Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

John 11;1-57

11  Edi ama odu owo kiet emi ọkọdọn̄ọde, Lazarus owo Bethany, ke obio-in̄wan̄ Mary ye Martha+ eyeneka esie.  Edi Mary emi ekeyetde Ọbọn̄ edifuọn̄ aran+ onyụn̄ adade idet esie ọkwọhọde enye ukot,+ ke Lazarus eyeneka esie eren ọkọdọn̄ọ.  Mmọdo nditọeka esie iban ẹdọn̄ utom ẹnọ enye, ẹte: “Ọbọn̄, sese! owo emi afo amade+ ọdọdọn̄ọ.”  Edi ke ini Jesus okopde enye ọdọhọ ete: “Udọn̄ọ emi idịghe udọn̄ọ n̄kpa, edi edi man ayarade ubọn̄ Abasi,+ man okpoto ke enye ẹnọ Eyen Abasi ubọn̄.”  Edi Jesus ama Martha ye eyeneka esie an̄wan ye Lazarus.  Edi ke ini enye okopde ete enye ọdọdọn̄ọ, enye aka iso odu usen iba ke ebiet emi enye okodude.  Ekem ke n̄kpọ emi ama ekebe enye ọdọhọ mme mbet esie ete: “Ẹyak nnyịn ifiak ika Judea.”  Mme mbet ẹdọhọ enye ẹte: “Rabbi,+ ndondo emi ke mbon Judea ẹkeyom nditọn̄ọ fi ke itiat,+ ndien ndi oyom ndifiak n̄ka do?”  Jesus ọbọrọ ete: “Nte un̄wana usen idịghe hour duopeba? Edieke owo ekededi asan̄ade ke uwemeyo+ enye idituahake n̄kpọ ndomokiet, koro enye okụtde un̄wana ererimbot emi. 10  Edi edieke owo ekededi asan̄ade ke okoneyo,+ enye ayatuaha n̄kpọ, koro un̄wana mîdụhe enye ke idem.” 11  Ekem ke enye ama eketịn̄ mme n̄kpọ emi ama, enye ọdọhọ mmọ ete: “Lazarus ufan nnyịn aka ndiduọk odudu, edi ami mmọn̄ n̄ka do man n̄kedemede enye ke idap.”+ 12  Ntre mme mbet ẹdọhọ enye ẹte: “Ọbọn̄, edieke edide enye aka ndiduọk odudu, enye oyokop nsọn̄idem.” 13  Nte ededi, Jesus eketịn̄ aban̄a n̄kpa esie. Edi mmọ ẹkere ke enye eketịn̄ aban̄a ndide idap nduọk odudu. 14  Adan̄aoro, Jesus ọdọhọ mmọ in̄wan̄-in̄wan̄ ete: “Lazarus akpa,+ 15  ndien mmadara ke ntak mbufo koro mmen̄kodụhe do, man mbufo ẹnịm ke akpanikọ. Edi ẹyak nnyịn ika ibịne enye.” 16  Ntre Thomas, emi ẹkekotde Amanamba, ọdọhọ mme mbet eken ete: “Ẹyak nnyịn n̄ko ika, man nnyịn ikakpa ye enye.”+ 17  Mmọdo ke ini Jesus esịmde, enye okụt ke enye ama ododu ke udi+ ke usen inan̄. 18  Ndien Bethany okoyom usụn̄ ọkpọn̄ Jerusalem ke n̄kpọ nte itiat iba. 19  Ndien ediwak mme Jew ẹma ẹdi ẹbịne Martha ye Mary ndidọn̄ mmọ esịt+ mban̄a eyeneka mmọ. 20  Ntre ke ini Martha okopde ke Jesus ke edi, enye ọwọrọ okosobo ye enye; edi Mary+ osụk odu ke ufọk. 21  Ntem Martha ọdọhọ Jesus ete: “Ọbọn̄, edieke afo okpokodude mi eyeneka mi ikpakakpaha.+ 22  Edi ke emi mmọfiọk nte ke adan̄a ediwak n̄kpọ eke afo eben̄ede Abasi,+ Abasi ọyọnọ fi.” 23  Jesus ọdọhọ enye ete: “Eyeneka fo eyeset.”+ 24  Martha ọdọhọ enye ete: “Mmọfiọk nte enye eyeset ke ini ediset ke n̄kpa+ ke akpatre usen.” 25  Jesus ọdọhọ enye ete: “Ami ndi ediset ye uwem.+ Owo eke ọbuọtde idem ye ami, idem ọkpọkọm enye akpakpa, oyodu uwem;+ 26  ndien kpukpru owo eke ẹdude uwem ẹnyụn̄ ẹbuọtde idem ye ami idikpaha tutu amama.+ Nte afo emenịm emi ke akpanikọ?” 27  Enye ọbọrọ enye ete: “Ih, Ọbọn̄; mmenịm nte afo edi Christ Eyen Abasi, Enye emi edide ke ererimbot.”+ 28  Ndien ke enye ama eketịn̄ emi, enye adaha okokot Mary eyeneka esie onyụn̄ ọdọhọ ke ndịbe ete: “Andikpep+ mmọmi, ndien enye ke okot fi.” 29  Edi ke ini enye okopde emi, enye adaha ada iwiwa etiene enye. 30  Edi Jesus ikodụkke kan̄a obio-in̄wan̄ oro, edi enye okosụk odu ke ebiet emi Martha okokụtde enye. 31  Ntem mme Jew emi ẹkedude ye Mary ke ufọk+ ẹdọn̄ enye esịt, ke ẹkụtde nte enye adahade ke enyọn̄ iwiwa ọwọrọ, ẹtiene enye, ẹkere ẹte ke enye aka udi+ nditua eyet do. 32  Ndien ke ini Mary esịmde ebiet emi Jesus okodude onyụn̄ okụtde enye, ọduọ enye ke ukot onyụn̄ ọdọhọ enye ete: “Ọbọn̄, edieke afo okpokodude mi, eyeneka mi ikpakakpaha.”