Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Joshua 10;1-43

10  Edikem ke ndondo oro Adoni-zedek edidem Jerusalem okopde ke Joshua ada Ai+ enyene onyụn̄ osobo+ enye efep, ke nte enye akanamde Jericho+ ye edidem esie,+ ntre ke enye onyụn̄ anam Ai ye edidem esie,+ ye nte ke mme andidụn̄ Gibeon ẹma ẹnam emem ye Israel+ ẹnyụn̄ ẹka iso ẹdụn̄ ke otu mmọ,  ndịk+ anam enye etieti, koro Gibeon ekedide akwa obio, ukem nte kiet ke otu mme obio ndidem, okonyụn̄ okponde akan Ai,+ ndien kpukpru irenowo esie ẹkedide n̄kpọsọn̄ owo.  Ndien Adoni-zedek edidem Jerusalem+ ọdọn̄ utom ọnọ Hoham edidem Hebron+ ye Piram edidem Jarmuth+ ye Japhia edidem Lachish+ ye Debir edidem Eglon,+ ete,  “Mbufo ẹdọk ẹtiene mi, ẹdi ẹdin̄wam mi man nnyịn in̄wana ye Gibeon, koro enye amanam emem ye Joshua ye nditọ Israel.”+  Ntem ke mmọ ẹsop idem ọtọkiet ẹnyụn̄ ẹdọk ẹka, mmọ ndidem Amorite+ mbition, edidem Jerusalem, edidem Hebron, edidem Jarmuth, edidem Lachish, edidem Eglon, mmọ emi ye kpukpru udịmekọn̄ mmọ, ẹnam nna ndin̄wana ekọn̄ ye Gibeon.  Ndien mbon Gibeon ẹdọn̄ ẹkedọhọ Joshua ke itienna ke Gilgal,+ ẹte: “Kûsụk ubọk fo ukpọn̄ ifịn fo.+ Dọk bịne nnyịn iwiwa, din̄wam nnyịn nyụn̄ nyan̄a nnyịn, koro kpukpru ndidem Amorite emi ẹdụn̄de ke obot obot ikpehe ẹmesop idem ọtọkiet ndin̄wana ye nnyịn.”  Ntre ke Joshua oto Gilgal ọdọk aka, enye ye kpukpru mbonekọn̄ emi ẹdude ye enye+ ye kpukpru n̄kpọsọn̄ iren uko.+  Ekem Jehovah ọdọhọ Joshua ete: “Kûyak ndịk mmọ anam fi,+ koro mmada mmọ nsịn fi ke ubọk.+ Baba owo mmọ kiet idikemeke ndida fi ke iso.”+  Ndien Joshua ọdọk ebịne mmọ ke mbuari. Enye oto Gilgal asan̄a ọdọk ke ofụri okoneyo oro. 10  Ndien Jehovah anam mmọ ẹdu ke ndutịme ke iso Israel,+ nditọ Israel ẹnyụn̄ ẹtọn̄ọ ndiwot mmọ ọkwọkudịm ke Gibeon,+ ẹnyụn̄ ẹbịne mmọ ke usụn̄ emi ọdọkde aka Bethhoron ẹnyụn̄ ẹwot mmọ tutu esịm Azekah+ ye Makkedah.+ 11  Edikem ke adan̄aemi mmọ ẹfen̄ede ke iso Israel ẹnyụn̄ ẹdude ke itịghede Beth-horon, Jehovah anam ikpọ itiat+ ẹto ke enyọn̄ ẹditọ mmọ tutu esịm Azekah, ndien mmọ ẹkpan̄a. Mbon oro ẹkekpan̄ade ke edịm itiat ẹma ẹwak ẹkan mbon oro nditọ Israel ẹkewotde ke akan̄kan̄. 12  Adan̄aoro ke Joshua eketịn̄ ye Jehovah ke usen oro Jehovah ayakde mme Amorite esịn nditọ Israel ke ubọk, onyụn̄ ọdọhọ ke iso Israel ete: “Utịn,+ tuak da ke Gibeon,+ Ọfiọn̄, tuak da n̄ko ke unaisọn̄ itịghede Aijalon.”+ 13  Ndien utịn ebet, ọfiọn̄ onyụn̄ atuak ada, tutu idụt oro osio mme asua esie usiene.+ Nte owo iwetke emi isịn ke n̄wed Jashar?