Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Joshua 6;1-27

6  Ndien ẹma ẹtịm ẹberi usụn̄ Jericho ke ntak nditọ Israel, baba owo kiet idụkke-dụk inyụn̄ iwọrọke-wọrọ.+  Ekem Jehovah ọdọhọ Joshua ete: “Sese, mmada Jericho ye edidem esie, ye n̄kpọsọn̄ iren uko esie, nsịn fi ke ubọk.+  Mmọdo mbufo kpukpru mbonekọn̄ ẹsan̄a ẹkanade obio emi ẹkụk ini kiet. Ntem ke mbufo ẹdinam ke usen itiokiet.  Ndien yak oku itiaba ẹkama nnụk okukịm itiaba ẹnyụn̄ ẹbem Ekebe iso, ndien ke ọyọhọ usen itiaba mbufo ẹnyene ndisan̄a n̄kanade obio oro utịm ikatiaba ndien mme oku ẹnyene ndifri mme nnụk.+  Ndien ke ini mmọ ẹfride nnụk okukịm oro, ke ini mbufo ẹnyụn̄ ẹkopde uyom nnụk oro ẹfride, kpukpru owo ẹnyene ndifiori akwa n̄kpo ekọn̄;+ ndien ibibene obio ọyọduọ ke isọn̄,+ ndien kpukpru owo ẹyebe nnennen ẹdụk.”  Ntem Joshua eyen Nun okot mme oku+ onyụn̄ ọdọhọ mmọ ete: “Mbufo ẹmen ekebe ediomi,+ ndien yak oku itiaba ẹkama nnụk okukịm itiaba ẹnyụn̄ ẹbem ekebe+ Jehovah iso.”  Ndien enye ọdọhọ kpukpru owo ete: “Mbufo ẹka, ẹkesan̄a ẹkanade obio, ndien yak mbon emi ẹkamade n̄kpọekọn̄+ ẹbem ekebe Jehovah iso.”  Ntre ke mmọ ẹnam kpa nte Joshua ọkọdọhọde mmọ; oku itiaba ẹkama nnụk okukịm itiaba ẹbe ke iso Jehovah ẹnyụn̄ ẹfri nnụk oro, ndien ekebe ediomi Jehovah onyụn̄ etiene mmọ ke edem.  Ndien mbon emi ẹkamade n̄kpọekọn̄ ẹbem mme oku emi ẹfride nnụk iso, ke adan̄aemi mbon emi ẹkpemede edem+ ẹtienede Ekebe oro ke edem, mme oku ẹnyụn̄ ẹka iso ẹfri nnụk. 10  Ndien Joshua ama owụk kpukpru owo+ ete: “Mbufo ẹkûfiori n̄kpo ẹkûnyụn̄ ẹyak ẹkop mbufo uyo, ikọ ndomokiet okûnyụn̄ ọwọrọ mbufo ke inua tutu esịm usen eke ndidọhọde mbufo ‘Ẹfiori!’ Ndien mbufo ẹfiori.”+ 11  Ndien enye anam ekebe Jehovah asan̄a akanade obio oro ini kiet, ekem mmọ ẹka itienna, ẹkedan̄ do ke okoneyo. 12  Ekem Joshua abak edemede ke usenubọk,+ mme oku ẹnyụn̄ ẹbiom ekebe+ Jehovah, 13  ndien oku itiaba emi ẹkamade nnụk okukịm itiaba ẹsan̄a ẹbem ekebe Jehovah iso, ẹka iso ndifri nnụk, ndien mbon emi ẹkamade n̄kpọekọn̄ ẹsan̄a ẹbem mmọ iso, ke adan̄aemi mbon oro ẹkpemede edem ẹsan̄ade ẹtiene ekebe Jehovah, mme oku ẹnyụn̄ ẹka iso ẹfri nnụk.+ 14  Ndien mmọ ẹsan̄a ẹkanade obio oro ini kiet ke ọyọhọ usen iba, ekem mmọ ẹfiak ẹnyọn̄ọ itienna. Ntem ke mmọ ẹkenam ke usen itiokiet.+ 15  Ndien edikem ke ọyọhọ usen itiaba, ke ndondo oro eyo esierede, mmọ ẹbak ẹdemede, ẹnyụn̄ ẹsan̄a ẹkanade obio nte ẹkam ẹsinamde, utịm ikatiaba. Ndien ke usen oro kpọt mmọ ẹsan̄a ẹkanade obio utịm ikatiaba.