Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Leviticus 11;1-47

11  Ndien Jehovah ọdọhọ Moses ye Aaron ete:  “Ẹdọhọ nditọ Israel ẹte, ‘Emi edi odu-uwem edibotn̄kpọ eke mbufo ẹditade+ ke otu kpukpru unam eke ẹdude uwem ke isọn̄:  Kpukpru edibotn̄kpọ eke ẹsiahade ikpat ẹnịm ufan̄, emi ẹnyụn̄ ẹkpọhide n̄kpọ ẹta, oro ke mbufo ẹdita.+  “‘Emi kpọt ke mbufo mîditaha ke otu kpukpru se ikpọhide n̄kpọ ita inyụn̄ isiahade ikpat: camel, koro enye ọkpọhide n̄kpọ ata edi mîsiahake ikpat. Enye edi ndedehe n̄kpọ ọnọ mbufo.+  Eku abaitiat+ n̄ko, koro enye ọkpọhide n̄kpọ ata edi mîsiahake ikpat. Enye edi ndedehe n̄kpọ ọnọ mbufo.  Ebet+ n̄ko, koro enye ọkpọhide n̄kpọ ata edi mîsiahake ikpat. Enye edi ndedehe n̄kpọ ọnọ mbufo.  Kpa ntre ye edi,+ koro enye asiahade ikpat enịm ufan̄, edi mîkpọhike n̄kpọ ita. Enye edi ndedehe n̄kpọ ọnọ mbufo.  Mbufo ẹkûta baba obụk mmọ kiet, ẹkûnyụn̄ ẹtụk okpo+ mmọ. Mmọ ẹdi ndedehe n̄kpọ ẹnọ mbufo.+  “‘Emi ke mbufo ẹdita ke otu se idude ke mmọn̄:+ Kpukpru n̄kpọ eke ẹnyenede n̄kọi ye ikpọk+ ke mmọn̄ ye ke inyan̄ ye ke idịm, oro ke mbufo ẹdita. 10  Ndien kpukpru n̄kpọ eke ẹdude ke inyan̄ ye ke idịm emi mînyeneke n̄kọi ye ikpọk, ke otu kpukpru mme edibotn̄kpọ eke ẹsan̄ade ke otu ke mmọn̄ ye ke otu kpukpru mme odu-uwem ukpọn̄ eke ẹdude ke mmọn̄, mmọ ẹdi n̄kpọ itekesịt ẹnọ mbufo. 11  Ih, mmọ ẹdidi n̄kpọ itekesịt ẹnọ mbufo. Mbufo ẹkûta baba obụk mmọ kiet,+ ẹdi ẹse okpo mmọ ke n̄kpọ itekesịt. 12  Kpukpru n̄kpọ eke ẹdude ke mmọn̄ emi mînyeneke n̄kọi ye ikpọk ẹdi n̄kpọ itekesịt ẹnọ mbufo. 13  “‘Mmọ emi ke mbufo ẹdise ke n̄kpọ itekesịt ke otu mme edibotn̄kpọ emi ẹfede.+ Ẹkûta mmọ. Mmọ ẹdi n̄kpọ itekesịt: ntrukpom+ ye ososo inyan̄ ye obubịt utere, 14  ye ididuot mbukpo ye obubịt mbukpo+ ke orụk mmọ, 15  ye kpukpru raven+ ke orụk mmọ, 16  ye ostrich+ ye ikurikụt ye ituen ye falcon ke orụk mmọ, 17  ye ekpri ikurikụt ye unen idịm ye atiai-utọn̄ ikurikụt,+ 18  ye unen mmọn̄ ye ikpan̄inyan̄ ye utere,+ 19  ye inuen inyan̄ ye akpantana ke orụk mmọ, ye usari ye emian̄.+ 20  Kpukpru mme enyene-mba edibotn̄kpọ emi ẹfede ke otu ẹnyụn̄ ẹsan̄ade ke kpukpru ukot inan̄ ẹdi n̄kpọ itekesịt ẹnọ mbufo.