Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Judges 20;1-48

20  Mmọdo kpukpru nditọ Israel ẹwọrọ+ ẹkesop idem nte owo kiet,+ ọtọn̄ọde ke Dan+ osụhọde esịm Beer-sheba+ ọkọrọ ye isọn̄ Gilead,+ ke iso Jehovah ke Mizpah.+  Ntre ikpọ owo ye ofụri esien Israel ẹda itie mmọ ke esop ikọt ata Abasi,+ irenowo tọsịn ikie inan̄ oro ẹsan̄ade ke ukot ẹnyụn̄ ẹkamade akan̄kan̄.+  Ndien nditọ Benjamin ẹdikop ke nditọ Israel ẹdọk ẹka Mizpah.+ Nditọ Israel ẹnyụn̄ ẹdọhọ ẹte: “Mbufo ẹtịn̄ ise, utọ idiọkn̄kpọ emi asan̄a didie?”+  Ntem eren oro, kpa eyen Levi,+ ebe n̄wan emi ẹkewotde, ọbọrọ ete: “Ami ye n̄wanesa+ mi ikaka Gibeah+ emi enyenede Benjamin ite ikadan̄ do.  Ndien mme enyene isọn̄ Gibeah ẹdaha ẹda ẹtịbi ikọ ye ami ẹnyụn̄ ẹkan ufọk oro n̄kodude ke esịt ẹkụk okoneyo oro. Mmọ ẹkeyom ndiwot mi, edi ẹkabade ẹdan̄ n̄wanesa mi ke n̄kanubọk+ tutu enye akpa.+  Ntre mmen n̄wanesa mi n̄kpok nnyụn̄ nnọ ẹsọk ofụri isọn̄ emi ẹdemede+ ẹnọ nditọ Israel, koro mmọ ẹkenamde obukpo ido+ ye esuene esuene ido ke Israel.+  Sese! Mbufo kpukpru nditọ Israel, mbufo ẹtịn̄ ikọ ẹnyụn̄ ẹkọk ibuot+ ke n̄kpọ emi.”  Ntem kpukpru owo ẹdaha ẹda nte owo kiet,+ ẹdọhọ ẹte: “Baba owo nnyịn kiet idinyọn̄ke tent esie, idinyụn̄ iwahake ufọk esie.+  Ndien se nnyịn idinamde ye Gibeah edi emi. Ẹyak nnyịn isịn afia+ idọk ikan̄wana ye enye. 10  Nnyịn iyosio owo duop ke owo ikie, owo ikie ke owo tọsịn, owo tọsịn ke owo tọsịn duop ke kpukpru esien Israel ndiyom udia nnọ kpukpru owo, man mmọ ẹka ẹken̄wana ye Gibeah ke esien Benjamin, ke ntak kpukpru esuene esuene ido+ emi mmọ ẹnamde ke Israel.” 11  Ntem kpukpru irenowo Israel ẹsop idem nte owo kiet, ẹdụk ediomi, ẹte in̄wana ye obio oro. 12  Ndien mme esien Israel ẹdọn̄ irenowo utom ẹnọ mbon esien Benjamin,+ ẹte: “Nso idiọkn̄kpọ ke ẹnam ntem ke otu mbufo?+ 13  Ndien, ke emi, ẹsion̄o irenowo+ oro kpa mbukpo irenowo+ oro ẹdude ke Gibeah+ ẹdi, man nnyịn iwot+ mmọ, inyụn̄ isio idiọkn̄kpọ emi ifep ke Israel.”+ Edi nditọ Benjamin inyịmeke ndikop uyo nditọete mmọ, kpa nditọ Israel.+ 14  Ndien nditọ Benjamin ẹto mme obio mmọ ẹwọn̄ọ ẹdisop idem ọtọkiet ke Gibeah ndikan̄wana ekọn̄ ye nditọ Israel. 15  Ntre ibat nditọ Benjamin emi ẹketan̄de ẹbon ke obio ke obio ekedi irenowo tọsịn edịp ye itiokiet emi ẹkamade akan̄kan̄,+ isịnke mme andidụn̄ Gibeah, emi ẹkedide irenowo ikie itiaba emi ẹketan̄de ẹbon. 16  Ndien ẹmek mbon ufien+ ikie itiaba ke otu kpukpru owo emi. Kpukpru mmọ ẹkedi mme otop-itiat,+ emi ẹkemede ndiket ukot idet ntop inyụn̄ iduehe. 