Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Joshua 7;1-26

7  Ndien nditọ Israel ẹnam idiọkn̄kpọ ke se iban̄ade n̄kpọ nsobo, koro Achan+ eyen Carmi, eyen Zabdi, eyen Zerah, owo esien Judah, akadade ndusụk n̄kpọ nsobo.+ Ndien Jehovah ayat esịt etieti ye nditọ Israel.+  Ekem Joshua etie ke Jericho osio mme owo ọdọn̄ ẹka Ai,+ emi ekperede Beth-aven,+ ke edem usiahautịn Bethel,+ onyụn̄ ọdọhọ mmọ ete: “Ẹdọk ẹka ẹkeyep isọn̄ oro.” Ntre ke iren oro ẹka ẹkeyep Ai.+  Ekem mmọ ẹfiak ẹbịne Joshua, ẹkedọhọ enye ẹte: “Yak okûdi kpukpru owo ẹdọk ẹka. Yak n̄kpọ nte owo tọsịn iba m̀mê ita ẹdọk ẹka ẹkesobo Ai. Kûkpa ndidọhọ kpukpru owo ẹka do, koro mmọ mîwakke.”  Ntre n̄kpọ nte owo tọsịn ita ẹdọk ẹka do, edi mmọ ẹfen̄e ke iso mbon Ai.+  Ndien mbon Ai ẹwot n̄kpọ nte owo edịp ye efịtekiet ke otu mmọ, ẹnyụn̄ ẹbịne mmọ+ ọtọn̄ọde ke inuaotop tutu esịm Shebarim ẹnyụn̄ ẹka iso ẹwot mmọ ke itịghede. Mmọdo nsia eyemede mmọ onyụn̄ akabade etie nte mmọn̄.+  Ndien Joshua awak ọfọn̄ esie onyụn̄ ọduọ ekịbi iso+ ke isọn̄ ke iso ekebe Jehovah tutu esịm mbubreyo, enye ye mbiowo Israel, mmọ ẹnyụn̄ ẹduọk ntọn̄ ke ibuot mmọ.+  Ndien Joshua ọdọhọ ete: “O Jehovah, Akakan Ọbọn̄ Andikara, ntak emi afo akadade mbon emi ke adan̄a anyan usụn̄ oro ebe Jordan, onyụn̄ edide ediyak nnyịn esịn ke ubọk mme Amorite man ẹsobo nnyịn? Ubaha nte nnyịn ikpokosụk idude ke edem Jordan oko!+  Mbọk, Jehovah, nso ke ndidọhọ ke emi Israel ama ekefehe ke iso mme asua esie?  Mbon Canaan ye kpukpru mme andidụn̄ isọn̄ emi ẹyenyụn̄ ẹkop n̄kpọ emi, ndien mmọ iditreke-tre ndikan nnyịn n̄kụk, nnyụn̄ nsịbe enyịn̄ nnyịn mfep ke isọn̄;+ afo edinyụn̄ anam nso aban̄a akwa enyịn̄ fo?”+ 10  Ndien Jehovah ọdọhọ Joshua ete: “Daha ke enyọn̄! Ntak emi afo ọduọde ekịbi iso ke isọn̄? 11  Israel amanam idiọkn̄kpọ, mmọ ẹmenyụn̄ ẹbiat ediomi mi+ emi n̄kodiomide ye mmọ; mmọ ẹmenyụn̄ ẹda ndusụk n̄kpọ nsobo,+ ẹyịp+ ẹnyụn̄ ẹdịp+ ẹnyụn̄ ẹda ẹsịn ke otu n̄kpọ mmọ.+ 12  Ndien nditọ Israel idikemeke ndidaha nda n̄n̄wana ye mme asua mmọ.+ Mmọ ẹyefiak edem ke iso mme asua mmọ, koro mmọ ẹkabarede ẹdi n̄kpọ nsobo. Ami ndidụhe aba ye mbufo ibọhọke mbufo ẹsọhi n̄kpọ nsobo oro ẹfep ke otu mbufo.+ 13  Daha ke enyọn̄! Nam kpukpru owo ẹsana,+ nyụn̄ dọhọ mmọ ete, ‘N̄kpọn̄, mbufo ẹnam idem mbufo asana koro Jehovah Abasi Israel ọdọhọ ete: “N̄kpọ nsobo mmọdo ke otu mbufo, O Israel.+ Mbufo idikemeke ndidaha nda n̄n̄wana ye mme asua mbufo tutu mbufo ẹsio n̄kpọ nsobo oro ẹfep ke otu mbufo. 