Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Luke 6;1-49

6  Edikem ke sabbath enye asan̄a ebe ke in̄wan̄ wheat, ndien mme mbet esie ẹkịbi+ mbuot wheat ẹfiak ke ubọk ẹta.+  Ndien ndusụk mme Pharisee ẹdọhọ ẹte: “Ntak emi mbufo ẹnamde se ibet mînyịmeke+ ẹnam ke sabbath?”+  Edi Jesus ọbọrọ mmọ ete: “Nte akanam mbufo ikotke se David+ akanamde ke ini biọn̄ ọkọdọn̄de enye ye mmọ emi ẹdude ye enye?+  Nte enye okodụkde ufọk Abasi ọkọbọ uyo iso Abasi+ ata onyụn̄ ada ndusụk ọnọ mmọ emi ẹdude ye enye, emi ibet mînyịmeke owo ata ke mîbọhọke mme oku ikpọn̄?”+  Ndien enye ọdọhọ mmọ ete: “Eyen owo edi Ọbọn̄ sabbath.”+  Edikem ke sabbath en̄wen,+ enye odụk synagogue ọtọn̄ọ ndikpep owo n̄kpọ. Ndien owo kiet emi ubọk nnasia esie akpade odu do.+  Mme scribe* ye mme Pharisee ẹtịm ẹkpeme+ enye ẹte ise m̀mê enye ọyọkọk udọn̄ọ ke sabbath, man ẹkụt usụn̄ ndidori enye ikọ.+  Edi, enye ọfiọk se mmọ ẹkerede,+ ndien enye ọdọhọ owo emi ubọk esie akpade ete: “Daha ke enyọn̄ dida mi ke ufọt.” Ndien enye adaha akada.+  Ekem Jesus ọdọhọ mmọ ete: “Mbụp mbufo nte, Nte ibet enyịme ẹnam eti n̄kpọ ke sabbath m̀mê enyịme ẹnam idiọk,+ ẹnyan̄a m̀mê ẹwot ukpọn̄?”+ 10  Ndien ke enye ama ekese mmọ kpukpru akanade, enye ọdọhọ owo oro ete: “Nyanade ubọk fo.” Enye anam ntre, ndien ubọk esie akabade ọfọn.+ 11  Edi esịt ofụt mmọ etieti, mmọ ẹnyụn̄ ẹneme ye kiet eken ẹban̄a se mmọ ẹkpenamde Jesus.+ 12  Edikem ke mme usen oro, enye ọwọrọ ọdọk obot ndibọn̄ akam,+ onyụn̄ ada ofụri okoneyo ọbọn̄ akam ọnọ Abasi.+ 13  Edi ke ini eyo esierede, enye okot mme mbet esie onyụn̄ emek owo duopeba osio ke otu mmọ, emi enye okonyụn̄ okotde “mme apostle”:+ 14  Simon, emi enye okotde n̄ko Peter,+ ye Andrew eyeneka esie, ye James ye John,+ ye Philip+ ye Bartholomew, 15  ye Matthew ye Thomas,+ ye James eyen Alphaeus, ye Simon emi ẹkotde “enyene-ifịk,”+ 16  ye Judas eyen James, ye Judas Iscariot, emi akakabarede edi andida enye nnọ.+ 17  Ndien enye asan̄a ye mmọ osụhọde edida ke unaisọn̄, ọkọrọ ye akwa otu mbet esie, ye akwa udịm owo+ emi ẹtode ofụri Judea ye Jerusalem ye mbeninyan̄ Tyre ye Sidon ẹdi ndikop ikọ esie, man enye onyụn̄ anam udọn̄ọ okụre mmọ.+ 18  Enye onyụn̄ anam udọn̄ọ okụre mmọ emi mme ndedehe spirit ẹfịnade. 