17  Ndien ẹtan̄ irenowo Israel ẹbon, owo tọsịn ikie inan̄ emi ẹkamade akan̄kan̄,+ isịnke nditọ Benjamin. Kpukpru mmọ ẹkedi mbonekọn̄. 18  Ntem mmọ ẹdaha ẹdọk ẹka Bethel ndikobụp Abasi.+ Ndien nditọ Israel ẹdọhọ ẹte: “Anie ke otu nnyịn edida iso ke ndikan̄wana ye nditọ Benjamin?”+ Ndien Jehovah ọbọrọ ete: “Judah edida iso.”+ 19  Ekem nditọ Israel ẹdaha ke usenubọk ẹkenam nna ndin̄wana ye Gibeah. 20  Ndien irenowo Israel ẹwọrọ ẹka ndin̄wana ye Benjamin; irenowo Israel ẹnyụn̄ ẹtịm udịmekọn̄ ndin̄wana ye mmọ ke Gibeah. 21  Ntre nditọ Benjamin ẹto Gibeah+ ẹwọn̄ọ ẹdi ẹnyụn̄ ẹdiwot irenowo Israel tọsịn edịp ye iba ke usen oro ẹduọn̄ọ ke isọn̄.+ 22  Edi, irenowo Israel ẹnyene uko ẹnyụn̄ ẹfiak ẹtịm udịmekọn̄ ke ebiet emi mmọ ẹkebemde iso ẹtịm udịmekọn̄ ke akpa usen. 23  Ntem nditọ Israel ẹdọk ẹketua+ ẹnọ Jehovah tutu esịm mbubreyo ẹnyụn̄ ẹbụp Jehovah, ẹte: “Nte mfiak n̄ka ekọn̄ ye Benjamin eyenete mi?”+ Ndien Jehovah ọbọrọ ete: “Dọk kan̄wana ye enye.” 24  Ntem nditọ Israel ẹsan̄a ẹkpere nditọ Benjamin ke ọyọhọ usen iba.+ 25  Ekem nditọ Benjamin ẹto ke Gibeah ẹwọn̄ọ ẹdi ndisobo ye mmọ ke ọyọhọ usen iba ẹnyụn̄ ẹfiak ẹwot irenowo tọsịn efịteta ke otu nditọ Israel ẹduọn̄ọ ke isọn̄,+ kpukpru mmọ ẹkedi mbon emi ẹkamade akan̄kan̄.+ 26  Ntem kpukpru nditọ Israel+ ẹdọk ẹka Bethel, ẹketua+ ẹnọ Jehovah, ẹsụhọde ẹtie do, ẹnyụn̄ ẹtie utreudia+ usen oro tutu esịm mbubreyo, ẹwa edifọp uwa+ ye uwa ebuana+ ke iso Jehovah. 27  Ekem nditọ Israel ẹbụp Jehovah,+ sia ekebe ediomi+ ata Abasi okodude do ke eyo oro. 28  Ndien Phinehas+ eyen Eleazar, eyen Aaron, ada ke iso ekebe oro ke eyo oro,+ obụp ete: “Nte mfiak n̄wọrọ n̄kan̄wana ekọn̄ ye nditọ Benjamin eyenete mi m̀mê n̄kûka?”+ Ndien Jehovah ọbọrọ ete: “Dọk ka, koro n̄kpọn̄ nyada enye nsịn fi ke ubọk.”+ 29  Ekem Israel ẹnịm mbon udịbe+ ẹkanade ofụri Gibeah. 30  Ndien nditọ Israel ẹdọk ẹbịne nditọ Benjamin ke ọyọhọ usen ita, ẹnyụn̄ ẹtịm udịmekọn̄ ndin̄wana ye Gibeah kpa nte ẹkenamde ke mme ini eken.+ 31  Ke ini nditọ Benjamin ẹwọn̄ọde ẹka ndisobo ye mmọ, nditọ Israel ẹdụri mmọ ẹkpọn̄ obio.+ Ekem, mmọ ẹtọn̄ọ ndikpen̄e ndusụk mmọ nnọ unan idiọk idiọk nte ẹkenamde ke akpa, n̄kpọ nte owo Israel+ edịp ye duop ẹkpan̄a ke an̄wa ye ke ọkpọusụn̄, oro kiet akade Bethel+ eken onyụn̄ akade Gibeah.+ 32  Ntre nditọ Benjamin ẹdọhọ ẹte: “Nnyịn imakan mmọ kpa nte ikakande ke akpa.”+ Edi nditọ Israel ẹdọhọ ẹte: “Ẹyak nnyịn ifehe,+ idụri mmọ iwọrọ ikpọn̄ obio idi ọkpọusụn̄.” 33  Ndien kpukpru nditọ Israel ẹdaha ke mme itie mmọ, ẹketịm udịmekọn̄ ke Baal-tamar, ke adan̄aemi mbon udịbe+ Israel ẹwọn̄ọde ke mme itie mmọ ke n̄kann̄kụk Gibeah.