Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Luke 18;1-43

18  Ekem enye ọnọ mmọ uwụtn̄kpọ kiet ndiwụt nte ke oyom mmọ ẹbọn̄ akam kpukpru ini, ẹkûnyụn̄ ẹkpa mba,+  ete: “Ebiereikpe emi mîbakke Abasi mînyụn̄ ikponoke owo okodu ke obio kiet.  Edi ebeakpa kiet ama odu ke obio oro onyụn̄ esika ebịne+ enye ediwak ini, ete, ‘Biere ikpe enen ke ufọt mi ye asua emi enyenede ikpe ye ami.’  Edi, enye inyịmeke ke ndusụk ini, ekem enye ọdọhọ ke esịt esie ete, ‘Okposụkedi nte mmembakke Abasi, mmennyụn̄ n̄kponoke owo,  edi, sia ebeakpa emi afịnade mi ndien ndien,+ nyebiere edinen ikpe nnọ enye, man enye okûdi mi aba edifịna+ mi tutu n̄kpa mba.’”  Ndien Ọbọn̄ ọdọhọ ete: “Ẹkop se ukwan̄ ebiereikpe oro ọkọdọhọde!  Ke akpanikọ, ndien, nte Abasi idinamke ẹbiere edinen ikpe+ ẹnọ ndimek ikọt esie emi ẹsemede ẹnọ enye uwemeyo ye okoneyo, idem okposụkedi enye enyenede anyanime+ ye mmọ?  Ndọhọ mbufo nte, Enye ayawara anam ẹbiere edinen ikpe+ ẹnọ mmọ. Edi, ke ini Eyen owo edidide, nte enye ayakam okụt orụk mbuọtidem emi ke isọn̄?”  Edi enye etịn̄ uwụtn̄kpọ emi n̄ko ọnọ ndusụk owo emi ẹkebuọtde idem ke idemmọ ẹte mmimọ idi ndinen+ owo ẹnyụn̄ ẹsede mmọ eken ke ndek+ ete: 10  “Owo iba ẹkedọk ẹka temple ndibọn̄ akam, kiet edi Pharisee enye eken edi ọbọ a-tax. 11  Pharisee ada+ ọbọn̄ akam+ emi ke esịt esie ete, ‘O Abasi, mmọkọm fi koro mmentiehe nte mmọ en̄wen, mbon n̄kanubọk, mme anam ukwan̄ido, mme esịn efịbe, m̀mê idem nte ọbọ a-tax emi.+ 12  Ntetre udia utịm ikaba ke urua, nsosio ubak kiet ke itie duop ke kpukpru se nnyenede nnọ.’+ 13  Edi ọbọ a-tax emi adade nsannsan inyịmeke ndikam mmenede enyịn esie nse enyọn̄, edi ọdọdiọn̄ amia ubọk ke ikpanesịt+ esie, ete, ‘O Abasi, tua mi, anamidiọk, mbọm.’+ 14  Ndọhọ mbufo nte, Owo emi osụhọde ọnyọn̄ ufọk esie nte edinen+ owo akan owo enye eken; koro owo eke emenerede idemesie ke enyọn̄ ẹyesụhọde enye ẹnịm, edi owo eke osụhọrede idemesie ẹyemenede enye.”+ 15  Ekem mme owo ẹda nseknditọ mmọ ẹsọk enye man enye otụk mmọ; edi ke ini mme mbet ẹkụtde ẹsua ẹnọ mmọ.+ 16  Edi, Jesus ete ẹda nseknditọ oro ẹdi onyụn̄ ọdọhọ ete: “Ẹyak n̄kpri nditọ ẹtiene mi, ẹkûdomo ndikpan mmọ. Koro obio ubọn̄ Abasi enyenede mmọ eke ẹtiede ntem.+ 17  Ke akpanikọ ke ndọhọ mbufo, Owo ekededi eke mîbọhọ obio ubọn̄ Abasi nte ekpri eyen ididụkke ke esịt.”+ 18  Ekem andikara kiet obụp enye, ete: “Eti Andikpep, ndinam nso man nnyene nsinsi uwem?”+ 19  Jesus obụp enye ete: “Ntak emi afo okotde mi eti? Owo ndomokiet idịghe eti, ke mîbọhọke kiet, kpa Abasi.