+ Ndien utịn atuak ada ke ufọt enyọn̄, inyụn̄ iwarake ndisụhọde ke ofụri usen oro.+ 14  Ndien baba usen eke ebietde usen oro idụhe, edide ke mbemiso m̀mê ke oro ebede, eke Jehovah okopde uyo owo,+ koro Jehovah akan̄wanade ekọn̄ ọnọ Israel.+ 15  Ekem Joshua ye ofụri Israel oro ẹkedude ye enye ẹfiak ẹnyọn̄ itienna ke Gilgal.+ 16  Ndien ndidem ition oro ẹfen̄e+ ẹkedịbe ke abaitiat ke Makkedah.+ 17  Ekem ẹditịn̄ ẹnọ Joshua ẹte: “Ẹkụt ndidem ition oro ẹdịbede ke abaitiat ke Makkedah.”+ 18  Ndien Joshua ọdọhọ ete: “Mbufo ẹkpat ikpọ itiat ẹberi ke inua abaitiat oro ẹnyụn̄ ẹnịm mbon ukpeme ẹkpeme mmọ. 19  Edi mbufo ẹkûtatuak ẹda. Ẹbịne mme asua mbufo, ẹnyụn̄ ẹto edem edem ẹwot mmọ.+ Ẹkûyak mmọ ẹdụk obio mmọ, koro Jehovah Abasi mbufo adade mmọ esịn mbufo ke ubọk.”+ 20  Ndien edikem ke ndondo oro Joshua ye nditọ Israel ẹkụrede ndiwot mmọ ọkwọkudịm, tutu mmọ ẹkpan̄a ẹma,+ mbon oro ẹkebọhọde mmọ ẹnyụn̄ ẹfen̄e ẹkedụk mme obio ibibene,+ 21  kpukpru owo ẹfiak ẹnyọn̄ itienna ke emem, ẹbịne Joshua, ke Makkedah. Baba owo kiet eke etịn̄de idiọk ikọ adian nditọ Israel idụhe.+ 22  Ekem Joshua ọdọhọ ete: “Mbufo ẹberede inua abaitiat oro ẹnyụn̄ ẹsion̄o ndidem ition emi ẹdọn̄ọde ke esịt ẹda ẹsọk mi.” 23  Ndien mmọ ẹnam ntre ẹnyụn̄ ẹsion̄o ndidem ition oro ẹdọn̄ọde ke abaitiat ẹda ẹsọk enye, kpa edidem Jerusalem,+ edidem Hebron,+ edidem Jarmuth, edidem Lachish,+ edidem Eglon.+ 24  Edikem ke ndondo oro mmọ ẹsion̄ode ndidem oro ẹda ẹsọk Joshua, Joshua okot kpukpru irenowo Israel onyụn̄ ọdọhọ mme etubom mbonekọn̄ oro ẹkesan̄ade ye enye ete: “Mbufo ẹsan̄a ẹkpere. Ẹda ukot mbufo ẹdori ndidem emi ke obotitọn̄.”+ Ndien mmọ ẹsan̄a ẹkpere ẹnyụn̄ ẹda ukot mmọ ẹdori mmọ ke obotitọn̄.+ 25  Ndien Joshua ọdọhọ mmọ ete: “Mbufo ẹkûfehe ndịk, ẹkûnyụn̄ ẹyak idem enyek mbufo.+ Ẹnyene uko, ẹnyụn̄ ẹkop odudu, koro ntem ke Jehovah edinam ye kpukpru mme asua mbufo emi mbufo ẹn̄wanade ekọn̄ ye mmọ.”+ 26  Ndien Joshua ọtọ mmọ owot onyụn̄ eyịri mmọ ke eto ition, ndien mmọ ẹkọn̄ọ do ke eto tutu esịm mbubreyo.+ 27  Edikem ke ini utịn osụhọrede, Joshua ọnọ uyo, ndien mmọ ẹkọn̄ọde ndidem oro ẹfep ke eto+ ẹnyụn̄ ẹtan̄ mmọ ẹketop ẹdọn̄ ke abaitiat oro mmọ ẹkedịbede. Ndien mmọ ẹberi ikpọ itiat ke inua abaitiat oro—tutu esịm mfịn emi. 28  Ndien Joshua ada Makkedah+ enyene ke usen oro onyụn̄ osobo enye ke iso akan̄kan̄. Enye onyụn̄ osobo edidem esie ye kpukpru ukpọn̄ eke ẹdude ke esịt.+ Enye iyakke baba owo kiet ọbọhọ. Ntre ke enye akanam edidem Makkedah+ kpa nte akanamde edidem Jericho. 