Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Luke 1;1-80

1  Sia ediwak owo ẹma ẹkesịn idem ẹwet mbụk akpanikọ+ oro nnyịn inịmde ọyọhọ ọyọhọ,  kpa nte mbon emi ẹkekụtde+ mme n̄kpọ emi toto ke editọn̄ọ+ ẹkenyụn̄ ẹtan̄ade etop+ emi ẹkeyakde ẹnọ nnyịn,  sia mma n̄kọtọn̄ọ ke editọn̄ọ ntiene kpukpru n̄kpọ nnennen nnennen, mma mbiere n̄ko ndiwet mmọ ke nde ke nde+ nnọ fi, ata eti+ Theophilus,+  man afo ekpetịm ọfiọk ete ke se ẹkekpepde fi edi akpanikọ.+  Ke eyo Herod,+ edidem Judea, oku kiet ama odu emi ekekerede Zechariah, owo otu Abijah,+ ndien enye ama enyene n̄wan emi otode ke otu nditọiban Aaron,+ enyịn̄ esie ekedi Elizabeth.  Mmọ mbiba ẹkedi ndinen owo+ ke iso Abasi ke ntak emi mmọ mîkenyeneke nduduọhọ+ ke ndisan̄a ke kpukpru mme ewụhọ+ ye mme ibet+ Jehovah.+  Edi mmọ ikenyeneke eyen, koro Elizabeth ekedide ada,+ mmọ mbiba ẹma ẹnyụn̄ ẹnen̄ede ẹsọn̄.  Edikem nte enye anamde utom nte oku ke iso Abasi ke ini utom otu+ esie,  nte ido utom oku edide, ini esie ama edikem enye ndidụk edisana ebiet Jehovah+ n̄kọfọp incense;+ 10  ndien ofụri otuowo ke ẹkebọn̄ akam ke an̄wa ke ini ufọp incense.+ 11  Angel Jehovah ọbiọn̄ọde enye ke iso, ada ke ubọk nnasia itieuwa ufọp incense.+ 12  Edi esịt etịmede Zechariah ke ini enye okụtde emi, ndịk onyụn̄ anam enye.+ 13  Nte ededi, angel oro ọdọhọ enye ete: “Kûfehe ndịk, Zechariah, koro ẹkop n̄kpeubọk fo,+ ndien n̄wan fo, Elizabeth, ayaman eyeneren ọnọ fi, afo oyonyụn̄ osio enye enyịn̄ John.+ 14  Ndien afo ayadara onyụn̄ enem esịt etieti, ediwak owo ẹyenyụn̄ ẹdara+ ẹban̄a emana esie; 15  koro enye oyokpon ke iso Jehovah.+ Edi inaha enye ọn̄wọn̄ wine ye ọkpọsọn̄ mmịn baba kiet,+ enye oyonyụn̄ ọyọhọ ye edisana spirit toto ke idịbi eka esie;+ 16  ndien enye ayanam ediwak nditọ Israel ẹfiak ẹtiene Jehovah+ Abasi mmọ. 17  N̄ko, enye ayada spirit ye odudu Elijah+ ebem enye iso, man ọwọn̄ọde esịt+ mme ete ọnọ nditọ onyụn̄ anam mbon ntụtutọn̄ ẹsan̄a ke ata ọniọn̄ ndinen owo, man etịm mbon emi ẹben̄ede idem+ ọnọ Jehovah.”+ 18  Ndien Zechariah ọdọhọ angel oro ete: “Ndisan̄a didie mfiọk ke emi edi akpanikọ? Koro mmọsọn̄,+ n̄wan mi onyụn̄ aka anyan ke isua.” 19  Angel oro ọbọrọ enye ete: “Ami ndi Gabriel,+ emi ndade n̄kpere iso Abasi, ẹkenyụn̄ ẹsio mi ẹdọn̄ ẹte ndinyene nneme+ ye afo nnyụn̄ ntan̄a eti mbụk n̄kpọ emi nnọ fi. 20  Edi, sese! afo eyedi imụm,+ udunyụn̄ ukemeke nditịn̄ ikọ, tutu esịm usen eke mme n̄kpọ emi ẹdidade itie, koro afo mûkenịmke mme ikọ mi ke akpanikọ, emi ẹdisude ke edikem ini mmọ.” 21  Ofụri ini emi mme owo ke ẹbebet Zechariah,+ mmọ ẹnyụn̄ ẹtọn̄ọ ndiyịk se inamde enye ebịghi ntre ke edisana ebiet. 