Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Leviticus 25;1-55

25  Ndien Jehovah ọdọhọ Moses ke Obot Sinai ete:  “Dọhọ nditọ Israel ete, ‘Ke ini mbufo ẹdide ẹdisịm isọn̄ emi nnọde mbufo,+ isọn̄ emi ndien enyene ndinịm sabbath nnọ Jehovah.+  Afo enyene ndisuan n̄kpasịp ke in̄wan̄ fo ke isua itiokiet, onyụn̄ enyene ndidiọn̄ vine ke in̄wan̄ fo ke isua itiokiet, onyụn̄ etet mbun̄wụm isọn̄.+  Edi ke ọyọhọ isua itiaba, isọn̄ enyene ndidu ke sabbath ọyọhọ nduọkodudu,+ kpa sabbath Jehovah. Afo unyeneke ndisuan n̄kpasịp ke in̄wan̄ fo, unyụn̄ unyeneke ndidiọn̄ vine ke in̄wan̄ fo.  Afo unyeneke ndikpen̄e se in̄wụmde ito n̄kpasịp oro ẹkeduọn̄ọde ke isọn̄, unyụn̄ unyeneke nditet grape ke vine oro mûkọdiọn̄ke. Isọn̄ enyene ndiduọk odudu ọyọhọ ọyọhọ ke isua kiet.  Ndien se isọn̄ on̄wụmde ke sabbath edidi udia mbufo, afo ye ofụn eren fo ye ofụn an̄wan fo ye owo emi afo ekpede utom ye esenowo, mbon emi ẹdụn̄de ye afo nte isenowo,  ye ufene fo ye unam ikọt ke isọn̄ fo. Ofụri mbun̄wụm isọn̄ ẹdidi udia.  “‘Ndien afo enyene ndibat sabbath isua itiaba, isua itiaba ke itie itiaba, ndien mme usen sabbath isua itiaba ẹnyene ndidi isua aba ye usụkkiet nnọ fi.  Ndien afo enyene ndinam ẹfri nnụk emi ọsọn̄de uyo+ ke ọyọhọ usen duop ke ọyọhọ ọfiọn̄ itiaba;+ ke usen usio-isop+ ke mbufo ẹdinam ẹfri nnụk ke ofụri isọn̄ mbufo. 10  Ndien mbufo ẹnyene ndinam ọyọhọ isua aba ye duop asana nnyụn̄ ntan̄a uwọrọ-ufụn ke isọn̄ nnọ kpukpru mme andidụn̄ ke esịt.+ Enye edidi Jubilee+ ọnọ mbufo, kpukpru mbufo ẹnyụn̄ ẹnyene ndifiak nnyọn̄ isọn̄ mbufo nnyụn̄ mfiak nnyọn̄ ubon mbufo.+ 11  Ọyọhọ isua aba ye duop oro edidi Jubilee ọnọ mbufo.+ Mbufo inyeneke ndisuan n̄kpasịp m̀mê ndikpen̄e se in̄wụmde ito n̄kpasịp oro ẹkeduọn̄ọde ẹbono ke isọn̄ m̀mê nditet grape ke vine oro mbufo mîkọdiọn̄ke.+ 12  Koro emi edi Jubilee. Enye enyene ndidi edisana n̄kpọ nnọ mbufo. Mbufo ẹmekeme ndidia mbun̄wụm isọn̄ eke otode in̄wan̄.+ 13  “‘Mbufo ẹnyene ndifiak nnyọn̄ isọn̄ mbufo ke isua Jubilee emi.+ 14  Ndien edieke afo anyamde n̄kpọ ọnọ nsan̄a fo m̀mê ọbọde nsan̄a fo n̄kpọ edep, ẹkûdue kiet eken.+ 15  Nte ibat isua edide tọn̄ọ nte Jubilee ekebe, ke afo edibọ nsan̄a fo n̄kpọ edep; enye edinyụn̄ anyam ọnọ fi nte ekemde ye ibat isua mbun̄wụm oro.+ 16  Nte isua awakde ke enye edimenede ekọmurua,+ ndien nte isua ekpride ke enye edisụhọde ekọmurua, koro nte ibat mbun̄wụm awakde ke enye edinyam ọnọ fi. 17  Ndien afo unyeneke ndidue nsan̄a fo,+ onyụn̄ enyene ndibak Abasi fo,+ koro ami ndi Jehovah Abasi mbufo.+ 18  Ntre mbufo ẹnyene ndinịm ewụhọ mi nnyụn̄ nnịm mme ubiereikpe mi nnyụn̄ nnam mmọ. Ndien mbufo ẹyedụn̄ ke isọn̄ emi ke ifụre.+ 19  Ndien isọn̄ oyon̄wụm mbun̄wụm esie,+ mbufo ẹyenyụn̄ ẹdia ẹyụhọ ẹnyụn̄ ẹdụn̄ ke esịt ke ifụre.