+ 21  “‘Mmọ emi kpọt ke mbufo ẹdita ke otu kpukpru mme enyene-mba edibotn̄kpọ emi ẹfede ke otu ẹnyụn̄ ẹsan̄ade ke kpukpru ukot inan̄, mmọ emi ẹnyenede n̄kpri ukot ke enyọn̄ ukot mmọ ndida mfrọ ke isọn̄. 22  Mmọ emi ke mbufo ẹdita ke otu mmọ: n̄kukun̄kpọyọriyọ emi esiwọrọde idụn̄,+ ke orụk mmọ, ye n̄kukun̄kpọyọriyọ emi ẹsitade,+ ke orụk mmọ, ye idian̄ ke orụk mmọ, ye ataktak+ ke orụk mmọ. 23  Ndien kpukpru mme enyene-mba edibotn̄kpọ eken emi ẹfede ke otu ẹnyụn̄ ẹsan̄ade ke ukot inan̄ ẹdi n̄kpọ itekesịt+ ẹnọ mbufo. 24  Mmọ emi ẹyenam mbufo ẹdehe. Kpukpru owo eke ẹtụkde okpo mmọ ẹyedehe tutu ẹsịm mbubreyo.+ 25  Ndien kpukpru owo eke ẹmende okpo mmọ ẹnyene ndiyet+ ọfọn̄ mmọ, ndien mmọ ẹnyene ndidehe tutu esịm mbubreyo. 26  “‘Amaedi unam ekededi emi asiahade ikpat edi mînyeneke ufan̄ mînyụn̄ ikpọhike n̄kpọ ita, mmọ ẹdi ndedehe n̄kpọ ẹnọ mbufo. Kpukpru owo eke ẹtụkde mmọ ẹyedehe.+ 27  Amaedi kpukpru edibotn̄kpọ emi ẹsan̄ade ke ekaubọk mmọ, ke otu kpukpru mme odu-uwem edibotn̄kpọ emi ẹsan̄ade ke kpukpru ukot inan̄, mmọ ẹdi ndedehe n̄kpọ ẹnọ mbufo. Kpukpru owo eke ẹtụkde okpo mmọ ẹyedehe tutu ẹsịm mbubreyo. 28  Ndien owo eke emende okpo+ mmọ eyeyet ọfọn̄ esie,+ oyonyụn̄ edehe tutu esịm mbubreyo. Mmọ ẹdi ndedehe n̄kpọ ẹnọ mbufo. 29  “‘Ndien emi edi ndedehe n̄kpọ ọnọ mbufo ke otu mme edibotn̄kpọ emi ẹsan̄ade ke otu ke isọn̄:+ oyot ye eku+ ye ekpọk ke orụk mmọ, 30  ye ukpọn̄eyen ye atakpot ye asawuri ye ekpọk ntan ye okube. 31  Mmọ emi ẹdi ndedehe n̄kpọ ẹnọ mbufo ke otu kpukpru mme edibotn̄kpọ emi ẹsan̄ade ke otu.+ Kpukpru owo eke ẹtụkde okpo mmọ ẹyedehe tutu ẹsịm mbubreyo.+ 32  “‘Ndien n̄kpọ ekededi eke okpo mmọ ọduọde odụk eyedehe, edide n̄kpọ eke ẹdade eto+ ẹnam m̀mê ọfọn̄ m̀mê ikpa+ m̀mê ọfọn̄ ntuan̄a.+ Ẹyemen n̄kpoduoho ekededi oro ẹdade ẹnam n̄kpọ ẹsịn ke mmọn̄, ndien enye eyedehe tutu esịm mbubreyo, ndien ekem enye ayasana. 33  Amaedi esombat+ ekededi eke mmọ ẹduọde ẹdụk, se ededi emi esịnede ke eso oro eyedehe, mbufo ẹyenyụn̄ ẹbom eso oro.