndutụhọ esie ke usen ke usen aka iso etiene mi.+ 24  Koro owo ekededi eke oyomde ndinyan̄a ukpọn̄ esie ọyọduọk enye; edi owo ekededi eke ọduọkde ukpọn̄ esie ke ntak mi edi enye oro edinyan̄ade enye.+ 25  Nso udori ke owo edidia edieke enye enyenede ofụri ererimbot edi ọduọk idemesie m̀mê okụt ntakurua?+ 26  Koro owo ekededi eke okopde bụt aban̄a mi ye ikọ mi, Eyen owo oyokop bụt aban̄a enye ke ini enye edide ke ubọn̄ esie ye eke Ete ye eke ndisana angel.+ 27  Edi ke akpanikọ ke ndọhọ mbufo nte, Ndusụk owo ẹdu ke otu mmọ emi ẹdade mi emi mîditabike n̄kpa tutu mmọ ẹbem iso ẹkụt obio ubọn̄ Abasi.”+ 28  Ndien ke n̄kpọ nte usen itiaita ẹbede tọn̄ọ nte enye eketịn̄ mme ikọ emi, enye ada Peter ye John ye James ọdọk obot aka ndibọn̄ akam.+ 29  Ndien nte enye ọbọn̄de akam, iso esie okpụhọde,+ edisịnen̄kpọ esie onyụn̄ akabade afia, esem.+ 30  N̄ko, sese! owo iba ẹdineme nneme ye enye, emi ẹdide Moses ye Elijah.+ 31  Mmọ emi ẹbiọn̄ọde ke ubọn̄ ẹnyụn̄ ẹtọn̄ọ ndineme mban̄a unyọn̄ esie oro ẹkenịmde ndisu enye ke idem ke Jerusalem.+ 32  Edi idap omụm Peter ye mmọ emi ẹdude ye enye; edi ke ini enyịn atarade mmọ, mmọ ẹkụt ubọn̄+ esie ye owo iba oro ẹdade ye enye. 33  Ndien nte mmọ emi ẹdian̄arede ẹkpọn̄ enye, Peter ọdọhọ Jesus ete: “Andikpep, ọfọn nnyịn ndidu mi, ntre yak nnyịn iwụk tent ita, kiet enyene fi, kiet enyene Moses, kiet onyụn̄ enyene Elijah,” edi enye ifiọkke se enye etịn̄de.+ 34  Edi nte enye osụk etịn̄de mme n̄kpọ emi, obubịt enyọn̄ oboho onyụn̄ ọtọn̄ọ ndifụk mmọ. Ndịk anam mmọ nte mmọ ẹdụkde obubịt enyọn̄ oro.+ 35  Uyo+ onyụn̄ oto ke obubịt enyọn̄ oro ọwọrọ, ete: “Emi edi Eyen mi, kpa enye emi mmekde.+ Ẹkpan̄ utọn̄ ẹnọ enye.”+ 36  Ndien ke ini uyo oro ọwọrọde, mmọ ẹkụt Jesus nte odude ikpọn̄.+ Edi mmọ ẹkịbi inua inyụn̄ itịn̄ke baba n̄kpọ kiet eke mmọ ẹkekụtde inọ owo ndomokiet ke mme usen oro.+ 37  Ke ndan̄nsiere, ke ini mmọ ẹtode obot oro ẹsụhọde ẹdi, akwa otuowo ẹsobo ye enye.+ 38  Ndien, sese! eren kiet ke otuowo oro ofiori, ete: “Andikpep, mmeben̄e fi nte ese eyeneren mi, koro enye edide ikpọn̄-ikpọn̄+ edibon eyen mi,+ 39  ndien, sese! spirit+ omụm enye, enye onyụn̄ obụmede ofiori, spirit onyụn̄ esịn̄ede enye esịn enye osio efot, anuak enye inyụn̄ imaha ndisọp nyak enye. 40  Ndien mma n̄kpe mme mbet fo ubọk nte ẹbịn enye ẹduọk, edi mmọ ikemeke.”+ 41  Jesus ọbọrọ ete: “O emana unana mbuọtidem ye eke ukwan̄ido,+ adan̄a didie ke ndika iso ye mbufo nnyụn̄ nyọ mbufo? Da eyen fo di mi.”