Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Luke 24;1-53

24  Edi, ke akpa usen urua, mmọ ẹda ufuọn̄n̄kpọ oro mmọ ẹketịmde ẹbabak ẹka udi.+  Edi mmọ ẹkụt ke ẹma ẹkpat itiat ẹsio ke udi,+  ndien ke ini mmọ ẹdụkde, mmọ ikwe okpo Ọbọn̄ Jesus.+  Ke adan̄aemi ekikere etịmerede mmọ aban̄a n̄kpọ emi, sese! owo iba emi ẹsịnede nsemnsem ọfọn̄idem ẹda mmọ ke n̄kan̄.+  Nte iban emi ẹkopde ndịk ẹnyụn̄ ẹsụkde iso ẹse isọn̄, iren emi ẹdọhọ mmọ ẹte: “Ntak emi mbufo ẹyomde Enye emi odude uwem ke otu mme akpan̄kpa?  [[Enye idụhe mi, edi ẹma ẹnam enye eset.]]+ Ẹti nte enye eketịn̄de ọnọ mbufo ke adan̄aemi enye okosụk odude ke Galilee,+  ete ana ẹda Eyen owo ẹsịn mme idiọkowo ke ubọk ẹnyụn̄ ẹkọn̄ ke eto ẹwot, ndien ke ọyọhọ usen ita enye eyeset.”+  Ntre mmọ ẹti ikọ esie,+  ẹnyụn̄ ẹto udi ẹnyọn̄ ẹdi ẹnyụn̄ ẹdibụk ofụri n̄kpọ emi ẹnọ mbet duopekiet ye kpukpru mmọ eken.+ 10  Mmọ ẹkedi Mary Magdalene, ye Joanna,+ ye Mary eka James. N̄ko, iban+ eken emi ẹsan̄ade ye mmọ ẹtịn̄ mme n̄kpọ emi ẹnọ mme apostle. 11  Edi, ikọ emi ẹtie mmọ ke utọn̄ nte ndisịme ikọ, mmọ inyụn̄ inịmke iban emi ke akpanikọ.+ 12  [[Edi Peter adaha ke enyọn̄ efehe aka udi ndien, ke onyụn̄ọde ese, okụt sụk ọfọn̄ emi ẹkedade ẹwan̄ enye. Ntre ke enye adaha, eyịk ke idemesie se iketịbede.]] 13  Edi, sese! owo iba ke otu mmọ ẹsan̄a kpa ke usen oro ẹka obio-in̄wan̄ emi ekerede Emmaus, emi oyomde usụn̄ ọkpọn̄ Jerusalem ke n̄kpọ nte itiat itiaba, 14  mmọ ẹnyụn̄ ẹneme ye kiet eken ẹban̄a kpukpru n̄kpọ+ emi ẹketịbede. 15  Edi nte mmọ ẹtịn̄de ikọ ẹnyụn̄ ẹnemede nneme, Jesus ke idemesie asan̄a ekpere+ onyụn̄ asan̄a ye mmọ; 16  edi mmọ idiọn̄ọke enye.+ 17  Enye obụp mmọ ete: “Nso n̄kpọ ke mbufo ẹneneni ntem ke otu idem mbufo nte mbufo ẹsan̄ade ke usụn̄?” Ndien mmọ ẹtuak ẹda, ẹtie mfụhọ mfụhọ. 18  Owo kiet emi ekerede Cleopas ọbọrọ enye ete: “Nte afo odụn̄ ikpọn̄ ke Jerusalem nte esenowo, ndien ke ntre ufiọkke se itịbede do ke usen ifan̄ emi?” 19  Ndien enye obụp mmọ ete: “Nso n̄kpọ?” Mmọ ẹbọrọ enye ẹte: “Mme n̄kpọ emi ẹban̄ade Jesus eyen Nazareth,+ emi edide prọfet+ eke okopde odudu ke utom ye ikọ inua ke iso Abasi ye ke iso kpukpru owo; 20  ye nte mbọn̄ oku ye mme andikara nnyịn ẹkebiomde enye ikpe n̄kpa ẹnyụn̄ ẹkọn̄de enye ke eto ẹwot.+ 21  Edi nnyịn ikodori enyịn ite edi owo emi edinyan̄a Israel;+ ih, n̄ko, emi edi ọyọhọ usen ita nte mme n̄kpọ emi ẹketịbe. 22  Akan oro, ndusụk iban+ ke otu nnyịn ẹnam idem akpa nnyịn n̄ko, koro mmọ ẹma ẹbak ẹka udi 23  edi ikwe okpo esie, mmọ ẹnyụn̄ ẹdi ẹdidọhọ ke mmimọ ima ikụt n̄ko mme angel ke n̄kukụt, emi ẹkedọhọde ẹte enye odu uwem. 24  N̄ko, ndusụk mmọ emi ẹdude ye nnyịn ẹma ẹdaha ẹka udi;+ ẹnyụn̄ ẹkekụt ke edi ntre, kpa nte iban oro ẹkedọhọde, edi mmọ ikwe enye.” 25  Ntre enye ọdọhọ mmọ ete: “O mbon unana ibuot oro mîsọpke ndinịm kpukpru n̄kpọ emi mme prọfet ẹketịn̄de!+ 26  Nte ikanaha Christ osobo mme n̄kpọ emi+ onyụn̄ ebe odụk ke ubọn̄ esie?”