Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Jeremiah 33;1-26

33   Ndien uyo Jehovah esịm Jeremiah ọyọhọ utịm ikaba, ke adan̄aemi ẹkesụk ẹkọbide enye ẹbaha ke Okụre Ufọk Ukpeme,+ ete:  “Ntem ke Jehovah Andinam+ isọn̄, Jehovah Andibot+ enye man ọsọn̄ọ owụk enye,+ emi Jehovah edide enyịn̄+ esie, ọdọhọ ete,  ‘Kot mi, ndien ami nyeyere fi+ nnyụn̄ nsọp nsian fi ikpọ n̄kpọ ye mme n̄kpọ oro ẹyan̄ade owo ifiọk oro afo mûfiọkke.’”+  “Koro ntem ke Jehovah Abasi Israel ọdọhọ aban̄a mme ufọk ke obio emi ye mme ufọk ndidem Judah oro ẹwụride ke ntak mme ibombom oro ẹkịbide ẹkanade ye ke ntak akan̄kan̄;+  onyụn̄ ọdọhọ aban̄a mbon oro ẹdide ndin̄wana ye mbon Chaldea nnyụn̄ nda mme okpo mbon oro n̄wotde ke iyatesịt mi ye ke ifụtesịt+ mi nyọhọ mme ebiet, ye ke ntak kpukpru mbon oro idiọkn̄kpọ mmọ anamde mi ndịp obio emi iso mi,+  ‘Sese ami mmọn̄ nnam enye afiak okop nsọn̄idem nnyụn̄ nnam idem ọsọn̄ enye;+ ndien ami nyanam udọn̄ọ okụre mmọ nnyụn̄ nyarade akpakịp emem ye akpanikọ nnọ mmọ.+  Ndien ami nyada mbon Judah ye mbon Israel oro ẹkemụmde nte mbuotekọn̄ mfiak nnyọn̄ ndi,+ nyonyụn̄ nsọn̄ọ mmọ idem kpa nte ekedide ke editọn̄ọ.+  Ndien ami nyanam mmọ ẹsana ẹbọhọ kpukpru ndudue mmọ emi mmọ ẹduede mi,+ nyonyụn̄ mfen kpukpru ndudue mmọ emi mmọ ẹduede mi, emi mmọ ẹnyụn̄ ẹnamde ẹbiat ibet mi.+  Ndien enye ayakabade edi enyịn̄ idara ọnọ mi,+ onyụn̄ edi itoro ye uyai ọnọ kpukpru mme idụt isọn̄ emi ẹdikopde kpukpru nti n̄kpọ oro ami nnamde nnọ mmọ.+ Ndien mmọ ẹyekop ndịk+ ẹnyụn̄ ẹnyek idem+ ke ntak kpukpru nti n̄kpọ ye ke ntak ofụri emem oro ami nnọde enye.’”+ 10  “Ntem ke Jehovah ọdọhọ ete, ‘Ke ebiet emi mbufo ẹdidọhọde ke edi ndon, owo ye ufene mînyụn̄ idụhe ke esịt, ke mme obio Judah ye ke mme efak Jerusalem oro ẹnade ndon,+ emi owo ye andidụn̄ ye ufene mîdụhe, ẹyetọn̄ọ ntak ẹkop+ 11  uyom akwa inemesịt ye uyom idara,+ ye uyo ebendọ ye uyo n̄wanndọ, ye uyo mbon oro ẹdọhọde ẹte: “Ẹtoro Jehovah mme udịm, koro Jehovah ọfọnde;+ koro ima-mfọnido esie odude ke nsinsi!”’+ “‘Mmọ ẹyeda uwa ekọm ẹdụk ẹdi ufọk Jehovah,+ koro ami nyada mbon oro ẹkemụmde ke isọn̄ emi nte mbuotekọn̄ mfiak ndi kpa nte ekedide ke editọn̄ọ,’+ Jehovah ọdọhọ.” 12  “Ntem ke Jehovah mme udịm ọdọhọ ete, ‘Ke ndon emi owo ye ufene+ mîdụhe ye ke kpukpru mme obio esie, in̄wan̄ mbiet ufene mme ekpemerọn̄ emi ẹnamde otuerọn̄ ẹsụhọde ẹna ọyọtọn̄ọ ntak odu.’