Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Judges 9;1-57

9  Edikem Abimelech+ eyen Jerubbaal adaha aka Shechem+ ebịne nditọete eka esie onyụn̄ ọkọdọhọ mmọ ye ofụri ubon ke ufọk ete eka esie, ete:  “Mbọk, mbufo ẹbụp kpukpru mme enyene isọn̄ Shechem, ẹte, ‘Ewe edifọn ye mbufo akan, owo ata ye duop,+ kpa kpukpru nditọ Jerubbaal ndikara mbufo m̀mê owo kiet ndikara mbufo? Ndien mbufo ẹti ẹte ke ami ndi ọkpọ mbufo ye obụk mbufo.’”+  Ndien nditọete eka esie ẹtịn̄ kpukpru ikọ emi ẹban̄ade enye ẹnọ kpukpru mme enyene isọn̄ Shechem tutu esịt mmọ ọwọn̄ọde etiene Abimelech,+ koro mmọ ẹkedọhọde ẹte: “Enye edi eyenete+ nnyịn.”  Ndien mmọ ẹnọ enye mbak silver ata ye duop emi ẹkedade ẹto ufọk Baal-berith,+ ndien Abimelech ada ekpe mme anana ubọkutom ye mbon emiom,+ man ẹkpesan̄a ye enye.  Ekem enye adaha aka ufọk ete esie ke Ophrah+ okowot nditọete+ esie, kpa nditọ Jerubbaal, irenowo ata ye duop, ke enyọn̄ itiat kiet, edi Jotham kpa ekperedem eyen Jerubbaal ọkọyọhọ osụhọ, koro enye ama edịbe.  Ekem kpukpru mme enyene isọn̄ Shechem ye ofụri ufọk Millo+ ẹsop idem ọtọkiet ẹka ẹkenam Abimelech edidem,+ ke ebiet emi ekperede akamba eto,+ kpa adaha emi okodude ke Shechem.+  Ke ini ẹtịn̄de ẹnọ Jotham, enye adaha inikiet aka ọkọdọk ada ke enyọn̄ Obot Gerizim+ onyụn̄ ofiori ọdọhọ mmọ ete: “Mbufo mme enyene isọn̄ Shechem, ẹkpan̄ utọn̄ ẹnọ mi, man Abasi n̄ko akpakpan̄ utọn̄ ọnọ mbufo:  “Usen kiet mme eto ẹkeka ndiyet edidem aran nnọ idemmọ. Ntre mmọ ẹdọhọ eto olive+ ẹte, ‘Di edidem nọ nnyịn.’+  Edi eto olive ọdọhọ mmọ ete, ‘Nte ndikpọn̄ aran mi emi ẹdade ẹkpono+ Abasi ye owo, nnyụn̄ n̄ka n̄kenyen̄e ke enyọn̄ mme eto+ eken?’ 10  Ndien mme eto oro ẹdọhọ eto fig+ ẹte, ‘Afo di ọbọn̄ an̄wan nọ nnyịn.’ 11  Edi eto fig ọbọrọ mmọ ete, ‘Nte ndikpọn̄ inịn̄e mi ye eti mbun̄wụm mi n̄ka n̄kenyen̄e ke enyọn̄ mme eto eken?’+ 12  Ekem mme eto ẹdọhọ vine ẹte, ‘Afo di ọbọn̄ an̄wan nọ nnyịn.’ 13  Ndien vine ọdọhọ mmọ ete, ‘Nte ndikpọn̄ obufa wine mi emi anamde Abasi ye owo ẹdat esịt+ n̄ka n̄kenyen̄e ke enyọn̄ mme eto eken?’ 14  Ekem kpukpru eto ẹdọhọ eto n̄kukịm+ ẹte, ‘Afo di edidem nọ nnyịn.’ 15  Ndien eto n̄kukịm ọbọrọ mmọ ete, ‘Edieke edide ke esịt akpanikọ ke mbufo ẹyom ndimek mi edidem mbufo, mbufo ẹdi, man nda mfụt+ mi mfụk mbufo. Edi mîdịghe ntre, yak ikan̄+ ọwọrọ ke eto n̄kukịm akata mme cedar+ ke Lebanon.’