Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Jeremiah 34;1-22

34  Uyo Jehovah emi ekesịm Jeremiah, ke ini Nebuchadrezzar edidem Babylon+ ye ofụri udịmekọn̄+ esie ye kpukpru mme obio ubọn̄ isọn̄, emi ubọk esie akakarade,+ ye kpukpru owo, ẹken̄wanade ye Jerusalem ye kpukpru mme obio esie,+ ete:  “Ntem ke Jehovah Abasi Israel ọdọhọ ete, ‘Ka kọdọhọ Zedekiah edidem Judah,+ ih, dọhọ enye ete: “Ntem ke Jehovah ọdọhọ ete, ‘Sese ami mmọn̄ nyak obio emi nsịn ke ubọk edidem Babylon,+ ndien enye enyene ndifọp enye ke ikan̄.+  Ndien afo udufeheke ubọhọ ubọk esie, koro owo mîditreke ndimụm fi nnyụn̄ nyak fi nsịn enye ke ubọk.+ Ndien enyịn fo oyokụt enyịn edidem Babylon,+ inua esie oyonyụn̄ etịn̄ ikọ ye inua fo, ndien afo eyedi Babylon.’  Nte ededi, O Zedekiah edidem Judah,+ kop uyo Jehovah, ‘Ntem ke Jehovah ọdọhọ aban̄a fi ete: “Afo udukpaha ke akan̄kan̄.  Afo edikpa ke emem;+ ndien kpa nte ẹkefọpde n̄kpọ ẹnọ mme ete fo, ndidem eset oro ẹkebemde fi iso ẹdu,+ kpa ntre ke mmọ ẹdifọp+ n̄kpọ ẹnọ fi, mmọ ẹyenyụn̄ ẹseme+ fi ẹte, ‘O etubom!’+ koro ‘ami ntịn̄ ikọ emi,’ uyo Jehovah edi emi.”’”’”  Ndien prọfet Jeremiah etịn̄ kpukpru ikọ+ emi ọnọ Zedekiah edidem Judah ke Jerusalem,  ke ini udịmekọn̄ edidem Babylon ẹken̄wanade ye Jerusalem ye kpukpru mme obio Judah oro ẹkeyakde ẹsụhọ,+ ye Lachish+ ye Azekah;+ koro mmọ, mme obio ibibene,+ ẹdi mbon oro ẹkesụhọde ke otu mme obio Judah.+  Uyo Jehovah emi ekesịm Jeremiah ke Edidem Zedekiah ama okokụre ndidiomi ediomi ye kpukpru owo oro ẹkedude ke Jerusalem man atan̄a uwọrọ-ufụn+ ọnọ mmọ,  man owo kiet kiet ayak ofụn eren esie, owo kiet kiet onyụn̄ ayak ofụn an̄wan esie, eren Hebrew ye n̄wan Hebrew,+ ọwọrọ ufụn, mbak edida mmọ nte ifịn, oro edi, eyen Jew, emi edide eyenete esie.+ 10  Ntre kpukpru mbọn̄+ ẹkop uyo oro, ọkọrọ ye kpukpru mbon oro ẹkedụkde ediomi ẹte owo kiet kiet ayak ofụn eren esie, owo kiet kiet onyụn̄ ayak ofụn an̄wan esie ọwọrọ ufụn, man ẹkûtọn̄ọ aba ntak ẹda mmọ nte ifịn, ndien mmọ ẹkop uyo oro ẹnyụn̄ ẹyak mmọ ẹnyọn̄ọ.+ 11  Ndien ke oro ama ekebe, mmọ ẹfiak edem+ ẹka ẹkeda ifịn iren ye ifịn iban oro mmọ ẹkeyakde ẹwọrọ ufụn ẹfiak ẹdi, mmọ ẹnyụn̄ ẹnam mmọ ẹkabade ẹdi ifịn iren ye ifịn iban.