22  Edi ke ini enye ọwọrọde edi, enye ikemeke nditịn̄ ikọ nnọ mmọ, ndien mmọ ẹfiọk ẹte enye ama okụt n̄kukụt+ ke edisana ebiet; ndien enye anam idiọn̄ọ ọnọ mmọ, edi osụk edi imụm. 23  Edikem, ke adan̄aemi mme usen utom esie ẹkụrede,+ enye ọnyọn̄ ufọk. 24  Edi ke mme usen oro ẹma ẹkebe Elizabeth n̄wan esie oyomo;+ ndien enye esịne ke ufọk ke ọfiọn̄ ition, ọdọhọde ete: 25  “Emi edi nte Jehovah anamde n̄kpọ ye ami ke mme usen emi enye osụkde enyịn ese mi ndimen esuene mi ke otu owo mfep.”+ 26  Ke ọyọhọ ọfiọn̄ itiokiet Abasi osio angel Gabriel+ ọdọn̄ aka obio Galilee emi ekerede Nazareth, 27  etiene eyenan̄wan emi mîfiọkke erenowo emi ẹken̄wọn̄ọde ndida nnọ owo ufọk David emi ekerede Joseph ke ndọ; ndien enyịn̄ eyenan̄wan+ oro ekedi Mary.+ 28  Ndien ke ini enye odụkde etiene eyenan̄wan emi, enye ọdọhọ ete: “Mmọkọm-o,+ afo emi ẹfọnde akwa mfọn, Jehovah+ odu ye afo.”+ 29  Edi ikọ oro etịmede eyenan̄wan emi esịt etieti, enye onyụn̄ ọtọn̄ọ ndikere se orụk ekọm emi ọkpọwọrọde. 30  Ntre angel oro ọdọhọ enye ete: “Kûfehe ndịk, Mary, koro afo omokụt mfọn+ ke iso Abasi; 31  ndien, sese! afo oyoyomo onyụn̄ aman eyeneren,+ ndien afo enyene ndisio enye enyịn̄ Jesus.+ 32  Enye oyokpon,+ oyonyụn̄ ekere Eyen Ata Edikon̄;+ ndien Jehovah Abasi ọyọnọ enye ebekpo+ ete esie David,+ 33  ndien enye ayakara ufọk Jacob nte edidem ke nsinsi, obio ubọn̄ esie idinyụn̄ inyeneke utịt.”+ 34  Edi Mary ọdọhọ angel ete: “Emi edikeme didie ndisu, ke emi mmenyeneke ebuana+ ye erenowo?” 35  Ndien angel oro ọbọrọ enye ete: “Edisana spirit+ oyodoro fi ke idem, odudu Ata Edikon̄ oyonyụn̄ ofụk fi. Ke ntak oro n̄ko eyen oro edimanade edikere edisana,+ Eyen Abasi.+ 36  Sese! Elizabeth iman fo n̄ko omoyomo eyeneren ke ini usọn̄ esie, ndien emi edi ọyọhọ ọfiọn̄ itiokiet, kpa n̄wan emi ẹkekotde ada;+ 37  koro idụhe ikọ baba kiet eke otode Abasi eke mîditreke ndisu.”+ 38  Ekem Mary ọdọhọ ete: “Sese! Ofụn an̄wan+ Jehovah! Akpakam osu ọnọ mi nte uyo fo edide.” Ndien angel oro adaha ọkpọn̄ enye. 39  Ntre ke mme usen oro Mary adaha ke enyọn̄ awara aka ikpehe emi etiede obot obot, ke obio kiet ke Judah, 40  onyụn̄ odụk ufọk Zechariah ọkọkọm Elizabeth. 41  Edi, nte Elizabeth okopde ekọm Mary, nsekeyen ọfrọ ke idịbi esie; ndien Elizabeth ọyọhọ ye edisana spirit, 42  enye onyụn̄ ofiori ke ọkpọsọn̄ uyo ete: “Ọfọfọn ọnọ fi ke otu iban, onyụn̄ ọfọfọn+ ọnọ mfri idịbi fo! 43  Ntre nsan̄a didie nnyene utọ ifet emi, eka Ọbọn̄+ mi ndidi ndise mi? 44  Koro, sese! uyo ekọm fo okododụk mi utọn̄, nsekeyen ke esịt idịbi mi ọfrọ ye akwa idatesịt.+ 45  N̄wan emi enịmde ke akpanikọ okop inemesịt n̄ko, koro mme n̄kpọ oro Jehovah eketịn̄de+ ọnọ enye ẹyesu ofụri ofụri.”+ 46  Ndien Mary ọdọhọ ete: “Ukpọn̄ mi ọnọ Jehovah ubọn̄,+ 47  spirit mi inyụn̄ itreke ndikop akwa idatesịt+ ke Abasi Andinyan̄a mi;+ 48  koro enye emenede enyịn ese usụhọde itie ofụn an̄wan+ esie. Koro, sese! ọtọn̄ọde ke emi kpukpru emana ẹyedọhọ ke ami mmokop inemesịt;+ 49  koro Enye emi enyenede odudu amanam ikpọ n̄kpọ ọnọ mi, enyịn̄ esie onyụn̄ edi edisana;+ 50  ndien mbọm esie odu ke kpukpru emana ọnọ mmọ eke ẹbakde enye.