Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Job 29;1-25

29  Ndien Job ọtọn̄ọ ntak etịn̄ ikọ esie ke n̄ke onyụn̄ ọdọhọ ete:   “Ubaha nte n̄kpetiede nte n̄kesitiede ke mme ọfiọn̄ enyọn̄ emi ẹkebede anyan ini ko,+ Nte n̄ketiede ke mme usen emi Abasi ekpemede mi;+   Ke ini enye akanamde utuenikan̄ esie ayama mi ke ibuot, Ke ini n̄kadade un̄wana+ esie nsan̄a ke ekịm;   Kpa nte n̄ketiede ke mme usen uyen mi,+ Ke ini n̄kedide ata ufan ye Abasi ke tent mi;+   Ke ini Ata Ọkpọsọn̄ okosụk odude ye ami, Ke ini kpukpru mme asan̄autom mi ẹkekande mi ẹkụk!   Ke ini n̄kesidade bọta nyet ikpat mi, Itiat ekesinyụn̄ osiode aran nte idịm ọnọ mi;+   Ke ini n̄kesiwọrọde n̄ka inuaotop obio,+ Ami n̄kesitịm itie mi ke an̄wa obio!+   Nditọwọn̄ ẹkụt mi ẹnyụn̄ ẹdịbe, N̄kani owo ẹnyụn̄ ẹdaha ke enyọn̄ ẹdada.+   Mbọn̄ ẹfara ke ikọ, Ẹnyụn̄ ẹda ekaubọk mmọ ẹfụk inua+ mmọ. 10  Mme etubom ẹdop uyo, Edeme mmọ onyụn̄ ọsọn̄ọ adiana mmọ ke nsịn̄.+ 11  Koro utọn̄ okopde onyụn̄ ọdọhọde ke ami mmokop inemesịt, Enyịn okụt onyụn̄ edi ntiense ọnọ mi. 12  Koro ami n̄kanyan̄ade owo ukụt emi esemede oyom un̄wam,+ Ye eyenakpa ye owo ekededi eke mînyeneke andin̄wam.+ 13  Ekọm owo oro ekperede nditak ekesidi ebịne mi, Mma nsinyụn̄ nnam esịt enem ebeakpa.+ 14  Nda edinen ido nsịne nte ọfọn̄, ndien enye ofụk mi idem.+ Unenikpe mi eketie nte anana-ubọk kod—ye mbọbọ ibuot. 15  Mma n̄kabade ndi enyịn nnọ nnan;+ Nnyụn̄ ndi ukot nnọ mbụn̄ọ. 16  Ami n̄kenen̄ede ndi ete nnọ mme ubuene;+ Nnyụn̄ ndụn̄ọde ikpe owo emi mmen̄kọfiọkke.+ 17  Mma nnyụn̄ mbụn̄ anamidiọk ọkpọ mban̄,+ Nnyụn̄ n̄wabade ndita nsio enye ke edet. 18  Ami n̄kesidọhọ nte, ‘Ami ndikpa ke ufọk mi,+ Nyonyụn̄ nnam usen uwem mi ẹwak nte ntan.+ 19  Orụn̄ mi ama atara oyom mmọn̄,+ Mbara onyụn̄ odoro ke n̄kọk mi ke ofụri okoneyo. 20  Ubọn̄ mi edi obufa ọnọ mi, Ami nyonyụn̄ ntop utịgha emi odude mi ke ubọk ndien ndien.’ 21  Mmọ ẹma ẹkop uyo mi; mmọ ẹma ẹnyụn̄ ẹbet, Ẹnyụn̄ ẹdop uyo ẹbet item mi.+ 22  Ke ini ntịn̄de ikọ mi mma mmọ ifiakke isioro uyo, Ikọ mi oyonyụn̄ ọtọi mmọ ke idem.+ 23  Mmọ ẹnyụn̄ ẹbet mi nte ẹbetde edịm,+ Ẹnyụn̄ ẹn̄wan̄ade inua mmọ ẹyom edịm ini utọ.+ 24  Ami nsak imam ye mmọ—mmọ inịmke ke akpanikọ— Mmọ inyụn̄ inịmeke un̄wana ke iso+ mi. 25  Mmek usụn̄ nnọ mmọ, nnyụn̄ nsụhọde ntie nte etubom; Ami n̄konyụn̄ ntie nte edidem ke otu mme udịm esie,+ Nte owo eke ọdọn̄de mbon ntuan̄a esịt.+

Mme Ikọ Idakisọn̄