Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Joshua 11;1-23

11  Edikem ke ini Jabin edidem Hazor okopde n̄kpọ emi, enye ọdọn̄ utom ọnọ Jobab edidem Madon+ ye edidem Shimron ye edidem Achshaph,+  ye ndidem emi ẹdude ke edem edere obot obot ikpehe ye ke unaisọn̄ desat emi odude ke edem usụk Chinnereth+ ye ke Shephelah+ ye ke n̄kan̄ obot Dor+ ke edem usoputịn,  mbon Canaan+ emi ẹdude ke edem usiahautịn ye edem usoputịn, ye mme Amorite+ ye mme Hittite+ ye mme Perizzite+ ye mbon Jebus+ ke obot obot ikpehe ye mme Hivite+ ke ukot Obot Hermon+ ke isọn̄ Mizpah.+  Ntre mmọ ẹwọrọ ẹka, mmọ ye kpukpru mbonekọn̄ mmọ, ata ediwak owo emi ẹwakde nte ntan mbeninyan̄,+ ye ata ediwak enan̄-mbakara+ ye mme chariot ekọn̄.  Ekem kpukpru ndidem emi ẹdiomi ẹnyụn̄ ẹsop idem ọtọkiet ndien ẹdi ẹdinam nna ọtọkiet ke mben mmọn̄ Merom ndin̄wana ye Israel.+  Ndien Jehovah ọdọhọ Joshua ete: “Kûkop ndịk uban̄a mmọ,+ koro n̄kpọn̄ adan̄aemi, nyada kpukpru mmọ nsịn Israel ke ubọk man ẹwot mmọ. Afo oyokpok akpan esịp enan̄-mbakara mmọ,+ onyụn̄ ọfọp mme chariot mmọ ke ikan̄.”+  Ndien Joshua ye kpukpru mbonekọn̄ emi ẹdude ye enye ẹdi ẹdisịm mmọ ke mbuari ke mben mmọn̄ Merom ndin̄wana ye mmọ.  Ndien Jehovah ada mmọ esịn Israel ke ubọk,+ ndien nditọ Israel ẹwot ẹnyụn̄ ẹbịne mmọ tutu ẹsịm Sidon+ emi awakde owo etieti ye Misrephoth-maim+ ye unaisọn̄ itịghede Mizpeh+ ke edem usiahautịn; mmọ ẹnyụn̄ ẹwot mmọ tutu baba owo mmọ kiet ibọhọke.+  Ekem Joshua anam ye mmọ kpa nte Jehovah ọkọdọhọde enye: enye okpok akpan esịp enan̄-mbakara mmọ,+ onyụn̄ ọfọp mme chariot mmọ ke ikan̄.+ 10  Ndien ke ini oro+ Joshua akabade ada Hazor+ enyene; onyụn̄ owot edidem esie ke akan̄kan̄,+ koro Hazor ke mbemiso ekedide ibuot ọnọ kpukpru mme obio ubọn̄ emi. 11  Mmọ ẹnyụn̄ ẹwot kpukpru ukpọn̄ emi ẹdude ke esịt ke iso akan̄kan̄ ẹnyụn̄ ẹsobo mmọ.+ Baba n̄kpọ kiet eke ọduọkde ibifịk isụhọke,+ enye onyụn̄ ọfọp Hazor ke ikan̄. 12  Ndien Joshua ada kpukpru mme obio ndidem emi enyene onyụn̄ omụm ndidem mmọ onyụn̄ owot mmọ ke iso akan̄kan̄.+ Enye osobo mmọ,+ kpa nte Moses asan̄autom Jehovah okowụkde.+ 13  Edi Israel ikosoboke mme obio oro ẹkedude ke edikon̄ ebiet, ke mîbọhọke Hazor oro Joshua ọkọfọpde. 14  Ndien nditọ Israel ẹtan̄ kpukpru n̄kpọ mbụme ke mme obio emi ye mme ufene ẹda ke idemmọ.+ Edi mmọ ẹwot kpukpru owo ke iso akan̄kan̄ tutu ẹsọhi kpukpru mmọ ẹfep.+ Mmọ inyụn̄ iyakke baba owo kiet eke ọduọkde ibifịk osụhọ.+ 15  Kpa nte Jehovah okowụkde Moses asan̄autom esie, ntre ke Moses okowụk Joshua,+ ndien Joshua anam kpa ntre. Enye ikosioho baba ikọ kiet ifep ke otu kpukpru se Jehovah okowụkde Moses.+ 16  Ndien Joshua ada ofụri isọn̄ emi enyene, kpa obot obot ikpehe ye ofụri Negeb+ ye ofụri isọn̄ Goshen+ ye Shephelah+ ye Arabah+ ye obot obot ikpehe Israel ye Shephelah esie,+ 17  ọtọn̄ọde ke Obot Halak,+ emi ọdọkde aka Seir,+ tutu esịm Baalgad+ ke unaisọn̄ itịghede Lebanon ke ukot Obot Hermon,+ ndien enye omụm kpukpru ndidem mmọ onyụn̄ ọtọ mmọ owot.+ 18  Ndien Joshua an̄wana ekọn̄ ye kpukpru ndidem emi ke ediwak usen. 19  Obio ndomokiet ikanamke emem ye Israel ke mîbọhọke mme Hivite+ emi ẹdụn̄de ke Gibeon.+ Mmọ ẹken̄wana ekọn̄ ẹda kpukpru mbon eken ẹnyene.+ 20  Koro Jehovah akanamde esịt mmọ ọsọn̄+ man mmọ ẹn̄wana ekọn̄ ye Israel, man enye okposobo mmọ efep, man okûnyụn̄ atua mmọ mbọm,+ edi man enye ọsọhi mmọ efep, kpa nte Jehovah okowụkde Moses.+ 21  N̄ko-n̄ko, ke ini oro Joshua aka okosobo mbon Anak+ efep ke obot obot ikpehe, ke Hebron, ke Debir, ke Anab+ ye ke ofụri obot obot ikpehe Judah ye ofụri obot obot ikpehe Israel.+ Joshua osobo mmọ ye mme obio mmọ efep.+ 22  Baba owo Anak kiet ikosụhọke ke isọn̄ nditọ Israel. Mmọ ẹkesụhọ+ ke Gaza+ ye Gath+ ye Ashdod+ kpọt. 23  Ntre ke Joshua ada ofụri isọn̄ oro enyene, nte ekemde ye kpukpru se Jehovah ọkọn̄wọn̄ọde ọnọ Moses,+ ndien Joshua edeme enye ọnọ Israel nte ẹkebaharede ẹnọ mmọ, ke esien ke esien.+ Ndien isọn̄ oro ana sụn̄ owo in̄wanake aba ekọn̄.+

Mme Ikọ Idakisọn̄