+ 20  “‘Edi edieke mbufo ẹdidọhọde ẹte: “Nso ke nnyịn ididia ke ọyọhọ isua itiaba ke emi nnyịn mîdisuanke n̄kpasịp, mîdinyụn̄ itetke mfri nnyịn?”+ 21  do, ami nyọnọ mbufo edidiọn̄ mi ke ọyọhọ isua itiokiet, ndien isọn̄ oyon̄wụm mbun̄wụm isua ita.+ 22  Ndien mbufo ẹnyene ndisuan n̄kpasịp ke ọyọhọ isua itiaita ẹnyụn̄ ẹdia akani mbun̄wụm tutu ke ọyọhọ isua usụkkiet. Mbufo ẹdidia akani mbun̄wụm tutu isọn̄ on̄wụm mbun̄wụm esie. 23  “‘Ntre owo inyeneke ndinyam isọn̄ taktak,+ koro isọn̄ edide okịm.+ Koro ke enyịn mi, mbufo ẹdi isenowo ye mme odudụn̄.+ 24  Ndien ke ofụri isọn̄ emi mbufo ẹnyenede, mbufo ẹnyene ndinọ owo unen ndifak isọn̄ esie.+ 25  “‘Edieke eyenete fo ebuenede onyụn̄ anyamde ndusụk isọn̄ esie, andifak emi edide iman esie enyene n̄ko ndidi ndifak se eyenete esie akanyamde.+ 26  Edi edieke owo mînyeneke andifak, ndien enye anam udori onyụn̄ enyene n̄kpọ ekem ndida mfak, 27  enye n̄ko enyene ndibat isua emi ebede tọn̄ọ nte enye akanyam isọn̄ oro onyụn̄ afiak ayak okụk emi osụhọde ọnọ owo emi enye akanyamde ọnọ, ndien enye ayafiak ada isọn̄ esie.+ 28  “‘Edi edieke enye mînyeneke se ikemde ndifiak nyak nnọ enye, se enye akanyamde eyesịne andidep ke ubọk tutu esịm isua Jubilee;+ ndien ọyọwọrọ enye ke ubọk ke Jubilee, ndien enye ayafiak ada isọn̄ esie.+ 29  “‘Ndien edieke owo anyamde ufọkidụn̄ ke obio emi ẹbọpde ibibene ẹkanade, enye enyene unen ndifak mbemiso isua kiet okụrede tọn̄ọ nte enye akanyam; enye enyene unen ndifak+ ke ufan̄ isua kiet. 30  Edi edieke enye mîfakke mbemiso isua kiet okụrede, ufọk emi odude ke obio emi ẹbọpde ibibene ẹkanade eyedi inyene andidep taktak ke ofụri emana esie. Idiwọrọke enye ke ubọk ke Jubilee. 31  Edi amaedi mme ufọk ke obio-in̄wan̄ emi owo mîbọpke ibibene ikanade, ẹyebat mmọ nte kiet ke otu in̄wan̄ emi odude ke obio. Ẹnyene unen ndifak+ enye, enye oyonyụn̄ ọwọrọ andidep ke ubọk ke Jubilee.+ 32  “‘Amaedi mme obio nditọ Levi ye mme ufọk ke mme obio emi ẹdide udeme mmọ,+ nditọ Levi ẹnyene unen ke nsinsi ndifak.+ 33  Ndien edieke owo mîfakke ufọk nditọ Levi, ufọk eke ẹnyamde ke obio emi edide udeme esie ọyọwọrọ andidep ke ubọk ke Jubilee;+ koro ufọk ke mme obio nditọ Levi ẹdide inyene mmọ ke otu nditọ Israel.+ 34  Akan oro, owo idinyamke in̄wan̄ mbiet ufene+ emi odude ke obio mmọ, koro enye edide inyene mmọ ke nsinsi. 35  “‘Ndien edieke eyenete fo emi odude ye afo ebuenede, mînyụn̄ inyeneke n̄kpọ aba,+ afo enyene ndin̄wam enye.+ Yak enye odu uwem ke ebiet fo nte esenowo ye odudụn̄.+ 36  Kûbọ enye udori, kûnyụn̄ unọ enye ebuọt ubọ akwa udori,+ edi bak Abasi fo;+ ndien eyenete fo enyene ndidu uwem ke ebiet fo. 37  Kûbuọt enye okụk fo ubọ udori,+ kûnyụn̄ unọ enye udia fo ubọ akwa udori. 38  Ami ndi Jehovah Abasi mbufo, emi n̄kosiode mbufo ke isọn̄ Egypt man nnọ mbufo isọn̄ Canaan,+ nnyụn̄ ndi Abasi mbufo.