29  Ndien Joshua ye ofụri Israel emi ẹdude ye enye ẹto Makkedah ẹbe ẹdika Libnah ẹken̄wana ekọn̄ ye Libnah.+ 30  Ntem ke Jehovah ada enye n̄ko ye edidem esie esịn Israel ke ubọk, ndien mmọ ẹsobo enye ye kpukpru ukpọn̄ eke ẹdude ke esịt ke iso akan̄kan̄. Mmọ iyakke baba owo kiet ọbọhọ. Ntre ke mmọ ẹnam ye edidem esie kpa nte mmọ ẹkenamde ye edidem Jericho.+ 31  Ekem Joshua ye ofụri Israel emi ẹdude ye enye ẹto Libnah ẹbe ẹdika Lachish+ ẹkenam nna do ẹnyụn̄ ẹn̄wana ekọn̄ ye enye. 32  Ntem ke Jehovah ada Lachish esịn Israel ke ubọk ndien mmọ ẹda enye enyene ke ọyọhọ usen iba, mmọ ẹnyụn̄ ẹsobo enye ye kpukpru ukpọn̄ eke ẹdude ke esịt ke iso akan̄kan̄,+ kpa nte mmọ ẹkenamde ye Libnah. 33  Ndien Horam edidem Gezer+ ọdọk aka ndin̄wam Lachish. Ntre ke Joshua osobo enye ye ikọt esie, inyụn̄ iyakke baba owo kiet ọbọhọ.+ 34  Ekem Joshua ye ofụri Israel emi ẹdude ye enye ẹto Lachish ẹbe ẹdika Eglon+ ẹkenam nna do ẹnyụn̄ ẹn̄wana ekọn̄ ye enye. 35  Ndien mmọ ẹkan enye usen oro ẹnyụn̄ ẹsobo enye ke iso akan̄kan̄, mmọ ẹnyụn̄ ẹsobo kpukpru ukpọn̄ eke ẹdude ke esịt ke usen oro, kpa nte mmọ ẹkenamde ye Lachish.+ 36  Ekem Joshua ye ofụri Israel emi ẹdude ye enye ẹto Eglon ẹbe ẹdika Hebron+ ẹken̄wana ekọn̄ ye enye. 37  Ndien mmọ ẹkan enye ẹnyụn̄ ẹsobo enye ye edidem esie ye kpukpru obio esie ye kpukpru ukpọn̄ eke ẹdude ke esịt ke iso akan̄kan̄. Enye inyụn̄ iyakke baba owo kiet ọbọhọ, kpa nte enye akanamde ye Eglon. Ntre ke enye okosobo Hebron ye kpukpru ukpọn̄ eke ẹdude enye ke esịt.+ 38  Ke akpatre Joshua ye ofụri Israel oro ẹdude ye enye ẹfiak ẹdi ke Debir+ ẹdin̄wana ekọn̄ ye obio emi. 39  Ndien Joshua ada enye ye edidem esie ye kpukpru obio esie enyene, Israel onyụn̄ owot mmọ ke iso akan̄kan̄, onyụn̄ osobo kpukpru ukpọn̄ eke ẹdude ke esịt.+ Enye inyụn̄ iyakke baba owo kiet ọbọhọ.+ Enye onyụn̄ anam ye Debir ye edidem esie kpa nte enye akanamde ye Hebron, nte enye okonyụn̄ anamde ye Libnah ye edidem esie.+ 40  Ndien Joshua osobo ofụri isọn̄ emi odude ke obot obot ikpehe+ ye ke Negeb+ ye Shephelah+ ye mme itịghede+ ye kpukpru ndidem mmọ. Enye inyụn̄ iyakke baba owo kiet ọbọhọ, ndien enye osobo+ kpukpru n̄kpọ eke ẹduọkde ibifịk,+ kpa nte Jehovah Abasi Israel okowụkde.+ 41  Ndien Joshua osobo mmọ ọtọn̄ọde ke Kadesh-barnea+ tutu esịm Gaza+ ye ofụri isọn̄ Goshen+ onyụn̄ ọdọk ekesịm Gibeon.+ 42  Ndien Joshua omụm kpukpru ndidem emi onyụn̄ ada isọn̄ mmọ enyene ini kiet,+ koro Jehovah Abasi Israel akan̄wanade ekọn̄ ọnọ Israel.+ 43  Ekem Joshua ye ofụri Israel ẹfiak ẹnyọn̄ ẹka itienna ke Gilgal.+

Mme Ikọ Idakisọn̄