Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Jeremiah 28;1-17

28  Edikem ke isua oro, ke ntọn̄ọ ubọn̄ Zedekiah+ edidem Judah, ke ọyọhọ isua inan̄, ke ọyọhọ ọfiọn̄ ition, Hananiah+ eyen Azzur, prọfet emi otode Gibeon,+ ọdọhọ mi ke ufọk Jehovah ke iso mme oku ye ke iso kpukpru owo ete:  “Ntem ke Jehovah mme udịm, Abasi Israel, ọdọhọ ete, ‘Nyobụn̄ ọkpọnọ edidem Babylon.+  Ke ufan̄ isua iba efen, ami mmọn̄ nda kpukpru n̄kpoduoho ufọk Jehovah emi Nebuchadnezzar edidem Babylon+ akatan̄de ke ebiet emi man akpada mmọ aka Babylon, mfiak ndinịm ke ebiet emi.’”  “‘Ndien ami mmọn̄ nda Jeconiah+ eyen Jehoiakim,+ edidem Judah, ye kpukpru mbon ntan̄mfep Judah emi ẹkedide Babylon+ mfiak ndi ke ebiet emi,’ uyo Jehovah edi emi, ‘koro nyobụn̄ ọkpọnọ+ edidem Babylon.’”  Ndien prọfet Jeremiah ọdọhọ prọfet Hananiah ke iso mme oku ye ke iso kpukpru owo emi ẹdade ke ufọk Jehovah,+ ete;  ih, prọfet Jeremiah ọdọhọ ete: “Amen!+ Jehovah akpakam anam ntem! Jehovah akpakam anam ntịn̄nnịm ikọ fo emi afo etịn̄de osu ke enye ndida mme n̄kpoduoho ufọk Jehovah ye kpukpru mbon ntan̄mfep nto Babylon mfiak ndi ebiet emi!+  Nte ededi, mbọk, kop ikọ emi ami ntịn̄de ke utọn̄ fo ye ke utọn̄ kpukpru owo.+  Amaedi mme prọfet oro ẹkebemde mi iso ẹdu ẹkenyụn̄ ẹbemde fi iso ẹdu toto ke eyo oko,+ mmọ n̄ko ẹma ẹsitịn̄ ntịn̄nnịm ikọ ẹban̄a ediwak idụt ye ikpọ obio ubọn̄, ẹban̄a ekọn̄ ye afanikọn̄ ye idiọk udọn̄ọ.+  Amaedi prọfet oro etịn̄de ntịn̄nnịm ikọ aban̄a emem,+ ke ini ikọ prọfet oro osude, ẹyefiọk prọfet oro Jehovah ke akpanikọ okosiode ọdọn̄.”+ 10  Ntre prọfet Hananiah ọkọn̄ọde ọkpọnọ oro ke itọn̄ prọfet Jeremiah onyụn̄ obụn̄ enye.+ 11  Ndien Hananiah+ ọdọhọ ke iso kpukpru owo ete: “Ntem ke Jehovah ọdọhọ ete,+ ‘Kpa ntem ke ami ndibụn̄ ọkpọnọ Nebuchadnezzar edidem Babylon ke itọn̄ kpukpru mme idụt ke ufan̄ isua iba efen.’”+ Ndien prọfet Jeremiah adaha ọnyọn̄ esiemmọ.+ 12  Ekem uyo Jehovah esịm Jeremiah,+ ke prọfet Hananiah ama okobụn̄ ọkpọnọ oro efep ke itọn̄ prọfet Jeremiah, ete: 13  “Ka kọdọhọ Hananiah ete, ‘Ntem ke Jehovah ọdọhọ ete: “Afo omobụn̄ mme ọkpọnọ eto,+ ndien afo enyene ndinam mme ọkpọnọ ukwak ke itie mmọ.”+ 14  Koro ntem ke Jehovah mme udịm, Abasi Israel, ọdọhọ ete: “Nyọkọn̄ọ kpukpru mme idụt emi ọkpọnọ ukwak ke itọn̄, man ẹnam n̄kpọ ẹnọ Nebuchadnezzar edidem Babylon;+ ndien mmọ ẹyenam n̄kpọ ẹnọ enye.+ Nyonyụn̄ nnọ enye mme unam ikọt.”’”+ 15  Ndien prọfet Jeremiah ọdọhọ prọfet Hananiah+ ete: “O Hananiah, mbọk, kpan̄ utọn̄! Jehovah idọn̄ke fi, edi afo amanam mbon emi ẹbuọt idem ke nsu.+ 16  Mmọdo ntem ke Jehovah ọdọhọ ete, ‘Sese! Ami mmọn̄ mmen fi mfep ke iso isọn̄. Isua emi afo ayakpa,+ koro afo etịn̄de ata ikọ nsọn̄ibuot ye Jehovah.’”+ 17  Ntre prọfet Hananiah akpa ke isua oro, ke ọyọhọ ọfiọn̄ itiaba.+

Mme Ikọ Idakisọn̄