Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Jeremiah 46;1-28

46  Uyo Jehovah emi ekesịm prọfet Jeremiah aban̄a mme idụt:+  Aban̄a Egypt,+ aban̄a udịmekọn̄ Pharaoh Necho edidem Egypt,+ emi okodude ke mben Akpa Euphrates ke Carchemish,+ enye emi Nebuchadrezzar edidem Babylon akakande ke ọyọhọ isua inan̄ emi Jehoiakim+ eyen Josiah, edidem Judah, akarade:  “Mbufo ẹtịm ekpri otuekọn̄ ye akwa otuekọn̄, ẹnyụn̄ ẹdi ekọn̄.+  O mbufo mme awat enan̄-mbakara, ẹtịm mme enan̄-mbakara ẹdọk, ẹyara ndụn ẹnyụn̄ ẹben̄e idem. Ẹtụk mme eduat ẹsem. Ẹmen kod ukwak+ ẹsịne.  “‘Ntak emi n̄kụtde mmọ ẹdịghede? Mmọ ke ẹfiak edem, ẹmenyụn̄ ẹnuak n̄kpọsọn̄ owo mmọ mbai mbai; mmọ ẹmenyụn̄ ẹfen̄e, inyụn̄ iwọn̄ọkede ise edem.+ Ndịk odu akan okụk,’+ uyo Jehovah edi emi.  ‘Yak owo eke ọsọpde itọk okûdomo ndifehe, yak ọkpọsọn̄ owo okonyụn̄ odomo ndifehe mbọhọ.+ Mmọ ẹmetuak ukot ẹduọn̄ọ+ ke edem edere+ ke mben Akpa Euphrates.’  “Anie edi emi ọdọkde edi nte Akpa Nile, nte akpa emi mmọn̄ esie otopde ọdọk?+  Egypt ọdọk edi nte Akpa Nile,+ nte akpa emi mmọn̄ esie otopde ọdọk.+ Enye onyụn̄ ọdọhọ ete, ‘Nyọdọk. Nyofụk isọn̄. Nyosobo obio ye mme andidụn̄ enye iwiwa.’+  O mbufo mme enan̄-mbakara ẹdọk ẹka; ẹnyụn̄ ẹwat idat idat, O mbufo mme chariot! Yak n̄kpọsọn̄ owo ẹwọrọ ẹka, Cush+ ye Put,+ emi ẹkamade otuekọn̄, ye Ludim,+ emi ẹkamade ẹnyụn̄ ẹdịghide utịgha. 10  “Ndien usen oro enyene Akakan Ọbọn̄ Andikara, kpa Jehovah mme udịm, usen usiene eke enye osiode mme asua esie usiene.+ Ndien akan̄kan̄ ayadia onyụn̄ oyụhọ onyụn̄ ọn̄wọn̄ iyịp mmọ oyụhọ, koro Akakan Ọbọn̄ Andikara,+ kpa Jehovah mme udịm, enyenede uwa+ ndiwa ke edem edere ke mben Akpa Euphrates.+ 11  “O eyenan̄wan* Egypt,+ dọk ka Gilead kada ndusụk balsam.+ Afo amanam usụn̄ usọbọ ẹwak ke ikpîkpu. Baba usọbọ kiet idụhe inọ fi.+ 12  Mme idụt ẹmekop esuene+ fo, mfiori fo omonyụn̄ ọyọhọ isọn̄.+ Koro mmọ ẹmetuak ukot ẹduọn̄ọ, ọkpọsọn̄ owo ọmọduọ ọkpọsọn̄ owo ke idem.+ Mmọ mbiba ẹmeduọn̄ọ ọtọkiet.” 13  Ikọ emi ke Jehovah eketịn̄ ọnọ prọfet Jeremiah aban̄a edidi Nebuchadrezzar edidem Babylon man edisobo isọn̄ Egypt:+ 14  “Mbufo ẹtịn̄ emi ke Egypt, ẹkwọrọ ke Migdol,+ ẹnyụn̄ ẹkwọrọ ke Noph+ ye ke Tahpanhes.+ Ẹdọhọ ẹte, ‘Da ke itie fo, tịm n̄kpọ n̄ko nọ idemfo,+ koro akan̄kan̄ ayadia akan fi okụk.+ 15  Ntak emi ẹkpọride ikọt fo emi ẹkopde odudu ẹfep?+ Mmọ isọn̄ọke ida, koro Jehovah onụkde mmọ ọduọk.