Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

John 21;1-25

21  Ke mme n̄kpọ emi ẹma ẹkebe, Jesus afiak owụt mme mbet idem ke inyan̄ Tiberias; edi enye owụt idem ke usụn̄ emi.  Simon Peter ye Thomas, emi ẹkekotde Amanamba,+ ye Nathanael+ emi otode Cana ke Galilee ye nditọ Zebedee+ ye mbet esie iba en̄wen ẹkedu ọtọkiet.  Simon Peter ọdọhọ mmọ ete: “Mmọn̄ ndika ukọiyak.” Mmọ ẹdọhọ enye ẹte: “Nnyịn n̄ko imọn̄ itiene fi ika.” Mmọ ẹwọn̄ọ ẹkediere ke ubom, edi mmọ imụmke baba n̄kpọ kiet ke ofụri okoneyo oro.+  Edi, ke eyo akade ndisiere, Jesus akada ke mbenesụk, edi mme mbet ifiọkke ite edi Jesus.+  Ekem Jesus obụp mmọ ete: “N̄kpri nditọ, nte mbufo ẹmenyene se ẹdiade?” Mmọ ẹbọrọ enye ẹte “Baba!”  Enye ọdọhọ mmọ ete: “Ẹduọk iyịre ke n̄kan̄ nnasia ubom ndien mbufo ẹyemụm n̄kpọ.”+ Ntre mmọ ẹduọk, edi mmọ ikemeke ndikot iyịre koro iyak ẹwakde.+  Edi mbet emi Jesus amade+ ọdọhọ Peter+ ete: “Edi Ọbọn̄!” Ntem ke ini Simon Peter okopde ete ke edi Ọbọn̄, enye emen enyọn̄ ọfọn̄ esịne, koro enye eketie iferi, onyụn̄ ọduọk idem ke inyan̄.  Edi mme mbet eken ẹsan̄a ke ekpri ubom ẹdi, koro mîkoyomke usụn̄ ikpọn̄ obot, ekedi n̄kpọ nte ikpat ikie ita kpọt, ẹdụride iyịre ye iyak.  Edi, ke ini mmọ ẹdọkde obot, mmọ ẹkụt ikan̄ ukan̄+ do ye iyak nte ẹdorode ke esịt, ye uyo. 10  Jesus ọdọhọ mmọ ete: “Ẹda ndusụk iyak emi mbufo ẹsụk ẹmụmde do ẹdi.” 11  Ntre, Simon Peter odụk ubom okodụri iyịre emi ọyọhọde ye ikpọ iyak edinịm ke obot, iyak ikie ye aba ye duopeta. Okposụkedi iyak ẹwakde ntem, iyịre iwahake. 12  Jesus ọdọhọ mmọ ete: “Ẹdi, ẹdidia n̄kpọ.”+ Idụhe baba mbet kiet emi ekenyenede uko ndibụp ete: “Afo edi anie?” koro mmọ ẹma ẹfiọk ẹte edi Ọbọn̄. 13  Jesus edi edimen uyo ọnọ mmọ,+ onyụn̄ anam kpa ntre ye iyak. 14  Emi edi ọyọhọ utịm ikata+ emi Jesus owụtde mme mbet idem ke enye ama ekeset ke n̄kpa. 15  Ndien, ke mmọ ẹma ẹkedia n̄kpọ ẹma, Jesus obụp Simon Peter ete: “Simon eyen John, nte afo amama mi akan mmọ emi?”+ Enye ọbọrọ ete: “Ih, Ọbọn̄, afo ọmọfiọk ete mmama fi.”+ Enye ọdọhọ enye ete: “Bọk nditọerọn̄ mi.”+ 16  Enye ọtọn̄ọ ntak obụp enye, ọyọhọ utịm ikaba ete: “Simon eyen John, nte afo amama+ mi?” Enye ọbọrọ ete: “Ih, Ọbọn̄, afo ọmọfiọk ete mmama fi.” Enye ọdọhọ enye ete: “Kpeme n̄kpri erọn̄ mi.”+ 17  Enye obụp enye ọyọhọ utịm ikata ete: “Simon eyen John, nte afo amama mi?” Peter ofụhọ ke emi enye obụpde ọyọhọ utịm ikata ete: “Nte afo amama mi?” Mmọdo enye ọbọrọ enye ete: “Ọbọn̄, afo ọmọfiọk kpukpru n̄kpọ;+ afo ọmọfiọk ete mmama fi.” Jesus ọdọhọ enye ete: “Bọk n̄kpri erọn̄ mi.+ 18  Ke ata akpanikọ ke ndọhọ fi nte, Ke ini afo ekedide akparawa, afo ama esibọbọ mbọbọ onyụn̄ asan̄a aka ebiet eke oyomde. Edi ke ini ọkọride ọsọn̄ afo ayanyanade ubọk ndien owo en̄wen ọyọbọp fi mbọbọ+ onyụn̄ ada fi aka ebiet eke afo mûmaha.”+ 19  Enye eketịn̄ emi man owụt orụk n̄kpa+ eke enye edikpade man ọnọ Abasi ubọn̄.+ Mmọdo ke enye ama eketịn̄ emi ama, enye ọdọhọ enye ete: “Ka iso tiene mi.”+ 20  Ke ini Peter ọwọn̄ọrede enye okụt mbet oro Jesus amade+ nte asan̄ade etiene mmọ, kpa mbet emi ekeberede enye ke ikpanesịt ke itie udia mbubreyo okonyụn̄ obụpde enye ete: “Ọbọn̄, anie edi owo emi edidade fi ọnọ?” 21  Ntem, ke ini Peter okụtde enye, enye obụp Jesus ete: “Ọbọn̄, nso ke owo emi edinam?” 22  Jesus ọbọrọ enye ete: “Edieke edide uduak mi enye ndidu tutu ami ndi,+ nso idi mbubehe fo do? Afo ka iso tiene mi.” 23  Ndien, ikọ emi asuana ke otu nditọete, nte ke mbet oro idikpaha. Edi, Jesus ikọdọhọke ite ke enye idikpaha, edi ọkọdọhọ: “Edieke edide uduak mi enye ndidu+ tutu ami ndi, nso idi mbubehe fo do?” 24  Emi edi mbet+ oro etiede ntiense aban̄a mme n̄kpọ emi onyụn̄ ewetde mme n̄kpọ emi, nnyịn imonyụn̄ ifiọk ite ikọ ntiense oro enye ọnọde edi akpanikọ.+ 25  Ke akpanikọ, ediwak n̄kpọ efen ẹdu emi Jesus akanamde, emi edide, edieke ẹkpewetde mmọ ata ọyọhọ ọyọhọ, n̄kereke ke ererimbot ọkpọdọn̄ọ n̄wed emi ẹdade ẹwet.+

Mme Ikọ Idakisọn̄