19  Ndien ofụri otuowo ẹyom nditụk+ enye, koro odudu+ otode enye ke idem ọwọrọ onyụn̄ anamde udọn̄ọ okụre mmọ kpukpru. 20  Ndien enye emenede enyịn ese mme mbet esie onyụn̄ ọdọhọ ete:+ “Mbufo emi ẹdide ubuene+ ẹmekop inemesịt koro obio ubọn̄ Abasi enyenede mbufo. 21  “Mbufo emi ẹtiede biọn̄+ ke emi ẹmekop inemesịt, koro mbufo ẹyeyụhọ.+ “Mbufo emi ẹtuade eyet ke emi ẹmekop inemesịt, koro mbufo ẹyesak imam.+ 22  “Mbufo ẹkop inemesịt ke ini mme owo ẹsuade+ mbufo, ẹnyụn̄ ẹdian̄arede mbufo ke idem mmọ ẹfep, ẹnyụn̄ ẹsụn̄ide mbufo ẹnyụn̄ ẹtịn̄de idiọk ẹdian enyịn̄ mbufo kaban̄a Eyen owo. 23  Ẹdara ke usen oro ẹnyụn̄ ẹfrọ, koro, sese! utịp mbufo omokpon ke heaven, koro mme ete ete mmọ ẹkenamde kpa ntre ye mme prọfet.+ 24  “Edi mbọm mbufo mbon inyene,+ koro mbufo ẹmenyenyene ndọn̄esịt mbufo ọyọhọ ọyọhọ.+ 25  “Mbọm mbufo emi ẹyụhọde ke emi, koro mbufo ẹyetie biọn̄.+ “Mbọm mbufo emi ẹsakde imam ke emi, koro mbufo ẹyefụhọ ẹnyụn̄ ẹtua eyet.+ 26  “Mbọm, ke ini kpukpru owo ẹtịn̄de se ifọnde ẹban̄a mbufo, koro mme ete ete mmọ ẹkenamde kpa ntre ye mme prọfet nsu.+ 27  “Edi ndọhọ mbufo emi ẹkpan̄de utọn̄ nte, Ẹka iso ẹma mme asua mbufo,+ ẹnyụn̄ ẹnam ufọn+ ẹnọ mmọ eke ẹsuade mbufo, 28  ẹdiọn̄ mmọ eke ẹsụn̄ide mbufo, ẹbọn̄ akam ẹyom ufọn mmọ eke ẹsọn̄ọde mbufo enyịn.+ 29  Owo ama eyịbi fi ke mfụk kiet,+ wọn̄ọde enye eken n̄ko nọ enye; owo ama onyụn̄ ọbọ+ fi ewụra fo, kûtre ndinọ enye ọfọn̄ idakidem fo n̄ko. 30  Nọ kpukpru owo eke ẹben̄ede fi n̄kpọ,+ owo eke onyụn̄ ọbọde fi n̄kpọ, kûdọhọ enye ọtọn̄ọ ntak ọkpọn̄ mmọ ọnọ fi. 31  “N̄ko, nte mbufo ẹyomde mme owo ẹnam n̄kpọ ye mbufo, ẹnam kpasụk ntre ye mmọ.+ 32  “Ndien edieke mbufo ẹmade mmọ eke ẹmade mbufo, nso itoro ke mbufo ẹnyene? Koro mme anamidiọk ẹkam ẹmama mmọ eke ẹmade mmọ.+ 33  Onyụn̄ edieke mbufo ẹnamde ufọn ẹnọ mmọ eke ẹnamde ufọn ẹnọ mbufo, nso itoro ke mbufo ẹnyene? Koro mme anamidiọk ẹsikam ẹnanam ntre.+ 34  N̄ko, edieke edide mmọ eke mbufo ẹdoride enyịn ẹte ẹyesio se ẹkebuọtde mmọ ke mbufo ẹnọ ebuọt ndien ibọhọ udori,+ nso itoro ke mbufo ẹnyene? Koro mme anamidiọk ẹbọbuọt mme anamidiọk n̄kpọ inyụn̄ ibọhọ udori man mmọ ẹkpefiak ẹbọ kpa ntre.+ 35  Edi, ẹka iso ẹma mme asua mbufo ẹnyụn̄ ẹnam ufọn ẹnọ mmọ ẹnyụn̄ ẹnọ ebuọt,+ ẹkûbọ udori, ẹkûdori enyịn ndifiak mbọ n̄kpọ ndomokiet; ndien utịp mbufo oyokpon, mbufo ẹyenyụn̄ ẹdi nditọ Ata Edikon̄,+ koro enye ọfọnde ido+ ye mme anana-esịtekọm ye mme idiọkowo. 