+ 34  Orụk udia ekededi eke owo adiade, emi ẹdade mmọn̄ ke eso oro ẹnam edidi ndedehe n̄kpọ, n̄kpọ ekededi eke owo ọn̄wọn̄de emi otode ke eso oro edidi ndedehe n̄kpọ. 35  Ndien kpukpru n̄kpọ eke okpo mmọ ọduọde odoro ẹyedehe. Edide itie usan̄uyo m̀mê n̄kpọ udori aban̄, ẹnyene ndibom enye. Mmọ ẹdi ndedehe n̄kpọ, mmọ ẹdinyụn̄ ẹdi ndedehe n̄kpọ ẹnọ mbufo. 36  Sụk idịm ye obube mmọn̄ ẹdidi edisana, edi owo ekededi eke otụkde okpo mmọ eyedehe. 37  Ndien edieke n̄kpọ eke otode okpo mmọ otụkde n̄kpasịp ekededi eke ẹditọde, n̄kpasịp oro asana. 38  Edi edieke ẹsịnde n̄kpasịp oro ke mmọn̄ ndien n̄kpọ eke otode okpo mmọ ọduọ odoro, enye edidi ndedehe n̄kpọ ọnọ mbufo. 39  “‘Edieke unam ekededi eke mbufo ẹsitade akpade, owo eke otụkde okpo esie eyedehe tutu esịm mbubreyo.+ 40  Ndien owo ekededi eke atade+ okpo unam emi eyeyet ọfọn̄ esie, ndien enye eyedehe tutu esịm mbubreyo; ndien owo eke emende okpo esie efep eyeyet ọfọn̄ esie, ndien enye enyene ndidehe tutu esịm mbubreyo. 41  Ndien kpukpru mme edibotn̄kpọ eke ẹsan̄ade ke otu ke isọn̄ ẹdi n̄kpọ itekesịt.+ Mbufo ẹkûta mmọ. 42  Amaedi edibotn̄kpọ ekededi eke ọnyọnide ke idịbi+ ye edibotn̄kpọ ekededi eke asan̄ade ke kpukpru ukot inan̄ m̀mê edibotn̄kpọ ekededi emi enyenede ediwak ukot ke otu mme edibotn̄kpọ eke ẹsan̄ade ke otu ke isọn̄, mbufo ẹkûta mmọ, koro mmọ ẹdide n̄kpọ itekesịt.+ 43  Ẹkûyak edibotn̄kpọ ekededi emi ẹsan̄ade ke otu ẹsabade ukpọn̄ mbufo, ẹkûnyụn̄ ẹda mmọ ẹsabade idem mbufo mbak mmọ ẹdinam mbufo ẹdehe.+ 44  Koro ami ndi Jehovah Abasi mbufo;+ ndien mbufo ẹnyene ndinam idem mbufo asana nnyụn̄ ndi edisana,+ koro ami ndide edisana.+ Ntre mbufo ẹkûnam edibotn̄kpọ ekededi eke ẹsan̄ade ke otu ke isọn̄ ẹnam ukpọn̄ mbufo ẹdehe. 45  Koro ami ndi Jehovah emi n̄kosiode mbufo ke isọn̄ Egypt ndọk ndi man ndi Abasi mbufo;+ mbufo ẹnyụn̄ ẹnyene ndidi edisana,+ koro ami ndide edisana.+ 46  “‘Emi edi ibet oro aban̄ade unam ye edibotn̄kpọ emi efede ye kpukpru ukpọn̄ eke ẹdude uwem ẹnyụn̄ ẹsan̄ade ke mmọn̄+ ye kpukpru ukpọn̄ eke ẹsan̄ade ke otu ke isọn̄, 47  man ukpụhọde odu+ ke ufọt se idehede ye se isanade, ye ke ufọt odu-uwem edibotn̄kpọ eke owo akpatade ye odu-uwem edibotn̄kpọ eke owo mîkpataha.’”

Mme Ikọ Idakisọn̄