+ 33  Ntem, ke ini Jesus okụtde nte enye atuade ye nte mme Jew oro ẹkesan̄ade ye enye ẹtuan̄ade, enye omụm mmụm ke spirit, esịt onyụn̄ etịmede enye;+ 34  ndien enye obụp ete: “Mbufo ẹkenịm enye ke m̀mọ̀n̄?” Mmọ ẹbọrọ enye ẹte: “Ọbọn̄, di dise.” 35  Jesus atua eyet.+ 36  Ntem mme Jew ẹdọhọ ẹte: “Sese, adan̄a nte enye amade enye!”+ 37  Edi ndusụk mmọ ẹdọhọ ẹte: “Nte owo emi akatatde nnan enyịn+ ikpekekemeke ndinam owo emi okûkpa?” 38  Ntem ke Jesus ama akafiak omụm mmụm ke esịt, enye edisịm udi.+ Udi emi ekedi abaitiat, ẹma ẹnyụn̄ ẹkpat itiat+ ẹberi ke inua esie. 39  Jesus ọdọhọ ete: “Ẹkpat itiat+ ẹsio.” Martha, eyeneka akpan̄kpa oro, ọdọhọ enye ete: “Ọbọn̄, anaedi enye etebe ke emi, koro usen inan̄ edi emi.” 40  Jesus ọdọhọ enye ete: “Nte n̄kọdọhọke fi nte edieke enịmde ke akpanikọ oyokụt ubọn̄ Abasi?”+ 41  Mmọdo mmọ ẹkpat itiat oro ẹsio. Ndien Jesus emenede enyịn esie ese enyọn̄+ onyụn̄ ọdọhọ ete: “Ete, mmọkọm fi koro afo okopde akam mi.+ 42  Ke akpanikọ, mmọfiọk nte ke afo emesikop uyo mi kpukpru ini; edi ntịn̄ ntem ke ntak otuowo+ emi ẹdade ẹkpere mi, man mmọ ẹkpenịm ke akpanikọ ẹte afo okosio mi ọdọn̄.”+ 43  Ndien ke enye ama eketịn̄ mme n̄kpọ emi ama, enye ofiori ke ọkpọsọn̄ uyo ete: “Lazarus, wọrọ di!”+ 44  Owo oro akakpade mi ọwọrọ edi ye ọfọn̄+ emi ẹkedade ẹbọp enye ukot ye ubọk, onyụn̄ ọbọbọ ọfọn̄ ke iso. Jesus ọdọhọ mmọ ete: “Ẹtat enye ẹnyụn̄ ẹyak enye ọnyọn̄.” 45  Ntre ediwak mme Jew oro ẹkedide ndise Mary emi ẹkenyụn̄ ẹkụtde se enye akanamde ẹbuọt idem ye enye;+ 46  edi ndusụk mmọ ẹdaha ẹbịne mme Pharisee ẹnyụn̄ ẹkesian mmọ mme n̄kpọ oro Jesus akanamde.+ 47  Mmọdo mbọn̄ oku ye mme Pharisee ẹkot esop Sanhedrin+ ẹbon ọtọkiet ẹnyụn̄ ẹdọhọ ẹte: “Nnyịn inanam didie, koro owo emi amanam ediwak idiọn̄ọ?+ 48  Edieke nnyịn isanade enye iyak, kpukpru mmọ ẹyebuọt idem ye enye,+ ndien mbon Rome+ ẹyedi ẹdibọ nnyịn itie+ nnyịn ye idụt nnyịn.” 49  Edi owo mmọ kiet, Caiaphas, emi ekedide akwa oku isua oro,+ ọdọhọ mmọ ete: “Mbufo ifiọkke n̄kpọ ndomokiet, 50  mbufo inyụn̄ ikereke ite ke edi ke ufọn mbufo owo kiet ndikpa+ ke ibuot mme owo akan ofụri idụt nditak.”+ 51  Enye iketịn̄ke emi ke ifiọk idemesie; edi sia enye ekedide akwa oku isua oro, enye etịn̄ ntịn̄nnịm ikọ ete ke akana Jesus akpa ọnọ idụt oro, 52  inyụn̄ ikpaha inọ idụt oro kpọt, edi man enye n̄ko akpatan̄ nditọ Abasi emi ẹsuanade+ obok ọtọkiet anam ẹdi kiet.+ 53  Ntre ọtọn̄ọde ke usen oro mmọ ẹdiomi ndiwot enye.+ 54  Ntem Jesus iwọrọke aba isan̄a an̄wan̄wa+ ke otu mme Jew,+ edi enye ọkpọn̄ do aka obio emi ekperede wilderness, okodụk obio emi ẹkotde Ephraim,+ onyụn̄ odu do ye mme mbet esie. 55  Edi passover+ mme Jew ke akasan̄a ekpere, ndien ediwak owo ẹto obio oro ẹdọk ẹka Jerusalem mbemiso passover man ẹkenam idem asana nte ido edide.+ 56  Ntem mmọ ẹsan̄a ẹyom Jesus ẹnyụn̄ ẹdọhọ kiet eken nte mmọ ẹdade ke temple ẹte: “Mbufo ẹkere didie? Nte enye ididịghe usọrọ emi?” 57  Ntem, mbọn̄ oku ye mme Pharisee ẹma ẹnọ uyo ẹte edieke owo ekededi ọfiọkde ebiet eke enye odude, yak enye etịn̄, man mmimọ ikpomụm enye.

Mme Ikọ Idakisọn̄