+ 34  Ntem irenowo tọsịn duop emi ẹkemekde ẹsio ke ofụri Israel ẹdi ke Gibeah, en̄wan onyụn̄ ọsọn̄ ubọk etieti; edi nditọ Benjamin ikọfiọkke ke afanikọn̄+ ọmọn̄ esịm mmimọ. 35  Ndien Jehovah akan Benjamin+ ke iso Israel, nditọ Israel ẹnyụn̄ ẹwot owo tọsịn edịp ye ition ikie kiet, emi kpukpru mmọ ẹkamade akan̄kan̄,+ usen oro ke Benjamin. 36  Ndien, nditọ Benjamin ẹkekere ke mmimọ imakan irenowo Israel ke ini mmọ ẹkefen̄ede+ nditọ Benjamin, koro mmọ ẹkebuọtde idem ke mbon udịbe oro mmọ ẹkenịmde ndin̄wana ye Gibeah. 37  Ndien mbon udịbe ẹbụmede inikiet inikiet ẹdụk Gibeah.+ Mbon udịbe+ oro ẹnyụn̄ ẹsuana ẹdụk ẹkesobo ofụri obio oro ke iso akan̄kan̄.+ 38  Ndien irenowo Israel ẹma ẹnam ẹdiomi ye mbon udịbe oro ndinam nsụn̄ikan̄ ọwọrọ ke obio+ oro ọdọk enyọn̄ nte idiọn̄ọ. 39  Ndien ke ini nditọ Israel ẹfiakde edem ẹtre ndin̄wana, nditọ Benjamin ẹtọn̄ọ ndikpen̄e n̄kpọ nte irenowo edịp ye duop nnọ unan idiọk idiọk ke otu irenowo Israel,+ koro mmọ ẹdọhọde ẹte: “Ke akpanikọ nnyịn imakan mmọ kpa nte ikakande ke akpa ekọn̄.”+ 40  Ndien idiọn̄ọ+ oro ọtọn̄ọ ndidọk ke enyọn̄ ke obio nte adaha nsụn̄ikan̄.+ Mmọdo ke ini nditọ Benjamin ẹwọn̄ọrede ẹse edem, sese! ofụri obio oro ke asak ikan̄, nsụn̄ikan̄ esie onyụn̄ ọdọk ke enyọn̄.+ 41  Ndien irenowo Israel ẹwọn̄ọde iso,+ esịt onyụn̄ ẹtịmede+ irenowo Benjamin, koro mmọ ẹkụtde afanikọn̄ oro esịmde mmimọ.+ 42  Mmọ ẹnyụn̄ ẹwọn̄ọde ẹkpọn̄ irenowo Israel ẹka n̄kan̄ wilderness, mbonekọn̄ ẹnyụn̄ ẹta ẹdiana mmọ, ke adan̄aemi mbon emi ẹtode obio ẹwọrọ ẹwotde mmọ. 43  Mmọ ẹkan mbon Benjamin+ ẹkụk. Ndien ẹbịne mmọ, inọhọ mmọ ufan̄.+ Ẹdịghi mmọ ke ata nsakiso Gibeah+ ke n̄kan̄ edem usiahautịn. 44  Ndien irenowo Benjamin tọsịn efịteta ẹduọn̄ọ, kpukpru mmọ ẹkedi mbon uko.+ 45  Ntem mmọ ẹwọn̄ọde ẹfen̄e ẹka aba akwa itiat Rimmon+ ke wilderness. Ndien nditọ Israel ẹmụm owo tọsịn ition ke ọkpọusụn̄+ ẹwot, ndien ẹta ẹdiana mmọ tutu ẹsịm Gidom, ẹnyụn̄ ẹwot irenowo tọsịn iba efen ke otu mmọ. 46  Ndien ofụri mbon Benjamin emi ẹkekpan̄ade ke usen oro ẹsịm irenowo tọsịn edịp ye ition emi ẹkamade akan̄kan̄,+ kpukpru mmọ ẹkedi mbon uko. 47  Edi owo ikie itiokiet ẹfen̄e ẹka wilderness ẹkedịbe ke akwa itiat Rimmon, ndien ẹdụn̄ ke akwa itiat Rimmon+ oro ke ọfiọn̄ inan̄. 48  Ndien nditọ Israel ẹfiak ẹdi ẹdin̄wana ye nditọ Benjamin ẹnyụn̄ ẹwot mbon oro ẹkedude ke obio ke iso akan̄kan̄, ọtọn̄ọde ke owo, ufene, tutu esịm se ededi oro mmọ ẹkụtde.+ Mmọ ẹnyụn̄ ẹfọp kpukpru obio oro mmọ ẹsịmde ke ikan̄.+

Mme Ikọ Idakisọn̄