Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Judges 18;1-31

18  Ke eyo oro edidem ikodụhe ke Israel.+ Ndien ke eyo oro esien Dan+ ke okoyom udeme ọnọ idemesie man odụn̄ ke esịt; koro tutu esịm ini oro mmọ ikadaha udeme inyene ke otu esien Israel.+  Ekem nditọ Dan ẹsio irenowo ition ke esien mmọ, emi ẹtode ke otu mmọ, iren uko, emi ẹtode Zorah+ ye Eshtaol,+ ẹdọn̄ ẹkeyep+ isọn̄ ẹnyụn̄ ẹdụn̄ọde ẹse nte enye etiede. Ndien ẹdọhọ mmọ ẹte: “Mbufo ẹka, ẹkedụn̄ọde isọn̄ oro.” Ekem mmọ ẹdi obot obot ikpehe Ephraim+ tutu ẹdisịm ufọk Micah,+ ẹnyụn̄ ẹdan̄ do okoneyo oro.  Ke adan̄aemi mmọ ẹkperede ufọk Micah, mmọ ẹda ẹdiọn̄ọ uyo akparawa oro, kpa eyen Levi, ntre mmọ ẹwaha ẹka do. Mmọ ẹnyụn̄ ẹbụp enye ẹte: “Anie akada fi edi mi, nso ke anam ke ebiet emi, onyụn̄ oyom nso mi?”  Ndien enye ọbọrọ mmọ ete: “Ntem ye ntem ke Micah akanam ọnọ mi onyụn̄ ekpe mi utom,+ onyụn̄ ọdọhọ ete nnam utom nte oku+ nnọ imọ.”  Ekem mmọ ẹdọhọ enye ẹte: “Mbọk, bụp+ Abasi+ man nnyịn ifiọk m̀mê nnyịn iyokụt unen ke usụn̄ emi nnyịn ikade.”  Ndien oku oro ọdọhọ mmọ ete: “Mbufo ẹka ke emem. Koro usụn̄ emi mbufo ẹkade anade Jehovah ke iso.”  Ekem irenowo ition oro ẹka ẹkesịm Laish+ ẹnyụn̄ ẹkụt nte mbon emi ẹdude ke esịt ẹdude uwem nda-ke-idem nte ido mbon Sidon edide, ẹtie ke emem ye ke ndueidem,+ inyụn̄ idụhe owo ufịk eke afịnade mmọ ke isọn̄ oro, mmọ ẹnyụn̄ ẹdu nsannsan ẹkpọn̄ mbon Sidon+ inyụn̄ inyeneke n̄kpọ ndomokiet ndinam ye ubonowo.  Ekem mmọ ẹdisịm nditọete mmọ ke Zorah+ ye Eshtaol,+ ndien nditọete mmọ ẹbụp mmọ ẹte: “N̄kpọ eketie didie ye mbufo?”  Mmọ ẹnyụn̄ ẹbọrọ ẹte: “Mbufo ẹdaha ke enyọn̄, ẹyak nnyịn idọk ikan̄wana ye mmọ; koro nnyịn imokụt isọn̄ oro, ndien, sese! enye edi ata eti isọn̄.+ Edi mbufo ke ẹmen̄e. Mbufo ẹkûbịghi ndikada isọn̄ oro nnyene.+ 10  Ke ini mbufo ẹdide, mbufo ẹdisobo ye mbon emi ẹdude ke ndueidem,+ ndien isọn̄ oro okpon etieti; koro Abasi adade isọn̄ oro esịn mbufo ke ubọk,+ kpa ebiet emi mînanake baba orụk n̄kpọ kiet emi odude ke isọn̄.”+ 11  Ntem irenowo ikie itiokiet emi ẹtode esien Dan,+ ẹbọbọ mbọbọ ekọn̄, ẹto Zorah ye Eshtaol,+ ẹdaha. 12  Ndien mmọ ẹdọk ẹka ẹnyụn̄ ẹkenam nna ke Kiriath-jearim+ ke Judah. Ntak edi oro mmọ ẹkotde ebiet oro Mahaneh-dan+ tutu esịm mfịn emi. Sese! enye odu ke edem usoputịn Kiriath-jearim. 13  Ekem mmọ ẹto do ẹsan̄a ẹdi obot obot ikpehe Ephraim tutu ẹdisịm ufọk Micah.+ 14  Ndien irenowo ition oro ẹkekade ndiyep+ isọn̄ Laish+ ẹdọhọ nditọete mmọ ẹte: “Nte mbufo ẹmediọn̄ọ ke ephod ye teraphim+ ye edisọi mbiet+ ye editara mbiet+ ẹdu ke mme ufọk emi? Mmọdo ẹkere se mbufo ẹdinamde.”+ 15  Ntre mmọ ẹwaha ẹdụk ufọk akparawa oro, kpa eyen Levi+ oro, ke ufọk Micah, ẹnyụn̄ ẹbụp enye nte n̄kpọ etiede.