+ 16  “Ndien ke emi edieke edide mbufo ẹkeda esịt akpanikọ ye edinen ido ẹnịm Abimelech ke edidem,+ edieke onyụn̄ edide mbufo ẹfọn mfọn ye Jerubbaal ye mbonufọk esie, onyụn̄ edieke edide mbufo ẹnam n̄kpọ ye enye man ekekem ye se enye akanamde, 17  ke emi ete mi akan̄wanade+ ọnọ mbufo okonyụn̄ esịnde ukpọn̄ esie ke itiendịk+ man anyan̄a mbufo osio Midian+ ke ubọk; 18  ndien mbufo ẹdaha ẹda ndin̄wana ye mbonufọk ete mi mfịn emi man mbufo ẹwot nditọ+ esie, owo ata ye duop,+ ke enyọn̄ itiat kiet, man mbufo ẹnyụn̄ ẹnịm Abimelech, eyen ofụn an̄wan+ esie, ke edidem+ ndikara mme enyene isọn̄ Shechem koro enye edide eyenete mbufo; 19  ntre, edieke edide ke esịt akpanikọ ye ke edinen ido ke mbufo ẹnam n̄kpọ emi ye Jerubbaal ye mbonufọk esie mfịn emi, mbufo ẹdat esịt ẹban̄a Abimelech, yak enye n̄ko adat esịt aban̄a mbufo.+ 20  Edi mîdịghe ntre, yak ikan̄+ oto Abimelech ọwọrọ edita mme enyene isọn̄ Shechem ye ufọk Millo,+ yak ikan̄+ onyụn̄ oto mme enyene isọn̄ Shechem ye ufọk Millo ọwọrọ edita Abimelech.”+ 21  Ekem Jotham+ emen itọk efehe aka Beer, onyụn̄ okodụn̄ do ke ntak Abimelech eyenete esie. 22  Ndien Abimelech ada ubọn̄ ke Israel ke isua ita.+ 23  Ekem Abasi ayak idiọk spirit+ edemede ke ufọt Abimelech ye mme enyene isọn̄ Shechem, ndien mme enyene isọn̄ Shechem ẹnam n̄kpọ n̄kari n̄kari+ ye Abimelech, 24  man ẹsio usiene+ afai oro ẹkenamde ye nditọ Jerubbaal owo ata ye duop oro, man ẹnyụn̄ ẹnam iyịp mmọ ọkọbọ Abimelech eyenete mmọ ke enye ndikowot mmọ,+ onyụn̄ ọkọbọ mme enyene isọn̄ Shechem koro mmọ ẹkesọn̄ọde enye ubọk+ ndiwot nditọete esie. 25  Ntre mme enyene isọn̄ Shechem ẹnọ mme owo ẹdịbe ẹbet enye ke enyọn̄ obot, ndien mmọ ẹwo kpukpru owo eke ẹsan̄ade ke usụn̄ oro ẹbe. Ekem ẹditịn̄ ẹnọ Abimelech. 26  Ndien Gaal+ eyen Ebed ye nditọete esie ẹdi, ẹdibe ẹdụk Shechem,+ ndien mme enyene isọn̄ Shechem ẹbuọt idem ye enye.+ 27  Ndien nte mmọ ẹkam ẹsinamde, mmọ ẹwọrọ ẹka nditet grape ke in̄wan̄ vine mmọ, ndinyụn̄ ndịghi mmọ nnyụn̄ ndia usọrọ idara,+ ekem mmọ ẹdụk ufọk abasi+ mmọ ẹkedia n̄kpọ ẹnyụn̄ ẹn̄wọn̄+ n̄kpọ ẹnyụn̄ ẹsụn̄i+ Abimelech. 