+ 20  Afo ọmọfiọk mme ewụhọ emi,+ ‘Kûsịn efịbe,+ Kûwot owo,+ Kûyịp inọ,+ Kûtie ntiense nsu,+ Kpono usọ ye uka.’”+ 21  Edi enye ọdọhọ ete: “Mma nnenịm kpukpru emi toto ke uyen.”+ 22  Ke ini Jesus okopde emi, ọdọhọ enye ete: “N̄kpọ kiet ke osụk osụhọ fi ndinam: Nyam kpukpru n̄kpọ emi afo enyenede deme nọ mme ubuene, ndien afo eyenyene n̄kpọuto ke heaven; nyụn̄ ditiene mi.”+ 23  Ke ini enye okopde emi, enye ofụhọ etieti, koro enye enyenede ediwak inyene.+ 24  Jesus ese enye onyụn̄ ọdọhọ ete: “Edidi ọkpọsọn̄ n̄kpọ didie ntem mbon emi ẹnyenede okụk ndibe ndụk obio ubọn̄ Abasi!+ 25  Ke akpanikọ, edi mmemmem n̄kpọ camel ndibe ke odudu abiabon* akan owo inyene ndidụk obio ubọn̄ Abasi.”+ 26  Mmọ emi ẹkopde ẹbụp ẹte: “Anie ndien ekeme ndibọhọ?” 27  Enye ọbọrọ ete: “Se owo mîkemeke ndinam, Abasi ekeme ndinam.”+ 28  Edi Peter ọdọhọ ete: “Sese! Nnyịn ima ikpọn̄ mme n̄kpọ nnyịn itiene fi.”+ 29  Enye ọdọhọ mmọ ete: “Ke akpanikọ ke ndọhọ mbufo, Idụhe baba owo kiet emi ọkọkpọn̄de ufọk m̀mê n̄wan m̀mê nditọeka m̀mê ete ye eka m̀mê nditọ ke ntak obio ubọn̄ Abasi+ 30  emi mîdibọhọ se iwakde ikan oro ke ini emi, ye nsinsi uwem ke editịm n̄kpọ emi edidide.”+ 31  Ekem enye ada mbet duopeba esịk ada onyụn̄ ọdọhọ mmọ ete: “Sese! Nnyịn imọn̄ idọk ika Jerusalem, ndien kpukpru se mme prọfet+ ẹkewetde ẹban̄a Eyen owo ẹyesu ofụri ofụri.+ 32  Ke uwụtn̄kpọ, ẹyeyak enye ẹnọ mbon idụt ẹyenyụn̄ ẹsak enye nsahi+ ẹnyụn̄ ẹmiom+ enye ẹnyụn̄ ẹfiari enye etap;+ 33  ndien ke ẹma ẹkemia+ enye ẹma, mmọ ẹyewot+ enye, edi ke ọyọhọ usen ita enye eyeset.”+ 34  Nte ededi, mmọ ikọfiọkke se baba kiet ke otu mme n̄kpọ emi ọwọrọde; edi ikọ emi edịbe mmọ, mmọ inyụn̄ ifiọkke se enye etịn̄de.+ 35  Ekem nte enye asan̄ade ekpere Jericho, nnan kiet etie ke mbenusụn̄ eben̄e eben̄e.+ 36  Ke ini enye okopde nte otuowo ẹsan̄ade ẹbe, enye obụp m̀mê nso ke emi ọkpọwọrọ. 37  Mmọ ẹdọhọ enye ẹte: “Jesus eyen Nazareth asan̄a ebe!”+ 38  Ndien enye ofiori, ete: “Jesus, Eyen David, tua mi mbọm!”+ 39  Edi mmọ emi ẹbede iso ẹsọn̄ọ ẹdọhọ enye ẹte ekịbi inua, edi enye ọdọdiọn̄ ofiori ete: “Eyen David, tua mi mbọm.”+ 40  Ekem Jesus atuak ada onyụn̄ ọnọ uyo ete ẹda owo oro ẹsọk imọ.+ Ke enye ama akasan̄a ekpere, Jesus obụp enye ete: 41  “Oyom nnam nso nnọ fi?”+ Enye ọbọrọ ete: “Ọbọn̄, nam mi mfiak n̄kụt usụn̄.”+ 42  Ntre Jesus ọdọhọ enye ete: “Fiak kụt usụn̄; mbuọtidem fo anam idem ọsọn̄ fi.”+ 43  Ndien kpa idaha oro enye afiak okụt usụn̄,+ onyụn̄ etiene enye, onyụn̄ ọnọ Abasi ubọn̄.+ N̄ko, kpukpru owo emi ẹkụtde ẹtoro Abasi.

Mme Ikọ Idakisọn̄

At. Ed., “abiabon ukịmn̄kpọ.”