Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

John 1;1-51

1  Ikọ+ okodu ke editọn̄ọ,+ Ikọ okonyụn̄ odu ye Abasi,+ ndien Ikọ ekedi abasi.+  Enye emi okodu ke editọn̄ọ+ ye Abasi.+  Kpukpru n̄kpọ ẹkedidu ebe ke enye,+ ndien ke mîbehe ke enye baba n̄kpọ kiet ikedịghe ididu. Se ikedide ididu  ebe ke enye ekedi uwem,+ ndien uwem emi ekedi un̄wana+ ọnọ mme owo.  Ndien un̄wana oro ke ayama ke ekịm,+ edi ekịm ikanke enye.  Ama odu owo emi ẹkesiode ẹdọn̄ nte andida ke ibuot Abasi:+ enye ekekere John.+  Owo emi ekedi nte ntiense,+ man etie ntiense aban̄a un̄wana,+ man kpukpru orụk owo ẹkpenịm ke akpanikọ oto ke enye.+  Idịghe enye ekedi un̄wana oro,+ edi enye ekedi man etie ntiense+ aban̄a un̄wana oro.  Ata un̄wana+ oro ọnọde kpukpru orụk owo+ un̄wana+ ama ekpere ndidi ke ererimbot. 10  Enye okodu ke ererimbot,+ ndien ekebe ke enye ererimbot edidu,+ edi ererimbot ikọfiọkke enye. 11  Enye ama aka obio emana esie, edi mbon esie idarake enye.+ 12  Edi, adan̄a ediwak owo emi ẹkedarade enye,+ enye ama ọnọ mmọ unen ndikabade ndi nditọ Abasi,+ koro mmọ ẹbuọtde idem ke enyịn̄ esie;+ 13  mmọ ikamanake ito iyịp m̀mê uduak obụkidem m̀mê uduak owo, edi okoto ke Abasi.+ 14  Ntre Ikọ ama akabade edi obụkidem+ onyụn̄ odụn̄ ke otu nnyịn, nnyịn inyụn̄ ikụt ubọn̄ esie, utọ ubọn̄ emi ikpọn̄-ikpọn̄ edibon eyen+ enyenede oto ete; enye ama onyụn̄ ọyọhọ ye mfọnido oro owo mîdotke ye akpanikọ.+ 15  (John ama etie ntiense aban̄a enye, ih, enye ama ofiori—emi edi owo oro ọkọdọhọde—ete: “Enye emi etienede mi ke edem ebem mi iso, koro enye ama ododu mbemiso ami ndidu.”)+ 16  Koro oto ke se enye enyenede ọyọhọ ọyọhọ+ ke kpukpru nnyịn ikọbọ mfọnido oro owo mîdotke ikọrọ ke mfọnido oro owo mîdotke.+ 17  Koro ẹkenọ Ibet ebe ke Moses,+ mfọnido oro owo mîdotke+ ye akpanikọ+ ebe ke Jesus Christ. 18  Akananam baba owo kiet ikwe Abasi;+ ikpọn̄-ikpọn̄ edibon abasi+ emi odude ke ikpanesịt+ Ete anam ẹdiọn̄ọ enye.+ 19  Ndien emi edi ikọ ntiense John ke ini mme Jew ẹkesiode mme oku ye nditọ Levi ke Jerusalem ẹdọn̄ ẹte ẹbịne enye ẹkebụp enye ẹte: “Afo edi anie?”+ 20  Ndien enye ama enyịme inyụn̄ ikan̄ke, edi ọdọhọ ete: “Ndịghe Christ.”+ 21  Mmọ ẹnyụn̄ ẹbụp enye ẹte: “Afo edi anie, ndien? Ndi afo edi Elijah?”+ Enye onyụn̄ ọdọhọ ete: “Ndịghe.” “Ndi afo edi Prọfet oro?”+ Enye onyụn̄ ọbọrọ ete: “Baba!” 22  Ntre mmọ ẹbụp enye ẹte: “Afo edi anie? man ikpada ibọrọ isọk mbon oro ẹkedọn̄de nnyịn. Nso ke afo etịn̄ aban̄a idemfo?”+ 23  Enye ọbọrọ ete: “Ami ndi uyo owo oro ofioride ke wilderness ete, ‘Ẹnen̄ede usụn̄ Jehovah,’ kpa nte prọfet Isaiah ọkọdọhọde.”+ 24  Ndien mbon oro ẹkesiode ẹdọn̄ ẹketo ke otu mme Pharisee. 25  Mmọdo mmọ ẹbụp enye mbụme ẹnyụn̄ ẹdọhọ ẹte: “Ntak, ndien, afo enịmde owo baptism+ edieke mûdịghe Christ m̀mê Elijah m̀mê Prọfet oro?” 26  John ọbọrọ mmọ, ete: “Nnịm owo baptism ke mmọn̄. Owo odu ke otu+ mbufo emi mbufo mîdiọn̄ọke,+ 27  enye emi etienede mi ke edem, edi emi mmendotke nditat urụk ikpaukot esie.”+ 28  Mme n̄kpọ emi ẹkeda itie ke Bethany ke edem Jordan oko, emi John ekenịmde owo baptism.