Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Jeremiah 30;1-24

30  Uyo emi okoto Jehovah esịm Jeremiah, ete:  “Ntem ke Jehovah Abasi Israel ọdọhọ ete, ‘Da n̄wed wet kpukpru ikọ oro ndidọhọde fi nịm nọ idemfo.+  Koro, “sese! mme usen ke ẹdi,” uyo Jehovah edi emi, “ndien ami nyatan̄ mbon oro ẹkemụmde nte mbuotekọn̄ ke otu ikọt mi, Israel ye Judah,+ mbon ọtọkiet,” Jehovah ọdọhọ, “ami nyonyụn̄ nda mmọ mfiak ndi isọn̄ oro n̄kọnọde mme ete ete mmọ, ndien mmọ ẹyefiak ẹda enye ẹnyene.”’”+  Ndien mmọ emi ẹdi ikọ oro Jehovah etịn̄de ye Israel ye Judah.  Koro ntem ke Jehovah ọdọhọ ete: “Nnyịn imokop uyom nnyekidem ye ndịk,+ ndien emem ndomokiet idụhe.  Mbọk, mbufo ẹbụp, ẹnyụn̄ ẹse m̀mê erenowo ke aman eyen. Ntak emi ami n̄kụtde kpukpru irenowo ẹberide ubọk ke isịn mmọ nte n̄wan oro oyomde ndiman eyen,+ kpukpru iso ẹnyụn̄ ẹkpai?+  Mbọm! Koro usen oro edi akwa usen,+ usen efen eke ebietde enye idụhe,+ enye onyụn̄ edi ini nnanenyịn ọnọ Jacob.+ Edi ẹyenyan̄a enye ẹsio ke esịt.”  “Ndien ama ekem ke usen oro,” uyo Jehovah mme udịm edi emi, “ami nyobụn̄ ọkpọnọ owo mfep ke itọn̄ fo, nyonyụn̄ n̄kịbi n̄kpọkọbi fo,+ ndien isenowo idisịnke enye aba ke ufụn.  Ndien mmọ ẹyenam n̄kpọ ẹnọ Jehovah Abasi mmọ ye David edidem mmọ,+ emi ndinamde adaha ada ọnọ mmọ.”+ 10  “Ndien amaedi afo, O Jacob asan̄autom mi, kûfehe ndịk,” uyo Jehovah edi emi, “kûnyụn̄ udịghe, O Israel.+ Koro sese ami mmọn̄ nnyan̄a fi nsio ke anyan ebiet nnyụn̄ nnyan̄a nditọ fo nsion̄o ke idụt oro ẹkedade mmọ ẹka ntan̄mfep.+ Ndien Jacob ayafiak ọnyọn̄ edi onyụn̄ ọbọhọ afanikọn̄ onyụn̄ odu ke ifụre, ndien ididụhe owo eke edinamde enye edịghe.”+ 11  “Koro ami ndude ye afo, ndinyan̄a fi,”+ uyo Jehovah edi emi; “edi ami nyosobo kpukpru mme idụt oro n̄kasuande fi ndọn̄.+ Edi ami ndisoboke fi.+ Ami nyonyụn̄ nnen̄ede fi ke udomo oro odotde, nditreke ndinọ fi ufen.”+ 12  Koro ntem ke Jehovah ọdọhọ ete: “Usọbọ idụhe inọ unan fo.+ Nde unan fo ebịghi ndikpa.+ 13  Idụhe owo eke ekpede ikpe fo, kaban̄a inia fo.+ Usụn̄ baba kiet idụhe ndisọbọ fi nnyụn̄ n̄kọk fi.+ 14  Kpukpru mbon oro ẹnen̄erede ẹma fi ẹmefre fi.+ Mmọ iyomke fi. Koro mmọnọ fi unan nte asua ọkpọnọde,+ nnyụn̄ nnọ fi ufen nte owo ibak ọkpọnọde,+ ke ntak akpakịp ndudue fo;+ mme idiọkn̄kpọ fo ẹmekabade ẹwak.+ 15  Nso inam afo ofioride n̄kpo ke ntak unan fo?+ Ubiak fo ikemeke ndikụre ke ntak akpakịp ndudue fo; mme idiọkn̄kpọ fo ẹmewak.+ Ami nnam fi mme n̄kpọ emi. 16  Mmọdo ẹyeta kpukpru mmọ eke ẹtade fi;+ ndien amaedi mme asua fo, kpukpru mmọ ẹyeka ntan̄mfep.+ Ndien ẹyebụme mbon oro ẹbụmede fi, nnyụn̄ nnam ẹwo kpukpru mbon oro ẹwode fi.”+ 17  “Koro nyanam fi afiak okop nsọn̄idem, nnyụn̄ n̄kọk unan fo,”+ uyo Jehovah edi emi. “Koro mmọ ẹkot fi n̄wan oro ẹbịnde ẹfep:+ ‘Oro edi Zion, emi baba owo kiet mîyomke.’”+ 18  Ntem ke Jehovah ọdọhọ ete: “Sese ami mmọn̄ ntan̄ mbon tent Jacob oro ẹkemụmde nte mbuotekọn̄ mbon ọtọkiet,+ nyonyụn̄ ntua mme ebietidụn̄ esie mbọm. Ndien ẹyefiak ẹbọp obio ke ibombom esie;+ tọwa ufọkidụn̄ oyonyụn̄ odu ke nnennen itie esie.+ 19  Ndien ekọm ye uyom mbon oro ẹsakde imam ẹyewọrọ ke otu mmọ.+ Ndien ami nyanam mmọ ẹwak, mmọ idinyụn̄ ikprike ke ibat;+ ami nyonyụn̄ nnam mmọ ẹwak ke ibat, ndien mmọ idikabakede idi mme usụhọde owo.+ 20  Ndien nditọ esie ẹyekabade ẹtie nte ẹketiede ke eset, ẹyenyụn̄ ẹsọn̄ọ ẹwụk esop esie ke iso mi.+ Ndien ami nyọwọn̄ọde enyịn mi nse kpukpru mbon oro ẹfịkde enye.+ 21  Ndien ikpọ owo esie ẹdito enye,+ andikara esie edinyụn̄ oto ke ufọt esie ọwọrọ;+ ndien ami nyanam enye asan̄a ekpere, enye oyonyụn̄ asan̄a ekpere mi.”+ “Koro anie, ndien, edi enye emi emende esịt esie enịm ubiọn̄ man asan̄a ekpere mi?”+ uyo Jehovah edi emi. 22  “Ndien mbufo ẹyedi ikọt mi,+ ami nyonyụn̄ ndi Abasi mbufo.”+ 23  Sese! Ọkpọsọn̄ ofụm Jehovah, kpa ifụtesịt, ọmọwọrọ aka, ọkpọsọn̄ oyobio oro ọkpọride n̄kpọ ebe.+ Enye oyoyụt ke ibuot mme idiọkowo.+ 24  Ikan̄-ikan̄ iyatesịt Jehovah idifiakke edem tutu enye osobo ama, tutu enye onyụn̄ anam mme ekikere esịt esie ama.+ Ke mme akpatre usen mbufo ẹyekere ẹban̄a n̄kpọ emi.+

Mme Ikọ Idakisọn̄