28  Ndien Gaal eyen Ebed ọdọhọ ete: “Abimelech edi anie,+ Shechem onyụn̄ edi anie oro nnyịn ikpanamde n̄kpọ inọ mmọ? Nte enye idịghe eyen Jerubbaal,+ nte Zebul+ inyụn̄ idịghe isụn̄utom esie? Mbufo mbon eken, ẹnam n̄kpọ ẹnọ mbon Hamor,+ emi edide ete Shechem, edi ntak emi nnyịn ke idem nnyịn ikpanamde n̄kpọ inọ mmọ? 29  Ubaha nte mbon emi ẹkpesịnede mi ke ubọk!+ Ami n̄kpodorode Abimelech mfep.” Ndien enye ọdọhọ Abimelech ete: “Nam udịmekọn̄ fo awak nyụn̄ wọrọ di.”+ 30  Ndien Zebul ọbọn̄ obio oro edikop ikọ oro Gaal eyen Ebed+ etịn̄de. Ndien enye ayat esịt etieti. 31  Ntre enye ọdọn̄ mme isụn̄utom n̄kari n̄kari ọnọ Abimelech, ọdọhọ ete: “Sese! Gaal eyen Ebed ye nditọete esie ẹdi ẹdisịm Shechem,+ ndien mmọ ẹdemede mbon obio emi ndin̄wana ye afo. 32  Mmọdo demede ke okoneyo,+ afo ye kpukpru owo emi ẹdude ye afo, nyụn̄ kedịbe+ ke ikọt bet. 33  Ndien ke usenubọk ke ndondo oro utịn asiahade afo ayabak adaha, onyụn̄ obụmede odụk obio; ndien ke ini enye ye mbon oro ẹdude ye enye ẹdahade ndin̄wana ye afo, nam se ededi oro ekemede ye mmọ.” 34  Ntem Abimelech ye kpukpru mbon oro ẹdude ye enye ẹdaha ke okoneyo, ẹnyụn̄ ẹbahade idemmọ ẹsịn ke udịm inan̄, ẹdịbe ẹbet Shechem. 35  Ekem Gaal+ eyen Ebed ọwọrọ akada ke nto-ndụk inuaotop obio oro. Ndien Abimelech ye mbon oro ẹkedude ye enye ẹwọrọ ke itie udịbe mmọ. 36  Ke ini Gaal adade okụt mbon oro, enye ọdọhọ Zebul ke ndondo oro ete: “Sese! Mme owo ke ẹto enyọn̄ obot ẹsụhọde ẹdi.” Edi Zebul ọdọhọ enye ete: “Mme mfụt obot ke afo ada okụt ekere ke ẹdi mme owo.”+ 37  Ekem Gaal ọtọn̄ọ ntak ọdọhọ ete: “Sese! Mme owo ke ẹto obot emi odude ke ufọt obio ẹsụhọde ẹdi, ndien udịm kiet ẹsan̄a usụn̄ akamba eto mfọni ẹdi.” 38  Ndien Zebul ọdọhọ enye ete: “Enye inua emi afo akanamde,+ ete, ‘Abimelech edi anie eke nnyịn ikpanamde n̄kpọ esie?’+ Nte idịghe mbon emi afo ekesịnde ke ndek+ ẹdi emi? Mbọk, wọrọ kan̄wana ye mmọ.” 39  Ntre Gaal ada mme enyene isọn̄ Shechem ọwọrọ akan̄wana ye Abimelech. 40  Abimelech onyụn̄ ọwọrọ ebịne enye, ndien enye efehe ke iso esie; mbon oro ẹwotde ẹduọn̄ọ ọkwọkudịm tutu esịm nto-ndụk inuaotop. 41  Ndien Abimelech aka iso odụn̄ ke Arumah, edi Zebul+ ebịn Gaal+ ye nditọete esie osion̄o, iyakke mmọ ẹdụn̄ ke Shechem.+ 42  Ekem ke ndan̄nsiere mbio obio ẹwọrọ ẹka in̄wan̄. Ndien ẹditịn̄ ẹnọ Abimelech.