Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Joshua 2;1-24

2  Ekem Joshua eyen Nun etie ke Shittim+ osio iren iba ke ndịbe ọdọn̄ nte uyep, ete: “Ẹka, ẹkese isọn̄ oro ye Jericho.” Ntre mmọ ẹka ẹkedụk ufọk n̄wan akpara kiet emi ekerede Rahab,+ ẹnyụn̄ ẹdan̄ do.  Ndien ẹtịn̄ ẹnọ edidem Jericho ẹte: “Sese! Iren emi ẹtode ke otu nditọ Israel ẹmedi mi okoneyo emi ndiyep isọn̄ emi.”  Ndien edidem Jericho ọdọn̄ utom ọnọ Rahab, ete: “Sion̄o iren emi ẹkedide ẹbịne fi di, emi ẹdụkde ufọk fo, koro mmọ ẹdi ndiyep ofụri isọn̄ emi.”+  Edi n̄wan oro ama emen iren iba emi ekedịp. Ndien enye ọdọhọ ete: “Ih, iren oro ẹma ẹdi ẹbịne mi, edi mfiọkke ebiet emi mmọ ẹketode ẹdi.  Mmọ ẹma ẹnyụn̄ ẹwọn̄ọ ke eyo ofụkde owo idem, ke ini ẹkeyomde ndiberi inuaotop.+ Mfiọkke ebiet emi mmọ ẹkade. Ẹbịne mmọ iwiwa, mbufo ẹyesịm mmọ.”  (Nte ededi, enye ama emen mmọ ọdọk ọkọm ufọk,+ ekedịp mmọ ke otu ọkpọ flax emi ẹketịmde ẹbon ẹnọ enye ke enyọn̄ ọkọm esie.)  Ndien mbon oro ẹsan̄a Jordan ẹbe ke ebiet ube mmọn̄+ ẹbịne mmọ, ẹnyụn̄ ẹberi usụn̄ inuaotop ke ndondo oro mbon emi ẹbịnede mmọ ẹwọrọde.  Ekem n̄wan oro ọdọk ebịne mbon uyep oro ke enyọn̄ ọkọm mbemiso mmọ ẹdụkde idap.  Ndien enye ọkọdọhọ iren oro ete: “Mmọfiọk nte ke Jehovah iditreke ndinọ mbufo isọn̄ emi,+ ye nte ke ndịk mbufo anam nnyịn,+ esịt ọmọduọ kpukpru mme andidụn̄ isọn̄ emi ke ntak mbufo.+ 10  Koro nnyịn imokop nte Jehovah akanamde mmọn̄ Ididuot Inyan̄ asat ke iso mbufo ke ini mbufo ẹketode Egypt+ ẹwọn̄ọ, ye se mbufo ẹkenamde ndidem Amorite mbiba, Sihon+ ye Og,+ emi ẹkedude ke edem Jordan oko, kpa mmọ emi mbufo ẹkesobode ẹfep.+ 11  Ke ini nnyịn ikokopde n̄kpọ emi, nsia* ama eyemede+ nnyịn, ibifịk ikonyụn̄ idụhe owo ndomokiet aba ke idem ke ntak mbufo,+ koro Jehovah Abasi mbufo edide Abasi ke heaven ke enyọn̄ ye ke isọn̄ ke idak.+ 12  Ndien ke emi, mbọk, ẹtomo enyịn̄ Jehovah+ ẹnọ mi, ẹte, sia n̄wụtde mbufo ima-mfọnido, mbufo n̄ko iditreke ndiwụt mbonufọk ete mi+ ima-mfọnido, ẹnyụn̄ ẹnọ mi ata idiọn̄ọ.+ 13  Mbufo ẹnyụn̄ ẹnịm ete+ mi ye eka mi ye nditọeka mi iren ye iban uwem, ye kpukpru se inyenede mmọ, ẹnyụn̄ ẹnyan̄a ukpọn̄ nnyịn ẹsio ke n̄kpa.”+ 14  Ndien iren oro ẹdọhọ enye ẹte: “Ukpọn̄ nnyịn ẹdikpa utu ke mbufo ndikpa!+ Edieke mbufo mîditịn̄ke n̄kpọ nnyịn emi inọ owo, nnyịn n̄ko iditreke ndiwụt fi ima-mfọnido nnyụn̄ nnam akpanikọ nnọ fi ke ini emi Jehovah edinọde nnyịn isọn̄ emi.”+ 15  Ke oro ama ekebe, enye anam mmọ ẹsụhọde ke urụk ẹwọrọ ke window, koro ufọk esie akadiana ke ibibene, enye okonyụn̄ odụn̄+ ke enyọn̄ ibibene obio. 16  Enye onyụn̄ ọdọhọ mmọ ete: “Ẹka obot obot ikpehe oko, mbak mbon emi ẹbịnede mbufo ẹdisịm mbufo; mbufo ẹnyụn̄ ẹdịbe do ke usen ita tutu mbon emi ẹbịnede mbufo ẹfiak edem, ndien mbufo ẹmekeme ndinyọn̄ọ.” 17  Ndien iren oro ẹdọhọ enye ẹte: “Nnyịn iyọbọhọ ubiomikpe ke un̄wọn̄ọ emi afo anamde nnyịn in̄wọn̄ọ+ mi. 18  Sese! Nnyịn imọn̄ idi isọn̄ emi. Tebe ididuot urụk emi ke window emi afo anamde nnyịn isụhọde iwọrọ, nyụn̄ nam ete ye eka fo ye nditọeka fo ye kpukpru mbonufọk ete fo ẹdu ye afo ke ufọk emi.+ 19  Ndien edieke owo ekededi editode enyịnusụn̄ ufọk fo ọwọrọ an̄wa,+ iyịp esie ọyọkọbọ enye, ndien nnyịn iyọbọhọ ubiomikpe; edi kpukpru owo emi ẹdisọn̄ọde ẹdu ye afo ke ufọk emi, iyịp mmọ ọyọkọbọ nnyịn edieke ubọk owo otụkde mmọ. 20  Edi edieke afo editịn̄de n̄kpọ nnyịn emi ọnọ owo,+ nnyịn iyọbọhọ ubiomikpe ke un̄wọn̄ọ emi afo anamde nnyịn in̄wọn̄ọ mi.” 21  Ndien n̄wan oro ọbọrọ mmọ ete: “Yak edi nte mbufo ẹdọhọde.” Ndien enye osio mmọ unyọn̄, mmọ ẹnyụn̄ ẹnyọn̄ọ. Ekem enye etebe ididuot urụk oro ke window. 22  Ntre mmọ ẹdaha ẹka obot obot ikpehe ẹnyụn̄ ẹkedu do usen ita, tutu mbon emi ẹbịnede mmọ ẹfiak edem. Ndien mbon emi ẹbịnede mmọ ẹyom mmọ ke kpukpru ebiet, inyụn̄ ikwe mmọ. 23  Ndien iren iba oro ẹto obot obot ikpehe oro ẹsụhọde, ẹbe mmọn̄ ẹdisobo ye Joshua eyen Nun, ẹnyụn̄ ẹbụk kpukpru se iketịbede ye mmọ ẹnọ enye. 24  Mmọ ẹnyụn̄ ẹdọhọ Joshua ẹte: “Jehovah amada ofụri isọn̄ oro esịn nnyịn ke ubọk.+ Mmọdo, esịt ọduọ kpukpru mme andidụn̄ isọn̄ oro aban̄a nnyịn.”+

Mme Ikọ Idakisọn̄

At. Ed., “esịt.”