+ 42  Edi nte enye asan̄ade ekpere, demon osio enye ọduọk ke isọn̄ onyụn̄ enen̄ede esịn̄ede enye. Nte ededi, Jesus aduari ndedehe spirit oro onyụn̄ anam eyen oro okop nsọn̄idem onyụn̄ ayak enye ọnọ ete esie.+ 43  Ndien, idem akpa kpukpru mmọ ndikụt akwa odudu+ Abasi. Edi ke ini idem osụk akpade kpukpru mmọ aban̄a kpukpru n̄kpọ eke enye anamde, enye ọdọhọ mme mbet esie ete: 44  “Ẹyak mme ikọ emi ẹtịm ẹdụk mbufo utọn̄, koro ẹmenịm ẹte ẹyak Eyen owo ẹsịn mme owo ke ubọk.”+ 45  Edi mmọ isụk ifiọkke se ikọ emi ọwọrọde. Ke akpanikọ, ama edịbe mmọ ke enyịn mbak mmọ ẹdifiọk enye, ndịk inyụn̄ iyakke mmọ ẹbụp enye ẹban̄a ikọ emi.+ 46  Ekem eneni edemede ke otu mmọ aban̄a m̀mê anie edi n̄kponn̄kan ke otu mmimọ.+ 47  Jesus ọfiọk eneni emi odude mmọ ke esịt, onyụn̄ anam ekpri eyenọwọn̄ edida enye ke n̄kan̄+ 48  ndien ọdọhọ mmọ ete: “Owo ekededi eke adarade ekpri eyenọwọn̄ emi ke ntak enyịn̄ mi adara mi n̄ko, ndien owo ekededi eke adarade mi adara enye emi okosiode mi ọdọn̄+ n̄ko. Koro owo emi enịmde idem ke n̄kpri-n̄kan+ ke otu mbufo kpukpru edi enye emi okponde.”+ 49  John ọbọrọ ete: “Andikpep, nnyịn ima ikụt owo kiet adade enyịn̄ fo ebịn mme demon+ ndien nnyịn idomo ndikpan+ enye, koro enye mîsan̄ake ye nnyịn.”+ 50  Edi Jesus ọdọhọ enye ete: “Ẹkûdomo ndikpan enye, koro owo eke mîbiọn̄ọke mbufo ada ye mbufo.”+ 51  Edikem ke ini mme usen eke ẹdimende enye ẹdọk ẹkperede,+ enye etetịm ebiere ndika Jerusalem. 52  Ntre enye osio mme isụn̄utom ọdọn̄ ẹbem enye iso. Ndien mmọ ẹka ẹkedụk obio-in̄wan̄ mbon Samaria+ kiet, nditịm itie nnọ enye; 53  edi mmọ idarake enye, koro enye ebierede ndika Jerusalem.+ 54  Ke ini mbet oro James ye John+ ẹkụtde emi, mmọ ẹdọhọ ẹte: “Ọbọn̄, nte afo omoyom nnyịn ikot ikan̄+ oto ke enyọn̄ osụhọde edisobo mmọ?” 55  Edi enye ọwọn̄ọde asua ọnọ mmọ. 56  Ntre mmọ ẹbe ẹka obio-in̄wan̄ en̄wen. 57  Ekem nte mmọ ẹsan̄ade ẹka ke usụn̄, owo kiet ọdọhọ enye ete: “Nyetiene fi n̄ka ebiet ekededi emi afo edikade.”+ 58  Edi Jesus ọdọhọ enye ete: “Mme ebuaikọt ẹnyene ndudu, mme inuen enyọn̄ ẹnyụn̄ ẹnyene efọk, edi Eyen owo inyeneke ebiet eke enịmde ibuot esie.”+ 59  Ekem enye ọdọhọ owo en̄wen ete: “Tiene mi.” Owo oro ọdọhọ ete: “Yak mi n̄ka kan̄a n̄kobụk ete mi.”+ 60  Edi enye ọdọhọ enye ete: “Yak mme akpan̄kpa+ ẹbụk mme akpan̄kpa mmọ, edi afo ka kpukpru ebiet katan̄a obio ubọn̄ Abasi.”+ 61  Ndien owo en̄wen nde ọdọhọ ete: “Nyetiene fi, Ọbọn̄; edi yak mbem iso kan̄a n̄kọkọm mbonufọk mi unyọn̄.”+ 62  Jesus ọdọhọ enye ete: “Baba owo kiet emi akabarede ese mme n̄kpọ oro ẹdude ke edem+ ke enye ama ekesịn ubọk ke ufụn̄isọn̄+ idotke ndidụk obio ubọn̄ Abasi.”

Mme Ikọ Idakisọn̄

Se ik. id. Lu 5:21.