+ 16  Ndien irenowo ikie itiokiet oro ẹbọbọde mbọbọ ekọn̄,+ emi ẹketode ubon nditọ Dan,+ ẹda ke nto-ndụk inuaotop ẹbet. 17  Irenowo ition oro ẹkekade ndiyep isọn̄+ oro ẹdọk ẹka, man ẹdụk ẹkemen edisọi mbiet+ ye ephod+ ye teraphim+ ye editara mbiet+ oro. (Edi oku+ oro ada ke nto-ndụk inuaotop ye irenowo ikie itiokiet oro ẹbọbọde mbọbọ ekọn̄.) 18  Mmọ ẹnyụn̄ ẹbe ẹdụk ufọk Micah ẹkemen edisọi mbiet, ephod ye teraphim ye editara mbiet+ oro. Ndien oku+ oro obụp mmọ ete: “Nso ke mbufo ẹnam emi?” 19  Edi mmọ ẹdọhọ enye ẹte: “Kịbi inua fo. Dian ubọk ke inua fo, tiene nnyịn, nyụn̄ kabade di ete+ ye oku+ nnyịn. Ewe ọfọn fi akan, afo ndidi oku ke ufọk owo kiet+ m̀mê ndidi oku nnọ esien ye ekpụk kiet ke Israel?”+ 20  Ndien esịt enem+ oku oro, enye onyụn̄ emen ephod ye teraphim ye edisọi mbiet+ oro odụk otu mmọ. 21  Ekem mmọ ẹwọn̄ọde iso ẹnyọn̄ọ ẹnyụn̄ ẹnam nditọwọn̄ ye ufene ye mme ọsọn̄urua n̄kpọ ẹbem mmọ iso.+ 22  Ke mmọ ẹma ẹkeka anyan ẹkpọn̄ ufọk Micah, ẹkot irenowo oro ẹkedude ẹkpere ufọk Micah+ ẹsop idem ọtọkiet ẹbịne nditọ Dan. 23  Ke ini mmọ ẹyịrede ẹfiori ẹkot nditọ Dan, mmọ ẹwọn̄ọde iso ẹbụp Micah ẹte: “Nso idi mfịna fo+ emi afo okotde otuowo emi ẹsop idem ọtọkiet?” 24  Ntre enye ọbọrọ ete: “Mbufo ẹmemen mme abasi+ mi oro n̄kanamde,+ ye oku+ n̄ko, ẹda ẹnyọn̄, ndien nso isụhọ aba inọ mi?+ Mbufo ẹsan̄a didie ndien ẹbụp mi ẹte, ‘Nso idi mfịna fo?’” 25  Ndien nditọ Dan ẹbọrọ enye ẹte: “Kûda ukpere nnyịn unam uyom, mbak mbon iyatesịt+ emi ẹdin̄wana ye mbufo, ndien afo ọduọk ukpọn̄ fo ye ukpọn̄ mbonufọk fo.” 26  Ndien nditọ Dan ẹbe ẹnyọn̄ọ ekemmọ; Micah onyụn̄ okụt ke mmọ ẹkop odudu ẹkan imọ,+ ndien enye ọwọn̄ọde iso ọnyọn̄ ufọk esiemmọ. 27  Edi mmọ ẹtan̄ se Micah akanamde, ye oku+ oro akakabarede edi esiemmọ, ẹbe ẹka n̄kan̄ Laish+ ndikan̄wana ye mbon emi ẹtiede ke emem ye ke ndueidem.+ Ndien mmọ ẹwot mmọ ke iso akan̄kan̄,+ ẹnyụn̄ ẹfọp obio oro ke ikan̄.+ 28  Ndien idụhe owo eke anyan̄ade mmọ, koro enye okodude nsannsan ọkpọn̄ Sidon,+ mmọ mîkonyụn̄ inyeneke n̄kpọ ndomokiet ndinam ye ubonowo; enye okonyụn̄ odu ke unaisọn̄ itịghede Beth-rehob.+ Ekem mmọ ẹbọp obio oro ẹnyụn̄ ẹdụn̄ ke esịt.+ 29  N̄ko-n̄ko, mmọ ẹda enyịn̄ Dan ete mmọ ẹsio obio oro, kpa Dan+ emi akamanade ọnọ Israel.+ Edi enyịn̄ obio oro ke mbemiso ekedi Laish.+ 30  Ekem nditọ Dan ẹmen edisọi mbiet+ oro ẹwụk ẹnọ idemmọ; ndien Jonathan+ eyen Gershom,+ kpa eyen Moses, ọkọrọ ye nditọ esie ẹkabade ẹdi mme oku ẹnọ esien nditọ Dan tutu esịm usen emi ẹdade idụt oro ẹka ntan̄mfep.+ 31  Ndien mmọ ẹnịm edisọi mbiet Micah, oro enye akanamde, ẹnọ idemmọ ke ofụri ini oro ufọk+ ata Abasi okodude ke Shiloh.+

Mme Ikọ Idakisọn̄