Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Jeremiah 25;1-38

25  Uyo emi ekesịm Jeremiah aban̄a kpukpru mbon Judah ke ọyọhọ isua inan̄ emi Jehoiakim+ eyen Josiah, edidem Judah, akarade, oro edi, ke akpa isua Nebuchadrezzar edidem Babylon;  emi prọfet Jeremiah ọkọdọhọde aban̄a kpukpru mbon Judah ye kpukpru mme andidụn̄ Jerusalem, ete:  “Ọtọn̄ọde ke ọyọhọ isua duopeta emi Josiah+ eyen Amon, edidem Judah, akarade, tutu esịm mfịn emi, isua edịp ye ita emi, uyo Jehovah emesịm mi, ndien n̄ka iso ntịn̄ nnọ mbufo, mbabak ndemede ntịn̄, edi mbufo ikopke.+  Ndien Jehovah ọdọn̄ kpukpru mme asan̄autom esie, mme prọfet, ẹbịne mbufo, ababak edemede onyụn̄ ọdọn̄ mmọ, edi mbufo ikopke+ inyụn̄ ikpan̄ke utọn̄,+  mmọ ẹdọhọ ẹte, ‘Mbọk, yak owo kiet kiet afiak edem ọkpọn̄ idiọk usụn̄ esie, mbufo ẹnyụn̄ ẹkpọn̄ ndiọi edinam mbufo,+ ẹnyụn̄ ẹdụn̄ ke isọn̄ emi Jehovah ọkọnọde mbufo ye mme ete ete mbufo toto ke eyo oko tutu esịm anyan ini emi edide.+  Mbufo ẹkûnyụn̄ ẹtiene mme abasi efen ẹte inam n̄kpọ mmọ inyụn̄ inụhọ inọ mmọ, mbak ẹdida utom ubọk mbufo ẹyat mi esịt, mbak ndida afanikọn̄ ntiene mbufo.’+  “‘Edi mbufo ikokopke uyo mi,’ uyo Jehovah edi emi, ‘man mbufo ẹkpeda utom ubọk mbufo ẹyat mi esịt ẹnyụn̄ ẹda afanikọn̄ ẹsọk idem mbufo.’+  “Mmọdo ntem ke Jehovah mme udịm ọdọhọ ete, ‘“Ke ntak emi mbufo mîkopke uyo mi,  sese ami mmọn̄ ndọn̄ utom nyonyụn̄ nda kpukpru ubon edem edere ndi,”+ uyo Jehovah edi emi, “nyonyụn̄ ndọn̄ utom nnọ Nebuchadrezzar edidem Babylon, asan̄autom mi,+ ndien ami nyada mmọ ndi ẹdin̄wana ye isọn̄+ emi ye mme andidụn̄ ke esịt ye kpukpru mme idụt emi ẹdude ẹkan ẹkụk;+ ndien ami nyayak mmọ nnọ nsobo nnyụn̄ nnam mmọ ẹdi n̄kpọ n̄kpaidem ye n̄kpọ emi ẹfride inụk+ ẹban̄a ye n̄wụre ebiet ke nsinsi.+ 10  Ndien ami nyabiat uyom inemesịt ye uyom idara ke esịt mmọ,+ ye uyo ebendọ ye uyo n̄wanndọ,+ uyom itiat ukọkn̄kpọ+ ye un̄wana utuenikan̄.+ 11  Ndien ofụri isọn̄ emi ayakabade edi n̄wụre ebiet, kpa n̄kpọ n̄kpaidem, ndien mme idụt emi ẹnyene ndinam n̄kpọ edidem Babylon ke isua ata ye duop.”’+ 12  “‘Ndien ama ekem ke isua ata ye duop ẹkụrede+ ami nyokot edidem Babylon ye idụt oro ẹdinam ibat,’+ uyo Jehovah edi emi, ‘ẹban̄a ndudue mmọ, nyonyụn̄ n̄kot isọn̄ mbon Chaldea edinam ibat,+ ndien nyanam enye akabade edi ndon ke nsinsi.+ 13  Ndien nyanam kpukpru ikọ mi emi n̄kọdọhọde mban̄a idụt oro ẹsu, kpa kpukpru se ẹwetde ke n̄wed emi, oro Jeremiah etịn̄de ntịn̄nnịm ikọ nte editịbede ọnọ kpukpru mme idụt.+ 14  Koro mmọ, ediwak idụt ye ikpọ ndidem,+ ẹmesịn mmọ ke ufụn;+ ndien ami nyosio mmọ usiene nte ekemde ye edinam mmọ ye utom ubọk mmọ.’”+ 15  Koro ntem ke Jehovah Abasi Israel ọdọhọ mi ete: “Bọ mi cup wine ifụtesịt emi ke ubọk mi, nyụn̄ nam kpukpru mme idụt emi ami ndidọn̄de fi nnọ ẹn̄wọn̄ enye.+ 16  Ndien mmọ ẹnyene ndin̄wọn̄ nnyụn̄ nten̄ nnyụn̄ nnam n̄kpọ nte idat ke ntak akan̄kan̄ oro ami ndọn̄de nnọ mmọ.”