+ 16  Edikem ke ọyọhọ utịm ikatiaba, mme oku ẹfri nnụk oro, ndien Joshua ọdọhọ kpukpru owo ete: “Mbufo ẹfiori;+ koro Jehovah amada obio emi esịn mbufo ke ubọk.+ 17  Koro ẹnyene ndisobo obio emi mfep;+ ndien kpukpru se idude ke esịt esie ẹdinyene Jehovah. Edi Rahab+ kpọt, kpa akpara oro, ke mbufo ẹdinịm uwem, enye ye kpukpru mbon oro ẹdude ye enye ke ufọk, koro enye ekedịpde mme isụn̄utom emi nnyịn ikosion̄ode idọn̄.+ 18  Amaedi mbufo, ẹkpeme idem ye n̄kpọ nsobo,+ mbak enye edidọn̄ mbufo itọn̄+ ndien mbufo ẹda ndusụk n̄kpọ nsobo+ ẹnyụn̄ ẹnam itienna Israel akabade edi n̄kpọ nsobo ndien ẹda afanikọn̄ ẹdi itienna.+ 19  Kpukpru silver ye gold ye mme n̄kpọ okpoho ye ukwak ẹdi ndisana n̄kpọ Jehovah.+ Mbufo ẹyetan̄ mmọ ẹka itie unịm n̄kpọuto+ Jehovah.” 20  Ndien kpukpru owo ẹfiori n̄kpo ke ini mme oku ẹfride nnụk+ oro. Edikem ke ndondo oro kpukpru owo ẹkopde uyom nnụk oro ẹfride, mmọ ẹtọn̄ọ ndifiori akwa n̄kpo ekọn̄, ndien ibibene oro ọtọn̄ọ ndiduọ ke isọn̄.+ Ekem kpukpru owo ẹbe nnennen ẹdụk obio oro, ẹnyụn̄ ẹda obio oro ẹnyene. 21  Ndien mmọ ẹda iso akan̄kan̄ ẹsobo+ kpukpru se idude ke obio oro ẹfep, ọtọn̄ọde ke erenowo esịm n̄wan, ọtọn̄ọde ke akparawa esịm akani eren ye enan̄ ye erọn̄ ye ass. 22  Ndien Joshua ọdọhọ iren iba oro ẹkekade uyep ke isọn̄ oro ete: “Ẹdụk ufọk n̄wan oro, kpa akpara oro, ẹkesio n̄wan oro ye kpukpru owo emi ẹnyenede enye ẹwọrọ ẹdi, kpa nte mbufo ẹken̄wọn̄ọde ẹnọ enye.”+ 23  Ntre n̄kparawa oro ẹkekade uyep do ẹbe ẹdụk ẹkesio Rahab ye ete esie ye eka esie ye nditọeka esie ye kpukpru owo emi ẹnyenede enye, ih, mmọ ẹsion̄o ofụri orụk esie ẹwọrọ ẹdi;+ ẹnyụn̄ ẹda mmọ ẹkebon ke edem itienna nditọ Israel. 24  Ndien mmọ ẹfọp obio oro ke ikan̄ ye kpukpru se idude ke esịt.+ Edi amaedi silver ye gold ye mme n̄kpọ okpoho ye ukwak, mmọ ẹtan̄ ẹkebon ke itie unịm n̄kpọuto ke ufọk Jehovah.+ 25  Edi Joshua enịm Rahab kpa akpara oro ye mbonufọk ete esie ye kpukpru owo emi ẹnyenede enye, uwem;+ enye onyụn̄ odụn̄ ye Israel tutu esịm mfịn emi,+ koro enye ekedịpde mme isụn̄utom oro Joshua okosiode ọdọn̄ ẹkeyep Jericho.+ 26  Ndien ke ukem ini oro Joshua esịn isụn̄i, ete: “Osụk ọdọdiọk ke iso Jehovah ọnọ owo eke edidahade ada ọbọp obio Jericho emi. Yak enye ataba akpan esie ke ini enye esịnde itiat idakisọn̄, onyụn̄ ataba ekperedem eyen esie ke ini enye ọdọn̄de mme usụn̄ esie.”+ 27  Ndien Jehovah odu ye Joshua,+ etop esie onyụn̄ asuana ke ofụri isọn̄.+

Mme Ikọ Idakisọn̄