Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Jeremiah 18;1-23

18  Ikọ emi okoto Jehovah esịm Jeremiah ete:  “Daha ke enyọn̄, nyụn̄ sụhọde ka ufọk oboteso,+ ndien nyanam fi okop ikọ mi do.”  Ndien ami nsụhọde n̄ka ufọk oboteso, ndien do enye ke anam utom ke mme wheel oboteso.  Ndien eso oro oboteso akadade mbateso anam abiara enye ke ubọk, ndien enye akabade ada enye anam eso efen, kpa nte enende oboteso ke enyịn ndinam.+  Ndien uyo Jehovah esịm mi, ete:  “‘Nte ami n̄kemeke ndinam ye mbufo, O ufọk Israel, kpa nte oboteso emi anamde?’ uyo Jehovah edi emi. ‘Sese! Kpa nte mbateso ke ubọk oboteso, kpa ntre ke mbufo ẹdi ke ubọk mi, O ufọk Israel.+  Ini ekededi oro ntịn̄de mban̄a idụt ye obio ubọn̄ nte ke nyedịbede enye nnyụn̄ n̄wụri enye nnyụn̄ nsobo enye,+  ndien idụt oro ọwọn̄ọde ọkpọn̄ idiọkn̄kpọ esie emi n̄ketịn̄de mban̄a,+ ami n̄ko nyokpụhọ ekikere* mban̄a afanikọn̄ oro n̄kekerede ndinam esịm enye.+  Edi ini ekededi oro nditịn̄de mban̄a idụt ye obio ubọn̄ nte ke nyọbọp enye nnyụn̄ n̄wụk enye,+ 10  ndien enye anam se idiọkde mi ke enyịn ke nditre ndikop uyo mi,+ ami n̄ko nyokpụhọ ekikere* ke eti n̄kpọ oro n̄kọdọhọde ke nyanam ke ufọn esie.’ 11  “Ndien ke emi mbọk, dọhọ mbon Judah ye mme andidụn̄ Jerusalem ete, ‘Ntem ke Jehovah ọdọhọ ete: “Sese ami mmọn̄ mbot afanikọn̄ mban̄a mbufo, nnyụn̄ n̄kere idiọk ekikere mban̄a mbufo.+ Mbọk, mbufo owo kiet kiet ẹwọn̄ọde ẹkpọn̄ ndiọi usụn̄ mbufo, ẹnyụn̄ ẹnam mme usụn̄ mbufo ye mme edinam mbufo ẹfọn.”’”+ 12  Ndien mmọ ẹdọhọ ẹte: “Idotenyịn idụhe!+ Koro nnyịn idisan̄a ke mme ekikere idem nnyịn, nnyịn owo kiet kiet idinyụn̄ inam n̄kpọ ke itụn idiọk esịt+ nnyịn.” 13  Mmọdo ntem ke Jehovah ọdọhọ ete: “Mbọk mbufo ẹbụp ke otu mme idụt. Anie okop mme n̄kpọ eke ẹtiede ntem? Odu oburobụt n̄kpọ oro eyenan̄wan* Israel anamde ebe ubọk.+ 14  Nte snow Lebanon ọyọkpọn̄ akwa itiat ke in̄wan̄? Mîdịghe nte esen mmọn̄ emi ebịtde onyụn̄ ewetde, ayasat? 15  Koro ikọt mi ẹmefre mi+ ke mmọ ndinam nsụn̄ikan̄ uwa ọwọrọ ọdọk ọnọ obukpo n̄kpọ,+ ye ke mmọ ndinam mme owo ẹtuak ukot ẹduọn̄ọ ke mme usụn̄ mmọ,+ kpa mme afan̄usụn̄ eset,+ man ẹsan̄a ke mme ọkpọusụn̄, kpa usụn̄ oro owo mîdiọn̄ke, 16  man ẹnam isọn̄ mmọ edi n̄kpọ n̄kpaidem,+ se ẹfride inụk ẹban̄a ke nsinsi.+ Owo ekededi oro asan̄ade ebe eyese enye ke n̄kpaidem onyụn̄ ofụn̄ ibuot.+ 17  Nyasuan mmọ ke iso asua nte ofụm edem usiahautịn.+ Nyakpa edem n̄wụt mmọ, n̄wụtke iso,+ ke usen afanikọn̄ mmọ.” 18  Ndien mmọ ẹdọhọ ẹte: “Mbufo ẹdi nnyịn ikere idiọk ekikere iban̄a Jeremiah,+ koro ibet iditakke ke ubọk oku,+ item iditakke ke ubọk owo ọniọn̄, ikọ idinyụn̄ itakke ke ubọk prọfet.+ Ẹdi nnyịn ida edeme+ imia enye, ẹyak nnyịn ikûkpan̄ utọn̄ ke ikọ esie ekededi.” 19  O Jehovah, kpan̄ utọn̄ nọ mi, nyụn̄ kop se mme andibiọn̄ọ mi ẹtịn̄de.+ 20  Nte ẹkpeda idiọk ẹsio usiene eti?+ Koro mmọ ẹmetịbi obube ẹnọ ukpọn̄+ mi. Ti nte ami ndade ke iso fo ntịn̄ eti n̄kpọ mban̄a mmọ, man n̄wọn̄ọde ifụtesịt fo n̄kpọn̄ mmọ.+ 21  Mmọdo, yak nditọiren mmọ nọ akan̄,+ nyụn̄ yak mmọ nọ odudu akan̄kan̄;+ iban mmọ ẹkpekam ẹkabade ẹdi iban emi ẹtabade nditọ, ẹnyụn̄ ẹdi mme ebeakpa.+ Iren mmọ ẹkpekam ẹkabade ẹdi mmọ emi udọn̄ọ n̄kpa owotde, n̄kparawa mmọ ẹkpenyụn̄ ẹdi mmọ emi ẹwotde ke akan̄kan̄ ke ekọn̄.+ 22  Yak ẹkop mfiori ke mme ufọk mmọ, ke ini afo adade mbon n̄wo etiene mmọ ke mbuari.+ Koro mmọ ẹmetịbi obube man ẹmụm mi, ẹnyụn̄ ẹdịp afia ẹnọ ukot mi.+ 23  Edi afo O Jehovah, emetịm ọfiọk kpukpru uduak mmọ emi mmọ ẹduakde ẹban̄a mi man ẹwot mi.+ Kûfụk ndudue mmọ, kûnyụn̄ usọhi idiọkn̄kpọ mmọ ufep ke iso fo; edi yak mmọ ẹkabade ẹdi mbon oro ẹnamde ẹtuak ukot ẹduọn̄ọ ke iso fo.+ Nam mmọ n̄kpọ ke ini iyatesịt fo.+

Mme Ikọ Idakisọn̄

At. Ed., “nyatua n̄kpọfiọk.”
At. Ed., “nyatua n̄kpọfiọk.”
At. Ed., “eyenan̄wan emi mîfiọkke erenowo.”