+ 12  Mmọdo uyo Jehovah oto Jehovah esịm Jeremiah, ete: 13  “Ntem ke Jehovah Abasi Israel ọdọhọ ete, ‘Ami mma ndiomi ediomi ye mme ete ete+ mbufo ke usen oro n̄kadade mmọ n̄wọrọ ke isọn̄ Egypt,+ nsio ke ufọk ufụn,+ nte: 14  “Ke utịt isua itiaba, mbufo owo kiet kiet ẹnyene ndisana eyenete mbufo nyak ọnyọn̄,+ eren Hebrew,+ emi ẹkenyamde ẹnọ fi,+ emi ama okonyụn̄ anam n̄kpọ ọnọ fi ke isua itiokiet; afo onyụn̄ enyene ndiyak enye ọwọrọ ufụn onyụn̄ etre ndidu ye afo.” Edi mme ete ete mbufo ikokopke uyo mi, ikonyụn̄ ikpan̄ke utọn̄.+ 15  Ndien mbufo ẹfiak edem mfịn emi ẹnyụn̄ ẹnam se inende ke enyịn mi ke mbufo owo kiet kiet nditan̄a uwọrọ-ufụn nnọ nsan̄a mbufo, mbufo ẹnyụn̄ ẹdiomi ediomi ke iso mi+ ke ufọk emi ẹkotde ẹdian enyịn̄ mi.+ 16  Ekem mbufo ẹfiak edem+ ẹnyụn̄ ẹsabade enyịn̄ mi,+ mbufo owo kiet kiet ẹnyụn̄ ẹfiak ẹkeda ofụn eren mbufo ye ofụn an̄wan mbufo, emi mbufo ẹkeyakde ẹwọrọ ufụn nte ukpọn̄ mmọ amade, mbufo ẹnyụn̄ ẹnam mmọ ẹkabade ẹdi ifịn iren ye ifịn iban mbufo.’+ 17  “Mmọdo ntem ke Jehovah ọdọhọ ete, ‘Mbufo ikopke uyo mi ke mbufo owo kiet kiet nditan̄a uwọrọ-ufụn+ nnọ eyenete mbufo ye nsan̄a mbufo. Sese ami mmọn̄ ntan̄a uwọrọ-ufụn nnọ mbufo,’+ uyo Jehovah edi emi, ‘ntan̄a nnọ akan̄kan̄+ ye idiọk udọn̄ọ+ ye akan̄,+ ndien ami nyanam mbufo ẹdi n̄kpọ nnyekidem ke kpukpru mme obio ubọn̄ isọn̄.+ 18  Ndien ami nyayak mbon oro ẹbiatde ediomi+ mi, sia mmọ mîkanamke ikọ ediomi oro mmọ ẹkediomide ke iso mi ye eyen enan̄ oro mmọ ẹkesịbede iba+ man mmọ ẹkpesan̄a ke ufọt mbak esie ẹbe;+ 19  oro edi, mbọn̄ Judah ye mbọn̄ Jerusalem,+ mme adaidaha ke okụre ye mme oku ye kpukpru mbio obio emi ẹkesan̄ade ke ufọt mbak eyen enan̄ ẹbe— 20  ih, ami nyayak mmọ nsịn ke ubọk mme asua mmọ ye ke ubọk mbon oro ẹyomde ukpọn̄ mmọ;+ ndien okpo mmọ ẹyekabade ẹdi udia ẹnọ mme edibotn̄kpọ emi ẹfede ke enyọn̄ ye mme unam ikọt ke isọn̄.+ 21  Ndien ami nyayak Zedekiah edidem Judah+ ye mbọn̄ esie nsịn ke ubọk mme asua mmọ ye ke ubọk mbon oro ẹyomde ukpọn̄ mmọ ye ke ubọk udịmekọn̄ edidem Babylon+ emi ẹfiakde edem ẹtre ndin̄wana ye mbufo.’+ 22  “‘Sese ami mmọn̄ n̄wụk,’ uyo Jehovah edi emi, ‘ndien ami nditreke ndida mmọ mfiak ndi obio emi,+ mmọ ẹyen̄wana ye enye ẹnyụn̄ ẹkan enye ẹnyụn̄ ẹfọp enye ke ikan̄;+ ndien nyanam mme obio Judah ẹdi ndon ẹnyụn̄ ẹnana andidụn̄.’”+

Mme Ikọ Idakisọn̄