Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Jeremiah 7;1-34

7  Uyo emi okoto Jehovah esịm Jeremiah, ete:  “Da ke inuaotop ufọk Jehovah, nyụn̄ tan̄a ikọ emi do,+ nyụn̄ dọhọ ete, ‘Ẹkop uyo Jehovah, kpukpru mbufo mbon Judah, emi ẹbede ke mme inuaotop emi ẹdụk ẹdi ndinụhọ nnọ Jehovah.  Ntem ke Jehovah mme udịm, Abasi Israel, ọdọhọ ete: “Ẹnam mme usụn̄ mbufo ye mme edinam mbufo ẹfọn, ndien ami nyayak mbufo ẹdụn̄ ke ebiet emi.+  Ẹkûbuọt idem ke mme ikọ nsu,+ ẹdọhọde ẹte, ‘Temple Jehovah, temple Jehovah, temple Jehovah edi emi!’  Koro edieke mbufo ẹditịmde ẹnam mme usụn̄ mbufo ye mme edinam mbufo ẹfọn, edieke mbufo ẹditịmde ẹnam unenikpe odu ke ufọt owo ye nsan̄a esie,+  edieke mbufo mîdifịkke esenowo ye eyenakpa ye ebeakpa,+ mîdinyụn̄ iduọkke iyịp owo eke mîduehe ke ebiet emi,+ mînyụn̄ itieneke mme abasi efen ẹnyụn̄ ẹda afanikọn̄ ẹsọk idem mbufo,+  do, ami nyayak mbufo ẹdụn̄ ke ebiet emi, ke isọn̄ emi n̄kọnọde mme ete ete mbufo, ke nsinsi nsinsi.”’”+  “Sese mbufo ke ẹbuọt idem ke mme ikọ nsu—emi ididaha ufọn ndomokiet idi.+  Nte ẹmekeme ndiyịp inọ,+ n̄wot owo,+ nsịn efịbe,+ n̄n̄wọn̄ọ un̄wọn̄ọ ke nsu+ nnyụn̄ nnam nsụn̄ikan̄ uwa ọwọrọ ọdọk ọnọ Baal+ nnyụn̄ ntiene mme abasi en̄wen emi mbufo mîkọfiọkke,+ 10  ndien nte mbufo ẹkpedida ke iso mi ke ufọk emi ẹkotde ẹdian enyịn̄ mi,+ ẹnyụn̄ ẹdọhọ ẹte, ‘Ẹyenyan̄a nnyịn,’ kpa ye kpukpru mbubiam n̄kpọ emi mbufo ẹnamde? 11  Nte ufọk emi ẹkotde+ ẹdian enyịn̄ mi amakabade edi itie udịbe mbon n̄wo ke enyịn mbufo?+ Sese ami n̄ko mmokụt,” uyo Jehovah edi emi.+ 12  “‘Mmọdo, ke emi, ẹka ebiet mi emi okodude ke Shiloh,+ emi n̄kanamde enyịn̄ mi odu ke akpa,+ ẹnyụn̄ ẹkụt se n̄kanamde enye ke ntak idiọkn̄kpọ ikọt mi Israel.+ 13  Ntem ke ntak emi mbufo ẹkenamde kpukpru utom emi,’ uyo Jehovah edi emi, ‘ndien ami n̄ka iso ndọhọ mbufo, mbabak ndemede ndọhọ,+ edi mbufo ikopke,+ nnyụn̄ n̄ka iso n̄kot mbufo, edi mbufo iyereke,+ 14  ami nyanam n̄ko ye ufọk emi ẹkotde ẹdian enyịn̄ mi,+ emi mbufo ẹbuọtde idem,+ nnyụn̄ nnam ye ebiet emi n̄kọnọde mbufo ye mme ete ete mbufo, kpa nte n̄kanamde ye Shiloh.+ 15  Ndien nyemen mbufo ke iso mi nduọk,+ kpa nte n̄kọduọkde kpukpru nditọete mbufo, kpa ofụri nditọ Ephraim.’+ 16  “Ndien amaedi afo, kûbọn̄ akam ke ibuot mbon emi, kûmenede uyo useme, kûnyụn̄ ubọn̄ akam kûnyụn̄ ukpe mi ubọk ke ibuot mmọ,+ koro ndikpan̄ke utọn̄ nnọ fi.+ 17  Nte afo ukwe se mmọ ẹnamde ke mme obio Judah ye ke mme efak Jerusalem?+ 18  Nditọiren ke ẹtan̄ ifia, mme ete ke ẹnyụn̄ ẹbara ikan̄, ndien iban ke ẹbuen ndomuyo man ẹnam uyo uwa ẹnọ ‘ọbọn̄ an̄wan ikpaenyọn̄’;+ mmọ ẹnyụn̄ ẹn̄wan̄a edin̄wọn̄ uwa+ ẹduọk ẹnọ mme abasi en̄wen man ẹyat mi esịt.