+ 16  Ediwak mmọ ẹmetuak ukot. Mmọ ẹmeduọn̄ọ n̄ko. Ndien mmọ ẹdọhọ kiet eken ẹte: “Daha ke enyọn̄, yak ifiak inyọn̄ ibịne ikọt nnyịn inyụn̄ inyọn̄ isọn̄ mme iman nnyịn ke ntak akan̄kan̄ oro ofiomode.”’ 17  Mmọ ẹtan̄a do ẹte, ‘Pharaoh edidem Egypt anam ikpîkpu uyom.+ Enye amayak ini usọrọ ebe.’+ 18  “‘Ma uwem mi,’ uyo Edidem, emi enyịn̄ esie edide Jehovah mme udịm,+ edi emi, ‘enye oyodụk edi kpa nte Tabor+ ke otu mme obot ye nte Carmel+ ke mbeninyan̄. 19  O eyenan̄wan+ emi odụn̄de ke Egypt, nam sụk mbiomo ntan̄mfep+ nọ idemfo. Koro Noph+ ayakabade edi n̄kpọ n̄kpaidem, ẹyenyụn̄ ẹfọp enye ke ikan̄, man anana andidụn̄.+ 20  Egypt edi ata ediye abak enan̄. Ọ́bọ́n̄ oyoto edem edere edita enye.+ 21  N̄ko-n̄ko, mbonekọn̄ emi ẹdude ke esịt esie emi enye ekpede-kpe, ẹbiet nditọ enan̄ eke ẹnyenede isek.+ Edi mmọ n̄ko ẹmefiak edem;+ mmọ ẹmefen̄e ọtọkiet. Mmọ isọn̄ọke ida.+ Koro usen afanikọn̄ mmọ emesịm mmọ, kpa ini emi ẹwọn̄ọrede enyịn ẹse mmọ.’+ 22  “‘Uyo esie ebiet eke urụkikọt oro ọnyọnide aka;+ koro mme owo ẹyeka ye odudu, ndien mmọ ẹyekama mme ekụri ẹdụk ẹbịne enye, nte mmọ eke ẹkpen̄ede eto. 23  Mmọ ẹyekpen̄e akai esie,’+ uyo Jehovah edi emi, ‘koro owo mîkemeke ndibe ndụk. Koro mmọ ẹmewak ẹkan n̄kukun̄kpọyọriyọ,+ mmọ inyụn̄ inyeneke ibat. 24  Bụt ayanam eyenan̄wan+ Egypt. Ẹyeyak enye ẹsịn ke ubọk mbon edem edere.’+ 25  “Jehovah mme udịm, kpa Abasi Israel, ọdọhọ ete, ‘Sese ami mmọn̄ n̄wọn̄ọde enyịn mi nse Amon+ eke No+ ye Pharaoh ye Egypt ye mme abasi+ esie ye ndidem+ esie, ih, Pharaoh ye kpukpru mbon oro ẹbuọtde idem ye enye.’+ 26  “‘Ndien nyayak mmọ nsịn ke ubọk mbon oro ẹyomde ukpọn̄ mmọ ye ke ubọk Nebuchadrezzar edidem Babylon+ ye ke ubọk mme asan̄autom esie; ndien ama ekem ẹyedụn̄ ke enye kpa nte ke mme usen eset,’+ uyo Jehovah edi emi. 27  “‘Ndien amaedi afo, kûfehe ndịk, O Jacob asan̄autom mi, kûnyụn̄ udịghe, O Israel.+ Koro sese ami mmọn̄ nnyan̄a fi nsio ke anyan ebiet nnyụn̄ nnyan̄a nditọ fo nsio ke idụt oro ẹkedade mmọ ẹka ntan̄mfep.+ Ndien Jacob ayafiak ọnyọn̄ edi idinyụn̄ inyeneke baba afanikọn̄ kiet, oyonyụn̄ odu ke ifụre, ndien baba owo kiet idinamke enye edịghe.+ 28  Amaedi afo, kûfehe ndịk, O Jacob asan̄autom mi,’ uyo Jehovah edi emi, ‘koro ami ndude ye afo.+ Koro nyosobo kpukpru mme idụt oro n̄kasuande fi ndọn̄,+ edi ndisoboke fi.+ Kpa ye oro, ami nyotụnọ fi ke udomo oro odotde,+ ndinyụn̄ ntreke ndinọ fi ufen.’”+

Mme Ikọ Idakisọn̄

At. Ed., “eyenan̄wan emi mîfiọkke erenowo.”