+ 13  “‘Ke mme obio oro ẹdude ke ikpehe emi etiede obot obot, ke mme obio unaisọn̄+ ye ke mme obio edem usụk+ ye ke isọn̄ Benjamin+ ye ke n̄kann̄kụk Jerusalem+ ye ke mme obio Judah,+ otuerọn̄ ẹyetọn̄ọ ntak ẹsan̄a ke idak ubọk andibat mmọ ẹbe,’+ Jehovah ọdọhọ.” 14  “‘Sese! Mme usen ke ẹdi,’+ uyo Jehovah edi emi, ‘ndien ami nyanam eti ikọ oro n̄kọdọhọde+ mban̄a ufọk Israel+ ye ufọk Judah. 15  Ke mme usen oro ye ke ini oro ami nyanam edinen nsehe+ etịbe ọnọ David, ndien enye eyekpe unenikpe onyụn̄ anam edinen ido ke isọn̄.+ 16  Ke mme usen oro ẹyenyan̄a+ Judah, Jerusalem oyonyụn̄ odụn̄ ke ifụre.+ Ndien se ẹdikotde enye edi emi, Jehovah Edi Edinen Ido Nnyịn.’”+ 17  “Koro ntem ke Jehovah ọdọhọ ete, ‘Amaedi David, enye idinanake owo eke etiede ke ebekpo ufọk Israel.+ 18  Ndien amaedi mme oku, kpa nditọ Levi, mmọ idinanake owo ke iso mi eke awade ofụri edifọp uwa onyụn̄ ọfọpde uwa n̄kpasịp onyụn̄ awade uwa kpukpru ini.’”+ 19  Ndien uyo Jehovah esịm Jeremiah, ete: 20  “Ntem ke Jehovah ọdọhọ ete, ‘Edieke mbufo ẹdikemede ndibiat ediomi mi emi aban̄ade uwemeyo ye ediomi mi emi aban̄ade okoneyo, man uwemeyo ye okoneyo ẹkûdu ke ini mmọ,+ 21  kpasụk ntre ẹyekeme ndibiat ediomi mi oro n̄kodiomide ye David, asan̄autom mi,+ mbak enye edinyene eyeneren oro edikarade nte edidem ke ebekpo esie;+ n̄ko ye nditọ Levi, kpa mme oku, mme asan̄autom mi.+ 22  Kpa nte owo mîkemeke ndibat mme udịm enyọn̄, mînyụn̄ ikemeke ndidomo ntan inyan̄,+ kpasụk ntre ke ami ndinam mfri David asan̄autom mi ye nditọ Levi emi ẹnamde n̄kpọ ẹnọ mi ẹwak.’”+ 23  Ndien uyo Jehovah esịm Jeremiah, ete: 24  “Nte afo ukwe se ndusụk mbon emi ẹdọhọde, ẹte, ‘Ubon iba emi Jehovah ekemekde,+ enye n̄ko eyesịn mmọ’? Ndien mmọ ẹnam n̄kpọ ye ikọt mi ke unana ukpono,+ inyụn̄ ibatke enye aba nte idụt. 25  “Ntem ke Jehovah ọdọhọ ete, ‘Mîkpedịghe emi n̄kenịmde ediomi mi emi aban̄ade uwemeyo ye okoneyo,+ mme ewụhọ enyọn̄ ye isọn̄,+ 26  ami n̄ko n̄kpesịn mfri Jacob ye eke David asan̄autom mi,+ n̄kponyụn̄ nsioho mme andikara nto mfri esie nte ẹkara mfri Abraham, ye Isaac ye Jacob. Koro nyatan̄ ikọt mmọ oro ẹkemụmde nte mbuotekọn̄+ mbon ọtọkiet nyonyụn̄ ntua mmọ mbọm.’”+

Mme Ikọ Idakisọn̄