+ 43  Ntem enye abahade ikọt esie esịn ke udịm ita+ ndien mmọ ẹka ẹkedịbe ke in̄wan̄ ẹbet. Ekem enye okụt, ndien sese, mmọ ke ẹwọn̄ọ ke obio. Ekem enye ọwọrọ ebịne mmọ, okowot mmọ. 44  Ndien Abimelech ye mme udịm oro ẹkedude ye enye ẹbụmede ẹkeda ke nto-ndụk inuaotop obio, ke adan̄aemi udịm iba eken ẹkebụmerede ẹbịne kpukpru mbon oro ẹkedude ke an̄wa, ẹnyụn̄ ẹwot mmọ.+ 45  Ndien Abimelech an̄wana ye obio oro ke ofụri usen oro onyụn̄ akan obio oro; enye onyụn̄ owot mbon oro ẹkedude ke esịt,+ ekem enye owụri obio+ oro onyụn̄ asuan inụn̄+ ke esịt. 46  Ke ini kpukpru mme enyene isọn̄ Shechem emi ẹdụn̄de ke tọwa ẹkopde n̄kpọ emi, mmọ ẹsọsọp ẹka ọkpọsọn̄ ebiet ufọk El-berith.+ 47  Ekem ẹditịn̄ ẹnọ Abimelech ẹte ke kpukpru mme enyene isọn̄ Shechem emi ẹdụn̄de ke tọwa ẹmesop idem ọtọkiet. 48  Ndien Abimelech ọdọk Obot Zalmon,+ enye ye kpukpru mbon oro ẹdude ye enye. Abimelech ada ekụri ke ubọk esie esịbe n̄kọk eto kiet onyụn̄ emen enye odori ke afara esie ndien ọdọhọ mbon oro ẹdude ye enye ete: “Se mbufo ẹkụtde nte nnamde—ẹwara ẹnam kpa ntre!”+ 49  Ntre kpukpru mmọ n̄ko ẹsịbe n̄kọk eto kiet kiet ke idemmọ ẹmen ẹtiene Abimelech ke edem. Ndien mmọ ẹtan̄ mmọ ẹkefụk ke ọkpọsọn̄ ebiet oro, ẹnyụn̄ ẹsịn ikan̄ ke ọkpọsọn̄ ebiet oro, ndien kpukpru mbon oro ẹdude ke tọwa Shechem ẹkpan̄a n̄ko, n̄kpọ nte iren ye iban tọsịn kiet.+ 50  Ekem Abimelech adaha aka Thebez+ akanam nna ndin̄wana ye Thebez nnyụn̄ n̄kan enye. 51  Sia ọkpọsọn̄ tọwa kiet okodude ke ufọt obio oro, do ke kpukpru irenowo ye iban ye kpukpru mme enyene isọn̄ ke obio oro ẹkefen̄e ẹka, ekem mmọ ẹkọbi usụn̄ ẹsịn idemmọ ẹnyụn̄ ẹdọk ẹkedoro ke ọkọm tọwa oro. 52  Ndien Abimelech ata usụn̄ ekesịm tọwa oro onyụn̄ akan̄wana, ndien ọdọk ekekpere inuaotop tọwa oro man ọfọp enye ke ikan̄.+ 53  Ndien n̄wan kiet otop itiat ukọkn̄kpọ ọtọ Abimelech ibuot onyụn̄ asuan enye n̄kpọkpọrọ.+ 54  Ntre enye okot asan̄autom emi akamade n̄kpọekọn̄ esie iwiwa onyụn̄ ọdọhọ enye ete: “Sio akan̄kan̄ fo kịm mi wot,+ mbak owo edidọhọ ete, ‘N̄wan okowot enye.’” Ke ndondo oro asan̄autom esie ekịm enye, ndien enye akpa.+ 55  Ke ini mbon Israel ẹkụtde ke Abimelech akpa, mmọ owo kiet kiet ẹnyọn̄ọ ebiet mmọ. 56  Ntem ke Abasi osio usiene+ idiọkn̄kpọ Abimelech emi enye akanamde ete esie ke ndikowot nditọete esie owo ata ye duop. 57  Abasi onyụn̄ anam kpukpru idiọkn̄kpọ oro mbon Shechem ẹkenamde ẹfiak ẹdidoro mmọ ke ibuot, man isụn̄i+ Jotham+ eyen Jerubbaal+ okpodoro mmọ ke ibuot.+

Mme Ikọ Idakisọn̄