+ 19  ‘Nte ami ke mmọ ẹnam esịt ayat?’ uyo Jehovah edi emi.+ ‘Nte idịghe idemmọ, man bụt ofụk mmọ iso?’+ 20  Mmọdo ntem ke Jehovah Akakan Ọbọn̄ Andikara ọdọhọ ete, ‘Sese! Ẹmọn̄ ẹn̄wan̄a iyatesịt mi ye ifụtesịt mi ẹfụk ebiet emi,+ ẹfụk owo ye ufene, ẹnyụn̄ ẹn̄wan̄a ẹfụk eto in̄wan̄+ ye mbun̄wụm isọn̄; ndien enye ayasak, idinyụn̄ inịmeke.’+ 21  “Ntem ke Jehovah mme udịm, Abasi Israel, ọdọhọ ete, ‘Ẹmen ofụri edifọp uwa mbufo ẹdian ye mme uwa mbufo ẹnyụn̄ ẹta unam.+ 22  Koro n̄kọdọhọke mme ete ete mbufo, n̄konyụn̄ n̄wụkke mmọ mban̄a ofụri edifọp uwa ye uwa+ ke usen emi n̄kadade mmọ n̄wọrọ ke isọn̄ Egypt. 23  Edi mma nda ikọ emi n̄wụk mmọ nte: “Ẹkop uyo mi,+ ndien ami nyedi Abasi mbufo,+ mbufo ẹyenyụn̄ ẹdi ikọt mi; ndien mbufo ẹyesan̄a ke kpukpru usụn̄+ oro ndiwụkde mbufo, man ọkpọfọn ye mbufo.”’+ 24  Edi mmọ ikokopke, ikonyụn̄ ikpan̄ke utọn̄,+ edi ẹsan̄a ke uduak ye ke itụn idiọk esịt mmọ,+ anamde mmọ ẹfiak edem inyụn̄ ikaha iso,+ 25  toto ke usen emi mme ete ete mbufo ẹkewọn̄ọde ke isọn̄ Egypt tutu esịm mfịn emi;+ ndien ami ndọn̄ kpukpru mme asan̄autom mi, mme prọfet nnọ mbufo, mbabak ndemede ke usen ke usen ndọn̄ mmọ.+ 26  Edi mmọ ikokopke uyo mi, ikonyụn̄ ikpan̄ke utọn̄,+ edi ẹsọn̄ obotitọn̄.+ Mmọ ẹma ẹnam se idiọkde ẹkan mme ete ete mmọ!+ 27  “Ndien afo enyene nditịn̄ kpukpru ikọ emi nnọ mmọ,+ edi mmọ idikopke uyo fo; ndien afo oyokot mmọ, edi mmọ idiyereke fi.+ 28  Ndien afo enyene ndidọhọ mmọ ete, ‘Emi edi idụt emi mbio esie mîkopke uyo Jehovah Abasi esie,+ mînyụn̄ ibọhọ ntụnọ.+ Akpanikọ amatak, ẹmesịbe enye ẹfep ke inua mmọ.’+ 29  “Kporo n̄kpọidet fo duọk,+ nyụn̄ kwọ ikwọ mfụhọ+ ke mme enyọn̄ obot, koro Jehovah emesịn+ oyonyụn̄ ọkpọn̄ emana emi enye ayatde esịt aban̄a.+ 30  ‘Koro nditọ Judah ẹmenam se idiọkde ke enyịn mi,’ uyo Jehovah edi emi. ‘Mmọ ẹmenịm mme mbubiam n̄kpọ mmọ ke ufọk emi ẹkotde ẹdian enyịn̄ mi, man ẹsabade enye.+ 31  Ndien mmọ ẹmebọp mme edikon̄ ebiet Topheth,+ emi ẹdude ke itịghede eyen Hinnom,+ man ẹfọp nditọiren mmọ ye nditọiban mmọ ke ikan̄,+ kpa n̄kpọ oro mmen̄kowụkke mmọ mîkonyụn̄ idụkke mi esịt.’+ 32  “‘Mmọdo, sese! mme usen ke ẹdi,’ uyo Jehovah edi emi, ‘emi owo mîdidọhọke aba ite ke enye edi Topheth ye itịghede eyen Hinnom, edi edi itịghede uwot owo;+ ndien mmọ ẹyebụk owo ke Topheth tutu itie idụhe aba.+ 33  Ndien okpo mbon emi ẹyekabade ẹdi udia mme edibotn̄kpọ emi ẹfede ke enyọn̄ ye mme unam ikọt, ndien ididụhe owo eke edinamde mmọ ẹdịghe.+ 34  Ndien nyanam uyom akwa inemesịt ye uyom idara ye uyo ebendọ ye uyo n̄wanndọ ẹdop ke mme obio Judah ye ke mme efak Jerusalem;+ koro isọn̄ ayakabade edi n̄wụre ebiet.’”+

Mme Ikọ Idakisọn̄