+ 27  Ndien enye ọtọn̄ọ ke Moses+ ye kpukpru mme Prọfet+ asiak mme n̄kpọ emi ẹketịn̄de ẹban̄a enye ke ofụri N̄wed Abasi ọnọ mmọ. 28  Ke akpatre, mmọ ẹsan̄a ẹkpere obio-in̄wan̄ emi mmọ ẹkekade, ndien enye anam nte n̄kpọ eke enye oyomde ndibe n̄ka iso iso. 29  Edi mmọ ẹyịre enye, ẹte: “Dan̄ ye nnyịn, koro ekpere mbubreyo ndien eyo ọmọn̄ okụt.” Ndien enye odụk akadan̄ ye mmọ. 30  Ndien nte enye etiede ye mmọ ke itie udia, enye emen uyo, ọdiọn̄, obụn̄ onyụn̄ ayak ọnọ mmọ.+ 31  Ndien enyịn mmọ ẹtara, mmọ ẹnyụn̄ ẹdiọn̄ọ enye; ndien enye osop mmọ ke enyịn.+ 32  Ndien mmọ ẹdọhọ kiet eken ẹte: “Nte esịt ikofiopke nnyịn ke ini enye ekenemede nneme ye nnyịn ke usụn̄, nte enye akatatde N̄wed Abasi ọnọ nnyịn ọyọhọ ọyọhọ?” 33  Ndien mmọ ẹdaha ke enyọn̄ kpa ke hour oro ẹfiak ẹnyọn̄ọ Jerusalem, ẹnyụn̄ ẹkụt mbet duopekiet ye mmọ emi ẹdude ye mmọ nte ẹsopde idem ọtọkiet, 34  ẹte: “Ke akpanikọ, Ọbọn̄ ama eset, ama onyụn̄ owụt Simon idem!”+ 35  Ekem mmọ ẹbụk se iketịbede ke usụn̄ ye nte mmọ ẹkesan̄ade ẹdiọn̄ọ enye ke ini enye obụn̄de uyo.+ 36  Ke adan̄aemi mmọ ẹtịn̄de mme n̄kpọ emi, enye ke idemesie ada ke ufọt mmọ [[onyụn̄ ọdọhọ mmọ ete: “Emem akpakam odu ye mbufo.”]] 37  Edi koro mmọ ẹkopde ndịk, ẹnyụn̄ ẹfehede ndịk,+ mmọ ẹkekere ẹte mmimọ ikụt spirit. 38  Ntre enye ọdọhọ mmọ ete: “Ntak emi esịt etịmerede mbufo, ntak emi ẹnyụn̄ ẹyịkde ke esịt mbufo? 39  Ẹse ubọk mi ye ukot mi, ẹfiọk ẹte ke ami ke edi; ẹfiọn̄ọ+ mi ẹse, koro spirit inyeneke obụk ye ọkpọ+ nte mbufo ẹkụtde mi nnyenede.” 40  [[Ndien nte enye etịn̄de ntem, enye owụt mmọ ubọk ye ukot esie.]] 41  Edi ke adan̄aemi mmọ mîsụk inịmke ke akpanikọ+ ọnọ ọkpọsọn̄ idatesịt, idem onyụn̄ akpade mmọ, enye ọdọhọ mmọ ete: “Nte mbufo ẹmenyene se owo adiade mi?”+ 42  Ndien mmọ ẹnọ enye ibio ọfọp iyak;+ 43  enye onyụn̄ ọbọ ata+ ke iso mmọ. 44  Ndien enye ọdọhọ mmọ ete: “Emi edi ikọ mi eke n̄ketịn̄de nnọ mbufo ke adan̄aemi n̄kosụk ndude ye mbufo,+ nte ke ana kpukpru se ẹkewetde ẹban̄a mi ke ibet Moses ye ke uwetn̄kpọ mme Prọfet+ ye mme Psalm+ ẹsu.” 45  Ndien enye atat mmọ ikike ọyọhọ ọyọhọ man mmọ ẹfiọk se N̄wed Abasi ọwọrọde,+ 46  enye onyụn̄ ọdọhọ mmọ ete: “Ntem ke ẹwet ẹte Christ enyene ndikụt ukụt nnyụn̄ nset ke n̄kpa ke ọyọhọ usen ita,+ 47  ẹnyụn̄ ẹnyene ndikwọrọ edikabade esịt ye edifen mme idiọkn̄kpọ+ ke enyịn̄ esie ke kpukpru mme idụt+—ọtọn̄ọde ke Jerusalem,+ 48  mbufo ẹnyene ndidi mme ntiense+ n̄kpọ emi. 49  Ndien, sese! mmọn̄ ndọn̄ se Ete mi ọkọn̄wọn̄ọde etiene mbufo. Edi, mbufo ẹbet ke obio tutu ẹsịne mbufo odudu emi otode ke enyọn̄.”+ 50  Edi enye ada mmọ ọwọrọ tutu esịm Bethany, ndien enye emenede ubọk esie ke enyọn̄ ọdiọn̄ mmọ.+ 51  Nte enye ọdiọn̄de mmọ, ẹdian̄ade enye ẹkpọn̄ mmọ ẹnyụn̄ ẹmen enye ẹdọk ẹdụk ke heaven.+ 52  Ndien mmọ ẹnụhọ ẹnọ enye ẹnyụn̄ ẹfiak ẹnyọn̄ọ Jerusalem ye akwa idatesịt.+ 53  Ndien mmọ ẹdu ke temple kpukpru ini ẹnọ Abasi itoro.+

Mme Ikọ Idakisọn̄