+ 51  Enye amada ubọk esie anam ọkpọsọn̄ n̄kpọ,+ enye amasuan mbon oro ẹtan̄de idem ke uduak esịt mmọ.+ 52  Enye omodorode mme enyene-odudu+ efep ke ebekpo onyụn̄ emenede mme usụhọde owo ke enyọn̄;+ 53  enye amada nti n̄kpọ oyụhọ mbon ọbiọn̄+ onyụn̄ anam mbon inyene ẹnyọn̄ọ ubọk ubọk.+ 54  Enye aman̄wam Israel asan̄autom esie,+ man enye eti mbọm,+ 55  kpa nte enye eketịn̄de ọnọ mme ete ete nnyịn, etịn̄de ọnọ Abraham ye mfri esie, ke nsinsi.”+ 56  Edi Mary odu ye enye ke n̄kpọ nte ọfiọn̄ ita, ekem ọnyọn̄ ufọk esiemmọ. 57  Ndien ini edikem Elizabeth ndiman eyen, enye onyụn̄ aman eyeneren. 58  Ndien mbọhọidụn̄ ye iman esie ẹkop ẹte Jehovah ama anam mbọm+ esie okpon ọnọ enye, mmọ ẹnyụn̄ ẹdara+ ye enye. 59  Ekem ke ọyọhọ usen itiaita mmọ ẹdi ẹdinịm ekpri eyen emi mbobi,+ ndien mmọ ẹyom ndisio enye enyịn̄ ete esie, Zechariah. 60  Edi eka esie ọdọhọ ete: “Baba-o! enye edikere John.” 61  Ndien mmọ ẹdọhọ enye ẹte: “Baba owo kiet ke otu iman fo ikereke enyịn̄ emi.” 62  Ekem mmọ ẹda idiọn̄ọ ẹbụp ete esie enyịn̄ eke enye oyomde ẹsio enye. 63  Ndien enye ọdọhọ ẹnọ imọ itiatn̄wed, enye onyụn̄ ewet ete: “John+ edi enyịn̄ esie.” Mmọdo idem akpa mmọ kpukpru. 64  Kpa idaha oro inua esie okụbọde,+ edeme esie onyụn̄ atara, ndien enye etịn̄ ikọ, otoro Abasi. 65  Ndien ndịk omụm kpukpru mmọ emi ẹdụn̄de ke mbọhọ mmọ; ẹnyụn̄ ẹsuan mbụk ofụri n̄kpọ oro ke ofụri edem obot obot Judea, 66  ndien kpukpru owo eke ẹkopde ẹmụm ẹsịn ke esịt,+ ẹnyụn̄ ẹdọhọ ẹte: “Nso ke ekpri eyen emi edidi?” Koro ubọk+ Jehovah odude ye enye. 67  Ndien Zechariah ete esie ọyọhọ ye edisana spirit, onyụn̄ ọdọhọ ete:+ 68  “Itoro enyene Jehovah Abasi Israel,+ koro enye ọmọwọn̄ọde ntịn̄enyịn esie ọnọ ikọt esie+ onyụn̄ anyan̄a mmọ.+ 69  Ndien enye amanam nnụk+ edinyan̄a etịbe ọnọ nnyịn ke ufọk asan̄autom esie David, 70  kpa nte enye akadade inua ndisana prọfet esie toto ke eset+ etịn̄ 71  aban̄a edinyan̄a nnyịn nsio ke ubọk mme asua nnyịn ye ke ubọk kpukpru mmọ eke ẹsuade nnyịn;+ 72  nditua mme ete ete nnyịn mbọm ndinyụn̄ nti edisana ediomi esie,+ 73  un̄wọn̄ọ oro enye ọkọn̄wọn̄ọde ọnọ Abraham ete ete nnyịn,+ 74  ete ke ima ikanyan̄a nnyịn isio ke ubọk mme asua+ nnyịn, iyọnọ nnyịn ifet ndinam edisana utom nnọ imọ ye unana ndịk+ 75  ke nsọn̄ọnda ye edinen ido ke iso esie ke ofụri eyouwem nnyịn.+ 76  Edi amaedi afo, ekpri eyen, ẹdikot fi prọfet Ata Edikon̄, koro afo eyebem Jehovah iso aka ndidiọn̄ usụn̄ esie,+ 77  ndinọ ikọt esie ifiọk edinyan̄a ebe ke edifen mme idiọkn̄kpọ mmọ,+ 78  oto ke esịt mbọm Abasi nnyịn. Mbọm emi ayanam usiere+ oto ke enyọn̄ esịm nnyịn,+ 79  ndiyama nnọ mmọ eke ẹtiede ke ekịm ye mfụt n̄kpa,+ ndinọ ukot nnyịn ndausụn̄ uforo uforo ke usụn̄ emem.” 80  Ndien ekpri eyen oro aka iso ndikọri+ nnyụn̄ n̄kop idem ke spirit, enye onyụn̄ aka iso odu ke desat tutu esịm usen eke enye owụtde Israel idem an̄wan̄wa.

Mme Ikọ Idakisọn̄