+ 29  Ke ndan̄nsiere enye okụt Jesus nte edide ebịne enye, ndien enye ọdọhọ ete: “Sese, Eyenerọn̄+ Abasi oro emende idiọkn̄kpọ+ ererimbot+ efep! 30  Emi edi owo emi n̄ketịn̄de mban̄a nte, Owo emi etienede mi ke edem ebem mi iso, koro enye ama ododu mbemiso ami ndidu.+ 31  Ami n̄kakam ndiọn̄ọke enye, edi ntak emi n̄kenịmde owo baptism ke mmọn̄ ekedi man ẹyarade enye ẹnọ Israel.”+ 32  John n̄ko ama etie ntiense, ete: “Mma n̄kụt spirit osụhọrede nte ibiom oto ke heaven edidoro enye.+ 33  Ami n̄kakam ndiọn̄ọke enye, edi Enye emi ọkọdọn̄de mi+ ete nnịm owo baptism ke mmọn̄ ọkọdọhọ mi ete: ‘Owo ekededi eke afo edikụtde nte spirit osụhọrede edidoro enye, emi edi enye emi enịmde owo baptism ke edisana spirit.’+ 34  Ndien mma n̄kụt, nnyụn̄ ntie ntiense nte ke enye edi Eyen Abasi.”+ 35  N̄ko ke ndan̄nsiere John ada ye owo iba ke otu mbet esie, 36  ndien nte enye okụtde Jesus asan̄ade, enye ọdọhọ ete: “Sese, Eyenerọn̄+ Abasi!” 37  Mbet iba oro ẹnyụn̄ ẹkop nte enye etịn̄de ntem, ndien mmọ ẹtiene Jesus. 38  Ekem Jesus ọwọn̄ọde okụt nte mmọ ẹtienede enye, onyụn̄ obụp mmọ ete: “Nso ke mbufo ẹyom?” Mmọ ẹbụp enye ẹte: “Rabbi, (emi ọwọrọde Andikpep,) afo odụn̄ ke m̀mọ̀n̄?” 39  Enye ọbọrọ mmọ ete: “Ẹdi, ndien mbufo ẹyekụt.”+ Ndien mmọ ẹka ẹkekụt ebiet emi enye odụn̄de, ndien mmọ ẹdu ye enye usen oro; ekedi n̄kpọ nte ọyọhọ hour duop.* 40  Andrew+ eyeneka Simon Peter ekedi kiet ke otu owo iba emi ẹkekopde se John eketịn̄de ẹnyụn̄ ẹtienede Jesus. 41  Owo emi ebem iso okụt Simon, eyeneka esiemmọ, onyụn̄ ọdọhọ enye ete: “Nnyịn imokụt Messiah”+ (emi ọwọrọde Christ).+ 42  Enye ada enye ọsọk Jesus. Ke ini Jesus esede+ enye, ọdọhọ ete: “Afo edi Simon+ eyen John;+ afo edikere Cephas” (emi ọwọrọde Peter ke usem Greek).+ 43  Ke ndan̄nsiere enye oyom ndidaha n̄ka Galilee. Ntre Jesus okụt Philip+ onyụn̄ ọdọhọ enye ete: “Tiene mi.”+ 44  Philip okoto Bethsaida,+ obio Andrew ye Peter. 45  Philip okụt Nathanael+ onyụn̄ ọdọhọ enye ete: “Nnyịn imokụt enye emi Moses ye mme Prọfet+ ẹkewetde ẹban̄a ke Ibet,+ kpa Jesus, eyen Joseph,+ emi otode Nazareth.” 46  Edi Nathanael obụp enye ete: “Nte eti n̄kpọ ndomokiet ekeme ndiwọrọ nto Nazareth?”+ Philip ọbọrọ enye ete: “Di dise.” 47  Jesus okụt Nathanael asan̄ade edi ndien ọdọhọ aban̄a enye ete: “Sese, ata eyen Israel, emi abian̄a mîdụhe enye ke esịt.”+ 48  Nathanael obụp enye ete: “Asan̄a didie ọdiọn̄ọ mi?” Jesus ọbọrọ enye ete: “Mbemiso Philip okokotde fi, ke adan̄aemi afo okodude ke idak eto fig, mma n̄kokụt fi.” 49  Nathanael ọdọhọ enye ete: “Rabbi, afo edi Eyen Abasi,+ afo edi Edidem+ Israel.” 50  Jesus obụp enye ete: “Nte afo emenịm ke akpanikọ koro n̄kọdọhọde fi ke mma n̄kụt fi ke idak eto fig? Afo oyokụt mme n̄kpọ emi ẹkponde ẹkan mmọ emi.” 51  Jesus aka iso ọdọhọ enye ete: “Ke ata akpanikọ ke ndọhọ mbufo nte, Mbufo ẹyekụt nte ẹbererede heaven ye nte mme angel+ Abasi ẹdide ẹdọdọk ẹsosụhọde ẹdi ndinam n̄kpọ nnọ Eyen owo.”+

Mme Ikọ Idakisọn̄

Oro edi, n̄kpọ nte n̄kanika inan̄ mbubreyo.