+ 39  “‘Ndien edieke eyenete fo emi odude ye afo ebuenede, onyụn̄ anyamde idemesie ọnọ fi,+ kûyak enye anam utom nte ofụn.+ 40  Enye enyene ndidu ye afo nte owo eke ẹkpede utom,+ nte odudụn̄. Enye enyene ndinam utom ye afo tutu esịm isua Jubilee. 41  Ndien yak enye ọwọrọ ọkpọn̄ fi, enye ye nditọ esie emi ẹdude ye enye, onyụn̄ ọnyọn̄ etiene ubon esie, ndien afiak akada isọn̄ mme ete ete esie enyene.+ 42  Koro mmọ ẹdide ifịn mi emi n̄kosiode ke isọn̄ Egypt.+ Mmọ inyeneke ndinyam idemmọ nte emi ẹnyamde ofụn. 43  Kûkara enye ke ufịk,+ nyụn̄ bak Abasi fo.+ 44  Amaedi ofụn eren fo ye ofụn an̄wan fo emi ẹtode mme idụt emi ẹkande mbufo ẹkụk, emi ẹkabarede ẹdi okwo, mbufo ẹmekeme ndidep ofụn eren ye ofụn an̄wan ke otu mmọ. 45  Ndien n̄ko mbufo ẹmekeme ndidep ifịn ke otu nditọ mme odudụn̄ emi ẹdide isenowo ke otu mbufo,+ ye ke otu ubon mmọ emi ẹdude ye mbufo, emi ẹkenyụn̄ ẹmanade ẹnọ mmọ ke isọn̄ mbufo; ndien mmọ ẹyedi inyene mbufo. 46  Ndien mbufo ẹnyene ndinịm mmọ nte n̄kpọ-akpa nnọ nditọ mbufo emi ẹditienede mbufo man ẹda ẹnyene ke nsinsi.+ Mbufo ẹmekeme ndida mmọ nte mbonutom, edi ẹkûkara nditọete mbufo emi ẹdide nditọ Israel ke ufịk.+ 47  “‘Edi edieke esenowo m̀mê odudụn̄ emi odude ye afo enyenede n̄kpọ, ndien eyenete fo emi odude ye enye akabade ebuene onyụn̄ anyam idemesie ọnọ esenowo oro m̀mê odudụn̄ emi odude ye afo, m̀mê owo ke ubon esenowo oro, 48  ke enye ama akanyam idemesie,+ ẹkeme ndifak enye.+ Kiet ke otu nditọete esie ekeme ndifak enye.+ 49  Mîdịghe eyeneka ete esie m̀mê eyen eyeneka ete esie ekeme ndifak enye, m̀mê owo ekededi emi edide iyịp kiet ye enye,+ owo ke ubon esie, ekeme ndifak enye. “‘Mîdịghe edieke enye akabarede enyene n̄kpọ, enye ekeme n̄ko ndifak idemesie.+ 50  Ndien enye enyene nditie ye owo emi ekedepde enye ndian ibat ọtọn̄ọde ke isua emi enye akanyamde idemesie ọnọ enye tutu esịm isua Jubilee,+ ndien ekọmurua esie enyene ndikem ye ibat isua oro.+ Enye enyene ndinam utom nnọ enye nte mme usen utom owo eke ẹkpede utom ẹdide.+ 51  Edieke ediwak isua ẹsụk ẹsụhọde, enye enyene ndisio okụk ke otu se ẹkedade ẹdep enye n̄kpe mfak idemesie adan̄a nte ibat isua oro edide. 52  Edi edieke isua eke ẹsụhọde mbemiso isua Jubilee+ mîwakke, enye enyene ndidian ibat ke idemesie. Enye enyene ndinọ okụk ndifak idemesie ke adan̄a nte ibat isua oro edide. 53  Enye enyene ndinam n̄kpọ ye enye nte ẹsinamde ye owo eke ẹkpede utom+ ke isua ke isua. Enye inyeneke ndikara enye ke ufịk+ ke iso fo. 54  Edi edieke enye mîkemeke ndifak idemesie ntem, enye ye nditọ esie n̄ko ẹnyene ndiwọrọ ke isua Jubilee.+ 55  “‘Koro nditọ Israel ẹdi ifịn mi. Mmọ ẹdi ifịn mi+ emi n̄kosiode ke isọn̄ Egypt.+ Ami ndi Jehovah Abasi mbufo.+

Mme Ikọ Idakisọn̄