36  Ẹka iso ẹtua owo mbọm, kpa nte Ete mbufo atuade owo mbọm.+ 37  “Akan oro, ẹtre ndibiere ikpe nnọ owo, ndien owo idibiereke ikpe inọ mbufo;+ ẹnyụn̄ ẹtre ndibiom owo ikpe, ndien owo idibiomke mbufo ikpe. Ẹsana owo ẹyak, ndien ẹyesana mbufo ẹyak.+ 38  Ẹnọ owo n̄kpọ, ndien ẹyenọ mbufo n̄kpọ.+ Ẹyedomo ọyọhọ udomo, eke ẹmịn̄de osụhọde, eke ẹnyen̄ede onyụn̄ ọyọhọde ọduọhọ, ẹsịn mbufo ke ọfọn̄. Koro udomo eke mbufo ẹdade ẹdomo ẹnọ owo, ke mmọ ẹdida ẹdomo ẹnọ mbufo ke usiene.”+ 39  Ekem enye ọnọ mmọ uwụtn̄kpọ n̄ko ete: “Nte nnan ekeme ndida nnan usụn̄? Nte mmọ mbiba ididuọn̄ọke idụk obube?+ 40  Eyen ukpepn̄kpọ ikanke andikpep enye, edi owo ekededi eke ẹtịmde ẹnọ ukpep eyetie nte andikpep enye.+ 41  Ntak emi afo esede mbio emi esịnede ke enyịn eyenete fo, edi mûkwe obukpọk emi odude fi ke enyịn?+ 42  Afo ekeme didie ndidọhọ eyenete fo ete, ‘Eyenete mi, yak nsio fi mbio ke enyịn,’ ke adan̄aemi afo mûkwe obukpọk emi odude fi ke enyịn?+ Mbubịk! Bem iso sio obukpọk emi odude fi ke enyịn fep,+ ndien afo eyetịm okụt nte edisan̄ade osio mbio oro odude ke enyịn eyenete fo.+ 43  “Koro idụhe eti eto ndomokiet eke on̄wụmde mbumbu mfri; inyụn̄ idụhe mbumbu eto ndomokiet eke on̄wụmde eti mfri.+ 44  Koro ẹdiọn̄ọ eto kiet kiet ke mfri esie.+ Ke uwụtn̄kpọ, owo itetke fig ke n̄kukịm, inyụn̄ itetke grape ke eto n̄kukịm.+ 45  Eti owo osion̄o se ifọnde ke nti n̄kpọuto+ eke ẹdude ke esịt esie, edi idiọkowo osion̄o se idiọkde ke mme idiọk n̄kpọuto esie; koro oto ke uyọhọ esịt inua etịn̄ ikọ.+ 46  “Ntak emi mbufo ẹkotde mi ‘Ọbọn̄! Ọbọn̄!’ edi mînamke mme n̄kpọ eke ndọhọde?+ 47  Owo ekededi eke etienede mi onyụn̄ okopde ikọ mi onyụn̄ anamde mmọ, nyowụt mbufo owo eke enye ebietde:+ 48  Enye ebiet owo eke ọbọpde ufọk, emi etịbide isọn̄ otụn̄ọ onyụn̄ esịnde itiat idakisọn̄ odori ke enyọn̄ akamba itiat. Mmọdo, ke ini ukwọ+ edide, akpa ọtọ ediberi ufọk oro, edi isọn̄ke ikem ndinyen̄e enye, koro ẹketịmde ẹbọp enye.+ 49  Ke n̄kan̄ eken, owo eke okopde edi mînamke,+ ebiet owo emi ọbọpde ufọk ke isọn̄ emi itiat idakisọn̄ mîdụhe. Akpa ọtọ ediberi enye, ndien kpa idaha oro enye ọduọ, n̄wụre+ ufọk oro onyụn̄ okpon.”+

Mme Ikọ Idakisọn̄

Se ik. id. Lu 5:21.