Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

Jeremiah 11;1-23

11  Uyo emi okoto Jehovah esịm Jeremiah, ete:  “Mbufo ẹkop mme ikọ ediomi emi! “Afo onyụn̄ enyene nditịn̄+ mmọ nnọ mbon Judah ye mme andidụn̄ Jerusalem,  nyụn̄ dọhọ mmọ ete, ‘Ntem ke Jehovah Abasi Israel ọdọhọ ete: “Ọdọdiọk ọnọ owo eke mîkopke mme ikọ ediomi emi,+  emi n̄kowụkde mme ete ete mbufo ke usen oro ami n̄kadade mmọ n̄wọrọ ke isọn̄ Egypt,+ nsio mmọ ke akwa ikan̄ utara ukwak,+ nnyụn̄ ndọhọ nte, ‘Mbufo ẹkop uyo mi, ẹnyụn̄ ẹnam n̄kpọ nte ekemde ye kpukpru se n̄kowụkde mbufo;+ ndien mbufo ẹyedi ikọt mi, ami nyonyụn̄ ndi Abasi mbufo,+  man nnam un̄wọn̄ọ oro n̄kọn̄wọn̄ọde nnọ mme ete ete mbufo,+ nte ke nyọnọ mmọ isọn̄ emi ọfiọrọde mmọn̄eba ye aranọkwọk,+ kpa nte edide mfịn emi.’”’” Ndien ami mbọrọ nnyụn̄ ndọhọ nte: “Amen, O Jehovah.”  Ndien Jehovah ọdọhọ mi ete: “Tan̄a kpukpru ikọ emi ke mme obio Judah ye ke mme efak Jerusalem,+ ete, ‘Mbufo ẹkop mme ikọ ediomi emi, ẹnyụn̄ ẹnam mmọ.+  Koro mma nsọn̄ọ nteme mme ete ete mbufo ke usen oro n̄kadade mmọ n̄wọrọ ke isọn̄ Egypt+ tutu esịm mfịn emi, mbabak ndemede nteme mmọ, nte: “Ẹkop uyo mi.”+  Edi mmọ ikokopke ikonyụn̄ ikpan̄ke utọn̄,+ edi mmọ ẹkesan̄a ke itụn idiọk esịt+ mmọ; ndien ami nda kpukpru ikọ ediomi emi n̄kowụkde mmọ nte ẹnam, edi emi mmọ mîkanamke, ntiene mmọ.’”  N̄ko-n̄ko, Jehovah ọdọhọ mi ete: “Ẹmekụt nte mbon Judah ye mme andidụn̄ Jerusalem ẹdụkde odu.+ 10  Mmọ ẹmefiak ẹbịne mme ndudue mme ete ete mmọ,+ mme akpa ete mmọ, emi ẹkesịnde ndikop mme ikọ mi, edi emi mmọ ẹtienede mme abasi efen man ẹnam n̄kpọ mmọ.+ Ufọk Israel ye ufọk Judah ẹmebiat ediomi mi oro n̄kanamde ye mme ete ete mmọ.+ 11  Mmọdo ntem ke Jehovah ọdọhọ ete, ‘Sese mmọn̄ nnam afanikọn̄+ oro mmọ mîdikemeke ndibọhọ esịm mmọ;+ ndien mmọ ẹyeseme ẹkot mi ẹyom un̄wam, edi ndiyereke mmọ.+ 12  Ndien mme obio Judah ye mme andidụn̄ Jerusalem ẹyeka ẹkeseme ẹnọ mme abasi emi mmọ ẹnamde nsụn̄ikan̄ uwa ọwọrọ ọdọk ọnọ mmọ,+ ẹyom un̄wam, edi emi mîdinyan̄ake mmọ ke baba usụn̄ kiet ke ini afanikọn̄ mmọ.+ 13  Koro mme abasi fo ẹmewak nte mme obio fo, O Judah;+ mbufo ẹmenyụn̄ ẹnịm mme itieuwa eke ẹwakde nte mme efak Jerusalem ẹnọ n̄kpọ bụt,+ kpa mme itieuwa ndinam nsụn̄ikan̄ uwa ọwọrọ ọdọk ọnọ Baal.’+ 14  “Ndien amaedi afo, kûbọn̄ akam ke ibuot mbon emi, kûnyụn̄ umenede uyo useme m̀mê ubọn̄ akam ke ibuot mbon emi,+ koro ndikpan̄ke utọn̄ ke ini mmọ ẹsemede ẹkot mi ẹban̄a afanikọn̄ mmọ.+ 15  “Nso mbubehe ke owo ima mi enyene ke ufọk mi,+ emi akpanamde ediwak mmọ ẹnam n̄kpọ emi,+ kpa idiọk ido emi?+ Nte mmọ ẹyeda edisana obụk unam ẹnam enye ebe ọkpọn̄ fi,+ ke ini afanikọn̄ fo edide? Nte afo ayadara ke ini oro?+ 16  ‘Eto olive eke esehede, emi mfri ye idem ẹyede,’ edi enyịn̄ emi Jehovah okotde fi.+ Ke uyo akwa n̄kụni ke enye ekịm enye ikan̄, mmọ ẹmenyụn̄ ẹbụn̄ mme n̄kọk esie.+ 17  “Ndien Jehovah mme udịm, Anditọ fi,+ ọdọhọ ke afanikọn̄ eyesịm fi ke ntak idiọkn̄kpọ ufọk Israel+ ye ufọk Judah oro mmọ ẹnamde man ẹyat mi esịt ke ndinam nsụn̄ikan̄ uwa ọwọrọ ọdọk ọnọ Baal.”+ 18  Ndien Jehovah amasian mi man n̄kpọfiọk. Ke ini oro afo ama anam mi n̄kụt mme edinam mmọ.+ 19  Ndien ami n̄ketie nte sụn̄sụn̄ ayara eyenerọn̄ emi ẹdade ẹka ndiwot,+ n̄konyụn̄ mfiọkke ke ami ke mmọ ẹkedụk odu ẹban̄a,+ ẹte: “Ẹyak nnyịn isobo eto ye mfri esie, ẹyak inyụn̄ isịbe enye ifep ke isọn̄ mme odu-uwem,+ man ẹkûti aba enyịn̄ esie.” 20  Edi Jehovah mme udịm ke ekpe ikpe ke edinen ido;+ enye ke odụn̄ọde mme ekpụt ye esịt.+ O ami n̄kpakam n̄kụt usiene emi afo osiode mmọ, koro edi afo ke nyarade ikpe mi nnọ.+ 21  Mmọdo ntem ke Jehovah ọdọhọ aban̄a mbon Anathoth+ emi ẹyomde ukpọn̄ fo, ete: “Kûtịn̄ ntịn̄nnịm ikọ ke enyịn̄ Jehovah,+ mbak afo udukpa ke ubọk nnyịn”; 22  mmọdo ntem ke Jehovah mme udịm ọdọhọ ete: “Sese ami mmọn̄ n̄wọn̄ọde enyịn nse mmọ. N̄kparawa ẹyekpan̄a ke akan̄kan̄.+ Nditọiren mmọ ye nditọiban mmọ ẹyekpan̄a ke akan̄.+ 23  Ndien nsụhọ baba kiet idisụhọke inọ mmọ, koro nyanam afanikọn̄ esịm mbon Anathoth,+ ke isua emi ndiwọn̄ọrede enyịn nse mmọ.”+

Mme Ikọ Idakisọn̄