+ 17  Ndien ami mbọ cup oro ke ubọk Jehovah nnyụn̄ nnam kpukpru mme idụt emi Jehovah ọkọdọn̄de mi ọnọ ẹn̄wọn̄:+ 18  oro edi, Jerusalem ye mme obio Judah ye ndidem esie ye mbọn̄ esie, man anam mmọ ẹdi n̄wụre ebiet, ye n̄kpọ n̄kpaidem,+ n̄kpọ oro ẹfride inụk ẹban̄a ye n̄kpọ isụn̄i, kpa nte edide mfịn emi;+ 19  Pharaoh edidem Egypt ye mme asan̄autom esie ye mbọn̄ esie ye kpukpru ikọt esie;+ 20  ye kpukpru mbuaha udịmowo, ye kpukpru ndidem isọn̄ Uz,+ ye kpukpru ndidem isọn̄ Philistia+ ye Ashkelon+ ye Gaza+ ye Ekron+ ye nsụhọ Ashdod;+ 21  Edom+ ye Moab+ ye nditọ Ammon;+ 22  ye kpukpru ndidem Tyre+ ye kpukpru ndidem Sidon+ ye ndidem isuo emi ẹdude ke edem inyan̄; 23  ye Dedan+ ye Tema+ ye Buz ye kpukpru mbon oro ẹfatde idet etak mban̄;+ 24  ye kpukpru ndidem mbon Arab+ ye kpukpru ndidem mbuaha udịmowo emi ẹdụn̄de ke wilderness; 25  ye kpukpru ndidem Zimri ye kpukpru ndidem Elam+ ye kpukpru ndidem nditọ Media;+ 26  ye kpukpru ndidem edem edere oro ẹdude ẹkpere ye mbon oro ẹdude ẹyom usụn̄, ke adiana ke adiana, ye kpukpru mme obio ubọn̄ eken ke isọn̄ emi ẹdude ke iso isọn̄; ndien edidem Sheshach+ eyetiene mmọ ọn̄wọn̄. 27  “Afo nyụn̄ dọhọ mmọ ete, ‘Ntem ke Jehovah mme udịm, Abasi Israel, ọdọhọ ete: “Ẹn̄wọn̄ ẹnyụn̄ ẹkpa mmịn ẹnyụn̄ ẹkpọhi ẹnyụn̄ ẹduọn̄ọ tutu mbufo ikemeke ndidaha aba nda+ ke ntak akan̄kan̄ oro ndọn̄de nnọ mbufo.”’+ 28  Ndien ama ekem edieke mmọ ẹsịnde ndibọ fi cup emi ke ubọk n̄n̄wọn̄, afo enyene ndidọhọ mmọ ete, ‘Ntem ke Jehovah mme udịm ọdọhọ ete: “Mbufo iditreke ndin̄wọn̄.+ 29  Koro, sese! obio emi ẹkotde ẹdian enyịn̄ mi ke ami ntọn̄ọ ndida afanikọn̄ ntiene,+ ndien nte mbufo ẹyebọhọ ufen ke usụn̄ ekededi?”’+ “‘Mbufo idibọhọke ufen, koro odu akan̄kan̄ oro ami n̄kotde nte edin̄wana ye kpukpru mme andidụn̄ isọn̄,’ uyo Jehovah mme udịm edi emi. 30  “Ndien amaedi afo, afo eyetịn̄ kpukpru ikọ ntịn̄nnịm ikọ emi ọnọ mmọ, onyụn̄ ọdọhọ mmọ ete, ‘Jehovah eyetie ke enyọn̄ okụni,+ enye oyonyụn̄ etie ke edisana ebietidụn̄ esie osioro uyo.+ Enye iditreke nditie ke ebietidụn̄ esie n̄kụni. Enye oyofiori aban̄a kpukpru mme andidụn̄ isọn̄ nte mfiori mbon oro ẹdịghide obube unyịmi wine.’+ 31  “‘Uyom ọyọwọrọ nnennen nnennen ekesịm ata nsannsan ikpehe isọn̄, koro Jehovah emenyene utọk ye mme idụt.+ Enye ayada ke ikpe ye kpukpru obụkidem.+ Amaedi mme idiọkowo, enye ayayak mmọ ọnọ akan̄kan̄,’+ uyo Jehovah edi emi. 32  “Ntem ke Jehovah mme udịm ọdọhọ ete, ‘Sese! Afanikọn̄ ke oto ke idụt kiet esịm idụt eken,+ ẹyenyụn̄ ẹdemede ọkpọsọn̄ oyobio ke ata nsannsan ikpehe isọn̄.+ 33  Ndien mmọ eke Jehovah ediwotde ke usen oro ẹyetọn̄ọ ke utịt isọn̄ kiet ẹna ẹsịm utịt isọn̄ eken.+ Owo idituaha mmọ idinyụn̄ itan̄ke mmọ idinyụn̄ ibụkke mmọ.+ Mmọ ẹyekabade ẹtie nte ifụm ke iso isọn̄.’+ 34  “Mbufo mme ekpemerọn̄ ẹtuan̄a, ẹnyụn̄ ẹsio n̄kpo!+ Ẹmian̄a,+ mbufo ikpọ owo ke otu mme erọn̄,+ koro mme usen eke ẹdiwotde mbufo ẹnyụn̄ ẹsuan mbufo ẹmekem,+ ndien mbufo ẹyeduọn̄ọ nte n̄kpọuto!+ 35  Ndien ebiet idụhe inọ mme ekpemerọn̄ ndifehe n̄ka, usụn̄ ubọhọ inyụn̄ idụhe inọ ikpọ owo ke otu mme erọn̄.+ 36  Ẹkop! Mfiori mme ekpemerọn̄, ye ntuan̄a ikpọ owo ke otu mme erọn̄, koro Jehovah omosobo mbiet mmọ. 37  Ndien ẹmenam mme ebietidụn̄ oro ẹtiede emem emem ẹnana uwem ke ntak ikan̄-ikan̄ iyatesịt Jehovah.+ 38  Enye ọmọkpọn̄ ebiet udịbe esie kpa nte abak ayara ekpe,+ koro isọn̄ mmọ amakabade edi n̄kpọ n̄kpaidem ke ntak akan̄kan̄ emi ofiomode ye ke ntak ikan̄-ikan̄ iyatesịt esie.”+

Mme Ikọ Idakisọn̄