14  Ndien mbufo ẹnyene ndiwọrọ ndi ke usenubọk, ke esien ke esien, ndien esien eke Jehovah edisiode+ ayasan̄a ekpere, ke ubon ke ubon, ndien ubon eke Jehovah edisiode ayasan̄a ekpere, ufọk kiet kiet ọyọwọrọ edi, ndien ufọk eke Jehovah edisiode ayasan̄a ekpere, ndien irenowo kiet kiet ẹyewọrọ ẹdi. 15  Ndien owo ekededi eke ẹdikụtde enye n̄kpọ nsobo ke ubọk, ẹyefọp owo oro ke ikan̄,+ owo oro ye kpukpru se enye enyenede, koro enye abiatde ediomi+ Jehovah, koro enye onyụn̄ anamde esuene esuene ido ke Israel.”’”+ 16  Ekem Joshua abak edemede ke usenubọk onyụn̄ anam Israel asan̄a ekpere, ke esien ke esien, ndien ẹsio esien Judah. 17  Ekem mme ubon esien Judah ẹsan̄a ẹkpere ndien ẹsio ubon Zerah,+ ekem enye anam ubon Zerah asan̄a ekpere, irenowo kiet kiet ẹsan̄a ẹkpere, ndien ẹsio Zabdi. 18  Ke akpatre enye anam mbonufọk esie ẹsan̄a ẹkpere, irenowo kiet kiet, ndien ẹsio+ Achan eyen Carmi, eyen Zabdi, eyen Zerah, owo esien Judah. 19  Ekem Joshua ọdọhọ Achan ete: “Eyen mi, mbọk, nọ Jehovah Abasi Israel ubọn̄+ nyụn̄ yarade idiọkn̄kpọ fo nọ enye,+ mbọk, tịn̄ nọ mi,+ Nso ke afo akanam? Kûdịp+ mi.” 20  Ndien Achan ọbọrọ Joshua ete: “Ke akpanikọ, mmanam idiọkn̄kpọ ndue Jehovah Abasi Israel,+ mmonyụn̄ nnam emi ye oko. 21  Ke ini n̄kokụtde+ ọfọn̄idem emi otode Shinar,+ emi eyede etieti, ke otu n̄kpọ mbụme, ye shekel silver ikie iba ye anyan ubak gold kiet, emi odobide shekel aba ye duop, mmọ ẹma ẹdọn̄ mi itọn̄,+ ami mma nnyụn̄ nda mmọ;+ ndien, sese! mmọ mmọdo ẹbụhọ ke isọn̄ ke tent mi, okụk onyụn̄ esịne ke idak.”+ 22  Ke ndondo oro, Joshua ọdọn̄ mme isụn̄utom, mmọ ẹnyụn̄ ẹfehe ẹka tent oro, ndien, sese! ẹkebụk n̄kpọ oro ke tent esie, okụk onyụn̄ esịne ke idak. 23  Ntre ke mmọ ẹsion̄o mme n̄kpọ oro ke tent oro ẹnyụn̄ ẹda mmọ ẹsọk Joshua ye kpukpru nditọ Israel, ndien ẹn̄wan̄a mmọ ẹbon ke iso Jehovah. 24  Joshua ye ofụri Israel ẹda Achan+ eyen Zerah ye silver ye ọfọn̄idem ye anyan ubak gold+ ye nditọ esie iren ye iban ye nyara enan̄ esie ye mme ass esie ye mme ufene esie ye tent esie ye kpukpru se enye enyenede, ẹka unaisọn̄ itịghede Achor.+ 25  Ndien Joshua ọdọhọ ete: “Ntak emi afo adade afanikọn̄ ọsọk nnyịn?+ Jehovah ọmọn̄ ada afanikọn̄ ọsọk fi mfịn emi.” Ndien ofụri Israel ẹtọn̄ọ enye ke itiat,+ ekem ẹfọp mmọ ke ikan̄.+ Ntem ẹtọn̄ọ mmọ ke itiat. 26  Ndien mmọ ẹkịbi enye akamba ebok itiat ke idem, tutu esịm mfịn emi.+ Ntem ke ikan̄-ikan̄ iyatesịt Jehovah ọwọn̄ọde ọkpọn̄ mmọ.+ Mmọdo enyịn̄ ebiet oro ekerede Unaisọn̄ Itịghede Achor,+ tutu esịm mfịn emi.

Mme Ikọ Idakisọn̄