Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

John 19;1-42

19  Ekem Pilate ada Jesus akamia.+  Ndien mbonekọn̄ ẹdọk anyanya n̄kukịm ẹyara enye ke ibuot ẹnyụn̄ ẹsịne enye ewụra+ uduot mmọn̄ibọn̄;  ndien mmọ ẹdọk ẹbịne enye ẹkedọhọ ẹte: “Imọkọm-o, Edidem mme Jew!” N̄ko, mmọ ẹsiak enye ufia ke mban̄.+  Ndien Pilate ọtọn̄ọ ntak ọwọrọ an̄wa ọkọdọhọ mmọ ete: “Sese! Nda enye n̄wọrọ nsọk mbufo ke an̄wa man mbufo ẹfiọk ẹte ami n̄kwe enye ndudue ke idem.”+  Ntem Jesus ọwọrọ edi an̄wa, ayara anyanya n̄kukịm onyụn̄ esịne ewụra uduot mmọn̄ibọn̄. Enye onyụn̄ ọdọhọ mmọ ete: “Sese! Owo oro mi!”  Edi, ke ini mbọn̄ oku ye mme asan̄autom ẹkụtde enye, mmọ ẹfiori ẹte: “Kọn̄ enye ke eto!+ Kọn̄ enye ke eto!” Pilate ọdọhọ mmọ ete: “Ẹda enye ke idem mbufo ẹkekọn̄, koro n̄kwe enye ndudue ke idem.”+  Mme Jew ẹbọrọ enye ẹte: “Nnyịn imenyene ibet,+ ndien nte ekemde ye ibet oro enye enyene ndikpa, koro enye enịmde idem ke eyen Abasi.”+  Ntre, ke ini Pilate okopde ikọ emi, ndịk ọdọdiọn̄ anam enye;  ndien enye ọtọn̄ọ ntak odụk ufọk ubọn̄ andikara okobụp Jesus ete: “Afo oto m̀mọ̀n̄?” Edi Jesus ibọrọke enye.+ 10  Ntem Pilate obụp enye ete: “Nte ubọrọke mi ikọ?+ Nte afo ufiọkke ke mmenyene odudu ndisana fi nyak mmonyụn̄ nnyene odudu ndikọn̄ fi ke eto?” 11  Jesus ọbọrọ enye ete: “Afo ukpenyeneke odudu ndomokiet ndinam mi n̄kpọ ke owo mîkpetiehe ke enyọn̄ inọ fi odudu.+ Ntak edi oro idiọkn̄kpọ owo emi akayakde mi esịn fi ke ubọk okponde akan.” 12  Ke ntak emi Pilate aka iso oyom nte akpasanade enye ayak. Edi mme Jew ẹfiori ẹte: “Edieke asanade owo emi ayak, afo udịghe ufan Caesar. Owo ekededi eke enịmde idem ke edidem etịn̄ n̄kpọ adian Caesar.”+ 13  Ntre, ke Pilate ama okokop mme ikọ emi, enye ada Jesus ọwọrọ edi an̄wa, onyụn̄ osụhọde etetie ke itie ikpe ke ọtọ emi ẹkotde Mbot Itiat, edi emi ẹkotde Gab′ba·tha ke usem Hebrew. 14  Ekedi usen mben̄eidem+ passover; ke n̄kpọ nte ọyọhọ hour itiokiet.* Ndien enye ọdọhọ mme Jew ete: “Sese! Edidem mbufo do!” 15  Edi, mmọ ẹfiori ẹte: “Men enye fep! Men enye fep! Kọn̄ enye ke eto!” Pilate obụp mmọ ete: “Nte n̄wot edidem mbufo?” Mbọn̄ oku ẹbọrọ ẹte: “Nnyịn inyeneke edidem en̄wen ibọhọke Caesar.”+ 16  Ekem enye ayak enye ọnọ mmọ ete ẹda ẹkekon̄ ke eto.+ Ndien mmọ ẹda Jesus ẹdaha. 17  Ndien, enye obiom eto ndutụhọ esie,+ ọwọrọ aka+ ebiet emi ẹkotde Ebiet N̄kpọkpọrọ, emi ẹkotde Gol′go·tha ke usem Hebrew;+ 18  ndien mmọ ẹkọn̄ enye ke eto do,+ ọkọrọ ye owo iba en̄wen, owo kiet ke n̄kan̄ emi, efen ke n̄kan̄ eken, edi Jesus esịne ke ufọt.+ 19  Pilate ewet enyịn̄ emi ẹnọde enye adian ke eto ndutụhọ oro. Ẹwet ntem: “Jesus eyen Nazareth Edidem mme Jew.”+ 20  Ntem ediwak mme Jew ẹkot enyịn̄ emi, koro ebiet emi ẹkekọn̄de Jesus ekperede obio;+ ndien ẹwet enye ke usem Hebrew, Latin, ye Greek. 21  Edi, mbọn̄ oku mme Jew ẹdọhọ Pilate ẹte: “Kûwet ete, ‘Edidem mme Jew,’ edi nte ke enye ọkọdọhọ, ‘Ami ndi Edidem Mme Jew.’” 22  Pilate ọbọrọ ete: “Se mma n̄kewet mmewewet.” 