Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Job 9;1-35

9  Ndien Job ọbọrọ onyụn̄ ọdọhọ ete:   “Mmenen̄ede mfiọk ke emi edi ntre. Edi didie ke owo ekpenen ke ikpe ye Abasi?+   Edieke enye akpadatde esịt ndida ke ikpe ye enye,+ Enye ikemeke ndibọrọ mbụme kiet ke otu tọsịn.   Enye enyene esịt ọniọn̄ onyụn̄ okop odudu.+ Anie ekeme ndisọn̄ ibuot ye enye ndien etre ndida unan?+   Enye emen mme obot efep,+ mme owo inyụn̄ ifiọkke, Enye omowụri mmọ ke iyatesịt+ esie.   Enye anam isọn̄ enyek ke itie esie, Tutu mme adaha+ esie ẹnyen̄e.   Enye ọdọhọ utịn ete okûyama, Enye onyụn̄ ofụk ntantaọfiọn̄,+   Enye anyanade heaven enịm+ Enye onyụn̄ asan̄a ke ọkpọsọn̄ mbufụt inyan̄;+   Anam otu ntantaọfiọn̄ emi ẹkotde Ash, otu ntantaọfiọn̄ emi ẹkotde Kesil, Ye otu ntantaọfiọn̄ emi ẹkotde Kimah+ ye otu ntantaọfiọn̄ Edem Usụk; 10  Anam ikpọ n̄kpọ emi owo mîkemeke ndidụn̄ọde,+ Ye mme utịben̄kpọ emi mînyeneke ibat.+ 11  Sese! Enye asan̄a ebe mi ndien ami n̄kwe enye, Enye onyụn̄ asan̄a aka iso, ami nnyụn̄ ndiọn̄ọke enye.+ 12  Sese! Enye awamade ọbọ. Anie edikeme ndibiọn̄ọ enye? Anie edibụp enye ete, ‘Nso ke afo ananam?’+ 13  Abasi idiwọn̄ọkede iyatesịt+ esie ifep; Mme andin̄wam andisịn editịm+ ẹyenyek. 14  N̄wan̄wadise ami ndibọrọ enye! Ami nyemek ikọ eke ntịn̄de ye enye,+ 15  Ndibọrọke enye, idem ọkpọkọm ami nnenen.+ Ami nyekpe owo emi adade ke ikpe ye ami ubọk nyom mfọn.+ 16  Edieke n̄kotde enye, ndi enye eyeyere mi?+ Nnịmke ke enye ayakpan̄ utọn̄ okop uyo mi; 17  Koro enye adade oyobio anuak mi Enye onyụn̄ anam unan mi awak ke unana ntak.+ 18  Enye idiyakke mi mfiak n̄kot ibifịk,+ Koro enye akade iso anam mi nyụhọ ndotndot n̄kpọ. 19  Edieke edide odu owo ekededi emi okopde odudu, edi enye;+ Ndien edieke odude owo ekededi emi ọsọn̄de idem ndikpe unenikpe, enye okpokot mi ikpe! 20  Edieke ami n̄kpenende, inua mi okpobiom mi ikpe nte idiọkowo; Edieke mmenyeneke nduduọhọ, do enye ọkpọdọhọ ke mmakwan̄a. 21  Edieke mmenyeneke nduduọhọ, ami n̄kpọfiọkke ukpọn̄ mi; Ami n̄kpese uwem mi ke ndek. 22  N̄kpọ kiet odu. Ntak edi oro ndọhọde nte, ‘Owo eke mînyeneke nduduọhọ, n̄ko ye idiọkowo, enye ada mmọ esịm utịt.’+ 23  Edieke udiọn̄ mmọn̄ owotde owo ke mbuari, Ke ini mbon oro mîduehe ẹdude ke nnanenyịn, enye ayasak mmọ nsahi. 24  Ẹmeyak isọn̄ ẹsịn idiọkowo ke ubọk;+ Enye ofụk mme ebiereikpe esie iso. Edieke mîdịghe enye, edi anie ndien? 25  N̄ko mme usen mi ẹsọp ẹkan efehe-itọk;+ Mmọ ẹmefehe ẹbe, mmọ idikwe se ifọnde. 26  Mmọ ẹmebe nte mme ubom nnyanyan̄a, Nte ntrukpom oro efede, aka iso afiak edem, oyom se adiade.+ 27  Edieke n̄kpọdọhọde, ‘Yak mfre ọkpọsọn̄ ekikere+ mi, Yak n̄kpụhọde iso+ mi nnyụn̄ nnam enye ayama,’ 28  Kpukpru ubiak mi ẹsịn mi ndịk;+ Mmọfiọk nte ke afo udûsehe mi ke owo eke mîduehe. 29  Ami mmakabade idiọkowo. Ntak emi n̄kpade utom ke ikpîkpu?+ 30  Ọkpọkọm nda mmọn̄ snow nyet idem, Nnyụn̄ nda suọp+ nyet ubọk mi, 31  Afo ekpenyịni mi ke obube, Ndien mme ọfọn̄ mi ẹkpesua mi. 32  Koro enye mîdịghe owo+ nte ami eke n̄kpọbọrọde enye, Eke nnyịn ikposobode ye kiet eken ke ikpe. 33  Owo idụhe ndibiere ikpe ke ufọt nnyịn,+ Eke okpodoride nnyịn mbiba ubọk esie. 34  Yak enye odorode mi eto esie ke idem,+ Ndien yak ndịk esie okûsịn mi ndịghe. 35  Yak ami ntịn̄ ikọ n̄kûnyụn̄ mfehe enye, Koro ami mmemfeheke ndịk.

Mme Ikọ Idakisọn̄