23  Ndien ke ini mbonekọn̄ ẹma ẹkekọn̄ Jesus ke eto, mmọ ẹmen ewụra esie ẹsiak ke mbak inan̄, owoekọn̄ kiet ada ubak kiet, ye ọfọn̄ idakidem. Edi ọfọn̄ idakidem ikenyeneke ituak, ẹkedọdọk enye ofụri ofụri ọtọn̄ọde ke enyọn̄.+ 24  Ntre mmọ ẹdọhọ kiet eken ẹte: “Ẹyak nnyịn ikûsasiak enye emi, edi ẹyak isịn afia ida ibiere m̀mê anie edinyene.” Emi ekedi man N̄wed Abasi okposu: “Mmọ ẹdeme ewụra mi ẹda ke otu idemmọ, ẹnyụn̄ ẹsịn afia ẹban̄a ọfọn̄idem mi.”+ Ntem mbonekọn̄ ẹma ẹnen̄ede ẹnam mme n̄kpọ emi. 25  Edi, eka+ Jesus ye eyeneka eka esie an̄wan ẹda ẹkpere eto ndutụhọ esie; ọkọrọ ye Mary+ n̄wan Clopas, ye Mary Magdalene.+ 26  Ntem ke ini Jesus okụtde eka esie ye mbet emi enye amade+ nte ẹdade ẹkpere, enye ọdọhọ eka esie ete: “N̄wan owo, sese! Eyen fo do!” 27  Ekem enye ọdọhọ mbet oro ete: “Sese! Eka fo!” Ndien toto ke ini oro ka iso mbet oro ada Mary ọnyọn̄ ufọk esiemmọ. 28  Ekem, ke ini Jesus ọfiọkde ete ke kpukpru n̄kpọ ẹma ẹsu ke emi, man N̄wed Abasi okposu, enye ọdọhọ ete: “Itọn̄ asat mi.”+ 29  Otu emi n̄kpakpai wine ọdọn̄ọde ọyọhọ ama ọdiọhọ do. Ntem mmọ ẹda ndọbọ emi ọyọhọde ye n̄kpakpai wine oro ẹtori ke eto hyssop ẹnyan enye ke inua.+ 30  Ndien ke Jesus ama ọkọbọ n̄kpakpai wine oro, enye ọdọhọ ete: “Okụre!”+ ndien, enye onụk ibuot onyụn̄ ayak spirit esie.+ 31  Ndien sia ekedide usen Mben̄eidem,+ mbak mme okpo ẹdikọn̄ọ+ ke eto ndutụhọ ke Sabbath, (koro usen oro ekedi akwa Sabbath,)+ mme Jew ẹben̄e Pilate ẹte ẹbụn̄ mmọ ukot ẹnyụn̄ ẹkọn̄ọde mme okpo oro ẹfep. 32  Ntre mbonekọn̄ ẹdi ẹdibụn̄ ukot akpa owo ye eke owo enye eken oro ẹkekọn̄de kiet ye enye. 33  Edi ke ini ẹdide ẹdisịm Jesus, mmọ ibụn̄ke enye ukot sia ẹkụtde ẹte enye ama akpakpa. 34  Edi owo kiet ke otu mbonekọn̄ ada eduat ekịm enye n̄kan̄,+ ndien kpa idaha oro iyịp ye mmọn̄ ẹwọn̄ọ. 35  Ndien owo oro okokụtde n̄kpọ emi etie ntiense, ikọ ntiense esie onyụn̄ edi akpanikọ, ndien owo oro ọfiọk ete imọ itịn̄ mme n̄kpọ emi ẹdide akpanikọ, man mbufo n̄ko ẹkpenịm ke akpanikọ.+ 36  Ke akpanikọ, mme n̄kpọ emi ẹkeda itie man itie N̄wed Abasi emi okposu: “Owo idinuakke baba ọkpọ esie kiet.”+ 37  N̄ko, itie N̄wed Abasi efen ọdọhọ ete: “Mmọ ẹyese Enye emi mmọ ẹkekịmde.”+ 38  Ndien ke mme n̄kpọ emi ẹma ẹkebe, Joseph emi otode Arimathea, emi ekedide mbet Jesus ke ndịbe ke ntak ndịk mme Jew,+ ediben̄e Pilate ete ayak imọ imen okpo Jesus ifep; Pilate enyịme ọnọ enye.+ Ntre enye edi edimen okpo esie efep.+ 39  Nicodemus n̄ko, kpa owo emi akakade ebịne enye ke okoneyo ke akpa ini, asan̄a ye ewan̄ myrrh ye aloe edi, emi odobide ke n̄kpọ nte pound ikie.+ 40  Ntre mmọ ẹmen okpo Jesus ẹnyụn̄ ẹda ọfọn̄ emi ẹduọkde ufuọn̄n̄kpọ ẹwan̄ enye,+ ke ido emi mme Jew ẹsitịmde okpo ẹben̄e edibụk. 41  In̄wan̄ ama odu ke ebiet emi ẹkekọn̄de enye, ndien obufa udi ama odu ke in̄wan̄ oro,+ emi akanam owo mîbụkke owo ke esịt. 42  Edi ke ntak usen mben̄eidem+ mme Jew, mmọ ẹbụk Jesus do, koro udi emi okodude ekpere.

Mme Ikọ Idakisọn̄

Oro edi, n̄kpọ nte n̄kanika duopeba uwemeyo.